40. Surah Al-Ghaafir

توحید و قرآن کی سچائی تشریح : جب اوپر آیات میں اللہ کی صفات میں سے کچھ تھوڑی سی صفات کو ہم غور سے سمجھ جاتے ہیں تو پھر اللہ کو ایک ماننا اور اس کی بھیجی ہوئی کتاب قرآن پر یقین کرنا کوئی مشکل بات نہیں رہ جاتی۔ ہم پر توحید کی وضاحت کچھ یوں ہوتی ہے : 1۔ اللہ تعالیٰ کی تمام صفات پر یوں یقین کرنا کہ کوئی دوسرا اس میں کسی صورت اس کا شریک نہیں ہوسکتا۔ 2۔ اس لیے صرف اور صرف اسی کی عبادت لازم ہے۔ 3۔ جب عبادت اسی کی ہوگی تو ہر قسم کی دعا اور پکار بھی اسی سے ہی ہوگی۔ وہی دعائیں سنتا اور پوری کرتا ہے۔ 4۔ اس پر اس قدر مضبوط بھروسہ ہونا ضروری ہے جس قدر حضرت موسیٰ نے فرعون کے مقابلے میں اللہ پر بھروسہ کیا اور کامیاب ہوئے۔ 5۔ اللہ کی خوشنودی حاصل کرنے کے لیے دل و جان، مال و اولاد اور ہر قسم کی خواہشات کو قربان کرنے کے لیے ہر وقت تیار رہنا اور کسی بڑی سے بڑی طاقت کے سامنے جھکنے سے انکار کردینا۔ یہی توحید کا مطلب ہے۔ سوائے کفار کے کون بیوقوف ہوگا جو اس سے انکار کرے گا ؟۔

کفار کا کردار اور اللہ کی عظمت و طاقت تشریح : یہاں کفار کی ہٹ دھرمی اور ضد بیان کی کئی ہے کہ اتنا کچھ دیکھ کر بھی کفار نہ اللہ پر یقین کرتے ہیں نہ رسول پر اور نہ ہی کتاب پر، پھر بنی پاک ﷺ کو پچھلی امتوں کا حوالہ دے کر بتایا گیا کہ آپ حیران پریشان نہ ہوں۔ کفار ہمیشہ یہی کرتے آئے ہیں۔ نبیوں کو جھٹلانا، کفر و شرک میں ڈوب کر زندہ رہنا اور پھر اللہ کے عذاب سے نیست و نابود ہوجانا، آخرت میں جہنم کے عذاب میں ہمیشہ کے لیے رہنا، یہ سب کچھ ان کو منظور ہے مگر حق کی راہ پر چلنا نامنظور ہے۔ حالانکہ یہ ایمان لا ناخود ان کے اپنے حق میں فائدہ مند اور نجات کا باعث ہے۔ اللہ کو تو ان کے ایمان سے کوئی فائدہ نہ پہنچے گا۔ کیونکہ اس کی سلطنت بڑی وسیع و عریض ہے اور فرشتے ہر وقت تسبیح و تقدیس میں مصروف رہتے ہیں۔ توحید پر ایمان لانے کی بڑی فضیلت اور بڑے فائدے ہیں جو انسانوں کے اپنے ہی کام آتے ہیں مثلا ً : 1 جب انسان اللہ کو معبود واحد مان کر پوری توجہ سے اس کی عبادت کرتا ہے اسی سے مدد مانگتا ہے تو پھر وہ دلیر ہوجاتا ہے۔ ہر قسم کے ڈر خوف، نقصان اور شیطان کے فریب سے محفوظ ہوجاتا ہے۔ 2 صرف ایک رب کو ہی سجدہ کرتا ہے اور جگہ جگہ عجرو انکساری کی ذلت سے بچ جاتا ہے۔ گویا رشوت و سفارش کا خاتمہ ہوجاتا ہے۔ 3 ایک ہی اللہ کی عبادت کرتے رہنے سے پوری امت مسلمہ میں وحدت، مساوات، ہمدردی، خلوص اور یک جہتی جیسی صفات پیدا ہوجاتی ہیں۔ اقوام عالم میں امت مسلمہ کی یہ خاص پہچان ہے۔ 4 اسلام کی تعلیم یہی ہے کہ اس میں ہر قسم کی طبقاتی، نسلی، علاقائی اور امیر و غریب کا فرق مٹ جاتا ہے۔ ایک ہی صف میں کھڑے ہوگئے محمود و ایاز نہ کوئی بندہ رہا نہ کوئی بندہ نواز (اقبال ) مسلمانوں کے اس عقیدہ توحید کا اثر اب تمام مذاہب میں کچھ یوں دکھائی دینے لگا ہے کہ بت پرست بھی ان بتوں کو اللہ تک پہنچنے کا وسیلہ کہنے لگے ہیں۔ مگر یہ قابل قبول نہیں ایسے لوگوں کو جہنم کا عذاب ضرور ملے گا۔ جبکہ مومنین کے لیے دنیا میں آسانیاں اور آخرت میں جنت کی خوشخبری ہے۔ کفار جہنم کے عذاب سے نکلنے کا طریقہ ڈھونڈھیں گے مگر کوئی راہ نہ پائیں گے۔ آیت گیارہ میں دو زندگیوں اور دو موتوں کا ذکر ہے جس کو ہم یوں واضح کرسکتے ہیں۔ پہلا یہ کہ مرنا اور زندہ ہونا حقیقت ہے جب کہ دوسرا یہ دنیا میں آنے سے پہلے عالم ارواح میں، ہم کیوں کہ مادی جسم نہـیں رکھتے تھے تو گویا موت میں زندہ تھے پھر جب مادی جسم میں روح پہنچی تو ہمیں پہلی موت سے پہلی زندگی ملی۔ تیسرا مرحلہ موت کا وہ ہے جس میں روح مادی جسم سے علیحدہ ہو کر موت کا درجہ بن جاتا ہے جبکہ روح عالم برزخ میں چلی جاتی ہے۔ چوتھا مرحلہ پھر وہ زندگی ہوگی جب روح دوبارہ جسم کے ساتھ مل کر زندگی مل جائے گی جو قیامت کے بعد کا معاملہ ہے اور یہ زندگی ہمیشہ کی زندگی ہوگی کیونکہ ہم زندگی مادی جسم اور روح کے ملنے کو کہتے ہیں۔ اور دونوں کے علیحدہ ہوجانے کو موت کہتے ہیں۔ یوں ہر انسان کی دو زندگیاں اور دو موتیں ہوتی ہیں۔ کفار کو جب جہنم میں ڈالا جائے گا تو وہ کہیں گے کہ اے اللہ ہم تیری طاقت کو مانتے ہیں اور اپنے گناہوں کا بھی اقرار کرتے ہیں۔ ہمیں کوئی راستہ بتا دو کہ یہاں سے نجات ہو سکے۔ تو اللہ کی طرف سے صاف انکار ہوگا۔ کیونکہ اقرار کرنے اور معافی مانگنے کا اللہ پر ایمان لانے کا وقت صرف دنیا والی زندگی میں تھا۔ اب وقت گزر چکا۔ یہاں پھر اللہ کی بڑائی، رحمت، برکت، بخشش اور قدرت کا ذکر کرتے ہوئے پھر نبی اور امت کو تاکید کی جا رہی ہے کہ ماحول اور لوگ چاہے کتنا ہی مجبور کریں کفر و شرک کی راہ سے دور رہنا اور ہدایت تو وہی پکڑتا ہے جو اس کی طرف رجوع کرتا ہے۔ (آیت :13) وہ مالک و خالق ہے وہ اپنے بندوں کو خوب اچھی طرح جانتا ہے۔ اس لیئے جن کو وہ اپنے بندوں میں سے چن لیتا ہے ان کو نبوت کے فرائض ادا کرنے کے لیے منتخب کرلیتا ہے۔ وحی کے ذریعہ اس کو اپنے احکامات بھیجتا رہتا ہے تاکہ لوگوں کو راہ دکھائے اور جہنم کے عذاب کی اطلاع دے۔ تاکہ وہ نیکی کی راہیں اختیار کریں۔ کیونکہ قیامت اور حساب کتاب ضرور ہوگا۔ اللہ اکیلا ہے، غالب ہے، حساب لینے والا ہے۔ یہاں وہاں ہر جگہ صرف اسی کی ہی بادشاہت ہے۔ وہ ظاہر باطن سب کچھ جانتا ہے۔ سننے والا ہے اور دیکھنے والا ہے۔ اور وہ قیامت کے دن فیصلہ کرے گا جو وہ فیصلہ کر دے گا اس میں کوئی شخص کمی بیشی کا اختیار ہرگز نہ رکھ سکے گا۔ پیغمبر کفار کو سب کچھ مسلسل بتاتے رہے مگر انہوں نے نہ سنا نہ مانا۔ تو یہ کفر کرتے تھے سو اللہ نے ان کو پکڑ لیا بیشک وہ قوت والا اور سخت عذاب دینے والا ہے۔ “ (آیت :22) ڈاکٹر برہان احمد فاروقی صاحب نے پیغمبر کی ضرورت اور ایمان کی مضبوطی پر بڑا اچھا مضمون دیا ہے لکھتے ہیں : کیونکہ دین حق کو عالمی سطح پر غالب کرنے کے لیے پہلے انفرادی سیرت کی تشکیل ضروری تھی جس کے لیے ایمان باللہ، ایمان بالآخرۃ، اعمال حسنہ اور اعمال سیہ (برے اعمال) کے مخصوص نتائج پر ایمان لانا ضروری تھا۔ اس کا اعادہ ابتدائی دور کی مکی سورتوں میں موجود ہے۔ افراد سے جماعت بنتی ہے۔ کم از کم دو فرد بھی مل کر جماعت بنا لیتے ہیں۔ جماعت کی تنظیم کے لیے تابع اور متبوع (اطاعت کرنے اور کروانے والا) کا ہونا بہت ضروری ہے۔ اس لیے صرف دو افراد بھی جماعت بلکہ منظم جماعت بن سکتے ہیں تو مکی زندگی میں مسلمانوں کی تعداد خواہ کتنی ہی کم کیوں نہ ہو ان کی جماعت بھی تھی کیونکہ آنحضرت ﷺ کے ” مطاع “ (تابع پیروکار) ہونے پر وہی محدود مسلم معاشرہ ایک صحیح قسم کا معاشرہ بن چکا تھا وہ منظم تھا اور ریاست کے لیے سب سے پہلے معاشرے کا منظم ہونا ضروری شرط ہے جس دین کو غالب بنانا مقصود تھا۔ جن افراد اور معاشرہ کا غلبہ دینا مطلوب تھا ان کے تمام ضروری اجزاء بنا دیئے گئے۔ افراد اور معاشرہ کو مربوط و مضبوط بنانے والی باتوں کی نشاندہی ان سورتوں میں کردی گئی۔ سب سورتوں کا مضمون ایک ہی ہے یعنی اللہ اور ہدایت۔ باقی تمام مضامین انہی کے تحت ہیں مثلاً : (1) آخرت (2) جزا و سزا (3) نبوت (4) احکام (5) ایام اللہ (6) مظاہر قدرت (7) معجزات۔ (از قران اور مسلمان کے زندہ مسائل) تو اب ہم پر یہ بات اچھی طرح واضح ہوجاتی ہے کہ نبی اکرم ﷺ کا انتخاب کیوں اور کیسے کیا گیـا پھر جو کتاب ان پر نازل کی گئی وہ انسانوں کے کن مفادات کو پیش نظر رکھ کر نازل کی گئی تھی چناچہ انسانوں کو عقل اور ارادہ دے کر بتا دیا گیا کہ یہ راستہ جنت کو جاتا ہے اور یہ دوزخ کو جاتا ہے، جو چاہو اختیار کرلو۔ لہٰذا قرآن پاک اور سنت نبوی کا گہرائی سے مطالعہ بےحد ضروری ہے کیونکہ قرآن کا مقصد رہنمائیـ، ہدایت اور نصیحت ہے۔ وحی، قرآن اور رسول، انسان کے لیے ہدایت دینے کے ذرائع ہیں۔ اس لیے قرآن اعمال صالحہ اور بہترین اخلاق و کردار کے اصول و ضوابط بار بار کبھی تفصیل سے کبھی مختصر دلیلوں، اور مثالوں کے ساتھ بیان کرتا ہے۔ ہم یوں بھی کہہ سکتے ہیں کہ لوگوں کو شرک و کفر اور اخلاقی برائیوں سے دور کرنے کے لیے قرآن پاک ایک مکمل اور بہترین اللہ کی بھیجی ہوئی کتاب ہے جس میں نہ کوئی غلطی ہے اور نہ ہی کوئی شک و شبہ کی بات۔ اس میں اللہ کی عظمت، رحم و کرم، قدرت، علم، رحمت اور غضب کچھ اس انداز میں بتائے گئے ہیں کہ پڑھنے والا اگر تھوڑی سی توجہ سے بھی کام لے تو راہ راست پر ضرور آسکتا ہے۔ اس بات کی بیشمار مثالیں تاریخ میں اور قرآن پاک میں جگہ جگہ ملتی ہیں۔ اور جو نہیں سمجھتے ان کی بھی بیشمار داستانیں ملتی ہیں۔ پھر ان کو جو سزائیں ملیں دنیا میں وہ بھی بیشمار ہمارے سامنے ہیں۔ ان سب سے قرآن کی روشنی میں سبق حاصل کرنا چاہیے۔