90. Surah Al-Balad

حیات انسانی 2: سورة البلد میں تین چیزوں کبو بطور استشہاد کے پیش فرمایا ۔ ہے اور ثابت کیا ہے کہ انسانی زندگی مسلسل مصائب اور سختیوں کا نام ہے ۔ ایک مکہ کی پوری تاریخ کہ کیونکہ اللہ کے ایک بندے نہ پریشانی اور اضطراب کے عالم میں یہاں اپنی اولاد کو بسایا اور اس غیر آباد زمین میں ایک معبد کی بنیاد رکھی ۔ اور پھر وہ جگہ کس درجہ مقبول ہوئی ۔ دوسرے آپ کا اس شہر میں فاتحانہ داخلہ اور تیسرے آدم اور بنی آدم کی ساری زندگی ، ان واقعات کو دیکھئے تو آپ کو معلوم ہوگا کہ حیات انسانی ، تعبیر ہے محنت وجانفشانی سے ، تگ ودو اور سعی سے ، دوڑ دھوپ اور کوشش سے ، اور وہی لوگ دنیا میں کامیابی اور کامرانی سے زندگی بسر کرسکتے ہیں ۔ جو اس راز کو سمجھتے ہیں اور جو آسودہ تن ہیں اور آرام طلب ہیں ۔ وہ ہمیشہ سیاسیات عالم میں غلام اور نکمے رہتے ہیں ۔ واضح رہے کہ یہاں وانت حل بھذا البلد بطور جملہ معترضہ کے ہے اور یہ پیش گوئی ہے ۔ یہ بھی ممکن ہے کہ اس کے معنی مطلقاً مکہ میں سکونت پذیر ہونے کے ہوں ۔ اس صورت میں آپ کی مکی زندگی کے پر مصائب ہونے کی طرف اشارہ ہوگا ۔ حل لغات :۔ وثاقہ ۔ باندھنا ۔ قید کرنا ۔ جکڑنا کبد ۔ مشقت ۔ کوفت اور مصیبت ۔

ف 1: غرض یہ ہے کہ انسان تو اس لئے پیدا کیا گیا تھا کہ یہ حق وصداقت کی راہ میں جس قدر مشکلات پیش آئیں ، ان کو صبر و استقلال کے ساتھ برداشت کرے ۔ مگر اس کی سرکشی اور بغاوت کا یہ عالم ہے کہ خدا سے بھی نہیں ڈرتا اور سمجھتا ہے ۔ کہ اس پر کسی کا بس نہیں چل سکے گا ۔ عیش و عشرت میں ، شادی غمی کی رسموں میں اور نام ونمود کے موقع پر بےدریغ خرچ کرتا ہے ، دعوتوں میں اور حکام وقت کی خوشنودی اور ان کی استرضا میں ہزاروں روپے پانی کی طرح بہادیتا ہے اور جب قومی اور ملی کاموں کے لئے خدا کے نام پر اس سے کچھ مانگا جاتا ہے تو کہتا ہے کہ صاحب ! میں نے بڑی دولت لٹائی ہے اور بڑا سرمایہ خرچ کیا ہے ۔ اب میں کچھ بھی نہیں دے سکتا ۔ وہ یہ گمان کرتا ہے کہ شاید اس کی فضول خرچیوں کو کسی نے نہیں دیکھا اور اس کی ریاکارانہ مساعی کو بہ نظر احتساب نہیں جانتا ۔ اللہ نے اس کو دو آنکھیں بخشی ہیں ۔ تاکہ حقائق کا مشاہدہ کرے ۔ ایک زبان اور دو ہونٹ عطا کئے ہیں کہ دنیا کی نعمتوں سے لطف اندوز ہو اور کلمہ حق کے اظہار سے دریغ نہ کرے ۔ اور نیکی وبدی کی دو راہیں اس کو دکھادی ہیں ، تاکہ گمراہ نہ ہو ۔ مگر یہ ہے کہ ان بیش قیمت نعمتوں کو قدر وتشکر کی نظروں سے نہیں دیکھتا ۔ سو یوں ایسا نہیں ہوتا کہ یہ دشوار گزار اخلاق وروح کی گھاٹی کو عبور کرلے اور وہ دشوار گزار گھاٹی یہ ہے کہ غلامی کے خلاف جہاد کرے اور اللہ کے غلاموں کو بندوں کی غلامی سے چھڑائے یا قحط اور بھوک کے زمانے میں اپنے رشتہ دار یتیموں کی مدد کرے ۔ یا فقیر خاک نشین کی طرف دست شفقت بھائے اور ان پاکبازوں میں سے ہو جو مومن ہیں اور صبروہمدردی کے جذبات کی تلقین کرتے ہیں ۔ یہی وہ لوگ ہیں جو اعزازو تکریم کے مستحق ہیں اور اصحاب یمین ہیں اور وہ منکرین جو خدا کی نعمتوں سے استفادہ نہیں کرتے جن کے دلوں میں خلق اللہ کے لئے کوئی شفقت کا جذبہ موجزن نہیں ، وہ بدبختی اور محرومی کے مالک ہیں ، جہنم میں جائیں گے ۔ اور اس کی آگ ان کو چاروں طرف سے گھیرلے گی ۔ فک رقبۃ سے مصطلح غلامی مراد ہے ۔ جس کے صاف اور واضح معنی یہ ہیں کہ قرآن کا مشورہ یہ نہیں ہے کہ وہ بندگی کے نظام کی ققویت کرے ۔ بلکہ یہ چاہتا ہے کہ اخلاقاً لوگوں میں یہ روح پیدا کردی جائے کہ وہ غلامی کو دور کرنا اپنے لئے بڑی سعادت سمجھنے لگے ۔ حل لغات :۔ لبدا ۔ بہت زیادہ النجدین ۔ نیکی اور بدی کی دو راہیں العقبۃ ۔ گھاٹی رقبۃ ۔ گردن مسغبۃ ۔ بھوک ۔ فاقہ ذامتربۃ ۔ خاک نشینی ۔