44. Surah Ad-Dukhaan

1۔ (لوح محفوظ سے آسمان دنیاپر) (آیت) ” لیلۃ مبرکۃ “۔ مراد شب قدر ہے جو حدیث نبوی ﷺ کے مطابق ماہ رمضان کے آخری عشرہ کی کسی طاق رات میں واقع ہوتی ہے۔ ھی لیلۃ القدر علی ماروی عن ابن عباس وقتادۃ وابن جبیر و مجاھد وابن زید والحسن وعلیہ اکثر المفسرین (روح) ایک قول یہ بھی مروی ہے کہ اس سے مراد نصف شعبان کی رات ہے۔ لیکن محدثانہ رنگ کے مفسر ابن کثیر نے اس کی تردید زور سے کی ہے۔ وقد ذکرنا الاحادیث الواردۃ فی ذلک فی سورة البقرۃ بما اغنی من اعادۃ ومن قال انما لیلۃ النصف من شعبان کما روی عن عکرمۃ فقد ابعد التحیۃ (ابن کثیر) ملاحظہ ہوضمیہ ” رحمت والی رات “ صفحہ نمبر 989 پر۔ (آیت) ” حم والکتب “۔ ان پر حاشیے پیشتر گذر چکے۔ (آیت) ” انزلنہ “ ضمیرہ (آیت) ” الکتب “۔ کی جانب ہے۔ 2۔ (اپنی غایت شفقت وکرم سے) یہ انذار ہمیشہ بندوں ہی کی مصلحت سے، انہیں کو عواقب امور سے مطلع ومتنبہ کرنے کے لئے ہوتا ہے۔

3۔ یعنی مشیت تکوینی جس طر پر جس کام کی انجام وہی منظور ہوتی ہے وہ اسی متعین طور پر ملائکہ متعلقہ کے سپرد کردیا جاتا ہے۔ بشری حساب وتخمینہ کے حساب سے ایک سال کی مدت کے لئے۔ وھکذا روی عن ابن عمر و مجاھد وابن مالک والضحاک وغیر واحد من السلف (ابن کثیر) (آیت) ” حکیم “۔ کے معنی پر حکمت کے ہیں۔ یجوز ان یکون المعنی کل امر متلبس بالحکمۃ (روح) (آیت) ” کل امر حکیم “۔ ہر حکمت والے معاملے سے یہ مراد نہیں کہ کچھ معاملے حکمت والے نہیں ہوتے، ہاحکمت تو سب ہی معاملات ہوتے ہیں۔ حکیم کی قید، قید واقعی ہے۔ (آیت) ” حکیم “۔ کے دوسرے معنی محکم ومضبوط کے ہیں۔ ووضع حکیم موضع محکم (ابن جریر) الامور الحکمۃ (بیضاوی) والحکیم بمعنی المحکم لانہ لایبدل ولا یغیر بعد ابرازہ للملائکۃ (علیہ السلام) (روح) حکیم اے محکم لایبدل ولا یغیر (ابن کثیر) یعنی اللہ کے اٹل قوانین سالانہ کے اجرا کا وقت یہی ہوتا ہے۔ (آیت) ” امرا من عندنا “۔ امرا کے صیغہ کا نکرہ ہونا اظہار عظمت وشان کے لئے ہے۔ وتنکیرہ للتفخیم (روح) امر کے ساتھ حکیم کا اضافہ خود ہی اظہار عظمت و جلالت کے لئے تھا۔ پھر اس پر (آیت) ” امرا من عندنا “۔ کے مزید اضافہ نے اس عظمت و جلالت کو اور کئی گنا بڑھا دیا۔

4۔ (کہ آپ ﷺ کے ذریعہ سے بندوں کو حق و باطل، خیروشر کی راہوں سے پوری طرح آگاہ کردیں) (آیت) ” رحمۃ من ربک “۔ رحمۃ للعالمین “۔ اس معنی میں کہ آپ ﷺ ہی کے ذریعہ سے کل بندوں کو بلاامتیاز وتفریق نیکی وبدی کے راستوں سے آگاہ کردیا گیا۔ (آیت) ” وبال مومنین رء وف رحیم “۔ مومنین کے حق میں آپ ﷺ رؤف و رحیم اس معنی میں کہ انہیں نے آپ ﷺ کے پیام کو قبول کیا اور آپ ﷺ کی ہدایت سے پوری طرح مستفید ہوئے اور رحمت خاص خود آپ ﷺ کے حق میں، اس معنی میں کہ آپ ﷺ ہی کو ذریعہ وواسطہ اس رحمت عالم کا بنایا۔ 5۔ (تو اس سے بڑھ کر بندوں کی ضرورتوں کو جاننے والا اور ان کی مصلحتوں کی رعایت کرنے والا اور کون ہوسکتا ہے ؟ )

6۔ یعنی اگر تم میں طلب صادق ہے، حق کی جستجو و تلاش ہے۔ (آیت) ” رب ..... بینھما “۔ ساری کائنات کے اسی خدائے واحد کی ملک ومملوک ہونے کا ایک بار پھر اثبات۔ کسی گوشہ ہستی میں کسی جہت و اعتبار سے بھی کوئی دوسرا مالک و متصرف نہیں۔

7۔ آیت ماقبل کی طرح اس میں بھی توحید ہی کے مختلف پہلوؤں کی تاکید اور شرک کے مختلف مظاہر کی تریدد ہے۔ (آیت) ” لاالہ الا ھو۔ اس کی صفت الوہیت میں کوئی بھی اس کا شریک نہیں۔ (آیت) ” یحی ویمیت “۔ جان ڈالنے اور جان لینے کی قوتیں بھی صرف اسی کے ہاتھ میں ہیں ..... زندگی کے کوئی الگ دیوتا اور موت کے کوئی الگ دیوتا نہیں۔ (آیت) ” ربکم ..... الاولین “۔ وہ کوئی نوپیدا معبود نہیں۔ دنیا جب سے قائم ہے اس کا وہی ایک اور اکیلا پروردگار رہا ہے .... بعض جاہلی قوموں نے اپنے اسلاف قدیم کو معبود مانا اور ان کی پرستش کی ہے۔ آیت میں اس اسلاف پرستی کی بھی تردید آگئی۔

8۔ (اور اس لیے حق کے واضح دلائل وصریح شواہد کی طرف توجہ والتفات ہی نہیں کرتے) (آیت) ” فی شک “۔ شک کی تنوین تعظیم کے لیے ہے۔ یعنی بڑے شک میں پڑے ہوئے ہیں۔ یہ لوگ توحید وآخرت کی طرف سے عجیب بےیقینی کی حالت میں مبتلا ہیں۔ (آیت) ” یلعبون “۔ یعنی سنجیدگی سے کبھی حقائق پسندی کی طرف آتے ہی نہیں۔ ان اہم ترین حقائق ومسائل کو بس ایک کھیل تماشہ سمجھ رکھا ہے۔ ” رحمت والی رات “۔ (متعلقہ حاشیہ نمبر 1 سورة الدخان) جان جب جسم کے پردہ میں ظاہر ہونے لگتی ہے، بےصورتی جب صورت پکڑنے لگتی ہے، اطلاق جب تعین قبول کرنے لگتا ہے، تو لازمی ہے کہ وہ اپنے لیے بھی وہ تمام قیود و خواص اختیار کرلے، جو جسم، صورت، اور تعین مادی کے لئے ضروری ہیں۔ عالم جسم وکائنات مادہ میں داخلہ کے دو بڑے دروازے زمان ومکان ہیں۔ لطیف سی لطیف نورانیت بھی جب سطح زمین پر نازل ہوگی، تو انہی دروازوں میں ہو کر داخل ہوگی، برکت و رحمت جیسی لطافتیں بھی (جو بار الفاظ کا تحمل نہیں کرسکتیں) کرۂ خاکی کو جب اور جہاں بھی سرفراز کریں گی، وقت اور جگہ، زمان ومکان کی قید اور پابندی کے ساتھ ہی کریں گی، قدرت نے وقت کی تقسیم جو مختلف حصوں میں کر رکھی ہے، یہ بےمعنی نہیں، ہر موسم، ہر فصل، ہر گھڑی، اپنے اپنے اعتبارات دوسروں سے الگ رکھتی ہے۔ صرف اپنی بیرونی اور ظاہری تاثیرات ہی کی حیثیت سے نہیں، بلکہ اپنی اندرونی اور روحانی کیفیتوں، صلاحتیوں، اور مناسبتوں کے لحاظ سے بھی، مہینے سال میں بارہ ہوتے ہیں، لیکن حج صرف ایک ہی مہینے میں ادا ہوسکتا ہے۔ دن ہفتہ میں سات ہوتے ہیں۔ لیکن جمعہ صرف ایک ہی ہوتا ہے۔ گھنٹے دن میں چوبیس ہوتے ہیں، لیکن ہر نماز ہر وقت ادا نہیں کی جاسکتی، وقت کا کوئی ٹکڑا جب آتا ہے تو اپنے ساتھ اپنی ساری مناسبتوں کو بھی لاتا ہے، اور اپنی ساری کیفیتوں کو پھیلا دینا چاہتا ہے۔ رات کا سناٹا جب چھانے لگتا ہے تو چرند پرند اور انسان سب اپنے اپنے کاموں کو روک کر آرام کرنا چاہتے ہیں۔ آفتاب کی سرگرمیاں جب شروع ہوتی ہیں، تو حیوان اور انسان سب کو اپنے اپنے کام یاد پڑجاتے ہیں۔ برسات میں جب آب زندگی آسمان سے اترنے لگتا ہے تو زمین کی بھی ساری سوئی ہوئی زندگیاں نئے سرے سے بیدار ہوجاتی ہیں۔ بہارکا موسم آتا ہے، تو کلیوں کے کھلنے اور گلوں کے پھوٹنے کے ساتھ ہی انسانی دلوں کی کلیاں بھی کھلنے لگتی ہیں، اور طرح طرح کی امنگیں پیدا ہوجاتی ہیں۔ اسی قسم کی مناسبتوں کو روح کی بولی میں دنوں کی فضیلتیں اور کرامتیں اور راتوں کی بزرگیاں اور برکتیں کہتے ہیں۔ پھر یہ بھی فطرت کا ایک دستور ہے کہ جو واقعہ، روحانیت کے عالم میں جس درجہ کا پیش آتا ہے اسی کی اہمیت کی مناسبت سے اس کی یادگار بھی اسی زمانہ کو قرار دے دیا جاتا ہے۔ اللہ کے خلیل نے ایک خاص موسم میں اپنے لخت جگر کو قربانی کے لئے پیش کیا، عین اسی زمانہ کو فریضہ حج وقربانی کے واسطے سارے فرماں بردار بندوں کے لئے مخصوص کردیا گیا۔ عاشورۂ محرم کو روایات کے مطابق، متعدد انبیائے کرام کو اہم واقعات ومعاملات پیش آئے، اس روز کے روزہ کی فضیلتیں بیان کردی گئیں۔ دو شنبہ کے روز دنیا کو رحمت کا پیام عام سنانے والا آیا، اس یوم مبارک کو یاد دل سے کیونکر مٹ سکتی ہے۔ اللہ کی اتاری ہوئی ہر نعمت بڑی ہی نعمت ہے۔ لیکن اس کی ساری بڑی نعمتوں میں اگر کوئی نعمت سب سے بڑی قرار دی جاسکتی ہے، تو یہ ہے کہ اس نے ہر تاریکی کو روشن کرنے، ہر کجی کو درست کرنے، ہر پستی کو بلند کرنے، ہر مرض کو شفا دینے، ہر دکھ کو مٹا دینے کے لئے ہر موسم اور ہر زمانہ، ہر خطہ اور اور ہر ملک، ہر قوم اور ہر امت، ہر فرد اور ہر جماعت، ہر مرد اور ہر عورت، ہر بوڑھے اور ہر جوان کے ہاتھ میں ایک کامل ومکمل ہدایت نامہ، اور ایک جامع ومفصل دستورالعمل دیدیا ہے، جس کے بعد کسی انسان کو کسی علم وفن، کسی حکمت وصنعت کسی استاد ومرشد، کسی مدرسہ اور مکتب کی قطعا کوئی حاجت ہی نہیں باقی رہ جاتی، جس گھڑی اس آفتاب ہدایت کا طلوع ہوا ہے، وہ وقت رات کا تھا۔ اس مبارک رات کی بزرگیوں اور سعادتوں کا کوئی انسانی دماغ احاطہ کرسکتا ہے ؟ جس شب مبارک کو خود خالق لیل ونہار ” شب مبارک “ ارشاد فرمائے، کس بشر کے قلم میں یہ قوت ہے کہ اس کی کرامتوں اور فضیلتوں کی شرح کرسکے ؟ کوئی لفظ، کوئی عبارت، کوئی عنوان تحریر، ایسا ممکن ہے جو اس پاک رات کی پاکیزگیوں اور ستھرائیوں، رحمتوں اور برکتوں، نعمتوں اور دولتوں کی تفسیر کیلئے کافی ہوسکے ؟ پھول بہار ہی میں کھلتے ہیں، اور کلے بہار ہی میں پھوٹتے ہیں۔ گلستان دہر اور چمن حیات کے اس سب سے زیادہ خوش رنگ، شاداب اور دلکش پھول کے لئے کیوں کر ممکن تھا کہ بجز موسم گل وفصل بہا رکے کسی اور وقت کھلتا، چناچہ خود صدق مطلق کی لسان حق کا بیان ہے کہ عین اسی موسم میں، جو ازل سے نعمتوں اور برکتوں کی بارش کے لئے مخصوص ہوچکا تھا، گلشن کائنات کے اس سدابہار پھول نے اپنی عطر بیزیوں سے اہل ذوق کے مشام جان کو معطر کیا۔ (آیت) ” شھر رمضان الذی انزل فیہ القران “۔ ” یہ رمضان کا وہی مہینہ ہے، جس میں قرآن اتارا گیا۔ ” اسی مبارک ماہ کی ایک شب تھی جب اس شاہد رعنا نے اپنے چہرہ سے نقاب الٹا ہے، ارشاد ہوتا ہے کہ ہم نے اسے ایک شب مبارک میں اتارا ہے۔ (آیت) ” انآ انزلنہ فی لیلۃ مبرکۃ اناکنا منذرین۔ فیھا یفرق کل امر حکیم۔ امرا من عندنا اناکنا مرسلین، رحمۃ من ربک، انہ ھو السمیع العلیم، رب السموت والارض وما بینھما، ان کنتم موقنین لاالہ الا ھو یحی ویمیت ربکم ورب ابآئکم الاولین (دخان۔ ع 1) ” ہم ہمیشہ اسی طرح ڈراتے رہے ہیں، اسی شب میں ہر حکمت والی بات کا فیصلہ ہوتا رہتا ہے۔ چناچہ یہ حکم بھی ہماری ہی طرف سے ہے، اور ہم ہمیشہ بھیجتے ہی رہتے ہیں۔ یہ تیرے رب کی طرف سے رحمت ہی ہے، جو سب کچھ سننے والا اور جاننے والا ہے۔ آسمانوں کا اور زمین کا اور جو کچھ انکے درمیان ہے، ان سب کا وہی پروردگار ہے، اگر تم یقین رکھتے ہو، وہی معبود جس کے سوا کوئی نہیں، زندگی اور موت سب اسی کے ہاتھ میں ہے، اور وہی رب ہے تمہارا اور تمہارے اگلے باپ دادوں کا “۔ اہل تفسیر میں اس کی بڑی بحث چلی آتی ہے کہ ” امر حکیم “ (حکمت والی بات) کے فیصلہ سے کیا مراد ہے، حالانکہ سیاق عبارت پر اگر نظر رہے، اور (آیت) ” رحمۃ من ربک “۔ ” ھوالسمیع العلیم “۔ ” رب السموت والارض “۔ اور ” ھو یحی ویمیت “۔” ربکم ورب ابآئکم الاولین “۔ کے لطیف اشارات کی روشنی سے کام لیاجائے تو یہ حقیقت بالکل واضح ہوجاتی ہے کہ ” سب کے حالات سے واقف “ ، سب کے پرورش کرنے والے “ اور ” سب کی زندگی اور موت پر حاکم “ کے ہاں سے جس ” رحمت کا نزول “ ہوگا، وہ یہی ہوسکتی ہے کہ سب کو ربوبیت کے قانون سے آگاہ کردیا جائاے، اور سب کو زندگی اور موت (زندگی کا لفظ شخصی وقومی ہر زندگی پر حاوی ہے) کے اصول بتائے ہیں، قرآن حکیم کا اصلی کام یہی ہے، اور اس کی تعلیم ربوبیت کے قانون کو توضیح کرتی ہے، اور افراد واقوام کو زندگی بخشتی ہے، نزول قرآن، اسی معنی میں دنیا کے لئے سب سے بڑی رحمت اور نعمت ہے، یہی سب سے بڑی رحمت اس شب مبارک کو نازل ہوئی تھی، اور اسی کی یادگار میں، اسی کے ماتحت ہر سال اسی شب کو جزئیات وتفصیلات سے متعلق ہر ” امر حکیم “ ہر حکمت والی بات کا نزول وتصفیہ ہوتا رہتا ہے۔ قرآن حکیم ہی کی ابتدائی نزول کی گھڑی کو، جسے ایک جگہ شب مبارک (لیلۃ مبارکۃ) سے موسوم کیا گیا ہے، دوسری جگہ شب قدر “ (لیلۃ القدر) کے خطاب گرامی سے یاد فرمایا ہے۔” (آیت) ” انآ انزلنہ فی لیلۃ القدر، وما ادرک ما لیلۃ القدر لیلۃ القدر خیر من الف شھر “۔ ہم نے اس قرآن کو شب قدر میں اتارا ہے، اور تم سمجھے کہ شب قد ر ہے کیا چیز ؟ شب قدر وہ برتر اور گرامی شب ہے، جو ہزار مہینوں سے بھی بہتر ہے ، ! بعض اہل شرح کی طرح یہاں اس الجھاؤ میں پڑنے کی مطلق حاجت نہیں کہ ” قدر “ یہاں اپنے کسی لغوی معنی میں آیا ہے، آیابمعنی حکم وقضا اور یا بمعنی شرف وتعظیم ! بہر صورت جو بھی پہلو اختیار کیا جائے، اس شب مبارک کی بےحد و حساب وبزرگی، خود آیۃ کریمہ (آیت) ” خیر من الف شھر “۔ بیان کر رہی ہے۔ یعنی وہ ایک رات جو ہزار مہینوں، ہزار ہا ہزار مہینوں، بلکہ ہر محدود اور شمار کی ہوئی مدت سے بڑھ چڑھ کر ہے ! جس مبارک رات کو قرآن جیسی بےنظیر نعمت دنیا کو ملی ہو، آسمانوں اور زمینوں کے فرمانروانے خاک کے پتلے کو اپنے محفوظ کلام کے شرف سے سرفراز کیا ہو، اس کی رحمتوں اور برکتوں کا احاطہ کرنا، انسانی دماغ کے تراشے ہوئے علم الحساب کے اعداد سے بھلا کس طرح ممکن ہے۔ (2) ؟ یہ شب مبارک آتی کب ہے ؟ روح وجان کے عالم میں بہار کے موسم کا نام، ماہ رمضان ہے، اس ماہ مبارک کا سب سے زیادہ مبارک زمانہ اس کا آخری عشرہ ہوتا ہے، پھول کوئی بھی کھلتا ہے، چمن مہکنے لگتا ہے، لیکن گلاب کی کلی جب کھلتی ہے تو اس وقت چمن کی مہک ہی کچھ اور ہوجاتی ہے۔ رمضان کا آخری عشرہ چمن میں گلاب کے کھلنے کا زمانہ ہوتا ہے۔ پاکوں اور پاکبازوں کا سردار، اس عشرہ بھر، ذکر و عبادت الہی کیلئے وقف رہتا تھا۔ (3) (گو وہ کون سازمانہ ہوتا تھا جب وہ عبادت الہی کیلئے وقف نہ ہوتا تھا ؟ ) اسی عشرہ کی کسی مقدس رات میں وہ مقدس گھڑی آجاتی ہے، جس کی فضیلتوں اور برکتوں کی شرح و تفصیل کے لئے لفظ وعبارت کا دفتر ناکافی ہے۔ اسی دولت بےبہا کی تلاش میں اگر انسان اپنی راتوں کی نیند بھی نہ قربان کرسکے، تو یقیناً اس کے دل کو اس قدر والی رات کی ذرا بھی قدر نہیں ! اس کے تعین سے اسی لئے قصدا ومصلحتا بےالتفاتی برتی گئی ہے، اور وہ رات جو (آیت) ” سلم، ھی حتی مطلع الفجر “۔ ” شام سے صبح تک سرتا سر رحمت ہی رحمت ہے “۔ اس کی بابت دنیا کا سب سے بڑا حکیم اپنی امت سے یہ ارشاد فرما گیا ہے کہ ” اس کو تلاش کرو آخر عشرہ رمضان کی طاق راتوں میں (4) “ جن جاگے ہوئے دلوں کی آنکھیں ” آج “ ان راتوں کو کسی کی یاد میں جاگ جاگ کر کاٹیں گی ،” کل “ وہ خود محسوس کریں گے کہ ان کی آنکھیں نہیں، ان کا نصیبہ جاگ رہا تھا ! (منقول از سچ، لکھنو۔ 9 اپریل 1926 ء۔ ) (1) ایک قلیل گروہ اس جانب گیا ہے کہ اس شب مبارک سے مراد شعبان کی پندرھویں ہے، لیکن محققین کا اتفاق ہے کہ اس مراد لیلۃ القدر ہی ہے۔ اور لیلۃ القدر، بلااختلاف، رمضان مبارک ہی کی کوئی آخری شب ہے۔ عن قتادۃ فی قولہ لیلۃ مبارکۃ قالھی لیلۃ القدر (ابن جریر) قال ابن زید فی قولہ تعالیٰ اناانزلنہ فی لیلۃ مبارکۃ قال تلک اللیلۃ لیلۃ القدر (ایضا) (2) التحدید بالالف لامفھوم لابل الغرض منہ التکثیر (مفتی محمد عبدہ مصری (رح) بیضاوی، بحرالمحیط، روح المعافی سب میں یہ قول نقل ہوا ہے کہ ہزار راتوں سے مراد کوئی متعین عدد نہیں، بلکہ محض تکثیر مراد ہے۔ (3) عن عائشۃ ؓ قالت کان رسول اللہ ﷺ یجتھد فی العشر الاواخر مالا یجتھد فی غیرہ (مسلم) (4) عن عائشۃ ؓ ان رسول اللہ ﷺ قال تحروا لیلۃ القدر فی الوتر من العشر الاواخر من رمضان (بخاری)

9۔ روایات متفق ہیں کہ اس مصیبت سے مراد وہ شدید قحط ہے جو اہل مکہ پر پڑنے والا تھا اور کچھ روز بعد پڑا، ہوا کہ جب ہجرت کے بعد بھی اہل مکہ کا عناد کم نہ ہوا بلکہ بڑھتا گیا تو عاجز آکر رسول اللہ ﷺ انکے حق میں بددعاء کی، اثر کا ظہور یوں ہوا کہ ادھر بارش رکی اور ادھر یمامہ (علاقہ یمن) کے رئیس ثمامہ نے جواب مسلمان ہوچکے تھے غلہ بھیجنا بند کردیا، مکہ کی غلہ کی منڈی یمامہ ہی سے تھی، اب قحط پورا ہوگیا۔ ذلک حین دعا رسول اللہ ﷺ علی قریش ربہ تبارک وتعالیٰ ان یاخذھم بسنین کسنی یوسف فاخذوا بالمجاعۃ (ابن جریر) حضرت عبداللہ بن مسعود صحابی ؓ نے بڑے زور وتاکید کے ساتھ آیت کے یہ معنی بیان کئے ہیں۔ قحط اتنا سخت تھا کہ لوگوں نے مردار کا گوشت، کھال ہڈیاں سب کھانا شروع کردیں تھیں۔ وفی روایۃ اخری صحیحۃ ..... حتی اکلوا المیتۃ والجلد والعظام (روح) (آیت) ” دخان مبین “۔ بھوک کی شدت اور دماغ کی خشکی میں، فضائے آسمانی میں دھواں سانظر آنے لگتا ہے، اسی کو یہاں آسمانی دھوئیں سے تعبیر کیا ہے۔ یقال ان الجائع کان یری بینہ وبین السماء دخانا من شدۃ الجوع (تاج) عنی بالدخان ماکان یصیبھم حینئذ فی ابصارھم من شدۃ الجوع من الظللۃ کھیءۃ الدخان (ابن جریر) دخان کا اطلاق عربی میں مطلق مؤذی پر بھی مجازا واستعارۃ ہوتا ہے۔ وتصور منہ التاذی بہ فقیل ھو دخن الخلق (راغب) (آیت) ” دخان “۔ کے معنی خشکی کے اور بھوک سے فضا کی دخان منظری کے بھی آئے ہیں، بلکہ خود شدت بھوک کے معنی بھی۔ والدخان الجدب والجوع (تاج) وقیل بل قیل اللجوع دخان (تاج) فالدخان یحتمل ان یراد بہ الشدۃ والشر مجازاوان یراد بہ حقیقۃ (روح)

10۔ یہ پیش گوئی اس طرح پوری ہوئی کہ قریش کے سردار ابو سفیان وغیرہ نے آپ ﷺ کو لکھا بھی اور آپ کے پاس آئے بھی کہ آپ سے دعاء کرائیں۔ لما اشتد القحط بقریش مشی ابوسفیان الی رسول اللہ ﷺ وناشدہ الرحم وواعدہ ان دعالھم وزال مابھم امنوا (روح)

11۔ بیسویں صدی کے بڑے بڑے فرنگی ” علماء ومحققین “ آخر اس منزل سے آگے نہ بڑھ سکے جو معاند کفار ومشرکین قریش کی تھی ! وہ لوگ بھی قرآن کے لفظی ومعنوی اعجاز کی طرف سے آنکھیں بندکئے یہی رٹ لگائے ہوئے تھے کہ یہ کلام کسی اور کا سکھایا پڑھایا ہوا ہے۔ اور آج یورپ وامری کہ کے بڑے بڑے مشتشرقین کا بھی ” منتہائے تحقیق “ بس اسی قدر ہے کہ یہ کتاب محمد عربی ﷺ نے کچھ ادھر ادھر سے سن سنا کر تیار کردی ہے ! (آیت) ” رسول مبین “۔ یعنی ایسے پیغمبر جن کی صداقت وحقانیت دلائل ومعجزات کی کثرت سے بالکل واضح وظاہر ہے۔ اے رسول عظیم الشان ظاھر امر رسالتہ بالایات والمعجزات (روح) وھو ماظھر علی رسول اللہ ﷺ من الایات والبینات من الکتاب المعجزوغیرہ من المعجزات (کشاف)

12۔ یعنی اتمام حجت کے لئے ہم اس بھوک کے عذاب کو دور بھی کردیں گے لیکن اس سے حاصل کیا ہوگا ایمان لانا تو الگ رہا۔ یہ جو نرمی اور شکستگی پیدا ہورہی ہے، یہ بھی جاتی رہے گی اور بدستور عناد و استکبار پر آجاؤ گے۔ یہ سب بطور پیش گوئی کے تھا، اور واقع میں ظہور اس کا یوں ہوا کہ آپ ﷺ نے دعا فرمائی اور ثمامہ نے بھی آپ ﷺ کا سفارش نامہ پاکر غلہ کی بندش دور کردی، لیکن اس فارغ البالی کے نصیب ہوجانے پر مشرکین کی مخالفت کا زور شور لوٹ آیا۔

13۔ یعنی پوری سزا آخرت میں ملے گی۔

14۔ حضرت موسیٰ (علیہ السلام) کا اہل فرعون کے پاس آنے اور حق تعالیٰ کا پیام پہنچانے کا ذکر ایک نئے عنوان سے ہے۔ قبلھم۔ ضمیر ھم معاصر مشرکین مکہ کی جانب ہے۔ اے قبل ھؤلآء المشرکین (مدارک) (آیت) ’ ’ رسول کریم “۔ کھلی ہوئی مراد حضرت موسیٰ (علیہ السلام) سے ہے۔ (آیت) ” ان ادوا “۔ ان۔ یہاں تفسیر ہے۔ (آیت) ” ان .... اللہ “۔ عباد اللہ سے مراد بنی اسرائیل ہیں، کہ انہیں میرے سپرد کردو۔ میں انہیں لے کر مسلک توحید پر چلانے کیلئے اپنے پرانے وطن شام کی طرف چلا جاؤں گا۔ (آیت) ” سلطن مبین “۔ اس کے تحت میں دلائل وخوارق سب آگئے۔ (آیت) ” انی ..... ترجمون “۔ صاف اشارہ اس طرف ہے کہ فرعونیوں یا مصریوں نے آپ ﷺ پر سنگبازی کی ٹھان لی تھی، توریت میں بھی اشارے موجود ہیں :۔ ” اگر ہم مصریوں کی آنکھوں کے آگے وہ قربانی کریں، جس سے وہ بیزار ہیں، تو کیا ہمیں وہ پتھراؤ نہ کریں گے۔ “ (خروج۔ 8: 26) مرشد تھانوی (رح) نے اسی آیت کے تحت میں یہ نکتہ ارشاد فرمایا ہے کہ حق تعالیٰ کے سامنے التجا کرتے رہنا اور اپنی قوت کا دعوی نہ کرنا عین اظہار عبدیت ہے۔

15۔ یعنی کم از کم اتنا ہی کرو اور میری ایذاء کے درپے ہو کر اپنے جرم کو اور شدید تر تو نہ بناؤ۔ مرشد تھانوی (رح) نے فرمایا کہ آیت میں ایسے شخص سے قطع تعلق پر دلالت ہے جس کی اصلاح کہ امید نہ ہو۔

16۔ (معلوم ہوتا ہے کہ یہ ایمان نہ لائیں گے اور وقت ان کی گرفت ہی کا آپہنچا ہے)

17۔ یعنی آپ (علیہ السلام) کے لئے تو سمندر میں راستہ کردیا جائے گا اور سمندر کا کچھ حصہ آپ (علیہ السلام) کیلئے خشک کردیا جائے گا، آپ (علیہ السلام) اسے اسی سکون کے حال میں چھوڑ کر چلے جائیے گا۔ اور اسی فکر واندیشہ میں نہ پڑئیے گا کہ فرعون بھی تو اسی راستہ سے آجائے گا۔ چناچہ آپ (علیہ السلام) اس ارشاد باری کی تعمیل میں بنی اسرائیل کو لے کر راتی راتا ہی نکل گئے اور صبح کو آپ (علیہ السلام) کا تعاقب بھی ہوا۔

18۔ یعنی اسی نسل کی بعد ایک دوسری نسل مصر اور اس کے سارے تعیشات پر حکاکم و متصرف ہوگئی اور ان لذتوں اور راحتوں کے سامان پر فرعونیوں کو دوام نہ ہوسکا۔ (آیت) ” کم ترکوا “۔ کم اظہار کثرت کیلئے ہے۔ کم عبارۃ عن الکثرۃ (مدارک) (آیت) ” قوما اخرین “۔ اس سے اشارہ اگر بنی اسرائیل ہی کی طرف سمجھا جائے جیسا کہ بعض مفسرین نے سمجھا ہے تو (آیت) ” اور ثنھا “۔ سے مراد یہ نہ رہے گی کہ انہیں بعینہ فرعونیوں ہی کی چھوڑی ہوئی نعمتیں عطا کیں، بلکہ مراد نفس وہ نعمتیں (سرسبز کھیتیاں، شاداب باغ بہتے ہوئے چشمے وغیرہ) ہوں گی، جو بنی اسرائیل کو شام و فلسطین یا کہیں بھی عطا ہوئی ہوں۔

19۔ پہلے یہ حقیقت ذہن نشین کرلی جائے، کہ کائنات کی کوئی سی بھی شے ہو، بڑی سے بڑی یا چھوٹی سے چھوٹی۔ احساس و شعور کسی نہ کسی درجہ میں ضرور رکھتی ہے۔ اس کے بعد یہ سمجھئے کہ آسمان اور زمین میں بھی ان کے مرتبہ کے لائق شعور موجود ہے۔ اسی سے وہ مومن کے مرتبہ کا ادراک کرکے اس کی وفات پر غمگین ہوتے ہیں۔ حکیم کائنات ودانائے فطرت محمد رسول اللہ ﷺ نے فرمایا ہے :۔ مامن عبد الاولہ فی السماء بابان باب یخرج منہ رزقہ وباب یدخل منہ عملہ وکلامہ فاذا مات فقداہ وب کیا علیہ (جامع ترمذی) مومن جب مرجاتا ہے تو آسمان کا وہ دروازہ جس سے اس کے عمل کا صعود ہوتا تھا اور وہ دروازہ جس سے اس کے رزق کا نزول ہوتا تھا اس پر روتے ہیں۔ اور آپ ﷺ کے رفیق وتلمیذ خاص حضرت علی ؓ سے مروی ہے کہ :۔ واخرج ابن المنذر وغیرہ عن علی ؓ انہ قال ان ال مومن اذا مات بکی علیہ مصلاہ من الارض ویصعد عملہ من السماء (روح) ” جب مومن مرتا ہے تو زمین میں اس کے نماز پڑھنے کی جگہ اور آسمان میں اس کے عمل کے صعود کرنے کی جگہ یہ دونوں اس پر روتی ہیں۔ “ (آیت) ” علیھم ..... کانوا “۔ ضمیر جمع غائب سے دونوں جگہ وہی قوم فرعون ہے جس کا ذکر اوپر سے چلا آرہا ہے۔ (آیت) ” فما ..... الارض “۔ یہ اثر تھا ان لوگوں کی کمال مبغوضیت کا۔ زمین، آسمان کسی کو بھی ان پر رونا نہ آیا، اور کسی کو بھی ان سے ہمدردی پیدا نہ ہوئی۔ (آیت) “ وما کانوا منظرین “۔ یہ اثر تھا ان کے کما مغضوبیت کا کہ ذرا بھی مہلت نہ پائی۔ اگر ابھی مہلت زندگی پاجاتے تو عذاب الی سے چندے اور بچے رہتے۔

20۔ بنی اسرائیل کی فضیلت و فوقیت کا بیان کئی بار آچکا ہے۔ اور اس کی توضیح سورة البقرۃ (پ 1) کے حاشیوں میں آچکی ہے۔ یہاں یہ بتایا ہے کہ یہ افضلیت واشرفیت یوں ہی اٹکل پچو بلاوجہ نہ تھی، خاص مصالح تکوینی کے ماتحت تھی۔ (آیت) ” بنی اسرآء یل۔ العذاب المھین۔ فرعون “۔ فرعون، بنی اسرائیل اور ان پر سختیاں، ان سب پر حاشیے سورة البقرۃ (پ 1) میں گزر چکے۔

21۔ مثلا دولت توحید، نعمت رسالت، اور پھر دنیوی حکومت وعزاز۔ (آیت) ” بلاء “۔ یہاں مصیبت کے معنی میں نہیں، انعام کے معنی میں ہے۔ اے نعمۃ ظاھرۃ (کشاف، روح) بلاء کے عام متداول معنی یہی لئے جاسکتے ہیں، یعنی ان نشانات کے ذریعہ سے خوب آزمائش اور تجربہ ہوگیا۔ اے اختبارظاھر جلی لمن اھتدی بہ (ابن کثیر) اختبار ظاھر لننظر کیف یعملون (روح)

22۔ یہ کہنے والے عصر قدیم کے ” روشن خیال “ مادیین اور عرب کے فطرت پرست دہریین تھے، حشر ونشر وعالم آخرت کے قطعی منکر، یہ مسلمانوں کو چیلنج دیکر اور اپنی ” روشن خیالی “۔ کے پر فخر مظاہرہ کے ساتھ کہتے تھے کہ ہم مذہب ووذھب کے ڈھکوسلوں کے سرے سے قائل ہی نہیں۔ ہم تو صرف حواس ظاہری ومشاہدہ کو مانتے ہیں، تو اگر واقعی کسی مردہ کو زندہ کرکے دکھا دو تو بیشک ہم قائل ہوجائیں، مغیبات مجردات میں آج بھی مشاہدہ و تجربہ کا مطالبہ اس قدیم ذہنیت کی صدائے باز گشت ہے۔

23۔ یعنی نافرمانی و قانون شکنی تو ایسی چیز ہے جس کی سزا ان مجرموں سے کہیں زائد قوت ومقدرت والوں کو مل کر رہی ہے۔ تو یہ بیچارے کس شمار وقطار میں ہیں۔ (آیت) ” خیر “۔ خیر کا مفہوم ہمیشہ اخلاقی وروحانی ہی پہلو نہیں رکھتا، مادی، مالی، جسمانی فوقیت کا اظہار بھی اسی لفظ سے ہوتا رہتا ہے۔ یہاں اسی دنیوی جاہ وحشم مادی قوت و سامان میں اظہار فوقیت کیلئے ہے۔ (آیت) ” قوم تبع “۔ جس طرح ملوک مصر کالقب فرعون تھا۔ اسی طرح جنوب عرب کی سلطنت یمن کے بادشاہوں کے ایک خاندان کا لقب تبع تھا۔ یہ اپنے وقت کے بڑے عظیم الشان وجلیل القدر فرمانروا تھے۔ اور ان کے حدود سلطنت علاوہ حمیر، حضرموت اور سارے علاقہ سبا کے شمال میں شمالی عرب تک اور مغرب میں افریقہ تک وسیع تھے۔ اور یہ خاندان کوئی ڈھائی سو سال فرماں روارہا۔ اور ان کے زمانہ کا تخمینہ ظہور اسلام سے ساتھ آٹھ صدیوں قبل کا کیا گیا ہے۔ اہل لغت کا بیان ہے کہ تبع ان بادشاہوں کو ان کی کثرت اتباع کی بنا پر کہتے ہیں۔ ابن ہشام میں ابن اسحاق کے حوالہ سے ہے کہ : قال ابن اسحاق وکان قد جعل طریقۃ حین اقبل من الشرق علی المدینہ وکان قدمربھا فی بدء تہ۔” اس نے مدینہ سے (یمن تک) سڑک بنوادی تھی، جب مشرق سے مدینہ کو آیا تھا اور اسی سڑک سے اپنے وطن کو آتا جاتا تھا۔ “ بہرحال اہل عرب تبع کی عظمت وشان سے خوب اچھی طرح واقف تھے۔ بلکہ ان کے ہاں تبع کی عظمت و جلالت بطور ضرب المثل کے مشہور زبان زد تھی، (آیت) ” ھم “۔ ضمیر عرب معاصرین کی جانب ہے جن کا ذکر ابھی آیات ماقبل میں آیا ہے۔

24۔ اس میں رد آگیا اس ان ساری جاہلی قوموں کا، جو یہ سمجھتی ہیں کہ یہ ساری کائنات محض ایک تماشہ گاہ ہے۔ اور خالق کائنات کو (نعوذ باللہ) محض ایک میلہ رچانا (تماشہ کرنا) مقصود تھا۔ قرآن مجید اس کی بار بار تردید کرتا ہے اور بتاتا ہے کہ اس کارخانہ آفرینش سے بڑے بڑے اہم مقصود ہیں ..... اکبر الہی آبادی (رح) کے الفاظ ہیں۔ ع : اکبر اس فطرت خاموش کو بےحس نہ سمجھ، ہاں بصیرت سے تہی دیدۂ نرگس نہ سمجھ۔ (آیت) ” ماخلقنھما الابالحق “۔ یعنی ان کی آفرنیش میں بڑی بڑی غایتیں اور مصلحتیں پنہاں ہیں۔ اور ان میں سے ایک بڑی حکمت قانون مجازات ومکافات کا اجراء ونفاذ ہے۔ (آیت) ” ولکن اکثرھم لایعلمون “۔ کثرت سے لوگ عقیدہ حشر ہی کے منکر ہیں اور جو مانتے ہیں ان میں بھی بہت سے عملا اس کو اہمیت کو بھلائے ہوئے ہیں۔