20. Surah Taa-Haa

(رکوع نمبر 8) اسرارومعارف اور یہ لوگ بھی یقینا تباہ ہوچکے ہوتے مگر اللہ جل جلالہ کا وعدہ کہ اس نے موت اور حساب کتاب کا وقت مقرر فرما دیا ان کی مہلت کا سبب ہے ، اگر یہ وعدہ نہ ہوتا تو کافر ارتکاب کفر پر ہی فورا عذاب میں پکڑا جاتا لیکن ایسا نہیں ہے بلکہ ایک وقت تک انہیں مہلت دی گئی ہے اور تب تک یہ چونکہ پوری طرح صرف دنیا حاصل کرنے پر لگے ہیں اور بھی ایسے لوگوں کو دنیا کی دولت بہت دے دیتے ہیں جو مزید امتحان کا باعث بنتی ہے لہذا آپ ان کی کڑوی کسیلی باتوں پر صبر کیجیے اور ان کے مقابل اپنا وقت اللہ جل جلالہ کی یاد اور اس کی عبادت میں صرف کیجیے بیشتر مفسرین نے یہاں تسبیح سے صلوۃ مراد لیا ہے کہ آگے صلوۃ ہی کے اوقات کا ذکر بھی ہے چناچہ ارشاد ہے کہ سورج طلوع ہونے سے قبل دن کی ابتدا اللہ جل جلالہ کی عبادت سے کیجیے اور غروب آفتاب سے پہلے بھی دن میں بھی اور رات کے اوقات میں بھی غرض مسلسل اللہ جل جلالہ کی عبادت کیا کیجیے کہ دشمن کی ایذا سے بچنے کا سب سے محفوظ قلعہ اللہ جل جلالہ کی یاد ہے اور اس کی عبادت ہی صبر کی توفیق اور برداشت کی قوت عطا کرتی ہے ذکر الہی قرب الہی اور توفیق عبادت کے ساتھ دنیا کے کاموں میں بھی معیت باری کا سبب ہے لہذا مومن کبھی تنہا نہیں رہتا اور ہر حال میں اللہ جل جلالہ اس کے ساتھ اس کی مدد کے لیے موجود ہوتا ہے نیز کفار کی دولت مندی کا خیال نہ کیا جائے کہ یہ دولت ہی انہیں اللہ جل جلالہ سے دور رکھنے کا باعث بن گئی ہوئی ہے اور سب سے بہترین رزق وہ ہے جو اللہ جل جلالہ کی طرف سے عطا ہوتا ہے یعنی مومن اسلام کے حکم کے مطابق کام کرتا ہے تو اس کی مزدوری اور کام بھی عبادت شمار ہوتا ہے اور اسے کسب حلال پر جو بھی مل جائے اللہ جل جلالہ کی طرف سے ہے اور بہترین رزق ہے کہ نہ صرف دنیا میں اپنے ساتھ دل کا سکون بھی لاتا ہے بلکہ آخرت میں بھی اللہ جل جلالہ کی عنایات کا باعث ہے جو ہمیشہ رہنے والی ہیں اگر کافر دولت دنیا کے جمع کرنے میں عمرعزیز ضائع کر رہا ہے تو یہ بھی اس کے حق میں بہت بڑی مصیبت ہے اور مومن کو کسب حلال کے ساتھ اللہ کی عبادت میں اپنا وقت لگانے کی سعادت نصیب ہوتی ہے لہذا آپ اپنے گھر والوں کو بھی اللہ جل جلالہ کی عبادت کا حکم دیجئے اور خود بھی اس پر مضبوطی سے قائم رہیے یعنی ہر ایماندار کو چاہیے کہ خود بھی عبادت پر قائم رہے اور عبادت کا ایک ماحول بنائے اور اہل خانہ کو عبادت کا پابند کرے نہ یہ کہ خود بھی ان سے متاثر ہو کر کوتاہی کرنے لگے اس لیے کہ اللہ کریم بندے سے روزی پیدا کرنے کا نہیں کہتا بلکہ بندوں کو روزی دینا اس کا کام ہے کوئی بندہ رزق پیدا کرکے اسے نہیں دیتا وہ بندوں کو عطا کرتا ہے اور رزق دینا صرف جسم کی حیات کو قائم رکھنے کے لیے ہے جبکہ اصل دولت آخرت کی امارت و دولتمندی ہے جو تقوی یعنی اللہ جل جلالہ کی عبادت اس کی یاد اور اس کی اطاعت سے نصیب ہوتی ہے ۔ یہ تو ابھی تک کہتے ہیں کہ ہمیں کوئی دلیل اور مضبوط نشانی نہیں ملی کہ ایمان لائیں کیا جو خبر آپ ﷺ اور قرآن کے بارے تمام پہلی کتابوں میں بھی موجود تھی جب وہ پوری ہوگئی اور عین ان نشانیوں کے مطابق آپ ﷺ بھی اور قرآن بھی نازل ہوا یہ کم نشانی ہے ؟ اگر آپ ﷺ کی بعثت سے پہلے انہیں تباہ کردیا جاتا تو یہ ضرور کہتے کہ اللہ کریم ہمیں ہلاک کرنے سے پہلے آپ نے اپنا کوئی رسول کیوں نہ بھیجا کہ ہم اس کی اطاعت کرتے اور تیرے احکام کی پیروی کرکے اس ذلالت وتباہی سے بچ جاتے اور اب جب یہ دونوں نعمتیں موجود ہیں تو ان کا رویہ دیکھیں آپ فرما دیجیے کہ ہر کوئی جو کچھ بھی کرتا ہے اس کے نتیجے کا منتظر رہتا ہے لہذا تم بھی انتظار کرو ایک وقت آرہا ہے جو واضح کر دے گا کہ کون ہدایت کے راستے پر تھا اور کامیابی کس کو نصیب تھی یعنی اگر ایمان نہیں لاتے تو موت اور قیامت کا انتظار کریں فیصلہ سامنے آجائے گا یہی سب سے بڑی محرومی ہے جو غور فکر نہ کرنے اور ایمان نہ لانے کے باعث انہیں نصیب ہوئی کہ روز حشر حق و باطل کی خبر تو ضرور ہوجائے گی مگر حق قبول کرنے کا وقت گذر چکا ہوگا اور اس وقت کی سمجھ سوائے حسرت کے کچھ نہ دے گی اور کوئی فائدہ نہ پہنچا سکے گی ۔