54. Surah Al-Qamar

نوح، عاد، ثمود، صالح، لوط اور فرعون کی قوموں کا ذکر عبرت کے لئے تشریح : ان آیات میں انسان کو چاہے وہ کسی دور اور کسی بھی زمان و مکان سے تعلق رکھتا ہو بڑے ہی واضح الفاظ میں بڑی اچھی طرح سمجھا دیا گیا ہے کہ انسان کی نجات اس کی بڑائی اور اس کی بہتری صرف اور صرف اس بات میں ہے کہ وہ قرآن کو غور سے پڑھے سمجھے اور یاد رکھ کر اس کی ہدایت پر عمل کرے اس بات کو مزید واضح کرنے کے لیے ان تمام گزری ہوئی قوموں کا حوالہ دیا گیا ہے جنہوں نے اپنی ہٹ دھرمی، بےوقوفی اور گمراہی کی وجہ سے اپنے پیغمبروں کو جھٹلایا، ان پر تہمتیں لگائیں ان کو برا بھلا کہا بلکہ قتل تک کردیا تو ایسے لوگ ایسی قو میں باالاخر اللہ کے عذاب کا نشانہ بنیں، تباہ و برباد کردی گئیں اور دنیا میں ان کی کہانیاں صرف عبرت سکھانے کے لیے باقی رکھی گئیں۔ پھر یہ بھی واضح کردیا گیا کہ عذاب اور قدرتی حادثات میں بڑا واضح فرق ہے وہ یوں کہ مثلاً حضرت نوح (علیہ السلام) نے عذاب آنے سے پہلے قوم کو اس عذاب سے آگاہ کردیا تھا اسی لیے بچاؤ کے لیے اللہ کے حکم سے کشتی تیار کی۔ اللہ کا ہر کام بڑے حساب کتاب اور اندازے سے بڑی حکمت سے ہوتا ہے۔ وہ کسی قوم کو بےقصور تباہ نہیں کرتا اور نہ ہی کسی شخص کو بےقصور سزا دیتا ہے وہ ہمیشہ عذاب آنے سے پہلے اعلان کروا دیتا اور عذاب آنے پر اپنے نیک پاک متقی پرہیزگار بندوں اور اپنے پیغمبروں کو اس عذاب سے بچا لیا کرتا۔ قرآن پاک کیا ہے ؟ ایک بہت ہی آسان، جامع، واضح اور علم و عرفان، واعظ و نصیحت سے بھری ہوئی اللہ کی کتاب ہے جو انسانوں کی ہدایت اور رہنمائی کے لیے رحمتوں اور برکتوں سے بھری ہوئی ہے۔ جس میں ہر ہر طرح سے بار بار ڈرایا گیا ہے کہ سزا کے دن سے ڈرو کیونکہ وہ بڑا سخت دن ہوگا۔ دنیا میں سر کشی، ظلم و ستم، کفر و نافرمانی، فخر و غرور اور گناہوں سے بھری زندگیاں گزارنے والے دنیا میں بھی ذلیل و خوار ہوتے ہیں اور آخرت میں آگ کا درد ناک عذاب دیا جائے گا۔ یہ بات یہ غیب کی خبریں یہ ڈرانے، سمجھانے اور خبردار کرنے والی باتیں اس جلیل القدر غالب اور زبردست الہ العٰلمین کی کہی ہوئی ہیں جو ہر کام آنکھ جھپکنے کی دیر میں کرلیتا ہے۔ اس کا بندوبست اس کا نظام کار اور اس کی قدرت اتنی حیرت ناک اور ناقابل فہم ہے کہ کوئی اس کا اندازہ بھی نہیں کرسکتا۔ انسان کی زندگی دنیوی اوراخروی سنوارنے کے لیے قرآن بھیجا گیا اور اس پر غور و فکر کرنے کی تاکید کی گئی مثال کے طور پر اسی سورة مبارکہ میں آیات 32, 22, 17 اور 40 میں یہی تاکید کی گئی ہے ' ہم نے اس قرآن کو سمجھنے کے لیے آسان کردیا ہے پھر کیا ہے کوئی اس نصیحت کو قبول کرنے والا۔ (40, 32, 22, 17) قرآن کو سمجھنے کا بہترین طریقہ تذکیر ہے۔ یعنی یاد کرنا سمجھنا اور دوسروں کو نصیحت کرنا۔ ان دونوں کا مفہوم ہم یوں سمجھ سکتے ہیں۔ کہ کسی بھی مضمون کو جب ہم بار بار غور سے پڑھتے ہیں تو اس کا اصل مقصد ہمارے سامنے روشن ہونے لگتا ہے۔ جب روشن ہونے لگتا ہے تو پھر دل و دماغ نفس کو مجبور کرنے لگتے ہیں کہ اس پر عمل بھی کیا جائے اور یوں وہ مضمون ہماری زندگی کا حصہ بن جاتا ہے۔ اور جب ہماری زندگی کا حصہ بن جاتا ہے تو پھر ہم اس کا ذکر دوسروں سے ضرور کرنے لگتے ہیں۔ جب اس کی اچھائیاں دوسروں کو بتانے لگتے ہیں تو اس کے وہ چھپے ہوئے نکات بھی ابھر کر ہمارے سامنے آنے لگتے ہیں جو ہماری نظر سے نہ گزرے تھے اور یوں ان آیات کا مطلب واضح ہوجاتا ہے کہ قرآن کوئی مشکل اور نہ سمجھ آنے والی کتاب نہیں ہے۔ بس ذرا سا غور کرو تو یہ تمہیں سمجھ آنے لگے گا۔ پھر اس کو بار بار پڑھو تو اور بھی واضح ہو کر تم پر اثر کرنے لگے گا پھر دوسروں کو سکھاؤ گے تو اس کے مضامین اور بھی آسان اور واضح ہو کر تمہارے سامنے آنے لگیں گے اور پھر اسی کے اصول ہی تمہارا اوڑھنا بچھونا بن جائیں گے یعنی تمہاری پوری زندگی ہی قرآن کے گرد گھومنے لگے گی۔ ہماری بد قسمتی، لاپرواہی اور بےوقوفی اس سے بڑھ کر اور کیا ہوگی کہ ہم نہ اس کو پڑھتے ہیں نہ غور کرتے ہیں اور نہ ہی عمل کرتے ہیں۔ اتنی بڑی نعمت سے بالکل فائدہ نہیں اٹھاتے حالانکہ ہم مسلمان ہیں۔ رسول کریم ﷺ نے فرمایا کہ اللہ تعالیٰ انسان کی شہ رگ سے بھی زیادہ قریب ہے۔ اس قربت کی وجہ سے اللہ نے انسان کو اشرف المخلوقات کا درجہ دیا ہے۔ انسان کی عظمت جو اللہ نے اسے دی ہے اتنی لاجواب ہے کہ اگر انسان اپنے دل، دماغ اور روح کو شیطان سے دور کرلیتا ہے تو خدائے بزرگ و برتر جوالہ لعٰلمین ہے تو ایسے پاکیزہ دل میں اس کی محبت سما جاتی ہے اور اس بلند وبالا مقام کے بارے میں ہی حضور ﷺ کا فرمان ہے۔ ' جس نے پہچانا اپنے نفس کو اس نے پہچانا اللہ تعالیٰ کو۔ اور یہ پہچان ہی انسانیت کی تکمیل ہے۔ اسی تکمیل انسانیت کے لئے اللہ نے بار بار فرمایا ہے :” ہم نے اس قرآن کو سمجھنے کے لئے آسان کردیا ہے، پھر کیا ہے کوئی ؟ اس نصیحت کو قبول کرنے والا “۔ (آیت 40) مولانا وحید الدین خان صاحب بڑی خوبصورت بات کہتے ہیں۔ ایمان میں زیادتی کس طرح ہوتی ہے۔ اس کا پہلا ذریعہ تفکر و تدبر ہے۔ انسان خدا کی باتوں کو پڑھتا ہے، وہ خدا کی چیزوں میں غور کرتا ہے (آل عمران 191) اس طرح حق و صداقت کی نئی نئی تجلیاں اس پر منکشف ہوتی ہیں پھر وہ اہل ذوق کے ساتھ ان پر مذاکرہ کرتا ہے جیسا کہ عمر فاروق ؓ نے کہا : تَعَالَ نُؤْمِنْ سَاعَۃً ، ھَلُمَّ فَلْنَذْکُرَ رَبَّنَا۔ اس طرح فکری تبادلہ کے ذریعہ ہر ایک اپنے علم کو بڑھاتا ہے ہر ایک اپنی معرفت میں اضافہ کرتا ہے۔ (از دین انسانیت) مطلب یہ ہے کہ انسان ہر وقت اپنے ذہن کی کھڑکیوں کو کھلا رکھے ہر صورت اور ہر وقت علم و عرفان، مطالعہ، مشاہدہ اور مذاکرہ و تدبر و تفکر قرآن میں مشغول رہے۔ اللہ نے حکم دیا ہے کہ انسان کو یہ دعا کرتے رہنا چاہیے۔ اور کہو اے میرے رب ! میرا علم زیادہ کر دے۔ (طہ 114) سورة القمر کی آیت 10 میں مقبول و مشہور دعا ہے جس کی فضیلت یہ بیان کی گئی ہے کہ تکلیف اور پریشانی میں بڑی موثر دعا ہے۔ ' یا اللہ ! میں ان سے کمزور ہوں تو ان سے بدلہ لے۔ (آیت 10) اللہ تعالیٰ کی قدرت، کبریائی، طاقت اور تدبر کسی سے پوشیدہ نہیں مگر سوائے ان لوگوں کے جو دنیا کی زندگی میں گم ہو کر سب کچھ بھلائے بیٹھے ہیں۔ تو ایسے لوگوں کو ہوش میں آنا چاہیے اور قرآن پاک کی اس غیب کی خبر کی طرف توجہ کرنی چاہیے کہ قیامت آنے والی ہے اور وہ تو اتنی اچانک آئے گی کہ جتنی آنکھ جھپکنے میں دیر لگتی ہے۔ اور پھر دوبارہ زندہ کئے جائیں گے اور ہر شخص اپنے دنیا میں کئے گئے اعمال نامے کے ساتھ حاضر کیا جائے گا۔ یہ بات اتنی ہی سچ ہے جتنی ہماری یہ زندگی سچ ہے۔ قرآن و احادیث اور جدید سائنس کی روشنی میں یہ بات ثابت ہوچکی ہے کہ انسان کا مرنا یقینی ہے دوبارہ زندہ ہو کر حساب کتاب دینا ضروری ہے اور سزاء اور جزا پانا بھی ضروری ہے۔ جیسا کہ رب العزت نے فرمایا۔ اس روز منہ کے بل دوزخ میں گھسیٹے جائیں گے اب آگ کا مزہ چکھو۔ (آیت 48)