Ayah 88:1اللہ تبارک وتعالی قیامت کے احوال اور اس کی مصیبت خیز ہولناکیوں کا ذکر کرتا ہے کہ قیامت تمام مخلوق کو اپنی سختیوں سے ڈھانپ لے گی، لوگوں کو ان کے اعمال کی جزا وسزا دی جائے گی لوگ الگ الگ دو گروہوں میں بٹ جائیں گے ایک گروہ جنت میں جائے گا اور دوسرا گروہ جہنم کو سدھارے گا پس اللہ تعالیٰ نے دو گروہوں کے وصف سے آگاہ فرمایا۔
Ayah 88:2جہنمیوں کے وصف میں فرمایا (وُجُوْهٌ يَّوْمَىِٕذٍ ) اس دن یعنی قیامت کے دن بہت سے چہرے (خَاشِعَةٌ) ذلت، فضیحت اور رسوائی کیوجہ سے جھکے ہوئے ہوں گے۔
Ayah 88:3(عَامِلَةٌ نَّاصِبَةٌ) سخت محنت کرنے والے، تھکے ماندے۔ یعنی عذاب میں سخت تھکے ہوئے ہوں گے ان کو چہروں کے بل گھسیٹا جائے گا اور آگ ان کے چہروں کو ڈھانپ لے گی۔ اللہ تعالیٰ کے فرمان (وُجُوْهٌ يَّوْمَىِٕذٍ خَاشِعَةٌ۔ عَامِلَةٌ نَّاصِبَةٌ) میں اس معنی کا احتمال ہے کہ دنیا کے اندر مشقت اٹھانے والے چہرے اس روز جھکے ہوئے ہوں گے۔ دنیا کے اندر (ان کی مشقت یہ تھی) کہ وہ بڑے عبادت گزار اور عمل کرنے والے تھے۔ مگر چونکہ اس عمل میں ایمان کی شرط معدوم تھی اس لیے عمل قیامت کے دن اڑتا ہوا غبار بنجائے گا۔ یہ احتمال معنی کے اعتبار سے اگرچہ صحیح ہے مگر سیاق کلام اس پر دلالت نہیں کرتا بلکہ پہلے معنی ہی قطعی طور پر صحیح ہیں کیونکہ اللہ نے اسے ظرف کے ساتھ مقید کردیا اور وہ ہے قیامت کا دن کیونکہ یہاں عمومی طور پر اہل جہنم کا ذکر کرنا مقصود ہے اور یہ احتمال اہل جہنم کی نسبت سے، بہت ہی چھوٹا ساجز ہے کیونکہ یہ کلام قیامت کی سختی کے لوگوں کو ڈھانپ لینے کے لیے حال میں ہے اور اس دنیا کے اندر ان کے احوال سے کوئی تعرض نہیں۔
Ayah 88:4(تَصْلٰى نَارًا حَامِيَةً ) دہکتی آگ میں داخل ہوں گے۔ یعنی اس کی حرارت بہت سخت ہوگی جو ان کو ہر جگہ سے گھیر لے گی۔
Ayah 88:5(تُسْقٰى مِنْ عَيْنٍ اٰنِيَةٍ ) ایک کھولتے ہوئے چشمے کا ان کو پانی پلایاجائے گا۔ یعنی انتہائی گرم۔ (وان یستغیثوا یغاثوا بما کالمھل یشوی الوجوہ۔ الکھف 29) اور اگر وہ فریاد کریں گے تو ایسے پانی سے ان کی فریاد رسی کی جائے گی جو پگھلے ہوئے تانبے کے مانند ہوگا جو چہروں کو بھون ڈالے گا۔ پس یہ ہوگا ان کا مشروب۔
Ayahs 88:6–7رہا ان کا طعام تو (لَيْسَ لَهُمْ طَعَامٌ اِلَّا مِنْ ضَرِيْعٍ ۔ لَّا يُسْمِنُ وَلَا يُغْنِيْ مِنْ جُوْعٍ ) خاردار جھاڑ کے سوا ان کے لیے کوئی کھانا نہیں ہوگا۔ جو موٹا کرے گا نہ بھوک مٹائے گا۔ یہ اس وجہ سے کہا گیا کہ کھانے سے دو امور میں سے ایک مقصود ہوتا ہے۔ کھانے والے کی بھوک مٹانا اور اس کی بھوک کی تکلیف دور کرنا یا اس کے بدن کو موٹا کرنا اور اس کے کھانے میں دونوں امور کے لیے کوئی فائدہ نہیں بلکہ یہ کھانا کرواہٹ، بدبو اور گھٹیا پن میں انتہا کو پہنچا ہوا ہوگا ہم اللہ تعالیٰ سے عافیت کا سوال کرتے ہیں۔
Ayah 88:8رہے نیکوکار تو روز ان کے چہرے ( نَّاعِمَةٌ) تروتازہ ہوں گے۔ یعنی ان نعمتوں کی تازگی عیاں ہوگی ان کے بدن تروتازہ ہوں گے اور ان کے چہرے نور سے دمک رہے ہوں گے اور وہ انتہائی خوش ہوں گے۔
Ayah 88:9(لِّسَعْيِهَا) اپنے اعمال سے۔ جو اس نے دنیا میں رہتے ہوئے نیک اعمال اور اللہ کے بندوں کے ساتھ حسن سلوک کو آگے بھیجا (رَاضِيَةٌ) خوش ہوں گے کیونکہ ان کو ان کی کوشش کا ثواب کئی گنا جمع کیا ہوا ملا پس انہوں نے اپنے انجام کی تعریف کی اور انہیں ہر وہ چیز حاصل ہوگئی جس کی وہ تمنا کرتے تھے۔
Ayah 88:10اور یہ سب کچھ (فِيْ جَنَّةٍ ) ایسی جنت میں ملے گا جس میں نعمتوں کی تمام انواع جمع ہیں (عَالِيَةٍ ) جو اپنے محل ومنازل میں بہت بلند ہے۔ پس اس محل ومقام اعلی علیین میں ہے اس کی منازل بہت بلند مسکن ہیں۔ اس میں بالاخانے ہیں اور بالاخانوں پر بنائے گئے بالاخانے ہیں جہاں سے وہ اکرام و تکریم کی نعمتوں کا نظارہ کرسکیں گے جو اللہ تعالیٰ نے ان کے لیے تیار کی ہیں۔ (قطوفھا دانیۃ) الحاقہ 23) جس کے پھل جھکے ہوئے ہوں گے۔ جس میں نہایت لذیذ میوے بکثرت ہوں گے وہ بہت زیادہ اچھے اچھے پھل ہوں گے جن کا حصول بہت آسان ہوگا جس حال میں بھی وہ ہوں گے وہ ان پھلوں کو حاصل کرسکیں گے انہیں کسی درخت پر چڑھنے کی حاجت ہوگی نہ کوئی ایسا پھل ہوگا جس کا حصول ان کے لیے دشوار ہوگا۔
Ayah 88:11(لَّا تَسْمَعُ فِيْهَا لَاغِيَةً ) اس میں نہیں سنیں کوئی حرام کی بات۔ یعنی جنت کے اندر حرام کی بات تو کجا کوئی لغو اور باطل کلمہ بھی نہیں سنیں گے بلکہ ان کا تمام تر کلام اچھا اور نفع بخش ہوگا جوا للہ کے ذکر، ان پر اللہ تعالیٰ کی لگاتار نعمتوں کے ذکر اور ایک دوسرے کے ساتھ رہنے والوں میں باہم آداب حسنہ پر مشتمل ہوگا جو دلوں کو مسرت اور شرح صدر عطا کرے گا۔
Ayah 88:12(فِيْهَا عَيْنٌ جَارِيَةٌ) یہ اسم جنس ہے یعنی اس کے اندر چشمے جاری ہوں گے، اہل جنت جیسے چاہیں گے اور جہاں چاہیں گے ان چشموں کا رخ موڑکر ان سے نہریں نکال کرلے جائیں گے۔
Ayah 88:13(فِيْهَا سُرُرٌ مَّرْفُوْعَةٌ) السرر۔ سریر کی جمع ہے اور بیٹھنے کی ان جگہوں کو کہتے ہیں جو بذات خود بلند ہوں اور ان کو ملائم اور نرم بچھونوں کے ذریعے سے بلند کیا گیا ہو۔
Ayah 88:14(وَّاَكْوَابٌ مَّوْضُوْعَةٌ) یعنی مختلف انواع کے لذیذ مشروبات سے لبریز آبخورے ان کے سامنے رکھ ہوئے ہوں گے جو ان کے لیے تیار کیے گئے ہوں گے اور ان کی طلب اور اختیار کے تحت ہوں گے۔ اور ہمیشہ رہنے والے کم عمر لڑکے (خدمت کے لیے) ان کے پاس گھوم رہے ہوں گے۔
Ayah 88:15(وَّنَمَارِقُ مَصْفُوْفَةٌ) یعنی حریر اور دبیز ریشم وغیرہ کے تکیے ہوں گے جن کو اللہ تعالیٰ کے سوا کوئی نہیں جانتا ان کے بیٹھنے اور ان پر آرام کرنے کے لیے صف درصف بچھایا گیا ہوگا وہ ان کو خود بنانے یا خود بچھانے کی فکر سے آزاد اور آرام میں ہوں گے۔
Ayah 88:16(وَّزَرَابِيُّ مَبْثُوْثَةٌ) الزرابی سے مراد خوبصورت بچھونے ہیں یعنی ان کی مجالس ہر جانب سے ان بچھونوں سے بھری ہوئی ہوں گی۔
Ayahs 88:17–18اللہ تبارک وتعالی ان لوگوں کو جو رسول اللہ کی تصدیق نہیں کرتے اور ان کے علاوہ دیگر لوگوں کو، اس بات پر آمادہ کرنے کے لیے کہ وہ اللہ کی مخلوقات میں غور و فکر کریں جو اس کی توحید پر دلالت کرتی ہیں فرماتا ہے (اَفَلَا يَنْظُرُوْنَ اِلَى الْاِبِلِ كَيْفَ خُلِقَتْ ) کیا یہ لوگ اونٹوں کی طرف نہیں دیکھتے کہ کیسے پیدا کیے گئے ؟ یعنی کیا وہ اس کی انوکھی تخلیق پر غور نہیں کرتے کہ کس طرح اللہ نے ان کو بندوں کے لیے مسخر اور ان بیشمار منافع اور مصالح کے لیے ان کا مطیع کردیا جن کے وہ ضرورت مند ہوتے ہیں۔
Ayah 88:19(وَاِلَى الْجِبَالِ كَيْفَ نُصِبَتْ ) اور پہاڑوں کی طرف کہ کیسے وہ نصب کیے گئے ہیں۔ ؟ یعنی خوبصورت اور نمایاں بنا کر ان کو نصب کیا گیا ہے جس سے زمین کو استقرار اور اثبات حاصل ہوا جس سے وہ حرکت نہیں کرتی۔ اللہ نے ان پہاڑوں میں انسان کے لیے بڑے بڑے فوائد ودیعت کیے ہیں۔
Ayah 88:20(وَاِلَى الْاَرْضِ كَيْفَ سُطِحَتْ ) اور زمین کی طرف کہ کس طرح وہ بچھائی گئی ہے۔ یعنی زمین کو کس طرح کشادگی کے ساتھ پھیلایا اور نہایت نرم اور ہموار بنایا گیا ہے تاکہ بندے اس پر ٹھکانا کرسکیں، اس پر کھیتی باڑی کرسکیں، باغات اگاسکیں، عمارتیں تعمیر کرسکیں اور اس کے راستے پر سفر کرسکیں آپ کو معلوم ہونا چاہیے کہ زمین کا ہموار ہونا اس کے گول ہونے کے منافی نہیں۔ اس کو ہر جانب سے افلاک نے گھیرا ہوا ہے جیسا کہ عقل، نقل، حس اور مشاہدہ اس پر دلالت کرتے ہیں اور بہت سے لوگوں کے ہاں یہ مذکور اور معروف ہے خاص طور پر اس زمانے میں اللہ تعالیٰ نے دور کی مسافتوں کو قریب کرنے کے لیے جو اسباب فراہم کیے ان کے ذریعے سے لوگ زمین کے اکثر گوشوں سے واقف ہوگئے ہیں کسی شے کا ہموار ہونا ایک بہت ہی چھوٹے جسم کی گولائی کے منافی ہوسکتا ہے جسے اگر ہموار کیا جائے تو اس میں قابل ذکر گولائی باقی نہیں رہے گی رہا کرہ زمین کا جسم جو کہ بہت ہی بڑا اور کشادہ ہے جو بیک وقت گول اور ہموار ہے دونوں امور ایک دوسرے کے منافی نہیں جیسا کہ اہل خبر کو اس کی معرفت حاصل ہے۔
Ayahs 88:21–22(فَذَكِّرْ ڜ اِنَّمَآ اَنْتَ مُذَكِّرٌ) یعنی لوگوں کو وعظ و نصیحت اور ان کو تنبیہ کیجے اور انکو خوشخبری دیجئے کیونکہ آپ مخلوق کو اللہ تعالیٰ کی طرف دعوت دینے اور ان کو نصیحت کرنے کے لیے مبعوث ہوئے ہیں آپ کو ان پر داروغہ بنا کر اور مسلط کرکے نہیں بھیجا گیا اور انہ ان کے اعمال کا وکیل بنا کر بھیجا گیا ہے پس جب آپ نے وہ ذمہ داری پوری کردی جو آپ کے سپرد کی گئی تھی تو اس کے بعد آپ پر کوئی ملامت نہیں۔ یہ اللہ تعالیٰ کے اس قول کے مانند ہے (وماانت علیھم بجبار فذکر بالقرآن من یخاف وعید۔ ق 45) ۔ اور آپ ان کے ساتھ زبردستی کرنے والے نہیں آپ قرآن کے ذریعے سے اس شخص کو نصیحت کرتے رہیے جو میرے عذاب کی وعید سے ڈرتا ہے۔
Ayah 88:23(اِلَّا مَنْ تَوَلّٰى وَكَفَرَ ) مگر جو کوئی اطاعت سے منہ موڑ کر کفر کارویہ اختیار کرے اور اللہ تعالیٰ کے ساتھ کفر کرے۔
Ayah 88:24(فَيُعَذِّبُهُ اللّٰهُ الْعَذَابَ الْاَكْبَرَ ) تو اللہ اسے نہایت سخت اور دائمی عذاب دے گا۔
Ayahs 88:25–26(اِنَّ اِلَيْنَآ اِيَابَهُمْ ) یعنی تمام خلائق کو ہماری ہی طرف لوٹنا اور قیامت کے روز ان سب کو ہمارے ہی پاس اکٹھے ہونا (ثُمَّ اِنَّ عَلَيْنَا حِسَابَهُمْ ) پھر انہوں نے جو کوئی اچھا براعمل کیا ہے، ان سے اس کا حساب لینا ہمارے ذمے ہے۔