12. Surah Yusuf

آیات 105 تا 111 اسرار ومعاف اگریہ لوگ نہیں مان رہیتو اس میں حیرت کی کوئی بات نہیں کہ ارض وسما میں بیشمار چیزیں اللہ کی عظمت پہ گواہی دے رہی ہیں اور زمین کا ذرہ ذرہ یا ہر ہر تنکا اور پھول پتہ اس کی عظمت کی دلیل ہے یا پھر پہلے لوگوں کی تباہ شدہ بستیوں کے کھنڈر بھی کفر اور گناہ کے انجام کی خبر دے رہے ہیں اور ان لوگوں کو شب وروز انہی اشیاء سے واسطہ بھی پڑتا ہے ۔ ایسی ہی جگہوں سے ان کا گزر بھی ہوتا ہے مگر اس بات کی طرف ان کا دھیان ہی نہیں جاتا بلکہ عقلا عاجز ہو کر اللہ کی ذات کا اقرار بھی کرتے ہیں تو ساتھ بہت سے اوصاف میں دوسروں کو شریک کرکے گرفتار بلاہوجاتے ہیں ۔ اور یہ تو ایسے بےفکر ہیں کہ اسی حال میں ان پر اللہ کا عذاب آجائے یا ان کی موت واقع ہوجائے یا قیامت بپا ہوجائے تب یہ ایمان لانے کی فکر کریں گے حالانکہ اس وقت ایمان لانا ہرگز مفید نہ ہوگا۔ اسلام عین عقل سلیم کے مطابق مذہب ہے اور انھیں فرمادیجئے کہ میراطریق کا ر اور راستہ یہی ہے کہ اللہ واحددلاشریک کی طرف دعوت دیتا ہوں اور دلامل عقلی دونوں کے ساتھ کہ نقل اور کتاب سے بھی یہ بات ثابت ہے اور عقل سلیم کے تقاضوں سے بھی ہم آہنگ اور میرے متبعین یا پیروکار بھی یہی کچھ کرتے ہیں یعنی اسلام ایسا مذہب نہیں جس میں محض رسومات اور ان پر فرضی نتائد کا وعدہ ہو بلکہ اس کے ارکان یعنی ایمانیات بھی اور عبادات بھی عین بصیرت کے مطابق ہیں اور یہی کچھ میرے پیروکار یعنی صحابہ کرام رضوان اللہ علیہم اجمعین جن کے سینے علوم رسالت کے خزانے ہیں اور جو اللہ کے سپاہی ہیں ۔ یہ الفاظ حضرت ابن مسعود ؓ کی روایت سے ہیں بھی کرتے ہیں ۔ اس میں ضمنا وہ سارے افراد امت بھی شامل ہیں جو دین کی دعوت کا کام علی وجہ بصیرت کرتے ہیں یعنی خالص اور ستھرادین کمی بیشی اور بدعات سے پاک۔ نہ ایک خاص قسم کا مذہب جس میں ان کی ذاتی خواہشات ملفوف ہوں اور انھیں رواجی مذہب کے نام پر پورا کرنا چاہتے ہوں ۔ اس سے خصوصا ایسے لوگ مراد ہیں جن کے قلوب علم ظاہر اور برکات نبوی سے روشن ہوں اور جو صاحب حال ہوں ۔ اور اللہ کریم ہر طرح کی شراکت سے پاک ہے اور میں بھی ہر طرح کے شرک سے خواہ وہ کتنا خفیف ہی کیوں نہ ہو اپنی برأت کا اعلان کرتا ہوں۔ نبوت صرف مردوں کو نصیب ہوئی اور آپ سے پہلے بھی ہم نے بہت سے حضرات کو انسانی آبادیوں میں مبعوث فرمایا جن پر اللہ کی طرف سے وحی آتی تھی ۔ آپ کی بعشت کوئی ایسی انہونی بات نہیں کہ ان لوگوں کو عجیب لگ رہی ہے ۔ یہاں رجال فرما کر یہ بھی طے فرمادیا کہ کوئی خاتون نبی بنائی گئی اور نبوت صرف مردوں کو نصیب ہوئی اور حضرت مریم یا ام موسیٰ یا حضرت ابراھیم (علیہ السلام) کی اہلیہ سارہ پر اگرچہ وحی کا لفظ استعمال ہوا ہے مگر یہ وحی نبوت نہ تھی اور اولیاء اللہ پر بھی من جانب اللہ علم کا نزول ثابت ہے ۔ نبوت چونکہ سرمیدان کرنے کا کام ہے اور عورت کے لیئے پردہ لازم تو یہ اس کے کرنے کا کام ہی نہ تھا۔ لہٰذا ان لوگوں کو ان بستیوں کے آثار سے سبق حاصل کرنا چاہیئے جن کے پاس اللہ کا پیغام اللہ کے نبی لائے اور انھوں نے نہ مانا تو ان کا کیا حشر ہوا اور کیسی تباہی سے دوچار ہوئے اور یہ قطعی بات ہے کہ نیک لوگوں کو اگرچہ دنیا میں قربانی بھی دینا پڑے۔ ابدی زندگی اور آخرت میں ان کا ٹھکانہ ہی بہترین ٹھکانہ ہے اگر ذرا بھی عقل سلامت ہوتویہ بات سمجھ میں انے والی ہے۔ اگر انھیں یہ خیال ہو کہ یہ انکار کر رہے ہیں تو اب تک ان پر عذاب کیوں نہیں آیا ؟ تو یہ قانون ازلی ہے کہ اللہ کریم انسان کو بہت مہلت بخشتے ہیں اور اس کی رسی دراز فرماتے رہتے ہیں ۔ پہلے بھی لوگوں کو فرصت دی گئی ۔ حتیٰ کہ اس دور کے انبیاء بھی یہ سوچنے لگے کہ ممکن ہے لوگوں پہ عذاب نہ ہی آئے ۔ اللہ کریم انھیں کچھ نہ کہیں تو ایسی صورت میں تو کفار کے پاس ہماری نبوت کے انکار کا ایک عذر بھی ہوگا کہ دفعتا ہماری مدد آپہنچی ان کی مہلت ختم ہوئی اور اپنے بندوں انبیاء اور ان کے ماننے والوں کو ہم نے بچالیا مگر کفار سے کوئی بھی ہمارے عذاب کو ٹال نہ سکا اور وہ تباہ ہوگئے ۔ یہ کتاب کوئی محض حکایت نہیں کہ گھڑلی گئی ہو بلکہ پہلی آسمانی کتب بھی اس کی تصدیق کرتی ہیں اور وہی عقائد اور اخبار یہ بھی بیان فرماتی ہے جو پہلی کتب میں موجود ہیں نیز انسانی زندگی کے ہر ہر شعبے ایمانیات عبادات اخلاقیات معاملات سیاسیات وغیرہ ذالک کے بارے پوری تفصیل اور سیرحاصل بحث موجود ہے پھر صرف تفصیلی بحث ہی نہیں بلکہ ہر ہر امر میں بہترین راہنمائی موجود ہے اور یہ سراپار حمت ہے کہ دنیا کی مشکلات سے بچ نکلنے راہ بھی بتاتی ہے اور آخرت کے مصائب سے بچنے کا طریقہ بھی اور قرب الٰہی کو پانے کا سلیقہ سکھاتی ہے ہاں ! یہ سب دولت ان لوگوں کے لئے ہے جنہیں اس کے ساتھ ایمان نصیب ہو۔ سورئہ یوسف تمام ہوئی 22 رمضان المبارک 1410 ہجری 18۔ اپریل 90 9 عیسوی بارگاہ رسالت پنا ہی یعنی مدینہ منورہ سے شروع ہونے والی یہ جلد چہارم الحمد اللہ اپنی تکمیل کو پہنچی ۔ اللہ اسے عامتہ المسلمین کے لئے باعث ہدایت اور بند ہ کے لئے تو شئہ آخرت بنائے ! آمین ۔