Ayah 21:3342 ہر کرہ اپنے فلک میں تیرے جا رہا ہے : اور اس قدر پر حکمت نظام کے تحت کہ نہ وہ ایک دوسرے سے ٹکراتے ہیں اور نہ اپنی مقررہ حدود سے باہر نکلتے ہیں۔ سو اس سب میں مخلوق کے لئے طرح طرح کے اور عظیم الشان فوائد و منافع بھی ہیں اور اس کے خالق ومالک کی عظمت، قدرت اور وحدانیت کے کھلے اور روشن دلائل بھی۔ سو زمین و آسمان اور سورج و چاند جیسے ایسے عظیم الشان کروں میں سے ہر ایک کا اپنے فلک اور دائرے میں اس قدر عمدگی اور پابندی سے برابر چلتے اور گردش کیے جانا حضرت حق ۔ جل مجدہ ۔ کی قدرت بےپایاں، حکمت بےنہایت اور عنایت بےغایت کے عظیم الشان مظہر ہیں۔ اور اس سے یہ بھی واضح ہوجاتا ہے کہ اس کی کارفرمائی اور حکمرانی اس کی اس عظیم الشان کائنات میں ہر وقت اور ہر لحظہ برابر جاری وساری ہے ۔ سبحانہ و تعالیٰ ۔ اور سورج و چاند وغیرہ کے یہ عظیم الشان کرے اسی کی قدرت وحکمت سے اپنے اپنے معین مدار میں پوری پابندی سے رواں دواں ہیں۔ مجال نہیں کہ سرِ مو اس سے انحراف کرسکیں۔ اگر یہ ذرہ برابر بھی ادھر ادھر ہوجائیں تو سارے نظام عالم میں خلل واقع ہوجائے۔ سو ان سب کا منٹ سیکنڈ کی پابندی و حساب کے ساتھ اپنی ڈیوٹی ادا کرنا اور کسی ادنی توقف و تخلف کے بغیر ادا کرنا اس بات کی واضح اور کھلی شہادت ہے کہ یہ سب حاکم کائنات کے محکوم اور اسی کے ہاتھ میں مسخر ہیں۔ سو کتنے احمق ہیں وہ لوگ جو ان عظیم الشان نشانہائے قدرت سے درس عبرت لینے کی بجائے الٹا انہی کی پوجا کرتے ہیں۔ اور اس طرح وہ اپنی ہلاکت و تباہی کا سامان اپنے ہاتھوں کرتے ہیں ۔ والعیاذ باللہ -
Ayah 21:3443 اس دنیا میں خلود و دوام کسی کے لیے ممکن نہیں : بلکہ ہر ایک نے یہاں سے بہرحال کوچ کرنا ہے۔ تو پھر منکرین کے لیے پیغمبر کی موت سے خوشی کا آخر کونسا مقام ہے۔ سو ارشاد فرمایا گیا تو کیا آپ اگر مرگئے تو یہ ہمیشہ رہیں گے ؟۔ اور جب نہیں اور یقیناً نہیں تو پھر آپ کے وصال و انتقال سے ان دشمنان دین حق کے لئے خوشی و مسرت کا آخر کیا موقع ہوسکتا ہے ؟ جو آپ کی موت کے انتظار میں ہیں اور کہتے ہیں ۔ { نَتَرَبَّصُ بِہٖ رَیْبَ الْمَنُوْنِ } ۔ کہ " ہم ان صاحب کی موت کی انتظار میں ہیں "۔ کفار کہا کرتے تھے کہ ان صاحب کا یہ دین تو بس ان کی زندگی تک ہی ہے۔ اس لیے ان کی موت تک انتظار کرلو۔ اس کے بعد ان کا یہ دین خودبخود ختم ہوجائے گا۔ اس لیے وہ بدبخت آپ کی موت کے انتظار میں تھے۔ تو اس پر یہ فرمایا جا رہا ہے کہ اس میں ان کیلئے خوشی کا کیا مقام ہوسکتا ہے۔ کیا آپ اگر اے پیغمبر اپنے وقت پر مرگئے تو یہ اس دنیا میں ہمیشہ رہیں گے۔ جب نہیں اور یقینا نہیں کہ موت لازمہ بشریت ہے تو پھر یہ بدبخت آخر کسی بنیاد پر خوش ہو رہے ہیں۔ سو خوش نصیب ہیں وہ جنکی موت راہ حق و ہدایت پر آتی ہے۔ کہ ان کے لیے آخرت کے اس جہان غیب میں ہمیشہ ہمیش کی کامیابی ہے۔
Ayah 21:3544 موت کا مزہ ہر جاندار نے بہرحال چکھنا ہے : اپنے اپنے وقت پر۔ کوئی اس سے بچ نہیں سکتا۔ تو پھر کسی کی موت سے کسی دوسرے کے لئے خوشی کا کوئی موقع آخر کس طرح ہوسکتا ہے کہ موت کا یہ کڑوا گھونٹ تو اس نے بھی بالآخر بھرنا ہے ؟ اس لیے عقلمندی کا تقاضا یہ ہے کہ انسان دوسروں کی موت کا انتظار کرنے کی بجائے خود اپنی اصلاح پر توجہ دے اور اپنے انجام کیلئے تیاری کرے۔ سو ان منکرین و مکذبین کے لیے اس بارے اگر خوشی و مسرت کا کوئی موقعہ ہوسکتا ہے تو صرف اس صورت میں ہوسکتا ہے جبکہ یہ زندگی جاوداں لے کر آئے ہوں۔ تو اس وقت ان کے لیے ایسا کہنے کی گنجائش ہوسکتی تھی کہ ہم جب حیات ابدی کے مالک ہیں تو پھر ایک انسان کو کس طرح رسول مان لیں اور ان کی اطاعت و ابتاع کیونکر کریں۔ جب ایسی کوئی بات نہیں اور نہیں ہوسکتی تو پھر ان کا پیغمبر کی موت پر خوش ہونا پرلے درجے کی حماقت ہے ۔ والعیاذ باللہ -
45 سب کا رجوع اللہ ہی کی طرف : سو اس سے واضح فرما دیا گیا کہ سب نے اللہ ہی کی طرف لوٹنا ہے۔ سو ارشاد فرمایا گیا " اور تم سب نے لوٹ کر بہرحال ہمارے ہی پاس آنا ہے "۔ تاکہ ہر کوئی اپنی زندگی بھر کے کئے کرائے کا پورا پورا بدلہ پا سکے۔ اور اس طرح عدل و انصاف کے تقاضے بھرپور طور پر پورے ہو سکیں اور ایسا بہرحال ہو کر رہے گا۔ اور تم سب کو اے لوگو بہرحال لوٹ کر ہمارے ہی پاس آنا ہے اور وہاں اپنے زندگی بھر کے کیے کرائے کا صلہ اور بدلہ بہرحال پانا ہے۔ سو اصل کام جو کرنے کا ہے وہ یہ ہے کہ انسان اپنے اس مصیر محتوم اور انجام موعود کیلئے تیاری کرے۔ اور دنیا کی اس عارضی وفانی زندگی اور محدود و مختصر فرصت کو اپنی آخرت کی حقیقی اور ابدی زندگی کو بنانے کی فکر وسعی میں صرف کرے ۔ وباللہ التوفیق -
Ayah 21:3646 اہل کفر و باطل کا کام اہل حق کا مذاق اڑانا : سو ارشاد فرمایا گیا کہ " جب یہ کفر و باطل والے آپ کو دیکھتے ہیں تو ان کا کام مذاق اڑانے کے سوا کچھ نہیں ہوتا " اور اہل حق سے بغض وعناد اور ان کا مذاق اڑانا باعث ہلاکت و تباہی ہے جو کہ کھلا ثبوت ہے ان کے عناد و ہٹ دھرمی کا۔ کہ بجائے اس کے کہ آپ کو دیکھ کر یہ لوگ خوشی و مسرت میں ڈوب جاتے اور آپ کی پیش فرمودہ تعلیمات مقدسہ کو صدق دل سے اپنا کر، اپنے لئے دارین کی سعادت و سرخروئی اور فوز و فلاح کا سامان کرتے۔ یہ الٹا آپ ﷺ کا مذاق اڑا کر اپنے کفر کی سیاہی اور بدبختی کو اور پکا کرتے اور اپنے لئے دوزخ کی دہکتی بھڑکتی آگ میں اضافہ کرتے ہیں۔ اور ان کو اس امر کا احساس و شعور تک نہیں کہ اس طرح یہ لوگ اپنے لئے کس قدر خسارے کا سودا کرتے ہیں۔ سو یہی حال ہوتا ہے حق اور اہل حق سے بغض وعناد اور ہٹ دھرمی کا کہ اس سے انسان کا دل سیاہ اور اس کی عقل ماؤف ہوجاتی ہے اور اس کی مت اس طرح مار کر رکھ دی جاتی ہے کہ اس کو خود اپنے نفع و نقصان کی تمیز بھی نہیں رہتی۔ اور اس کا حال بد سے بدتر ہوتا چلا جاتا ہے ۔ والعیاذ باللہ العظیم ۔ بہرکیف اہل کفر و باطل کا اہل حق کے ساتھ ہمیشہ اسی طرح کا معاملہ رہا۔ یعنی ایسے لوگ اہل حق اور انکے ذریعے پہنچنے والے پیغام حق و ہدایت کا مذاق اڑاتے ہیں۔ کل بھی یہی تھا اور آج بھی یہی ہے۔ اور آج کے اس دور میں جبکہ مادی ترقی اور ملحدانہ فلسفہ اپنے عروج پر ہے ان لوگوں کے طنز و مذاق اور طعن وتشنیع نے طرح طرح کی اور نت نئی صورتیں اختیار کرلی ہیں۔ قسما قسم کی فلمیں، ڈرامے اور کارٹون بنا کر یہ لوگ حق اور اہل حق کا مذاق اڑا رہے ہیں ۔ والعیاذ باللہ العظیم -
47 مشرکوں کی مشرکانہ حمیت کا ایک نمونہ و مظہر : سو اس سے مشرکوں کے اپنے خود ساختہ معبودوں کے لیے غیرت مندی اور مشرکانہ حمیت کا ایک مظہر و نمونہ سامنے آتا ہے۔ سو یہ لوگ پیغمبر کے لیے کہتے ہیں کہ کیا یہی صاحب ہمارے معبودوں کا نام لیتے ہیں ؟۔ اور ان کی مذمت و برائی کرتے ان کو مشکل کشا و حاجت روا ماننے سے انکار کرتے ہیں۔ اور ان کو یہ بےحقیقت قرار دیتے ہیں اور ان کی پوجا پاٹ کو یہ شرک قرار دیتے اور دوزخی بتاتے ہیں۔ اور اپنے لیے خدا کا رسول ہونے کا دعویٰ کرتے ہیں۔ کیا خدا نے انہی کو رسول بنا کر بھیجنا تھا ۔ { واذا راوک ان یتخذونک الا ہزوا، اہذ الذی بعث اللہ رسولا } ۔ (الفرقان : 41) ۔ سو اس سے مشرکوں اور بت پرستوں کے ان کے اپنے من گھڑت اور خود ساختہ معبودوں کے لیے غیرت مندی اور مشرکانہ حمیت کا ایک نمونہ و مظہر سامنے آتا ہے کہ یہ لوگ پیغمبر کو دیکھتے ہی ان کا مذاق اڑاتے اور تحقیر و نفرت کے انداز میں کہتے ہیں کہ کیا یہی ہیں وہ صاحب جو تمہارے معبودوں کا مذاق اڑاتے اور ان کو برا کہتے ہیں۔ اور ۔ { یَذْکُرُ اٰلِہَتَکُمْ } ۔ میں ضمیر خطاب اپنے عوام کو بھڑکانے کے لیے استعمال کی گئی ہے۔ یعنی یوں نہیں کہتے کہ یہ ہمارے معبودوں کی برائی کرتا ہے۔ بلکہ یوں کہتے ہیں کہ یہ صاحب تمہارے معبودوں کے خلاف اس گستاخی کا ارتکاب کرتے ہیں۔ سو ان دونوں اسلوبوں کے درمیان بلاغت کے لحاظ سے بڑا فرق ہے۔
48 مشرکوں کی خدائے رحمان کے بارے میں بےحسی : سو اس سے مشرکوں کی خدائے رحمان کے بارے میں بےحسی اور بےغیرتی کا ایک نمونہ و مظہر سامنے آتا ہے۔ اپنے من گھڑت اور خود ساختہ معبودوں کے بارے میں تو یہ اتنے غیرت مند اور پرجوش ہیں لیکن معبود حقیقی یعنی خدائے رحمن کے ذکر کے ساتھ یہ کفر کرتے ہیں۔ اور ان کو اس کا احساس تک نہیں کہ جس خدائے رحمان کی گوناں گوں کی رحمتوں میں یہ سرتاپا ڈوبے ہوئے ہیں اس کے ساتھ کفر و انکار کرکے یہ کتنے بڑے ظلم اور کس قدر ہولناک جرم کا ارتکاب کرتے ہیں ۔ والعیاذ باللہ ۔ سو اس سے اندازہ کیا جاسکتا ہے کہ انسان جب راہ حق و ہدایت سے منہ موڑ لیتا ہے تو وہ کتنا اندھا اور اوندھا ہوجاتا ہے اور کس قدر بدل جاتا ہے۔ اور کتنا ناشکرا بن جاتا ہے۔ اپنے خود ساختہ اور بےحقیقت بتوں کا تو اس کو اس قدر خیال ہوتا ہے کہ ان سے متعلق بیان حقیقت اور اظہار واقع کو بھی وہ ان کے حق میں گستاخی اور بےادبی قرار دیتا ہے مگر جس خدائے رحمن کی رحمتوں میں یہ انسان سرتاپا ڈوبا ہوا ہے اس کی اس کو پرواہ تک نہیں۔ بلکہ اس کے حق میں یہ کفر و ناشکری کا مرتکب ہوتا ہے ۔ والعیاذ باللہ ۔ اور اسی مہلک بیماری کے جراثیم آج کے کلمہ گو مشرکوں میں بھی آپ کو جگہ جگہ اور طرح طرح سے نظر آئیں گے۔ مثلاً یہ کہ ایسے لوگ مسجدوں میں جو کہ اللہ تعالیٰ کے گھر ہیں اور یہ خود بھی ان کو ایسا ہی جانتے اور مانتے ہیں، وہاں تو ایسے لوگ اپنے جوتے اپنے ہاتھوں میں اٹھائے صف اول تک بھی لے جائیں گے، مگر کسی قبر یا آستانے کا جب معاملہ آئے گا تو جوتے دور اتار کر رکھ لیں گے اور ننگے قدم تک چلیں گے۔ اور ایسے لوگ مسجدوں کے پاس سے ایسے لوگ گاتے بجاتے بےفکری و لاپرواہی سے گزر جائیں گے مگر جب کس قبر وغیرہ کے پاس سے گزریں گے تو سب کچھ یہ بند کردیں گے اور اپنے ہاتھوں اور اشاروں سے قبر کو سلام کرتے ہوئے وہاں سے گزریں گے۔ کوئی بندہ خدا اگر خالص توحید بیان کرے گا تو ان لوگوں کو برا لگے گا اور یہ اس پر طرح طرح کے الزامات عائد کریں گے۔ اور اگر وہ شرک اور شرکیات سے روکے گا تو اس کے خلاف یہ ہنگامہ کھڑا کردیں گے کہ یہ شخص بزرگوں کا منکر اور ان کی توہین کا مرتکب ہے وغیرہ وغیرہ۔ اور اپنے شرک و شرکیات اور قبروں آستانوں پر اپنی سجدہ ریزی کے جواز کے لئے دلائل تک پیش کرنے کی تگ و دو میں لگ جائیں گے۔ سو کیسی مشابہت ہے کل کے ان کھلے مشرکوں اور آج کے ان کلمہ گو مشرکوں کے درمیان ؟- { تَشَابَہَتْ قُلُوْبُہُمْ } ۔ والعیاذ باللہ العظیم ۔ اللہ زیغ وضلال کے ہر شائبے سے ہمیشہ محفوظ اور اپنی پناہ میں رکھے ۔ آمین ثم آمین۔
Ayahs 21:37–3849 انسان بڑا جلدباز واقع ہوا ہے : اسی لئے وہ عذاب کے لئے بھی جلد بازی سے کام لیتا ہے اور کہتا ہے کہ وہ عذاب جس سے ہمیں ڈرایا جاتا ہے فوراً آ کیوں نہیں جاتا۔ حالانکہ اللہ پاک کا معاملہ تو سراسر حکمت پر مبنی اور رحمت بھرا ہوتا ہے۔ وہاں جلد بازی کا کوئی مقام نہیں۔ ہر چیز کے لئے اس کے یہاں ایک خاص پیمانہ ہے ۔ { کُلُّ شَیْئٍ عِنْدَہ بِمِقْدَار } ۔ (الرعد : 8) ۔ اور اس کا پیمانہ بھی بندوں کے پیمانوں سے کہیں بڑا اور بہت بڑا ہے۔ اس کے یہاں کا ایک دن ہمارے یہاں کے ایک ہزار سال کے برابر ہوتا ہے۔ چناچہ ارشاد ربانی ہے ۔ { وَاِنَّ یَوْمًا عِنْدَ رَبِّکَ کَاْلْفِ سَنَۃٍ مِّمَّا تَعُدُّوْنَ } ۔ (الحج : 47) ۔ سو اس کے یہاں اس کے متمرد و سرکش بندوں کے عذاب کا بھی ایک خاص وقت مقرر ہے۔ ورنہ ان لوگوں پر اس کا عذاب کبھی آچکا ہوتا۔ ارشاد فرمایا گیا ۔ { وَلَوْلَا کَلِمَۃٌ سَبَقَتْ مِنْ رِّبِّکَ لَکَانَ لِزَامًا وَّاَجَلٌ مُّسَمّٰی } ۔ (طہٰ : 129) ۔ والعیاذ باللہ من کل زیغ و انحراف ۔ اللہ ہمیشہ اپنی رضا اور خوشنودی کی راہوں پر چلنا نصیب فرمائے ۔ آمین۔
50 پس تم لوگ عذاب کیلئے جلدی مت مچاؤ : بلکہ دنیاوی زندگی کی اس فرصت کو جو آج تمہیں دستیاب و میسر ہے اس کو غنیمت سمجھ کر اس عذاب سے بچنے کی فکر کرو کہ حیات دنیا کی یہ فرصت مستعار ہاتھ سے نکلنے کے بعد پھر کبھی اور کسی بھی قیمت پر دوبارہ ملنے والی نہیں۔ سو عقلمندی کا تقاضا یہ ہے کہ انسان اس عذاب سے بچنے کی فکر کرے اور فرصت حیات کو آخرت کی تیاری کیلئے غنیمت جانے ۔ وباللہ التوفیق ۔ بہرکیف اس ارشاد سے ان جلد بازوں کی طرف سے عذاب کے لیے مچائی جانے والی جلد بازی کا جواب دیا گیا اور واضح فرمایا گیا کہ یہ تاخیر خداوند قدوس کی رحمت و عنایت کی بنا پر ہو رہی ہے۔ وہ رحمان و رحیم چاہتا ہے کہ جو لوگ اس فرصت سے فائدہ اٹھانا چاہیں وہ فائدہ اٹھا کر توبہ و اصلاح کرلیں اور انابت و رجوع الی اللہ کے ذریعے اپنی دنیا و آخرت سنوار لیں اور ہمیشہ کے عذاب اور دائمی رسوائی سے بچ جائیں۔ مگر یہ عقل کے اندھے اور مت کے مارے ایسے بدبخت ہیں کہ اس فرصت سے فائدہ اٹھانے کی بجائے عذاب کے لیے جلدی مچاتے ہیں اور عافیت کی بجائے عذاب مانگتے ہیں ۔ والعیاذ باللہ العظیم ۔ اللہ تعالیٰ زیغ وضلال کی ہر شکل سے محفوظ اور اپنی پناہ میں رکھے ۔ آمین۔
Ayah 21:3951 دولت ایمان و یقین سعادت دارین سے سرفرازی کا ذریعہ و وسیلہ : سو اس سے واضح فرما دیا گیا کہ ایمان و یقین اور خاص کر آخرت کا ایمان و یقین دارین کی سعادت و سرخروئی کی اصل بنیاد ہے۔ اگر آخرت کا ایمان و یقین ان لوگوں کو ہوتا اور وہاں کے حال سے یہ کسی قدر واقف و آگاہ ہوتے تو ان کا حال یقینا اس سے یکسر مختلف ہوتا۔ یعنی " لو " شرطیہ کی جزاء یہاں پر محذوف ہے جو کہ بلاغت کا تقاضا ہے۔ مطلب یہ ہے کہ کفار چونکہ آخرت کی سزا و جزاء پر ایمان نہیں رکھتے اس لئے اپنی غفلت و بیخبر ی اور لاپرواہی کی بناء پر یہ اس طرح کے سوال کرتے اور ایسی بےمقصد و لایعنی زندگی گزارتے ہیں۔ ورنہ اگر آخرت کے اس ہولناک دن اور وہاں کے عذاب کا کسی بھی قدر ان کو کوئی علم و اندازہ ہوجائے تو ان کی زندگی کے اطوار یکسر بدل جائیں۔ سو اس سے معلوم ہوا کہ ایمان بالآخرۃ زندگی کی اصلاح کے لئے سب سے اہم اساس و بنیاد ہے اور اس سے محرومی ہر خیر سے محرومی ہے ۔ والعیاذ باللہ ۔ اور یہ ایک ظاہر بات ہے۔ کیونکہ آخرت کے ایمان و یقین سے محرومی کے بعد انسان کی زندگی بےمقصد اور لایعنی ہو کر رہ جاتی ہے ۔ والعیاذ باللہ العظیم ۔ سو ارشاد فرمایا گیا کہ اگر ان کافروں کو اس وقت کا کچھ اندازہ ہوجاتا جبکہ آتش دوزخ ان کو ہر طرف سے اپنے گھیرے میں لیے ہوگی اور ان کی بےبسی کا حال یہ ہوگا کہ یہ نہ اس کو آگے سے دور کرسکیں گے نہ پیچھے سے اور نہ ان کے حمایتی اور خود ساختہ حاجت رواؤں اور مشکل کشاؤں کی طرف سے ان کی کوئی مدد ہو سکے گی اور نہ ان کی وہ پارٹی اور جمعیت ان کی کچھ کام آسکے گی جس پر انکو بڑا ناز ہے اور نہ ان کے ان خود ساختہ معبودوں اور شرکاء میں سے کوئی ان کا سہارا بن سکے گا جن پر آج یہ لوگ تکیہ کیے ہوئے ہیں۔ اگر یہ اس حال کو جان لیتے اور اس کا ان کو کچھ بھی اندازہ ہوتا تو ان کے لچھن یہ نہ ہوتے اور ان کا حال کچھ اور ہی ہوتا۔ کاش کہ یہ لوگ اس حقیقت کو جان لیتے اور یہ راہ راست پر آجاتے۔
Ayah 21:4052 قیامت بالکل اچانک آئے گی : سو ارشاد فرمایا گیا کہ قیامت کی وہ ہولناک گھڑی اچانک آپہنچے گی اور اپنے وقت پر اس نے بہرحال آ کر رہنا ہے۔ خواہ کوئی مانے یا نہ مانے۔ چاہے یا نہ چاہے۔ سو اس وقت ان لوگوں کا حال بہت برا ہوگا جنہوں نے زندگی بھر اس کا انکار کیا ہوگا۔ ایسے لوگوں کے ہوش اس وقت اڑ جائیں گے اور ان کی حسرت و مایوسی کی کوئی حد و انتہاء نہ رہے گی ۔ والعیاذ باللہ العظیم ۔ اور کسی کو پتہ نہیں کہ وہ ہولناک گھڑی کب اور کس حال میں آئیگی۔ کیونکہ وہ بالکل اچانک آئے گی۔ جیسا کہ دوسرے مقام پر ارشاد فرمایا گیا ۔ { لَا تَاْتِیْکُمْ الاَّ بَغْتَۃً } ۔ (الاعراف : 87) ۔ اور پھر کفار و منکرین تو چونکہ اس کو مانتے ہی نہیں اس لیے ان کے لیے وہ جب بھی آئیگی بالکل اچانک ہی آئیگی اور ایسی اچانک کہ ان کے ہوش اڑا کر رکھ دے گی ۔ والعیاذ باللہ العظیم ۔ بہرکیف ارشاد فرمایا گیا کہ وہ کہیں وقت بتا کر نہیں آئے گی بلکہ ایسی اچانک آئے گی کہ کسی کو اس کا کوئی اندازہ اور احساس تک نہ ہوگا جیسا کہ دنیا میں زلزلے آتے ہیں تو کہیں وقت بتا کر نہیں آتے بلکہ دن رات کے کسی بھی حصے میں اور کسی بھی حال میں آجاتے ہیں۔ جیسا کہ سورة اعراف کی آیت نمبر 97 تا 99 میں اس کی تصریح فرمائی گئی ہے۔ اس لیے عقلمندی کا تقاضا یہ ہے کہ اس کا وقت پوچھنے کی بجائے اس کے لیے تیاری کی جائے ۔ وباللہ التوفیق لما یحب ویرید وعلی ما یحب ویرید -
53 منکرین کیلئے پھر کوئی مہلت ممکن نہ ہوگی : سو ارشاد فرمایا گیا کہ قیامت کی وہ گھڑی جب آپہنچے گی تو ان کے ہوش اڑا کر رکھ دے گی۔ پھر نہ تو ان لوگوں کے لیے اس کو لوٹا دینے کا یارا ہوگا اور نہ ہی ان کو کوئی مہلت ہی مل سکے گی۔ تاکہ یہ توبہ و اعتذار کا کوئی سامان کرسکیں بلکہ پھر تو انکو دائمی عذاب میں رہنا ہوگا۔ سو کیسے شقی و بدبخت ہیں یہ لوگ کہ دنیاوی زندگی کی اس قیمتی فرصت میں آخرت کے اس دائمی عذاب سے بچنے کی فکر و کوشش کرنے کی بجائے یہ الٹا اس کے آنے کے لئے جلدی مچاتے ہیں ۔ والعیاذ باللہ ۔ سو اس سے اندازہ کیا جاسکتا ہے کہ کفر و انکار کی ظلمت انسان کو کس قدر اندھا، بہرا اور کتنا غیر ذمہ دار اور لاپرواہ بنا دیتی ہے ۔ والعیاذ باللہ العظیم ۔ بہرکیف اس سے واضح فرما دیا گیا کہ وہ اپنے وقت پر بالکل اچانک آدھمکے گی۔ پھر یہ نہ اس کو ٹال سکیں گے اور نہ ہی انکے لیے کسی طرح کی کوئی مہلت ممکن ہوگی کہ یہ توبہ و اصلاح کرسکیں۔ سو ایسوں کو ہوش کے ناخن لینے چاہئیں اور فرصت حیات کو غنیمت سمجھ کر اپنی اصلاح کر لینی چاہیے قبل اس سے کہ وہ ان کے ہاتھ سے نکل جائے ۔ وباللہ التوفیق لما یحب ویرید وعلی ما یحب ویرید وہو الہادی الی سواء السبیل -
Ayah 21:4154 اہل باطل کی طرف سے اہل حق کا مذاق و استہزاء : سو اہل باطل کی طرف سے اہل حق کا ہمیشہ ہی مذاق اڑایا گیا۔ یہاں تک کہ حضرات انبیاء و رسل کا بھی مذاق اڑایا گیا۔ تو آج کے ان فرزندان کفر و باطل کا یہ طریقہ و وطیرہ کوئی نئی اور انوکھی چیز نہیں بلکہ پہلے سے ایسا ہوتا آیا ہے۔ مگر اس کا وبال خود ان ہی پر پڑے گا۔ جیسا کہ ان سے پہلوں کے ساتھ ہوچکا ہے ۔ والعیاذ باللہ ۔ پس اس ارشاد ربانی میں ایک طرف تو آنحضرت ۔ ﷺ ۔ کے لئے اور پھر آپ ﷺ کے واسطے سے آپ کی امت کے ہر داعی حق کے لئے تسلی کا بڑا سامان ہے اور دوسری طرف اس میں منکرین و مکذبینِ حق کیلئے سخت تنبیہ و تذکیر بھی کہ وہ حق اور اہل حق سے مذاق اور استہزاء سے باز آجائیں اور اپنے احوال واطوار کی اصلاح کرلیں کہ حق اور اہل حق سے مذاق و استہزاء کا انجام بہت ہی برا ہے ۔ والعیاذ باللہ العظیم ۔ اور اس کا نتیجہ بڑا ہولناک ہوتا ہے جیسا کہ اگلے حاشیے میں آ رہا ہے ۔ اللہ تعالیٰ ایسی ہر برائی اور اس کے ہر شائبے سے ہمیشہ محفوظ اور اپنی پناہ میں رکھے ۔ آمین۔
55 حق سے مذاق اڑانے کا انجام نہایت برا ۔ والعیاذ باللہ : سو اس سے واضح فرما دیا گیا کہ حق اور اہل حق سے مذاق و استہزاء کا انجام بہرحال بہت برا ہے جو ان کو بہرحال بھگتنا ہوگا۔ سو اس سے پہلے جن لوگوں نے حق کا مذاق اڑایا آخرکار ان کو گھیر لیا اسی چیز نے جس کا وہ مذاق اڑایا کرتے تھے۔ پس اس میں درس عبرت ہے دور حاضر کے ان کفار ناہنجاز کے لئے جو حق اور اہل حق کا مذاق اڑاتے ہیں کہ وہ اس سے سبق لیں اور اپنی اس روش بد سے باز آجائیں۔ ورنہ جو انجام ان کے ان بڑوں اور پیش رؤوں کا ہوچکا ہے وہ ان کا بھی ہوسکتا ہے کہ اللہ تعالیٰ کا قانون بےلاگ اور سب کیلئے یکساں اور ایک برابر ہے ۔ والعیاذ باللہ ۔ سو حق اور اہل حق کا مذاق اڑانے والوں کا انجام بڑا ہی برا اور نہایت ہی ہولناک ہے۔ اور ربِّ رحمن اپنی رحمت بےپایاں سے جو ایسے بدبختوں کو ڈھیل دے رہا ہے اس سے ان کو دھوکے میں نہیں پڑنا چاہیئے بلکہ اس کی طرف سے ملنے والی اس فرصت سے فائدہ اٹھاتے ہوئے اپنے حال اور اپنی روش کی اصلاح کرلینی چاہیئے قبل اس سے کہ اس کا ہولناک انجام انکو اپنی گرفت میں لے لے۔ کیونکہ برائی کا برا انجام ایسے لوگوں کو بہرحال بھگتنا ہوگا ۔ { وَلاَ یَحِیْقُ الْمَکْرَ السَّیِّئُ الاَّ بِاَہْلِہ } (فاطر :43) ۔ والعیاذ باللہ العظیم -
Ayah 21:4256 خدائے رحمان کی گرفت و پکڑ سے کوئی بھی نہیں بچا سکتا : سو استفہام تنبیہ و توبیخ کے طور پر فرمایا گیا۔ " بھلا کون ہے جو خدائے رحمن سے تمہاری حفاظت کرسکے ؟ "۔ اور اس کی پکڑ اور عذاب سے تمہیں بچا سکے ؟ ظاہر ہے کہ کوئی بھی ایسا نہیں سوائے اس کی رحمت بیکراں کے۔ تو پھر یہ کس قدر ظلم اور کتنی بڑی ناانصافی ہے کہ انسان اسی خدائے رحمن اور اس کی عبودیت اور عبادت و بندگی سے منہ موڑے جس کی رحمت و عنایت میں یہ سرتاپا ڈوبا ہوا ہے ؟ سو یہ سوال تقریع و توبیخ اور ان لوگوں کے ضمیروں کو جھنجھوڑنے کیلئے ہے کہ جس خدائے رحمن کی رحمتوں میں تم لوگ سر تا پا ڈوبے ہوئے ہو اور جو محض اپنی رحمت و عنایت سے تمہیں ایسے تمام حوادث سے محفوظ رکھتا ہے تو اس سے منہ موڑنا اور غفلت و اعراض برتنا کتنا ظلم اور کس قدر بےانصافی ہے ۔ والعیاذ باللہ العظیم ۔ (محاسن التاویل، معارف، صفوہ اور فتح وغیرہ) ۔
57 رب کی یاد سے اعراض و روگردانی باعث ہلاکت و تباہی ۔ والعیاذ باللہ : سو ارشاد فرمایا گیا اور ان لوگوں کے اصل مرض کی تشخیص کے طور پر ارشاد فرمایا گیا کہ یہ لوگ اپنے رب کی یاد سے منہ موڑے ہوئے ہیں۔ نہ اس کی رحمتوں اور عنایتوں کی طرف متوجہ ہوتے ہیں اور نہ ہی اس کا حقِّ شکر ادا کرنے کی کوئی فکر و کوشش کرتے ہیں۔ بلکہ اس سے بڑھ کر یہ کہ یہ اس ظلم و بےانصافی کا ارتکاب کرتے ہیں کہ خدائے رحمن کی بخشی ہوئی ان طرح طرح کی نعمتوں کو اس کے سوا دوسری فرضی، وہمی ہستیوں اور خود ساختہ سرکاروں کی طرف منسوب کرتے اور انہی کے آگے جھکتے، ان کے نام جپتے، ان کے ناموں کی نذریں مانتے، نیازیں دیتے اور چڑھاوے چڑھاتے ہیں وغیرہ وغیرہ ۔ والعیاذ باللہ العظیم ۔ اور پھر یہ اسی وحدہ لاشریک کی شان حلم و کرم ہے کہ اس سب کے باوجود اس نے ایسے لوگوں کو چھوٹ دے رکھی ہے ۔ سبحانہ و تعالیٰ ۔ بہرکیف ارشاد فرمایا گیا کہ یہ لوگ جو عذ 1 بِ الہی کے لیے اس قدر جلد بازی سے کام لے رہے ہیں ان سے پوچھو کہ اگر خدائے رحمان کا عذاب ان پر رات یا دن کے کسی بھی حصے میں آجائے تو پھر کون ہے جو ان کو اس کے اس عذاب اور اس کی گرفت و پکڑ سے بچا سکے ؟ تو پھر یہ لوگ آخر کس طرح اور کس بل بوتے پر اس کے عذاب کا اس جلد بازی اور بےفکری و لاپرواہی سے مطالبہ کر رہے ہیں۔ سو ایسی کوئی بھی بات نہیں بلکہ اصل بات یہ ہے کہ یہ لوگ خداوند قدوس کی یاد دلشاد سے منہ موڑ کر غفلت و لاپرواہی کے ہولناک گڑھے میں گرے جا رہے ہیں ۔ والعیاذ باللہ العظیم -
Ayah 21:4358 مشرکوں کے خود ساختہ معبودوں کی بےبسی کا ذکر وبیان : سو ارشاد فرمایا گیا " اور یہ ان کے خودساختہ معبود تو خود اپنی مدد بھی نہیں کرسکتے "۔ کہ وہ سراسر عاجز و بےبس اور بےجان ہیں۔ لکڑی پتھر وغیرہ کے بتوں میں تو سرے سے اس کی کوئی اہلیت اور صلاحیت ہی نہیں۔ اور قبروں میں دفن شدہ ہستیاں زندگی میں اگرچہ دعاء وغیرہ اسباب کے ذریعے کچھ کام آسکتی تھیں مگر اب ان کے بس میں یہ بھی نہیں رہا۔ تو اللہ پاک کے عذاب سے بچانے والا اس کی اپنی رحمت کے سوا اور کون ہوسکتا ہے ؟ سو جن لوگوں نے اپنے ایسے خودساختہ اور بےحقیقت معبودوں کے سہارے اس خدائے رحمن سے منہ موڑا ہے وہ بڑے ہی خسارے میں ہیں ۔ والعیاذ باللہ ۔ بہرکیف ارشاد فرمایا گیا کہ یہ لوگ تو اپنے ان خود ساختہ اور من گھڑت معبودوں کو بہت کچھ بلکہ سب کچھ سمجھتے ہیں لیکن ان کی بےبسی کا عالم یہ ہے کہ وہ خود اپنی مدد بھی نہیں کرسکتے۔ چہ جائے کہ کسی دوسرے کی مدد کریں۔ سو مدد اللہ تعالیٰ ہی کی مدد ہے۔ اسی لیے حضرت رسول اکرم ﷺ نے صاف اور صریح طور پر ارشاد فرمایا کہ " جب تمہیں سوال کرنا ہو تو اللہ ہی سے کرو اور جب تمہیں مدد مانگنا ہو تو اللہ ہی سے مانگو "۔ " اذا سالت فاسأل اللہ واذا استعنت فاستعن باللہ "۔ اور اسباب کے درجے میں اگر کسی اور سے مدد مانگی جائے تو اس کی اجازت ہے کہ یہ دنیا ہے ہی دار الاسباب لیکن ما فوق الاسباب اللہ کے سوا کسی اور سے مانگنا شرک ہوگا جو کہ کبیرہ گناہ بلکہ اکبر الکبائر ہے ۔ والعیاذ باللہ -
59 مشرک کو اللہ کی پناہ نہیں مل سکتی : کہ وہ اللہ کا باغی اور سرکش ہے۔ اس لیے اس کو اللہ کی طرف سے کوئی پناہ نہیں مل سکتی ہے۔ سو ارشاد فرمایا گیا " اور نہ ہی ان کو ہماری طرف سے کوئی تائید اور پناہ مل سکتی ہے "۔ یعنی نہ ہماری طرف سے ان کو کوئی پناہ ملے گی اور نہ پناہ دہندہ۔ پھر یہ کسی کی کوئی مدد کیسے کرسکتے ہیں ؟ سو ایسے عاجزوں اور بےبسوں کو معبود قرار دینا اور ان کے آگے جھکنا اور ذلیل ہونا کس قدر حماقت و جہالت اور کتنا بڑا ظلم ہے ۔ والعیاذ باللہ العظیم ۔ سو { یَصْحَبُوْنَ } یہاں پر " یُجَارُوْنَ " کے معنی میں ہے کہ یہ لفظ اسی معنیٰ میں استعمال ہوتا ہے۔ چناچہ عرب کہتے ہیں " صبحک اللہ " تو اس سے ان کی مراد ہوتی ہے، " اَجَارَکَ اللّٰہُ وَسَلَّمَکَ " ( ابن جریر، محاسن التاویل وغیرہ) ۔ سو مشرکوں کے ان خود ساختہ اور من گھڑت معبودوں کو جب اللہ تعالیٰ کی طرف سے کوئی جوار اور پناہ حاصل نہیں تو یہ اللہ کے عذاب سے بچانے کے کام کس طرح آسکتے ہیں۔
Ayahs 21:44–4660 منکرین و مکذبین کے اعراض و استکبار کی اصل وجہ : سو اس سے منکرین و مکذبین کے اعراض و استکبار کی اصل وجہ کو واضح فرما دیا گیا کہ یہ لوگ اللہ تعالیٰ کی شان حلم و کرم اور اس کے امہال سے دھوکے میں پڑگئے ۔ والعیاذ باللہ ۔ اور اللہ تعالیٰ کی شان کرم و حلم کو بھول کر یہ لوگ یہ سمجھ بیٹھے کہ یہ سب کچھ ہمارا حق ہے جو ہمیں اپنی محنت و قابلیت سے ملا ہے۔ اور یہ ہمارے پاس ہمیشہ اور ایسے ہی رہے گا ۔ { یَحْسَبُ اَنَّ مَالَہُ اَخْلَدَہُ } ۔ اور اس طرح یہ لوگ اپنے خالق ومالک اور اس کے حقِّ بندگی سے غافل ہو کر یہ لوگ راہ حق سے بھٹک گئے ۔ والعیاذ باللہ ۔ سو دنیاوی ساز و سامان اور مال و متاع سے مست و مغرور ہونے کی بجائے اس کو اللہ تعالیٰ کا عطیہ و احسان اور ذریعہ امتحان سمجھ کر اپنے خالق ومالک کا دل و جان سے شکر ادا کرنا چاہیئے تاکہ اس طرح یہ مال و دولت سعادت دارین کا ذریعہ و وسیلہ بن جائے ۔ وباللہ التوفیق ۔ بہرکیف اس ارشاد سے منکرین و مکذبین کے اعراض و انکار کے اصل سبب کو آشکارا فرما دیا گیا کہ یہ لوگ خود اور ان کے باپ دادا ایک طویل عرصے تک اللہ کی نعمتوں سے بہرہ مند و سرشار ہوتے رہے جس کے نتیجے میں ان کے دل سخت اور سیاہ ہوگئے اور یہ لوگ بجائے اللہ تعالیٰ کا شکر ادا کرنے کے الٹا اس گھمنڈ میں مبتلا ہوگئے کہ یہ سب کچھ ان کا حق اور ان کے باپ دادا کی میراث ہے۔ اور یہ ہمیشہ اسی میں رہیں گے اور ایسی ہی مزے کرتے رہیں گے۔ اور اس طرح یہ لوگ قساوت قلبی میں مبتلا ہو کر نور حق و ہدایت سے محروم اور ہمیشہ کے خسارے میں مبتلا ہوگئے ۔ والعیاذ باللہ العظیم ۔ اللہ تعالیٰ فکر وعمل کی ہر کجی سے ہمیشہ محفوظ اور اپنی پناہ میں رکھے ۔ آمین۔
61 منکرین قدرت کے شکنجہ گرفت میں : سو ارشاد فرمایا گیا کہ " یہ لوگ دیکھتے نہیں کہ ہم زمین کو کم کرتے چلے آرہے ہیں اس کی مختلف سمتوں سے "۔ اہل حق کو فتح و غلبہ دے کر۔ جیسا کہ مدنی دور میں صحابہ کرام کو نصیب ہوا۔ اسی لئے اس آیت کریمہ کے بارے میں مفسرین کرام فرماتے ہیں کہ یہ مدنی ہے۔ بہرکیف اس میں فرمایا گیا کہ کس طرح ہم نے اس زمین کے مختلف حصوں کو فتوحات کے ذریعے مسلمانوں کو دے دیا اور پھر ان مختلف حصوں پر مسلمانوں کو قابض کردیا۔ یہاں تک کہ مکہ کے آس پاس کے سب علاقے مسلمانوں کے زیر نگیں ہوگئے۔ (المراغی، المحاسن وغیرہ) ۔ اور اس کے علاوہ اسلام اپنی صداقت و حقانیت کی بنا پر دنیا میں پھیلتا اور لوگوں کے دل و دماغ میں اترتا اور ان کو مسخر کرتا جا رہا ہے۔ آج تک ایسے ہی ہے اور قیامت تک ایسے ہی رہے گا ۔ انشاء اللہ ۔ کہ حق بہرحال یہی اور صرف یہی ہے۔
62 کیا پھر بھی یہ لوگ غالب آئیں گے : یہ استفہام توبیخ و انکار کے لئے ہے کہ ایسی صورت میں ان منکروں کو غلبہ نصیب نہیں ہوگا بلکہ یہ اور بھی ذلیل و خوار ہوں گے۔ تو پھر یہ لوگ اس امر واقعہ کو کیوں نہیں سمجھتے اور عقل و ہوش کے ناخن کیوں نہیں لیتے ؟ سو ان کو اپنے ایسے ہر زعم و فاسد سے توبہ کرکے حق کی طرف رجوع کرنا چاہیئے قبل اس سے کہ فرصت حیات ان کے ہاتھ سے نکل جائے اور ان کو ہمیشہ کیلئے پچھتانا پڑے ۔ والعیاذ باللہ ۔ بہرکیف ان لوگوں کے ضمیروں کو جھنجھوڑتے اور ان پر دستک دیتے ہوئے ارشاد فرمایا گیا کہ کیا یہ لوگ ان قرائن و شواہد کو دیکھتے ہوئے بھی اس زعم فاسد میں مبتلا ہیں کہ غلبہ انہی کا ہے ؟ تو کیا یہ لوگ سوچتے اور غور وفکر سے کام نہیں لیتے کہ ان قرائن اور شواہد کی موجودگی میں غلبہ ان کا ہوگا یا علمبرداران حق کا ؟
Ayah 21:4765 قیامت کا قیام ظہور عدل کے لیے : سو ارشاد فرمایا گیا کہ " قیامت کے روز کسی پر کوئی ظلم نہیں ہوگا " کہ نہ کسی کی کوئی نیکی کم کی جائے گی اور نہ کسی کے کھاتے میں کوئی ناکردہ برائی ڈالی جائے گی۔ بلکہ صحیح صحیح اور پورا پورا انصاف کیا جائے گا۔ اور ہر کسی کو اس کے زندگی بھر کے کئے کرائے کا پورا پورا بدلہ دیا جائے گا۔ جیسا کہ دوسرے مقام پر فرمایا گیا ۔ { وَوُفِّیَتْ کُلُّ نَفْسٍ مَّا کَسَبَتْ وَہُمْ لَا یُظُلَمُوْنَ } ۔ (آل عمران : 25) ۔ پس ہر کوئی اپنے بارے میں خود جائزہ لے اور دیکھ لے کہ اس نے کل کے اس یوم حساب کیلئے کیا سامان کر رکھا ہے۔ (الحشر : 18) ۔ بہرکیف اس ارشاد سے واضح فرما دیا گیا کہ قیامت کا قیام و ظہور عدل کے لیے ہوگا۔ اسی لیے اس روز عدل کے ترازو نصب کیے جائیں گے تاکہ ہر کسی کو اس کے کیے کرائے کا صلہ و بدلہ کانٹے کے تول پر پورا پورا دیا جائے اور کسی سے کسی طرح کی کوئی زیادتی نہ ہونے پائے ۔ وباللہ التوفیق لما یحب ویرید -
66 قیامت کے روز ہر کسی کو اس کے عمل کا پورا پورا بدلہ ملے گا : سو ارشاد فرمایا گیا کہ " اگر کسی کا رائی کے دانے کے برابر بھی کوئی عمل ہوگا تو اس کو بھی حاضر کیا جائے گا "۔ تاکہ وہ اس کا بھی صلہ و بدلہ پا سکے۔ اور کسی کی کسی بھی طرح کی کوئی حق تلفی نہ ہونے پائے۔ اور ایسا کرنا اللہ پاک۔ سبحانہ و تعالیٰ ۔ کیلئے کچھ بھی مشکل نہیں کیونکہ کسی کا کوئی بھی عمل یا کوئی بھی چیز اس سے کسی بھی طرح مخفی اور پوشیدہ نہیں رہ سکتی خواہ وہ کہیں آسمانوں کی بلندیوں میں پائی جاتی ہو یا زمین کی پستیوں میں کہیں مخفی و مستور ہو۔ اور اس کیلئے کسی بھی چیز کو حاضر کردینا کچھ بھی مشکل نہیں کہ اس کا معاملہ تو کاف اور نون کے درمیان ہے۔ یعنی اس کیلئے " کن " فرمایا اور وہ ہوگیا ۔ سبحانہ و تعالیٰ ۔ لہذا وہ ہر کسی کے عمل کو اس روز حاضر کریگا تاکہ وہ اس کا بدلہ پاس کے۔ بہرکیف اس یوم حساب میں کانٹے کے تول پر ہر کسی کو اس کے ہر عمل کا پورا پورا صلہ و بدلہ دیا جائے گا۔ رائی کے دانے کے برابر بھی اگر کسی کا کوئی عمل ہوگا تو اس کو بھی اس روز حاضر کیا جائے گا ۔ وباللہ التوفیق لما یحب ویرید وعلی ما یحب ویرید -
67 اور ہم کافی ہیں حساب لگانے والے : کہ ہمارا علم بھی کامل و لامحدود اور ہماری قدرت بھی کامل و لامحدود ہے۔ پس نہ کوئی ہمارے علم سے باہر ہوسکتا ہے اور نہ ہماری قدرت سے۔ سو اس ارشاد ربانی میں بڑی تنبیہ اور تذکیر ہے غافل انسانوں کے لئے ۔ فِایّاہُ نَسْاَلُ سُبَحَانَہ وَتَعَالٰی التّوفِیْقَ وَالسّدَادَ لِمَا یُحِبُّ وَیَرْضَی مِنَ الْقَوْلِ وَالْعَمَلِ فِی کُلِّ مَوْطِنٍ مِّنَ الْمَوَاطِنَ وَبِکُلِّ حَالٍ مِّنَ الاحوال ۔ پس اگر کوئی شخص دنیا میں اپنے کیے کرائے کے نتیجے اور اس کی پاداش سے بچ بھی گیا تو اس کو اس سے دھوکے میں نہیں پڑنا چاہیئے کہ وہ آخرت کے اس جہان عدل و انصاف میں بہرحال اپنے کیے کرائے کے بھگتان سے نہیں بچ سکے گا۔ اور فرمایا گیا کہ ہم کافی ہیں حساب لینے کے لیے۔ ہمیں نہ کسی کی کسی طرح کی مدد و معاونت کی کوئی ضرورت ہوگی اور نہ کسی طرح کی مساعدت کی کوئی حاجت۔ بلکہ یہ سب کام ہم تنہا ہی انجام دیں گے۔ لہذا اگر کسی نے یہ گمان کر رکھا ہے کہ ساری مخلوق کا یہ حساب کتاب ہم کس طرح کریں گے تو یہ اس کے اپنے دماغ کی تنگی اور اس کا مغالطہ ہے۔ اور اگر کوئی یہ سمجھتا ہے کہ اس کے خود ساختہ اور من گھڑت شرکاء اور شفعاء کی ہمیں مدد درکار ہوگی تو یہ اس کے اپنے دماغ کی خرابی اور اس کا اپنا وہم ہے ۔ والعیاذ باللہ -
Ayah 21:4868 حضرت موسیٰ اور ہارون کے بعض اہم انعامات کا ذکر وبیان : سو ارشاد فرمایا گیا " اور بلاشبہ ہم نے موسیٰ اور ہارون کو بھی فرقان دیا۔ یعنی تورات۔ جو کہ اپنے دور میں حق وباطل، کفر و ایمان، حلال و حرام اور جائز و ناجائز کے درمیان فرق کرنے والی تھی۔ (ابن جریر، ابن کثیر، روح اور مراغی وغیرہ) ۔ اور جو کہ راہ حق و صواب کو واضح کرنے والی ایک عظیم الشان روشنی بھی تھی اور اہل ایمان وتقویٰ کے لئے ایک عظیم الشان ذکر اور نصیحت بھی۔ اور جو کہ اصل میں ملی تھی حضرت موسیٰ (علیہ السلام) کو۔ مگر حضرت ہارون بھی چونکہ ان کے نائب اور شریک کار تھے، اس لئے یہاں پر اس کی نسبت ان دونوں کی طرف کی گئی ہے اور اس کتاب سے جہالت وغوایت کے اندھیروں میں حق و ہدایت کی روشنی کی جانی تھی۔ بہرکیف اب یہاں سے حضرات انبیائے کرام کا تذکرہ شروع ہوتا ہے جس میں بڑے اہم درس ہائے عبرت و بصیرت ہیں اور اس سلسلے کا آغاز حضرت موسیٰ اور حضرت ہارون کے ذکر سے فرمایا گیا ان کی امتیازی شان کی بناء پر۔ اور ان کو فرقان، ضیاء اور ذکر کی نعمتوں سے نوازنے اور ان سے سرفراز کرنے کا ذکر فرمایا گیا جو کہ راہ حق و ہدایت پر چلنے والوں کے لیے جلیل القدر انعامات اور عظیم الشان صفات ہیں۔ اور یہ تینوں صفتیں تورات کی ہیں۔ اور یہی شان ہر آسمانی کتاب کی ہوتی ہے۔ اسی لیے یہ صفات قرآن حکیم کے لیے بھی کئی جگہ ذکر فرمائی گئی ہیں۔
Ayah 21:4969 تقویٰ و پرہیزگاری وسیلہ نجات و سرفرازی : سو اس سے واضح فرما دیا گیا کہ تقویٰ و پرہیزگاری سعادت دارین سے سرفرازی کا ذریعہ و وسیلہ ہے۔ سو یہ ایک اہم اور بنیادی حقیقت ہے کہ تقویٰ و پرہیزگاری اور ایمان بالغیب دارین کی سعادت و سرخروئی سے سرفرازی کا ذریعہ و وسیلہ ہے کہ اس کتاب ہدایت سے فائدہ دراصل یہی لوگ اٹھا سکتے تھے۔ ورنہ اس کی ہدایت تو اپنے دور کے تمام ہی انسانوں کے لئے عام اور یکساں تھی۔ سو اس سے معلوم ہوا کہ تقویٰ و پرہیزگاری اور ایمان بالغیب سب خوبیوں کی اصل اساس اور بنیاد ہے۔ اسی سے انسان انسان بنتا ہے اور اس کے اندر احساس ذمہ داری پیدا ہوتا ہے اور وہ بات کو غور اور توجہ سے سنتا اور اس پر کان دھرتا ہے۔ جبکہ اس سے محرومی کی صورت میں ۔ والعیاذ باللہ ۔ انسان ایک لاپرواہ اور غیر ذمہ دار انسان بن جاتا ہے اور وہ حق بات پر کان ہی نہیں دھرتا جس سے وہ محروم کا محروم رہ جاتا ہے ۔ والعیاذ باللہ العظیم ۔ بہرکیف اس سے واضح فرما دیا گیا کہ کتاب ہدایت کی تعلیم و تلقین سے مستفید و فیضیاب وہی لوگ ہوسکتے ہیں جن کے دل و دماغ ماؤف نہیں ہوئے اور ان کی عقل و فطرت کا نور بجھا نہیں۔ اور وہ اپنے دلوں کے اندر خدا کا خوف اور آخرت کا ڈر رکھتے ہیں ۔ وباللہ التوفیق لما یحب ویرید وعلی ما یحب ویرید -
Ayah 21:5070 قرآن حکیم کی منکروں کے دل و دماغ پر دستک : سو ارشاد فرمایا گیا کہ " کیا پھر بھی تم لوگ اس کا انکار ہی کرتے جاؤ گے ؟ " ۔ والعیاذ باللہ : اور اپنی محرومی کی اس روش پر تم لوگ پھر بھی اڑے ہی رہو گے ؟ جو کہ سب سے بڑی محرومی اور بدبختی ہے کہ اتنی بڑی اور اس قدرعظیم الشان نعمت کو اپنانا اور اس پر ایمان لانا دارین کی سعادت و سرخروئی کا ذریعہ ہے۔ اور اس سے منہ موڑنا سب سے بڑا خسارہ و نقصان اور تمام خرابیوں کی جڑ بنیاد ہے ۔ والعیاذ باللہ العظیم ۔ سو اس ذکر سے منہ موڑتے ہو جو سراسر خیر و برکت اور ہدایت و نور ہے۔ اور اگر تم اس پر بھی ایمان نہیں لاؤ گے اور اس سے اعراض برتو گے تو پھر کس پر ایمان لاؤ گے ۔ { فَبِاَیِّ حَدِیْثٍ بَعْدَہُ یُؤمِنُوْنَ } ۔ بہرکیف اس ارشاد سے منکروں کے دل و دماغ پر دستک دیتے ہوئے ان سے فرمایا گیا کہ جس طرح حضرت موسیٰ کو تورات سے نوازا گیا تھا اسی طرح اب ہم نے آپ پر اے پیغمبر اس برکتوں بھری کتاب کو نازل فرمایا ہے۔ اور یہ اگرچہ باران رحمت کی طرح سراسر خیر و برکت ہے لیکن اس کی فیضباریوں سے مستفید و فیضیاب وہی لوگ ہوسکتے ہیں جن کے اندر اس کی صلاحیت موجود ہو۔ اور جن کے اندر یہ چیز نہیں ان کے لیے محرومی ہی محرومی ہے ۔ والعیاذ باللہ العظیم -
Ayahs 21:51–5471 رشد و ہدایت میں حضرت ابراہیم کا خاص مرتبہ و مقام : سو ارشاد فرمایا گیا کہ " ہم نے اس سے پہلے ابراہیم کو بھی ان کی شان کے لائق رشد و ہدایت سے نوازا تھا اور ہم اس کو خوب جانتے تھے کہ وہ کن کن صلاحیتوں اور قابلیتوں کے مالک ہیں اور کیا کیا مکارم و محاسن ان کے وجود باجود کے اندر مخفی و مستور ہیں۔ اور وہ ہماری کن کن عنایتوں اور نوازشوں کے اہل اور مستحق ہیں۔ کیونکہ خالق سے مخلوق کی کوئی بھی حالت و کیفیت مخفی و مستور نہیں رہ سکتی ۔ { اَلاَ یَعْلَمُ مَنْ خَلَقَ وَہُوَ اللَّطِیْفُ الْخَبِیْرُ } ۔ بہرکیف اس ارشاد سے واضح فرما دیا گیا کہ حضرت ابراہیم کو ہدایت و معرفت کے اس خاص درجہ و مرتبہ سے نوازا گیا تھا جو ان کے شایان شان تھا۔ ہدایت و معرفت کے درجات و مراتب مختلف ہیں۔ اللہ تعالیٰ جس کو بھی اس میں سے کوئی حصہ عطا فرماتا ہے وہ اس کی صلاحیتوں کو جانچ کر اس کے درجہ و مرتبہ کے مطابق عطا فرماتا ہے ۔ سبحانہ وتعالیٰ -
Ayahs 21:55–5674 اعلانِ حق سے مشرکوں کے اندر کھلبلی : سو حضرت ابراہیم کے اس اعلانِ حق سے مشرک قوم کے اندر بوکھلاہٹ اور کھلبلی مچ گئی۔ سو انہوں نے ابراہیم سے کہا کہ " تم دل لگی کرتے ہو جو اتنی بڑی بات کہہ رہے ہو " اور اپنے اور ہم سب کے آباؤ اجداد کو بھی گمراہ قرار دے رہے ہو ؟ سو یہ ہوتی ہے شان عقیدہ توحید کی۔ اور اس کے علمبردار صادق کی کہ تن تنہا حضرت ابراہیم (علیہ السلام) نے بغیر کسی لگی لپٹی کے بھرے مجمع میں ان سب کو گمراہ بلکہ گمراہی میں ڈوبا ہوا قرار دے دیا اور ڈنکے کی چوٹ اس کا صاف اعلان فرمایا دیا (علیہ الصلوۃ والسلام) اس سے وہ مشرک قوم اس طرح بوکھلا اٹھی اور انہوں نے حیرت زدہ ہو کر حضرت ابراہیم سے اس طرح پوچھا اور ان سے کہا کہ کیا تم سنجیدگی سے اور سچ مچ ایسی بات کہتے ہو یا یونہی دل لگی کر رہے ہو ؟ یعنی کیا یہ جوانی کی ترنگ اور لا ابالی کا نتیجہ ہے یا تم سچ مچ اور سنجیدگی سے ایسی بات کہہ رہے ہو ؟ کیونکہ یہ بات ان کے لیے بڑی ہی عجیب تھی۔
Ayah 21:5777 حضرت ابراہیم کی طرف سے بت شکنی کا اعلان : سو آپ نے اس بارے قسم کھا کر ارشاد فرمایا " اور قسم ہے اللہ کی میں تمہارے ان جھوٹے معبودوں کی خبر لے کر رہوں گا جبکہ تم لوگ ان سے پیٹھ پھیر کر جا چکے ہوؤ گے "۔ تاکہ اس طرح ان کا بےحقیقت ہونا پوری طرح آشکارا ہوجائے۔ یہ بات یا تو حضرت ابراہیم نے اپنے دل میں کہی یا اتنی آہستہ کہی کہ وہ لوگ اس کو سن نہ سکے یا سن لینے کے باوجود انہوں نے اس کو قابل توجہ ہی نہ سمجھا۔ کہ اتنی بڑی جرات و جسارت کون کرسکتا ہے ؟ اس لیے انہوں نے اس کی پرواہ نہ کی۔ بہرکیف حضرت ابراہیم نے ان مشرکوں کے سامنے واضح لفظوں میں اعلانِ حق فرما دیا کہ میں موقعہ ملتے ہی تمہارے ان معبودوں کی خبر لے کر رہوں گا۔ اور پھر آپ نے عملی طور پر ایسا کر کے بھی دکھایا اور برائی کو اپنے ہاتھوں سے مٹا دیا جو کہ " فلیغیرہ بیدہ " کے ارشاد نبوی کے مطابق انکار منکر کا پہلا اور سب سے اہم اور بڑا ذریعہ ہے۔ سو آپ نے اپنے دست مبارک کی ضرب کاری سے ان کے ان تمام خود ساختہ اور من گھڑت معبودوں کو ٹکڑے ٹکڑے کردیا اور اس طرح دست قدرت کا یہ معجزہ ظاہر ہوا کہ بت گر، بت پرست اور بت فروش باپ کے گھر میں ایسا بت شکن اور توحید کا علمبردار بیٹا پیدا ہوا جس نے قیامت تک آنے والی دنیا کی عبرت کے لیے درس توحید اور بت شکنی کے بےمثال اور انمٹ نقوش چھوڑے ۔ علی نبینا وعلیہ الصلاۃ والسلام ۔ اللہ تعالیٰ توحید کی علمبرداری اور شرک کے نشانوں کو مٹانے کی یہ سعادت ہمیں بھی نصیب فرمائے ۔ آمین۔
Ayahs 21:58–6078 مشرکوں کی تجہیل و تحمیق کے ایک اور معرکے کا انتظام : سو اس سے واضح فرما دیا گیا کہ حضرت ابراہیم نے موقعہ پاتے ہی ان کے ان تمام بتوں کو پاش پاش کردیا سوائے انکے بڑے کے۔ کہ اس کو چھوڑ دیا تاکہ وہ اس کی طرف رجوع کریں اور اس سے پوچھیں کہ یہ کیا بات ہے کہ یہ سب تو ٹوٹے پڑے ہیں اور تو صحیح سلامت ہے ؟ اور کلہاڑا بھی تو نے اٹھا رکھا ہے ؟۔ سو اس طرح ان بتوں کا عجز اور ان کی بےحقیقتی ان کے سامنے واضح ہوجائے گی۔ اور شاید اس طرح ان لوگوں کو راہ حق کی طرف رجوع نصیب ہوجائے۔ سو اس طرح حضرت ابراہیم نے ان مشرکوں کی تجہیل و تحمیق کے ایک موقعہ کا انتظام فرما دیا تاکہ ان کی جہالت اور حماقت سب کے سامنے اس طرح آشکارا ہوجائے کہ انکے لیے کسی انکار کی گنجائش باقی نہ رہے۔ کہ ان سے پوچھا جائے گا کہ تم لوگ خود اپنے ان ٹھاکروں سے پوچھ لو کہ تمہارا یہ حشر کس نے کیا ؟ تو اس کے جواب میں یہ لوگ یہی کہیں گے کہ یہ تو بول نہیں سکتے۔ تو اس موقع پر میں ان سے کہوں گا کہ تف ہے تم لوگوں پر بھی۔ اور تمہارے ان خود ساختہ اور من گھڑت معبودوں پر بھی جن کی پوجا پاٹ میں تم لگے ہوئے ہو۔ چناچہ بعد میں ویسے ہی ہوا۔ جیسا کہ آگے آ رہا ہے۔
Ayahs 21:61–6279 ابراہیم کو سب لوگوں کے سامنے حاضر کرنے کا حکم : سو ارشاد فرمایا گیا کہ ابراہیم کا ذکر آنے پر انہوں نے کہا کہ لاؤ اس کو سب لوگوں کے سامنے تاکہ یہ سب دیکھ لیں۔ سو اس طرح علمبرداران کفر و شرک کی طرف سے حضرت ابراہیم کو سب لوگوں کے سامنے لانے کا حکم دے دیا گیا۔ سو مت کے مارے ان مشرکوں نے اپنے معبودوں کی اس درگت سے سبق لینے اور راہ حق و ہدایت کی طرف رجوع کرنے کی بجائے حضرت ابراہیم کے بارے میں حکم دیا کہ لے آؤ اس کو سب لوگوں کے سامنے تاکہ لوگ دیکھ لیں اس کے اس حشر وانجام کو جو اس کے ساتھ ہم کریں گے۔ نیز وہ گواہی دیں اس جرم کی جس کا ارتکاب اس شخص نے کیا ہے۔ یعنی یہ لفظ " شہود " سے بھی ہوسکتا ہے اور " شہادت " سے بھی۔ دونوں صورتوں میں معنیٰ صحیح بنتا ہے۔ (روح، مدارک، کشاف، مراغی اور محاسن وغیرہ ) ۔ سو اس سے کفر و شرک کی مت ماری کا ایک اور نمونہ سامنے آتا ہے ۔ والعیاذ باللہ العظیم -
Ayah 21:6380 حضرت ابراہیم کی مشرکوں کے ضمیروں پر ایک اور دستک : کہ آپ نے انکے سوال کے جواب میں ارشاد فرمایا کہ یہ کارروائی انکے اس بڑے گرو نے کی ہوگی جو کلہاڑا اٹھائے خود صحیح وسالم کھڑا ہے۔ اور باقی سب چورہ چورہ ہوچکے ہوئے ہیں۔ اور جب تم اس کو کرتا دھرتا مانتے اور اپنا حاجت روا و مشکل کشا سمجھتے ہو تو پھر اس کی موجودگی میں دوسروں کا یہ حشر ہوا تو آخر کیوں ہوا ؟ اور یہ کیوں کھڑا دیکھتا رہا ؟۔ تو اس طرح حضرت ابراہیم نے ان کے ضمیروں کو جھنجھوڑا اور ان کو ایک اور دستک دی تاکہ وہ سوچیں کہ وہ بت پرستی کے جس گھناؤنے جرم کا ارتکاب کر رہے ہیں وہ کس قدر سنگین جرم ہے۔ اور یہ انسانیت کی کس قدر توہین و تذلیل ہے۔ اور یہ ایسی بےحقیقت اور بےجان مورتیوں کے آگے جھک کر کیسی حماقت کا ارتکاب کرتے اور کس قدر ہولناک گڑھے میں گرتے جا رہے ہیں ۔ والعیاذ باللہ جل وعلا -
Ayah 21:6481 حضرت ابراہیم کی ضرب حق کا مشرکوں پر اثر : کہ اس سے انہوں نے اپنے دلوں میں خود اپنے آپ سے یا ایک دوسرے سے کہا کہ یقینا تم لوگ خود ہی ظالم ہو۔ یعنی { انفسہم } کے یہ دونوں مطلب بن سکتے ہیں۔ ایک یہ کہ وہ لوگ اپنے دلوں میں اس طرح سوچنے لگے۔ اور دوسرا مطلب یہ کہ انہوں نے باہم ایک دوسرے سے اس طرح کہا۔ سو اس طرح حضرت ابراہیم کی ضرب حق کا ان لوگوں پر وقتی طور پر اثر ہوا لیکن پھر بھی وہ اوندھے ہوگئے اور حق کی طرف لوٹنے کی بجائے کفر و شرک کے اسی مہیب اور تباہ کن گڑھے میں گرگئے ۔ والعیاذ باللہ -
82 مشرکوں کا اپنے ظلم کا اقرار و اعتراف : سو انہوں نے خود اپنے آپ کو یا ایک دوسرے کو خطاب کر کے کہا کہ یقینا تم لوگ خود ہی ظالم ہو جو ایسی بےجان مورتیوں کی پوجا کرتے ہو اور یہ نہیں سوچتے کہ یہ مورتیاں جو خود اپنے آپ کو بھی نہیں بچا سکتیں وہ دوسروں کے کیا کام آئیں گی ؟ اور جب یہ کسی نفع و نقصان کا بھی کوئی اختیار نہیں رکھتیں تو پھر ان کو معبود قرار دینے کی کیا تک ہوسکتی ہے بلکہ یہ تو حقیقت میں انسانیت کی انتہائی تحقیر و تذلیل ہے۔ سو حضرت ابراہیم کی طرف سے لگنے والی اس ٹھوکر سے وہ اپنے عقل و دل کی راہنمائی کی طرف متوجہ ہوئے اور ایک دوسرے سے کہنے لگے کہ تم لوگ تو اس نوجوان کو ظالم کہتے ہو لیکن اس نے ثابت کردیا کہ ظالم وہ نہیں تم لوگ ہو جو ایسی بےحقیقت چیزوں کو پوجتے پکارتے اور ان کو اپنا معبود اور حاجت روا و مشکل کشا قرار دیتے ہو جو اتنی صلاحیت بھی نہیں رکھتے کہ خود اپنا بچاؤ کرسکیں یا اس کو کسی دوسرے کے آگے بیان ہی کرسکیں۔ تو پھر یہ مورتیاں تمہاری حاجت روا و مشکل کشا آخر کس طرح ہوسکتی ہیں ؟۔
Ayah 21:6583 پھر وہ اوندھے ہوگئے اپنے سروں پر : یعنی زمین کی طرف سرجھکا کر ( ابن کثیر) اور لاجواب ہو کر عناد و ہٹ دھرمی اور دھمکیوں پر اتر آئے۔ اور مت مار دی گئی ان بدبختوں کی اور ان کو حق کی طرف رجوع کرنے کی توفیق پھر بھی نصیب نہ ہوسکی ۔ والعیاذ باللہ العظیم ۔ " نکس " کے معنیٰ کسی چیز کو اس طرح الٹ دینے کے ہوتے ہیں کہ اس کا سر نیچے اور پاؤں اوپر ہوجائیں۔ ( مدارک وغیرہ ) ۔ سو حضرت ابراہیم کی تنبیہ و تذکیر سے ان لوگوں نے ذرا دیر میں سہی پر آنکھیں کھولیں تو سہی۔ لیکن پھر اوندھے ہو کر بولے کہ ابراہیم تم اچھی طرح سے جانتے ہو کہ یہ بت بول نہیں سکتے تو پھر ہم ان سے اس بارے کس طرح پوچھیں۔ سو جن لوگوں کی مت مار دی جاتی ہے ان کا حال یہی ہوتا ہے کہ وہ ایک قدم صحیح سمت میں اٹھائیں گے اور پھر اسی الٹی اور اوندھی چال پر چل پڑتے ہیں جس پر وہ پہلے سے چل رہے ہوتے ہیں ۔ والعیاذ باللہ العظیم -
84 معبودان من دون اللہ بےحقیقت اور بےبس : سو اس سے مشرکوں کی طرف سے اپنے معبودوں کی بےبسی کا اقرار و اعتراف ذکر فرمایا گیا ہے۔ سو ارشاد فرمایا گیا کہ انہوں نے کہا کہ ہمارے یہ بت بول نہیں سکتے تو پھر ہم ان سے پوچھیں کیونکر ؟۔ مگر یہ بات پھر بھی ان لوگوں کی سمجھ میں نہ آسکی کہ جو اس قدر بےجان اور بےحقیقت ہیں وہ آخر ان کے خدا اور حاجت روا و مشکل کشا کیونکر ہوسکتے ہیں ؟ سو اس طرح مشرکوں نے اپنے معبودوں کی بےبسی اور ان کے عجز کا اعتراف تو کیا لیکن پھر بھی اندھے کے اندھے ہی رہے۔ اور یہی نتیجہ ہوتا عناد اور ہٹ دھرمی کا ۔ والعیاذ باللہ ۔ سو جو لوگ اس طرح کی جہالتوں میں مبتلا ہوتے ہیں ان کے قلب و باطن پر جب کسی تنبیہ یا واقعے سے کچھ روشنی پڑتی ہے تو ان کو سیدھی راہ دکھائی دینے لگتی ہے مگر جہالت پھر ان کی مت مار دیتی ہے ۔ والعیاذ باللہ -
Ayahs 21:66–6785 حضرت ابراہیم کا مشرکوں پر بھرپور وار : ۔ سو مشرکوں کے اس اقرار و اعتراف کے بعد حضرت ابراہیم نے ان پر بھرپور وار کرتے ہوئے ان سے فرمایا کہ کیا تم لوگ ایسی بےحقیقت چیزوں کی پوجا کرتے ہو جو نہ کوئی نفع پہنچا سکیں اپنے پجاریوں کو ان کی پوجا پاٹ پر۔ تو پھر تم لوگ آخر ان کی پوجا کیوں کرتے ہو ؟ اور ایسی بےحقیقت چیزیں جو اپنے پجاریوں کے لیے بھی کسی نفع اور فائدہ کا اختیار نہ رکھتی ہوں ان کو معبود قرار دے کر ان کی پوجا پاٹ کرنا کتنی بڑی حماقت اور کس قدر ظلم عظیم ہے ۔ والعیاذ باللہ العظیم ۔ معبود کی عبادت و بندگی اسی لیے کی جاتی ہے کہ وہ عابد کے کام آسکے۔ اور عبادت و بندگی پر اس کو نفع و فائدہ پہنچا سکے۔ ورنہ اس کی عبادت و بندگی عبث و بیکار ہے۔
86 معبودان باطلہ کی کمال بےبسی کا ذکر : سو اس سے معبودان باطلہ کی کمال بےبسی کو ظاہر فرما دیا گیا کہ وہ نہ تو اپنے پجاریوں کو کوئی نفع پہنچا سکتے ہیں اور نہ ہی کوئی نقصان پہنچا سکتے ہیں ان سے منہ موڑنے پر اور ان کی اس قدر تحقیر و تذلیل کرنے پر۔ اور یہاں تک کہ اگر کوئی ان کو توڑ پھوڑ کر ٹکڑے ٹکڑے اور ریزہ ریزہ کر دے تو بھی یہ ان کا کچھ نہیں بگاڑ سکتے۔ بلکہ یہ خود اپنے آپ کو بھی نہیں بچا سکتے۔ تو پھر ایسوں کو معبود ماننا اور ان کو حاجت روا و مشکل کشا قرار دے کر ان کے آگے مراسم عبودیت بجا لانا کس قدر جہالت اور کتنی بڑی حماقت ہے ۔ والعیاذ باللہ العظیم -