54. Surah Al-Qamar

(ف 1) فرعون اور اس کی قوم کی طرف حضرت موسیٰ اور ہارون ڈر سنانے آئے انہوں نے ہماری سب نشانیوں کی یعنی حضرت موسیٰ کے نومعجزوں کی تکذیب کی ہم نے ان کو یوں پکڑ کر سزا دی جیسے ایک بڑاجلیل القدر بادشاہ قاہر قادر ایک ادنی آدمی کو پکڑ لیتا ہے۔

(ف 1) اے قریش ! کیا تم کافروں کی جماعت ان اگلے کافروں سے کچھ بہتر ہے قوت وجماعت میں زائد ہے کیا ہے کچھ بھی نہیں۔ کیا تمہارے لیے کوئی پروانہ نجات ، برات نامہ خدا کا اس کی کتابوں میں لکھ کر آگیا ہے شرک کی اجازت مل گئی ہے۔ اے محبوب ﷺ کیا ان کافروں کو یہ گھمنڈ اور دعوی ہے کہ ہم سب اکٹھے ایک جماعت، ایک دل آپس میں مدد کرنے والے ہیں ہم پر کون قابوپائے گا تو اے محبوب ﷺ عنقریب وہ وقت آگیا کہ ان کی جماعتیں پراگندہ ہوں اور سب شکست کھائیں اور پیٹھ پھیربھاگیں ۔ بلکہ اصل عذاب کا تو وعدہ آخرت کے عذاب کا ہے جس کے ظہور کا وقت قیامت ہے جو بڑی آفت کا دن ہے اور نہایت کڑوی گھڑی ہے جس میں اس طرح کے نافرمان لوگ آگ میں اوندھے منہ گھسیٹے جائیں گے اور ان کے ذلیل کرنے کو اللہ کے فرشتے یہ کہہ دیں گے لوآج اس آگ کا مزہ چکھو، جس کو دنیا میں تم لوگ جھٹلاتے تھے چناچہ دنیا کے عذاب کی پیشن گوئی بروز بدرظاہر ہوئی کہ بہت قتل ہوئے اور بہت قید کیے گئے۔

مسئلہ تقدیر اور قدرت کی نشانیاں۔ (ف 2) شان نزول : مسند امام احمد اور صحیح مسلم، ترمزی، وغیرہ میں حضرت ابوہریرہ کی روایت ہے جس کا حاصل یہ ہے کہ قریش لوگ نبی ﷺ سے قضا وقدر کی باتیں سن کر ان باتوں میں طرح طرح کی بحث کرتے تھے۔ اس پر اللہ تعالیٰ نے یہ آیتیں نازل فرمائیں ، حاصل کلام یہ ہے کہ قریش میں دین اسلام کے منکر لوگ قرآن شریف کے کلام الٰہی ہونے کے اور نبی ﷺ کے رسول ہونے کے اور ضروریات دین کے جس طرح منکر تھے اسی طرح قضا وقدر کے بھی وہ لوگ منکر تھے صحابہ اور تابعین کا قول یہ ہے کہ اللہ تعالیٰ نے دنیا کے پیدا کرنے سے پہلے جو کچھ نیک وبد دنیا میں ہونے والا تھا اس سب کو اپنے علم ازلی کے موافق لوح محفوظ میں لکھ لیا ہے اب جو کچھ دنیا میں ہورہا ہے وہ اللہ کے علم ازلی اور لوح محفوظ کے نوشتہ کے موافق ہورہا ہے یہ قول عام صحابہ اور تابعین کا آیات قرآنی اور صحیح حدیثوں کے موافق ہے ، مگر فرقہ معتزلہ میں سے ایک گروہ معبد جہنی کا پیرو اس کے مخالف ہے اس فرقہ کا نام قدریہ ہے ان کا کہنا یہ ہے کہ بندہ جو کچھ کرتا ہے وہ مستقل طور پر خود کرتا ہے بندہ کے کسی کام کے کرنے سے پہلے بندے کے کام سے اللہ کے علم ازلی کو کچھ تعلق نہیں ہے اسی بات میں اہل سنت نے فرقہ قدریہ کے رد میں صدہا کتابیں لکھی ہیں غرض جس طرح اللہ تعالیٰ کی توحید اور نبی ﷺ کے رسول برحق ہونے پر ایمان لانا ضروری ہے اسی طرح قضا وقدر پر ایمان لانا بھی ضروری ہے ابوداؤد ومسند امام احمد وغیرہ میں جو روایتیں ہیں ان میں نبی ﷺ نے فرمایا کہ آخرزمانہ میں قضا وقدر کے منکر لوگ پیدا ہوں گے وہ اس مت کے مجوس ہیں ان کے پاس بیٹھنے اور ان کے ساتھ کلام شروع کرنے اور وہ بیمار ہوجائیں تو ان کی عیادت کرنے اور مرجائین تو ان کے جنازے میں شریک ہونے کی ممانعت فرمائی گئی اور انہیں دجال کا ساتھی فرمایا گیا وہ بدترین خلق ہیں اللہ تعالیٰ نے پہلے، انا کل شئی خلقناہ بقدر، میں تقدیر کا ذکر فرمایا پھر ، وما امرنا الاواحدۃ کلمح البصر، فرمایا، حاصل مطلب ان دونوں آیتوں کا یہ ہے کہ دنیا میں جو کچھ ہورہا ہے تقدیر کے موافق اللہ کا پیدا کیا ہوا ہے ایک ذرہ بھی تقدیر اور اس کی پیدا کی ہوئی چیزوں سے باہر نہیں ہے اللہ کی قدرت ایسی زبردست ہے کہ ایک کلمہ کن کے کہنے سے پلک جھپکانے میں جو کچھ وہ کہتا ہے وہ ہوجاتا ہے کس چیز کے پیدا ہونے میں کچھ دیر نہیں لگتی، اب آگے فرمایا کہ قریش کے ہم خیال جن پچھلے لوگوں نے اللہ کے رسولوں اور اللہ کے کلام کو جھٹلایا ان کو طرح طرح کے عذابوں سے اللہ تعالیٰ نے دنیا میں ہلاک کردیا اور عقبی کا سخت عذاب جدا ان کو بھگتنا پڑے گا ہر نصیحت پکڑنے والے کو اس سے نصیحت پکڑنی چاہیے ، تاکہ حال کے لوگوں کا بھی وہی انجام نہ ہوجوان کے ہم خیال لوگوں کا ہوا، اس واسطے کہ اللہ تعالیٰ کی طرف سے ہر انسان کے پیچھے دوکاتب مقرر ہیں جو ان کا چھوٹا بڑانیک وبد سب قول فعل لکھتے رہے اور یہ انتظام سزاوجزا کے لیے ہے جو اگلے پچھلے سب لوگوں سے متعلق ہیں اب آگے اللہ تعالیٰ کے عذاب سے ڈر کر اللہ کے کلام سے نصیحت پکڑنے والوں کا ذکر فرمایا کہ ان کے نیک عملوں کی جزا میں ان کے رہنے کو باغ ملیں گے، جن می پانی دودھ شراب اور شہد کی نہریں جاری ہوں گی اور طرح طرح کے میوے اور ہر طرح کی راحت کے سامان مہیا ہوں گے اور اس ذی اقتدار بادشاہ کی بارگاہ میں ان کی بڑی عزت ہوگی کہ وہ بادشاہ جو چاہے سو کرسکتا ہے دنیا کے بادشاہوں کے خاص اقتدار کی طرح اس کے اقتدار کی کوئی حد نہیں ہے ۔ صحیح مسلم میں مغیرہ بن شعبہ سے روایت ہے کہ جس کے ایک ٹکڑے کا حاصل یہ ہے کہ نبی ﷺ نے فرمایا ، ادنی اہل جنت کو دنیا کی بادشاہت سے دس گناسازوسامان راحت کا جنت میں دیاجائے گا۔