17. Surah Al-Israa

سُبْحٰنَ الَّذِیْۤ اَسْرٰى بِعَبْدِهٖ لَیْلًا مِّنَ الْمَسْجِدِ الْحَرَامِ اِلَى الْمَسْجِدِ الْاَقْصَا الَّذِیْ بٰرَكْنَا حَوْلَهٗ لِنُرِیَهٗ مِنْ اٰیٰتِنَا١ؕ اِنَّهٗ هُوَ السَّمِیْعُ الْبَصِیْرُ ﴿١﴾Open ayah 17:1 in the Quran reader

پاک ہے (عجز و درماندگی کے عیب سے) وہ (ذات) جو لے گیا اپنے بندے (یعنی پیغمبر اسلام) کو راتوں رات مسجد حرام سے مسجد اقصیٰ تک جس کے ماحول کو ہم نے (بڑی) برکت دی ہے، تاکہ ہم اسے کچھ اپنی نشانیاں دکھائیں (اور اسے بعض اسرار غیب معلوم ہوں ورنہ) حقیقت یہ ہے کہ سننے اور دیکھنے والا تو وہی ( اللہ) ہے۔

وَ اٰتَیْنَا مُوْسَى الْكِتٰبَ وَ جَعَلْنٰهُ هُدًى لِّبَنِیْۤ اِسْرَآءِیْلَ اَلَّا تَتَّخِذُوْا مِنْ دُوْنِیْ وَكِیْلًاؕ ﴿٢﴾Open ayah 17:2 in the Quran reader

اور (اسی طرح) ہم نے موسیٰ کو کتاب دی تھی اور ہم نے اس (کتاب) کو بنی اسرائیل کے لئے ہدایت کا ذریعہ بنایا تھا (اور انھیں حکم دیا تھا) کہ ہمارے سوا کسی (اور) کو (اپنا) کار ساز نہ ٹھہرا لینا۔

ذُرِّیَّةَ مَنْ حَمَلْنَا مَعَ نُوْحٍ١ؕ اِنَّهٗ كَانَ عَبْدًا شَكُوْرًا ﴿٣﴾Open ayah 17:3 in the Quran reader

(تم) ان لوگوں کی نسل (ہو) جن کو ہم نے (طوفان کی ہلاکت سے نجات دی تھی اور) نوح کے ساتھ (کشتی میں) سوار کیا تھا اور بیشک وہ (ہمارا) ایک شکر گزار بندہ تھا۔

وَ قَضَیْنَاۤ اِلٰى بَنِیْۤ اِسْرَآءِیْلَ فِی الْكِتٰبِ لَتُفْسِدُنَّ فِی الْاَرْضِ مَرَّتَیْنِ وَ لَتَعْلُنَّ عُلُوًّا كَبِیْرًا ﴿٤﴾Open ayah 17:4 in the Quran reader

اور (دیکھو، ) ہم نے بنی اسرائیل کو (اپنی) کتاب میں یہ جتلا دیا تھا کہ تم ضرور دو مرتبہ ملک میں فساد کرو گے اور (لوگوں پر) بڑی زیادتیاں کروگے۔

فَاِذَا جَآءَ وَعْدُ اُوْلٰىهُمَا بَعَثْنَا عَلَیْكُمْ عِبَادًا لَّنَاۤ اُولِیْ بَاْسٍ شَدِیْدٍ فَجَاسُوْا خِلٰلَ الدِّیَارِ وَ كَانَ وَعْدًا مَّفْعُوْلًا ﴿٥﴾Open ayah 17:5 in the Quran reader

پھر جب ان دو وقتوں میں سے پہلا وقت آگیا تو (اے بنی اسرائیل، ) ہم نے تم پر اپنے ایسے بندے بھیج دیئے جو بڑے جنگجو تھے پس وہ (تمہارے) شہروں میں ہر طرف پھیل گئے اور (ہمارا) وعدہ پورا ہونا ہی تھا۔

ثُمَّ رَدَدْنَا لَكُمُ الْكَرَّةَ عَلَیْهِمْ وَ اَمْدَدْنٰكُمْ بِاَمْوَالٍ وَّ بَنِیْنَ وَ جَعَلْنٰكُمْ اَكْثَرَ نَفِیْرًا ﴿٦﴾Open ayah 17:6 in the Quran reader

پھر (دیکھو، ) ہم نے (تمہیں) دشمنوں پر (غلبہ دے کر دوبارہ) تمہارے دن پھیرے اور مال و اولاد (کی کثرت) سے تمہاری مدد کی اور تمہیں بڑا جتھے والا بنادیا۔

اِنْ اَحْسَنْتُمْ اَحْسَنْتُمْ لِاَنْفُسِكُمْ١۫ وَ اِنْ اَسَاْتُمْ فَلَهَا١ؕ فَاِذَا جَآءَ وَعْدُ الْاٰخِرَةِ لِیَسُوْٓءٗا وُجُوْهَكُمْ وَ لِیَدْخُلُوا الْمَسْجِدَ كَمَا دَخَلُوْهُ اَوَّلَ مَرَّةٍ وَّ لِیُتَبِّرُوْا مَا عَلَوْا تَتْبِیْرًا ﴿٧﴾Open ayah 17:7 in the Quran reader

اگر (اس وقت) تم نے بھلائی کے کام کئے تو اپنے ہی لئے کئے اور اگر برے کام کئے تو بھی اپنے ہی لئے کئے۔ پھر جب ہمارے دوسرے وعدے کا وقت آیا (تو ہم نے اپنے دوسرے بندوں کو بھیج دیا) کہ وہ تمہارے چہرے بگاڑ دیں اور وہ گھس جائیں مسجد (اقصیٰ ) میں جس طرح پہلی مرتبہ (حملہ آور) اس میں گھسے تھے (اور اس کو لوٹا کھسوٹا تھا) اور جس چیز پر قابو پائیں اسے تہس نہس کر ڈالیں۔

عَسٰى رَبُّكُمْ اَنْ یَّرْحَمَكُمْ١ۚ وَ اِنْ عُدْتُّمْ عُدْنَا١ۘ وَ جَعَلْنَا جَهَنَّمَ لِلْكٰفِرِیْنَ حَصِیْرًا ﴿٨﴾Open ayah 17:8 in the Quran reader

(اگر اب بھی باز آجاؤ تو) کچھ عجب نہیں کہ تمہارا رب تم پر رحم فرمائے لیکن اگر تم پھر (سرکشی و فساد کی طرف) لوٹے تو ہم بھی پھر (وہی) کریں گے جو پہلے کیا تھا۔ اور (یاد رکھو، ) ہم نے (ایسے) کافروں کے لئے جہنم کا قید خانہ تیار کر رکھا ہے۔

اِنَّ هٰذَا الْقُرْاٰنَ یَهْدِیْ لِلَّتِیْ هِیَ اَقْوَمُ وَ یُبَشِّرُ الْمُؤْمِنِیْنَ الَّذِیْنَ یَعْمَلُوْنَ الصّٰلِحٰتِ اَنَّ لَهُمْ اَجْرًا كَبِیْرًاۙ ﴿٩﴾Open ayah 17:9 in the Quran reader

بلاشبہ یہ قرآن اس راہ کی طرف رہنمائی کرتا ہے جو بالکل سیدھی ہے اور ایمان والوں کو جو نیک عمل کرتے ہیں خوشخبری دیتا ہے کہ ان کے لئے بڑا (بھاری) اجر ہے

وَّ اَنَّ الَّذِیْنَ لَا یُؤْمِنُوْنَ بِالْاٰخِرَةِ اَعْتَدْنَا لَهُمْ عَذَابًا اَلِیْمًا۠ ﴿١٠﴾Open ayah 17:10 in the Quran reader

اور یہ بھی (بتاتا ہے) کہ جو لوگ آخرت پر یقین نہیں رکھتے ان کے لئے ہم نے عذاب درد ناک تیار کر رکھا ہے۔

وَ یَدْعُ الْاِنْسَانُ بِالشَّرِّ دُعَآءَهٗ بِالْخَیْرِ١ؕ وَ كَانَ الْاِنْسَانُ عَجُوْلًا ﴿١١﴾Open ayah 17:11 in the Quran reader

اور (دیکھو، ) انسان (اپنے حق میں) شر کی اس طرح درخواست کرتا ہے جس طرح خیر کی درخواست۔ اور حقیقت یہ ہے کہ انسان بڑا ہی جلد باز ہے۔

وَ جَعَلْنَا الَّیْلَ وَ النَّهَارَ اٰیَتَیْنِ فَمَحَوْنَاۤ اٰیَةَ الَّیْلِ وَ جَعَلْنَاۤ اٰیَةَ النَّهَارِ مُبْصِرَةً لِّتَبْتَغُوْا فَضْلًا مِّنْ رَّبِّكُمْ وَ لِتَعْلَمُوْا عَدَدَ السِّنِیْنَ وَ الْحِسَابَ١ؕ وَ كُلَّ شَیْءٍ فَصَّلْنٰهُ تَفْصِیْلًا ﴿١٢﴾Open ayah 17:12 in the Quran reader

اور (دیکھو، ) ہم نے رات اور دن کو (اپنی قدرت و حکمت کی) دو نشانیاں بنا رکھا ہے۔ سو رات کی نشانی کو تو ہم نے دھندلا بنایا (کہ راحت و سکون کا وقت بن جائے) اور دن کی نشانی کو ہم نے روشن کردیا کہ (اس کے اجالے میں) تم اپنے رب کا فضل تلاش کرو، نیز برسوں کا شمار اور (برسوں کے شمار سے ہر طرح کا) حساب بھی معلوم کرلو۔ اور ہم نے (قرآن میں) ہر چیز کو خوب تفصیل سے بیان کردیا ہے۔

وَ كُلَّ اِنْسَانٍ اَلْزَمْنٰهُ طٰٓئِرَهٗ فِیْ عُنُقِهٖ١ؕ وَ نُخْرِجُ لَهٗ یَوْمَ الْقِیٰمَةِ كِتٰبًا یَّلْقٰىهُ مَنْشُوْرًا ﴿١٣﴾Open ayah 17:13 in the Quran reader

اور ہم نے ہر انسان کا اعمال نامہ اس کی گردن سے لگا رکھا ہے اور قیامت کے دن ہم (اس کے نامہ اعمال کی) ایک کتاب نکال کر اس کے سامنے پیش کردیں گے جسے وہ کھلا ہوا پائے گا۔

اِقْرَاْ كِتٰبَكَ١ؕ كَفٰى بِنَفْسِكَ الْیَوْمَ عَلَیْكَ حَسِیْبًاؕ ﴿١٤﴾Open ayah 17:14 in the Quran reader

(اور اس سے کہا جائے گا) پڑھ اپنا اعمال نامہ، آج اپنا حساب لگانے کے لئے خود تیرا وجود ہی کافی ہے۔

مَنِ اهْتَدٰى فَاِنَّمَا یَهْتَدِیْ لِنَفْسِهٖ١ۚ وَ مَنْ ضَلَّ فَاِنَّمَا یَضِلُّ عَلَیْهَا١ؕ وَ لَا تَزِرُ وَازِرَةٌ وِّزْرَ اُخْرٰى١ؕ وَ مَا كُنَّا مُعَذِّبِیْنَ حَتّٰى نَبْعَثَ رَسُوْلًا ﴿١٥﴾Open ayah 17:15 in the Quran reader

جو سیدھے راستے چلا تو اپنے (ہی) لئے چلا اور جو بھٹک گیا تو بھٹکنے کا خمیازہ بھی وہی اٹھائے گا اور کوئی شخص کسی (کے گناہ) کا بوجھ نہ اٹھائے گا، اور ہم کبھی (کسی قوم کو) عذاب دینے والے نہیں جب تک کہ (حق و باطل کا فرق سمجھانے کے لئے اس میں) رسول نہ بھیج دیں۔

وَ اِذَاۤ اَرَدْنَاۤ اَنْ نُّهْلِكَ قَرْیَةً اَمَرْنَا مُتْرَفِیْهَا فَفَسَقُوْا فِیْهَا فَحَقَّ عَلَیْهَا الْقَوْلُ فَدَمَّرْنٰهَا تَدْمِیْرًا ﴿١٦﴾Open ayah 17:16 in the Quran reader

اور جب ہم نے ارادہ کیا کہ کسی بستی کو ہلاک کریں تو اس (بستی) کے خوشحال لوگوں کو حکم بھیج دیا پھر (بجائے اس کے کہ وہ اس کی تعمیل کرتے) انہوں نے اس (بستی) میں نافرمانی (کی راہ اختیار) کی۔ پس اس (بستی) پر (عذاب کی) بات ثابت ہوگئی اور ہم نے اسے تباہ و برباد کر کے رکھ دیا

وَ كَمْ اَهْلَكْنَا مِنَ الْقُرُوْنِ مِنْۢ بَعْدِ نُوْحٍ١ؕ وَ كَفٰى بِرَبِّكَ بِذُنُوْبِ عِبَادِهٖ خَبِیْرًۢا بَصِیْرًا ﴿١٧﴾Open ayah 17:17 in the Quran reader

(دیکھ لو، ) نوح کے بعد سے ہم نے کتنی ہی امتوں کو (ان کے کفر و سرکشی کے سبب) ہلاک کر مارا۔ اور (اے پیغمبر، ) تمہارا رب اپنے بندوں کے گناہ جاننے اور دیکھنے کے لئے کافی ہے (اسے کسی اور کی اعانت کی ذرا بھی حاجت نہیں) ۔

مَنْ كَانَ یُرِیْدُ الْعَاجِلَةَ عَجَّلْنَا لَهٗ فِیْهَا مَا نَشَآءُ لِمَنْ نُّرِیْدُ ثُمَّ جَعَلْنَا لَهٗ جَهَنَّمَ١ۚ یَصْلٰىهَا مَذْمُوْمًا مَّدْحُوْرًا ﴿١٨﴾Open ayah 17:18 in the Quran reader

جو کوئی فوری فائدہ (اسی دنیا میں) چاہتا ہے تو ہم جسے (دینا) چاہیں (اور) جتنا دینا چاہیں اسی (دنیا) میں اسے دے دیتے ہیں، پھر (آخر کار) ہم نے اس کے لئے جہنم (تیار) کر رکھی ہے جس میں وہ داخل ہوگا بدحال اور ٹھکرایا ہوا۔

وَ مَنْ اَرَادَ الْاٰخِرَةَ وَ سَعٰى لَهَا سَعْیَهَا وَ هُوَ مُؤْمِنٌ فَاُولٰٓئِكَ كَانَ سَعْیُهُمْ مَّشْكُوْرًا ﴿١٩﴾Open ayah 17:19 in the Quran reader

اور جو آخرت کا طالب ہو اور اس کے لئے جیسی کوشش کرنی چاہئے ویسی اس کے لئے کوشش بھی کرے اور ہو وہ مومن، تو (اس کے لئے دائمی کامیابیاں ہیں اور) ایسے ہی لوگ ہیں جن کی کوشش (اللہ کے ہاں) مقبول ہوگی۔

كُلًّا نُّمِدُّ هٰۤؤُلَآءِ وَ هٰۤؤُلَآءِ مِنْ عَطَآءِ رَبِّكَ١ؕ وَ مَا كَانَ عَطَآءُ رَبِّكَ مَحْظُوْرًا ﴿٢٠﴾Open ayah 17:20 in the Quran reader

(اے پیغمبر، ) وہ (دنیا کے طالب) اور یہ (آخرت کے طالب) سب ہی کو ہم تمہارے رب کی بخشش سے (دنیا میں امداد) دیئے جا رہے ہیں اور تمہارے رب کی بخشش (عام ہے کسی پر) بند نہیں۔

اُنْظُرْ كَیْفَ فَضَّلْنَا بَعْضَهُمْ عَلٰى بَعْضٍ١ؕ وَ لَلْاٰخِرَةُ اَكْبَرُ دَرَجٰتٍ وَّ اَكْبَرُ تَفْضِیْلًا ﴿٢١﴾Open ayah 17:21 in the Quran reader

(اے پیغمبر، ) تم دیکھ لو کہ ہم نے کس طرح (دنیوی بخشش میں بلا شرط کفر و ایمان کے) بعض لوگوں کو بعض پر برتری دی ہے اور البتہ آخرت کے درجے کہیں بڑھ کر ہیں اور (اس کی) فضیلت (بھی) کہیں بڑھ کر ہے۔

لَا تَجْعَلْ مَعَ اللّٰهِ اِلٰهًا اٰخَرَ فَتَقْعُدَ مَذْمُوْمًا مَّخْذُوْلًا۠ ﴿٢٢﴾Open ayah 17:22 in the Quran reader

(اے پیغمبر، ) اللہ کے ساتھ کوئی دوسرا معبود نہ بنانا ورنہ بدحال اور بےیارومددگار ہو کر بیٹھ رہو گے۔

وَ قَضٰى رَبُّكَ اَلَّا تَعْبُدُوْۤا اِلَّاۤ اِیَّاهُ وَ بِالْوَالِدَیْنِ اِحْسَانًا١ؕ اِمَّا یَبْلُغَنَّ عِنْدَكَ الْكِبَرَ اَحَدُهُمَاۤ اَوْ كِلٰهُمَا فَلَا تَقُلْ لَّهُمَاۤ اُفٍّ وَّ لَا تَنْهَرْهُمَا وَ قُلْ لَّهُمَا قَوْلًا كَرِیْمًا ﴿٢٣﴾Open ayah 17:23 in the Quran reader

اور تمہارے رب نے فیصلہ کردیا ہے کہ (لوگو، ) اس کے سوا کسی کی عبادت نہ کرو اور والدین کے ساتھ حسن سلوک رکھو، ان میں سے کوئی ایک یا دونوں تمہارے سامنے بڑھاپے کو پہنچیں تو انھیں اف تک نہ کہو اور نہ ان کو جھڑکو اور ان سے ادب کے ساتھ بات چیت کرو،

وَ اخْفِضْ لَهُمَا جَنَاحَ الذُّلِّ مِنَ الرَّحْمَةِ وَ قُلْ رَّبِّ ارْحَمْهُمَا كَمَا رَبَّیٰنِیْ صَغِیْرًاؕ ﴿٢٤﴾Open ayah 17:24 in the Quran reader

اور ان کے سامنے شفقت اور انکساری کے ساتھ جھکے رہو اور ان کے حق میں (ہمیشہ) دعا کرتے رہو کہ اے میرے رب، جس طرح انہوں نے مجھے بچپن میں پالا پرورش کیا ہے (اور میرے حال پر رحم کرتے رہے ہیں) اسی طرح تو بھی ان پر رحم فرما۔

رَبُّكُمْ اَعْلَمُ بِمَا فِیْ نُفُوْسِكُمْ١ؕ اِنْ تَكُوْنُوْا صٰلِحِیْنَ فَاِنَّهٗ كَانَ لِلْاَوَّابِیْنَ غَفُوْرًا ﴿٢٥﴾Open ayah 17:25 in the Quran reader

(لوگو، ) تمہارا رب خوب جانتا ہے جو تمہارے دلوں میں ہے۔ اگر تم (حقیقت میں) سعادت مند ہو (اور تم سے ماں باپ کے حق میں بھولے سے فروگزاشت بھی ہوگئی ہو) وہ تم کو معاف کر دے گا کیونکہ وہ توبہ کرنے والوں کے لئے بڑا ہی بخشنے والا ہے۔

وَ اٰتِ ذَا الْقُرْبٰى حَقَّهٗ وَ الْمِسْكِیْنَ وَ ابْنَ السَّبِیْلِ وَ لَا تُبَذِّرْ تَبْذِیْرًا ﴿٢٦﴾Open ayah 17:26 in the Quran reader

اور رشتہ داروں کو (بھی) ان کا حق ادا کرو اور مسکین و مسافر کو (بھی ان کا حق دو ) اور فضول خرچی نہ کرو۔

اِنَّ الْمُبَذِّرِیْنَ كَانُوْۤا اِخْوَانَ الشَّیٰطِیْنِ١ؕ وَ كَانَ الشَّیْطٰنُ لِرَبِّهٖ كَفُوْرًا ﴿٢٧﴾Open ayah 17:27 in the Quran reader

فضول خرچ لوگ شیطان کے بھائی ہیں اور شیطان اپنے رب کا بڑا ہی ناشکرا ہے۔

وَ اِمَّا تُعْرِضَنَّ عَنْهُمُ ابْتِغَآءَ رَحْمَةٍ مِّنْ رَّبِّكَ تَرْجُوْهَا فَقُلْ لَّهُمْ قَوْلًا مَّیْسُوْرًا ﴿٢٨﴾Open ayah 17:28 in the Quran reader

اور اگر تمہیں (ان حقداروں سے) پہلو تہی کرنا پڑے (اس بنا پر) کہ اپنے رب کی مہربانی کی جس کے تم امیدوار ہو راہ دیکھ رہے ہو، تو نرمی سے انھیں سمجھا دو

وَ لَا تَجْعَلْ یَدَكَ مَغْلُوْلَةً اِلٰى عُنُقِكَ وَ لَا تَبْسُطْهَا كُلَّ الْبَسْطِ فَتَقْعُدَ مَلُوْمًا مَّحْسُوْرًا ﴿٢٩﴾Open ayah 17:29 in the Quran reader

اور (دیکھو، ) نہ تو اپنا ہاتھ گردن سے باندھ لو اور نہ اسے بالکل ہی کھول دو ، (ایسا کرو گے) تو ملامت زدہ اور درماندہ ہو کر رہ جاؤگے۔

اِنَّ رَبَّكَ یَبْسُطُ الرِّزْقَ لِمَنْ یَّشَآءُ وَ یَقْدِرُ١ؕ اِنَّهٗ كَانَ بِعِبَادِهٖ خَبِیْرًۢا بَصِیْرًا۠ ﴿٣٠﴾Open ayah 17:30 in the Quran reader

تمہارا رب جس کی روزی چاہتا ہے فراخ کردیتا ہے اور (جس کی چاہتا ہے) نپی تلی کردیتا ہے۔ بلاشبہ وہ اپنے بندوں (کے حال) سے باخبر ہے اور انھیں دیکھ رہا ہے۔

وَ لَا تَقْتُلُوْۤا اَوْلَادَكُمْ خَشْیَةَ اِمْلَاقٍ١ؕ نَحْنُ نَرْزُقُهُمْ وَ اِیَّاكُمْ١ؕ اِنَّ قَتْلَهُمْ كَانَ خِطْاً كَبِیْرًا ﴿٣١﴾Open ayah 17:31 in the Quran reader

(لوگو، ) افلاس کے ڈر سے اپنی اولاد کو قتل نہ کرو ہم ہی انھیں بھی رزق دیتے ہیں اور تمہیں بھی۔ بیشک ان کا قتل بڑا بھاری گناہ ہے۔

وَ لَا تَقْرَبُوا الزِّنٰۤى اِنَّهٗ كَانَ فَاحِشَةً١ؕ وَ سَآءَ سَبِیْلًا ﴿٣٢﴾Open ayah 17:32 in the Quran reader

اور زنا کے قریب بھی نہ پھٹکو۔ یقینا وہ بڑی بےحیائی (کی بات) ہے اور (بہت ہی) برا چلن۔

وَ لَا تَقْتُلُوا النَّفْسَ الَّتِیْ حَرَّمَ اللّٰهُ اِلَّا بِالْحَقِّ١ؕ وَ مَنْ قُتِلَ مَظْلُوْمًا فَقَدْ جَعَلْنَا لِوَلِیِّهٖ سُلْطٰنًا فَلَا یُسْرِفْ فِّی الْقَتْلِ١ؕ اِنَّهٗ كَانَ مَنْصُوْرًا ﴿٣٣﴾Open ayah 17:33 in the Quran reader

اور (دیکھو، ) کسی جان کو ناحق قتل نہ کرو جسے (قتل کرنا) اللہ نے حرام کیا ہے اور جو شخص ظلم سے قتل کیا جائے تو ہم نے اس کے والی (وارث) کو اختیار دے دیا ہے۔ سو (اسے چاہئے کہ) قتل (کا بدلہ لینے) میں زیادتی نہ کرے۔ بیشک اس کی مدد کی جائے گی۔

وَ لَا تَقْرَبُوْا مَالَ الْیَتِیْمِ اِلَّا بِالَّتِیْ هِیَ اَحْسَنُ حَتّٰى یَبْلُغَ اَشُدَّهٗ١۪ وَ اَوْفُوْا بِالْعَهْدِ١ۚ اِنَّ الْعَهْدَ كَانَ مَسْئُوْلًا ﴿٣٤﴾Open ayah 17:34 in the Quran reader

اور یتیم کے مال کے قریب بھی نہ پھٹکو مگر ہاں ایسے طریقے پر کہ (یتیم کے حق میں) بہتر ہو، یہاں تک کہ وہ اپنے سن بلوغ کو پہنچ جائے۔ اور (دیکھو، ) عہد کو پورا کیا کرو۔ بیشک (قیامت میں) عہد کی باز پرس ہوگی۔

وَ اَوْفُوا الْكَیْلَ اِذَا كِلْتُمْ وَ زِنُوْا بِالْقِسْطَاسِ الْمُسْتَقِیْمِ١ؕ ذٰلِكَ خَیْرٌ وَّ اَحْسَنُ تَاْوِیْلًا ﴿٣٥﴾Open ayah 17:35 in the Quran reader

اور جب ناپ کردو تو پیمانے کو پورا بھر دیا کرو اور (تول کردینا ہو تو) ترازو (کی ڈنڈی) سیدھی رکھ کر تولا کرو۔ (معاملے کا) یہ بہتر طریقہ ہے اور انجام کے لحاظ سے بھی (یہی) بہتر ہے۔

وَ لَا تَقْفُ مَا لَیْسَ لَكَ بِهٖ عِلْمٌ١ؕ اِنَّ السَّمْعَ وَ الْبَصَرَ وَ الْفُؤَادَ كُلُّ اُولٰٓئِكَ كَانَ عَنْهُ مَسْئُوْلًا ﴿٣٦﴾Open ayah 17:36 in the Quran reader

اور (دیکھو، ) جس بات کا تمہیں علم نہ ہو اس کے پیچھے نہ لگو۔ (یاد رکھو، ) کان، آنکھ اور دل ان سب سے (قیامت کے دن) باز پرس ہونی ہے۔

وَ لَا تَمْشِ فِی الْاَرْضِ مَرَحًا١ۚ اِنَّكَ لَنْ تَخْرِقَ الْاَرْضَ وَ لَنْ تَبْلُغَ الْجِبَالَ طُوْلًا ﴿٣٧﴾Open ayah 17:37 in the Quran reader

اور زمین پر اکڑ کر نہ چلو۔۔ یقینا تم نہ زمین کو پھاڑ سکتے ہو اور نہ پہاڑوں کی لمبائی کو پہنچ سکتے ہو۔

كُلُّ ذٰلِكَ كَانَ سَیِّئُهٗ عِنْدَ رَبِّكَ مَكْرُوْهًا ﴿٣٨﴾Open ayah 17:38 in the Quran reader

(اے پیغمبر، ) یہ سارے برے کام تمہارے رب کے نزدیک ناپسندیدہ ہیں۔