Ayah 51:1(1) قسم ہے ان ہوائوں کی جو بکھیرنے اور اڑا کر پراگندہ کرنے والی ہیں۔
Ayah 51:2(2) پھران بدلیوں کی قسم جو بوجھ کو اٹھانے والی ہیں۔
Ayah 51:3(3) پھر ان کشتیوں کی قسم جو نرم رفتار سے چلنے والی ہیں۔
Ayah 51:4(4) پھران تقسیم کرنے والے فرشتوں کی قسم جو امرالٰہی سے تقسیم کرتے ہیں۔
Ayah 51:5(5) یقینا تم لوگوں سے جس کا وعدہ کیا جاتا ہے وہ سچ ہے۔
Ayah 51:6(6) اور یقینا اعمال کی جزا ضرور ملنے والی ہے۔ یعنی بارش سے پہلے جو بادلوں کو ابھارنے کے لئے تیز ہوا چلتی ہے جس سے خاک اور غبار اڑتا ہے اس کی قسم پھر جب پانی سے بھرے ہوئے بادل اٹھ آتے ہیں ان بدلیوں کی قسم، اور سازگاری ہوا کے ساتھ جو نرم رفتار کے ساتھ کشتیاں چلتی ہیں ان کی قسم اور ان فرشتوں کی قسم جو ارزاق وغیرہ کی تقسیم پر موکل ہیں یا اللہ تعالیٰ کے حکم کے موافق مختلف علاقوں میں بارش کی تقسیم کرتے ہیں اور ہوسکتا ہے کہ یہ چاروں قسمیں ہوا کی ہوں۔
مثلاً یوں ترجمہ کیا جائے قسم ہے ان ہوائوں کی جو اڑا کر بکھیرتی ہیں جن سے غبار اور خاک وغیرہ اڑتی ہے۔ پھر وہ ہوائیں جو بادلوں کو اٹھا لاتی ہیں اور بدلیوں کی حامل ہوتی ہیں پھر وہ نرم رفتار ہوائیں جو بارش سے پہلے آہستہ اور سبک خرام ہوتی ہیں پھر ان ہوائوں کی قسم جو حکم الٰہی کے موافق پانی کو بانٹتی اور تقسیم کرتی ہیں ان تمام قسموں کا جواب قسم یہ ہے۔ انما توعدون لصادق وان الدین لواقح
یعنی جس قیامت کا تم سے وعدہ کیا جاتا ہے اور جس بعث بعد الموت کا تم کو وعدہ دیاجارہا ہے وہ بالکل سچ ہے اور اعمال کی جزا ضرور واقع ہونے والی ہے اور حساب اعمال کا ضرور ہونے والا ہے قیامت کے صدق پر ان چیزوں کی قسم کھائی۔
مناسبت ظاہر ہے کہ قیامت تمام عالم کو درہم برہم کردے گی خواہ وہ عالم علوی ہو یا عالم سفلی ہو، یا خلا اور جو ہو، فرشتے عالم علوی کے، کشتیاں عالم سفلی کی، ہوا اور بادل خلا اور جو کے اور یہ تو ظاہر ہی ہے کہ حضرت حق تعالیٰ جوان سب چیزوں پر قدرت رکھتا ہے اور جس نے یہ نظام ہوائوں کا اور بدلیوں کا اور تقسیم امور کا قائم کیا ہے وہ اس سب کو فنا کرنے کی بھی طاقت اور قدرت رکھتا ہے اور ختم کرنے کے بعد پھر انسان کو دوبارہ پیدا بھی کرسکتا ہے۔
بعض علماء نے جاریات کا ترجمہ بجائے کشتیوں کے ستارے کیا ہے۔
حضرت شاہ صاحب (رح) فرماتے ہیں یہ قسم ہے بادوں کی اول آندھی چلتی ہے غبار اڑاتا ہے اور بادل بنتے ہیں پھر ان میں پانی بنتا ہے اس بوجھ کو لئے پھر تیاں ہیں پھر برسنے کے قریب رم بائو چلتی ہے پھر ہانک کر اور جگہ کا حصہ پہنچاتی ہیں موافق حکم کے۔
خلاصہ : یہ کہ حضرت شاہ صاحب (رح) کے نزدیک یہ چاروں قسمیں ہوائوں کی ہیں اس لئے ان کے منہیہ میں فرشتوں کا اور کشتیوں کا ذکر نہیں ہے۔
حضرت شاہ صاحب (رح) کے نزدیک ذاریات ، حاملات، جاریات مقسمات یہ سب ہوائیں ہیں۔
Ayah 51:7(7) قسم ہے راستوں والے آسمان کی۔
Ayah 51:8(8) کہ تم ایک اختلاف کی بات میں پڑے ہوئے ہو۔
Ayah 51:9(9) اس کے ماننے سے وہی پھرا اور بازرہا جو راندہ گیا اور پھر دیا گیا۔ یہ آسمان کی قسم کھائی راستوں والا آسمان جس میں فرشتوں کے جانے آنے کے راستے ہیں یا تاروں والا آسمان حبک جمع ہے جی کہ کی جیسے طریق جمع طریقہ کی یا جمع ہے حباک کی جس کے معنی ستارے کے ہیں اسی وجہ سے ترجمے میں دو قول ہیں راستوں والے آسمان کی قسم اور تاروں والے آسمان کی قسم۔
حضرت شاہ صاحب (رح) نے اپنے ترجمے میں فرمایا قسم ہے آسمان جالی دار کی پھر موضع القرآن میں فرمایا آسمان جالی دار یعنی تارے ہیں اس میں جال سا اور جھگڑے کی بات آخرت کا جینا جو اس کی نہ مانے وہ درگاہ سے پھیرا گیا۔ جس طرح حبک کے معنی دو طرح کے گئے ہیں اسی طرح قول مختلف میں بھی کئی قول ہیں یا تو وہی مرنے کے بعد آخرت میں زندہ ہونا۔ یا قرآن کے بارے میں مختلف قول کہتے ہو یارسول اللہ کے بارے میں مختلف باتیں کہتے ہو۔
بہرحال آسمان کی قسم کھا کر فرمایا کہ تم بلاوجہ ایک اختلاف میں مبتلا ہو اور جس چیز میں اختلاف کررہے ہو وہ ایسی ہے کہ اس سے وہی شخص بازرہ سکتا ہے اور اس پر ایمان لانے سے وہی پھرتا ہے جو درگاہ خداوندی سے پھر دیا گیا اور لوٹا دیا گیا۔
حضرت ابن عباس نے فرمایا یضل عنہ من ضل یعنی وہ شخص گمراہ ہوتا ہے اس سے جس کو گمراہ کیا گیا۔ صاحب قاموس نے کہا ہے ۔ مافوک مصروف عن الحق مطلب یہ ہے کہ جس بارے میں اختلاف کررہے ہو وہ آخرت کا جینا ہو یا قرآن ہو، یا نبی کریم ﷺ کی ذات ہو ، بحال اس سے وہی پھرتا ہے جو پھیر دیا گیا اور راندا گیا یعنی جو ازلی بدبخت ہے وہی سے انکار کرتا اور پھرتا ہے۔
غرض قیامت رسول یا قرآن کے اقرار اور ایمان سے وہی پھر تا ہے جس کی ہر قسم کی خیروسعادت سے پھرنا اور محروم رہنا ہوتا ہے۔
Ayah 51:10(10) ہلاک کئے جائیں اور خدا کی رحمت سے دور کئے جائیں وہ تخمینے لگانے اور اٹکل کرنے والے اور بےسند باتیں کرنے والے۔
Ayah 51:11(11) جو غفلت اور جہالت میں فراموش کرنے اور بھولنے والے ہیں۔
Ayah 51:12(12) پوچھتے اور دریافت کرتے ہیں کہ جزا کا دن کب ہوگا۔
Ayah 51:13(13) وہ اس دن ہوگا جس دن یہ لوگ آگ پر تپائے جائیں گے۔
Ayah 51:14(14) کہا جائے گا اپنی تکذیب اور اپنی شرارت کا مزہ چکھو یہی تو وہ عذاب ہے جس کی تم جلدی اور شتابی کیا کرتے تھے۔ قتل بددعا کے طور پر ہے۔ یعنی لحن خراصون محض بدگمان اور اٹکل سے بےسند بات کرنے والے عمرۃ ، جمل، ضلال، غفلت، تعنت اور استہزاء اور جلدی کرنے کی غرض سے پوچھتے تھے انصاف کا دن کب ہوگا ۔ فتنت الشئی جلانا عذاب کرنا آگ پر تپانا ، آگ کے کوئلوں پر رکھ کر الٹ پلٹ کرنا اپنے فتنے کا مزہ چکھو یعنی اپنی شرارت اور شرک کا مزہ آگے پرہیزگاروں کے انجام کا ذکر فرماتے ہیں۔
Ayah 51:15(15) البتہ پرہیزگار اور ڈرنے والے لوگ باغوں میں اور چشموں میں ہوں گے۔
Ayah 51:16(16) ان کی حالت یہ ہوگی کہ جو نعمتیں اور جو ثواب ان کے پروردگار نے ان کو دیا ہوگا وہ اس کو حاصل کررہے ہوں گے کیونکہ وہ اس عالم آخرت سے پہلے نکوکار اور نیکی کرنے والے تھے۔
Ayah 51:17(17) وہ لوگ رات کو بہت کم سویا کرتے تھے۔
Ayah 51:18(18) اور رات کے آخری حصے میں یعنی سحر کے وقت بخشش طلب کیا کرتے تھے۔
Ayah 51:19(19) اور ان کے مالوں میں حصہ مقرر تھا سوال کرنے والوں کا اور سوال سے بچنے والوں کا۔ یعنی ایسے باغات میں ہوں گے جن میں چشمے جاری ہوں گے اور جو جو نعمتیں ان کا پروردگار ان کو عطا فرمائے گا ان کو حاصل کرتے ہوں گے کیونکہ یہ پرہیزگار لوگ دنیا میں نیک روش رکھتے تھے اور نیکیاں کرنے کے خوگر تھے اور علاوہ فرائض و واجبات کے نوافل اور تطوعات بھی بجا لاتے تھے رات کو بہت کم سوتے تھے یعنی رات کا اکثر حصہ عبادت میں گزارتے تھے اور سحر کے وقت اللہ تعالیٰ سے استغفار کیا کرتی تھے یہ استغفار یا تو تھوڑی دیر سو جانے پر کیا کرتے تھے یا رات نہیں سوتے تھے بلکہ عشاء کی نماز پڑھتے تھے اس تقدیر پر اس آیت کا تہجد کی نماز سے کوئی تعلق نہ ہوگا۔
بہرحال عبادات بدنی کے بعد عبادات مالی اور ان کی خیرات کا حال بتایا کہ وہ اپنا مال مانگنے والوں کو بھی دیتے تھے اور جو سوال سے تعفف کی وجہ سے بچتے اور پرہیز کرتے ہیں ان کو بھی دیتے ہیں۔
تلک الرسل میں تفصیل گزر چکی ہے سائل کی دو قسمیں بیان فرمائیں ایک وہ جو عام طور سے سوال کرتے ہیں اور دوسرے وہ جو سفید پوش ہیں اور شرم وحیاء کی وجہ سے سوال نہیں کرتے پھرتے۔
حضرت شاہ صاحب (رح) فرماتے ہیں ہارا وہ محتاج ہے اور مانگتا نہیں پھرتا۔
خلاصہ : یہ ہے کہ پہلی آیتوں میں منکروں کا ذکر تھا ان آیتوں میں متقیوں کا ذکر فرمایا آگے دلائل توحید اور رزق کے وعدہ کی تاکید ہے۔
Ayah 51:20(20) اور زمین میں یقین کرنیوالوں کے لئے بہت سے دلائل موجود ہیں۔
Ayah 51:21(21) اورخود تمہاری ذات میں بھی دلائل موجود ہیں پھر کیا تم کو دکھائی نہیں دیتا۔ اوپر محسنین کا ذکر تھا اب فرمایا سب کاموں کا دارومدار یقین پر ہے یقین کرنے والوں کے لئے زمین قدرت الٰہی کی نشانیوں سے بھری پڑی ہے اس کی نباتات رنگ برنگ کے پھول اور پتوں کی ساخت معدنیات قسم قسم کے جواہرات غرض کیا چیز ہے جو زمین ہر نہیں اگلتی۔ یہ کارخانہ ارضی اپنے اندر ہزاروں نشانیاں قدرت خداوندی کی پنہاں رکھتا ہے اور ان کو وقتاً فوقتاً آشکارا کرتا رہتا ہے اور زمین تو بڑی چیز ہے خود انسان کے اندر کیا نہیں ہے۔ انسان خود ایک عالم صغیر ہے جس میں سب کچھ موجود ہے سرے لے کر پائوں تک قدرت الٰہی کی ایک جیتی جاگتی تصویر ہے کیا تم دیکھتے نہیں اور اپنی ساخت اور اپنی بناوٹ پر غور نہیں کرتے۔ ؎
نظرے بسوئیخود کن کہ تو جان دل ربائی
مفگن بخاک خود را کہ تو از بلند جائی
تو زچشم خود نہانی تو کمال خود چہ دانی
چوں دراز صدف بروں آ کہ تو بس گران بہائی
بہرحال خواہ عالم صغیر ہو یا عالم کبیر ہو ہر ایک میں اللہ تعالیٰ کی توحید اور اس کی بےپناہ قدرت کے دلائل موجود ہیں آگے خیرات کرنے والوں کی ہمت افزائی کرتے ہیں اور رزق کی جانب سے اطمینان دلاتے ہیں۔
Ayah 51:22(22) اور تمہاری روزی اور جو تم سے وعدہ کیا جاتا ہے وہ سب آسمان میں ہے۔ یعنی رزق کا سامان آسمان سے ارتا ہے یا یہ مطلب ہے کہ جس قدر رزق تمہارے لئے مقسوم ہے اور جس قدر رزق تمہاری قسمت میں ہے اور جو ثواب و عقاب اور خیر اور شر اور قیامت کا وقوع یہ سب امور لوح محفوظ میں درج ہیں اور وہیں کے لکھے کے موافق آسمان پر سے ہرچیزنازل ہوتی ہے آسمان میں ہونے کے معنی یہ ہیں کہ یہ سب لوح محفوظ میں درج ہے۔
Ayah 51:23(23) آسمان و زمین کے پروردگار کی قسم یہ بات بالکل ایسی ہی برحق ہے جیسے تم بولتے اور باتیں کررہے ہو - حضرت حق تعالیٰ نے اپنی ذات کی قسم کھاکر یقین دلایا کہ اس کلام میں شبہ نہیں جیسے اپنے بولنے میں شبہ نہیں ۔ تم اپنے بولنے میں شبہ نہیں کرتے ایسے اس بات کو بھی حق سمجھو اور اس کے حق ہونے میں شبہ نہ کرو کہ رزق پہنچ کر رہے گا اور قیامت آکر رہے گی اور اللہ تعالیٰ کے وعدے ضرور پورے ہوکر رہیں گے چونکہ رزق کی بحث تھی اور اللہ تعالیٰ کے وعدوں کی توفیق کا بیان تھا اس لئے آگے حضرت اسراہیم (علیہ السلام) کا ذکر فرمایا۔
Ayah 51:24(24) اے پیغمبر کیا ابراہیم کے معزز اور بزرگ مہمانوں کی بات بھی آپ تک پہنچی ہے۔ یہ فرشتے تھے جیسا کہ سورة حجر میں گزر چکا ہے زیادہ سے زیادہ ان کی تعداد مع جبرائیل (علیہ السلام) کے دس بتائی جاتی ہے ہوسکتا ہے کہ کم وبیش ہو مکرم فرما رہے تھے اس سے بڑھ کر اور کیا مکرم ہوسکتے ہیں۔
حدیث میں آتا ہے جو شخص اللہ تعالیٰ اور قیامت کے دن پر ایمان رکھتا ہو اس کو چاہیے کہ وہ اپنے مہمان کا اکرام کرے اور اس کی عزت کرے۔
Ayah 51:25(25) یہ واقعہ اس وقت کا ہے جب وہ مہمان ابراہیم (علیہ السلام) کے پاس آئے تو انہوں نے کہا سلام ، ابراہیم (علیہ السلام) نے بھی کہا سلام یہ لوگ اجنبی ہیں۔ یعنی تحیہ جو دستور تھا کہ انہوں نے سلام کیا حضرت ابراہیم (علیہ السلام) نے سلام کا جواب وعلیکم السلام کہا ، پھر فرمایا دل میں یہ لوگ اوپری اور ناشناختہ ہیں۔
ابن عبات کا قول یہی ہے کہ دل میں فرمایا اور ہوسکتا ہے کہ زبان سے کہا ہو کہ آپ نے لوگوں کو پہچانا نہیں مگر فرشتوں نے کوئی جواب نہ دیا۔ یا یہ کہ وہ دیار کفر تھا وہاں اسلامی تہذیب کو سن کر اوپری خیال کیا۔
بہرحال سلام و کلام کے بعد۔
Ayah 51:26(26) ابراہیم خاموشی کے ساتھ اپنے گھر والوں کی طرف گیا اور ایک خوب فربہ اور موٹا بچھڑا گھی میں تلا ہوا لے آیا۔
Ayah 51:27(27) پھر وہ بچھڑا ان کے سامنے لاکر رکھا اور فرمایا آپ کھاتے کیوں نہیں یعنی مہمانوں سے بات کرکے جلدی سے گھر گئے یہ جانا خفیہ طور پر تھا جیسا کہ قاعدہ ہے گھر گئے اور گھر جاکر ایک موٹ بچھڑا تلواکر گھی میں لے آئے اب وہ بچھڑا مہمانوں کے آگے رکھا جب مہمانوں نے ہاتھ نہ بڑھایا تو فرمایا۔ الا تاکلون۔
Ayah 51:28(28) پھر ابراہیم (علیہ السلام) ان سے اپنے دل ہی دل میں خوف کرنے لگا ان مہمانوں نے کہا آپ ڈرئیے نہیں اور انہوں نے ابراہیم کو ایک ایسے لڑکے کی بشارت دی جو بڑا عالم ہوگا۔ جب انہوں نے کچھ نہ کھایا تو ان کو اندیشہ ہواکیون کہ مہمان کا کھانا نہ کھانا خطرناک سمجھا جاتا تھا کہ یہ کھانا نہیں کھاتے تو معلوم ہوتا ہے کہ ان کی نیت تکلیف پہنچانے کی ہے وہ فرشتے تھے ان کو معلوم ہوا تو انہوں نے کہا آپ خوف نہ کیجئے اور اندیشہ نہ کیجئے اور ایک لڑکے کی جو دانا اور علیم ہوگا یعنی نبی ہوگا اس کی بشارت دی یہ بشارت حضرت اسحاق (علیہ السلام) کے ہونے کی تھی۔
Ayah 51:29(29) اتنے میں ابراہیم (علیہ السلام) کی بیوی بولتی ہوئی سامنے آئی اور اس نے ماتھے پر ہاتھ مارا اور کہنے لگی میں بڑھیا بھی اور بانجھ بھی۔ یہ بیوی حضرت سارا ہیں یہ گھر میں سن رہی ہوں گی انہوں نے لڑکے کی بشارت سنی تو ماتھے پر ہاتھ مار کر کہنے لگیں جیسے عورتوں کی عادت ہے کہ تعجب کے وقت ایسا کرتی ہیں وہ آگے آئیں اور ہاتھ مار کر کہنے لگیں میں بڑھیا بھی اور بانجھ بھی ایسی حالت میں بچہ ہونا بڑے تعجب کی بات ہے۔ یہ قصہ سورة ہود میں تفصیل کے ساتھ گزر چکا ہے۔
بہرحال جب حضرت سارانے ہاتھ مار کر ماتھے تر تعجب کا اظہار کیا تو ان فرشتوں نے عورت کا یہ تعجب دیکھ کر فرمایا۔
Ayah 51:30(30) ان مہمان فرشتوں نے کہا تیرے پروردگار نے اسی طرح فرمایا ہے بیشک وہ بڑے علم والا بڑی حکمت والا ہے۔ یعنی تعجب کی کوئی بات نہیں یہ تو اللہ کا فرمودہ ہے وہ جانتا ہے کہ کس کو اولاد دینی ہے اور کیونکر دینی ہے اور وہ بڑی حکمت والا ہے اس کی حکمت اور مصلحت کے ماتحت ہی نبوت تقسیم ہوتی ہے وہ جس خاندان میں چاہتا ہے علم ونبوت کا سلسلہ جاری رکھتا ہے اور جب تک چاہتا ہے اس کو قائم رکھتا ہے ۔
بہرحال اس بات کو سن کر حضرت سرا کا تعجب دور ہوگیا۔
Ayah 51:31(31) حضرت ابراہیم (علیہ السلام) نے کہا اے خدا کے فرستادواب تمہارا کیا مقصد ہے اور تم کو کیا مہم درپیش ہے۔ یعنی جب بات کھل گئی تو ان سے دریافت کیا کہ اے خدا کے بھیجے گئے فرشتو ! اب تمہارا کیا کام ہے انہوں نے بتادیا کہ حضرت لوط کی قوم پر عذاب لے کر آئے ہیں اب وہیں جارہے ہیں تفصیل سورة ہود اور سورة حجر دیکھ لی جائے۔
Ayah 51:32(32) ان فرشتوں نے حضرت ابراہیم (علیہ السلام) کے جواب میں کہا بلاشبہ ہم ایک مجرم قوم کی طرف بھیجے گئے ہیں یعنی لوط (علیہ السلام) کی قوم پر عذاب کی غرض سے بھیجے گئے ہیں ۔
Ayah 51:33(33) تاکہ ہم ان مجرموں پر کھنگر پتھر برسائیں۔
Ayah 51:34(34) ان پتھروں پر آپ کے پروردگار کی طرف سے حد سے نکل جانے والوں کے لئے خاص نشان بھی پڑے ہوئے ہیں۔ مطلب یہ ہے کہ جو لوگ حد سے نکل جانے والے ہیں اور مسرف ہیں ان پر جو پتھر برسیں گے ان پتھروں پر آپ کے پروردگار کی جانب سے خاص علامت اور نشان ہوں گے یعنی ان کے نام لکھے ہوئے ہوں گے تفصیل سورة ہود میں گزر چکی ہے۔
Ayah 51:35(35) آخر کار اس بستی میں جتنے ایمان والے تھے ہم نے ان کو وہاں سے بچا کر نکال لیا۔
Ayah 51:36(36) اور ہم نے اس بستی میں ایک گھر کے سوا مسلمانوں کا اور کوئی گھر پایا بھی نہیں۔ یعنی وہاں ایک گھر کے سوا کوئی اور گھر ہی مسلمانوں کا نہ تھا ورنہ اللہ تعالیٰ کا علم اس کو بھی محیط ہوتا بہرحال ایمان والوں کو بچا نکالا اس کے بعد جو کچھ ہوا وہ سورة حجر اور سو رہ ہود میں پڑھ لیجئے۔
Ayah 51:37(37) اور ہم نے ان تباہ شدہ بستیوں میں ایسے لوگوں کے لئے ایک سبق آموز نشان باقی رکھا جو درد ناک عذاب سے ڈرتے اور خوف کھاتے ہیں۔ یعنی عذاب الیم سے جو لوگ ڈرتے ہیں ان کے لئے اب تک وہ الٹی ہوئی بستیاں پڑی ہیں اور مکان الٹے پڑے ہیں اور وہاں سڑا ہوا بدبودار پانی بہتا ہے۔
Ayah 51:38(38) اور موسیٰ (علیہ السلام) کے واقعہ میں بھی عبرت آموز نشانی ہے جب کہ ہم نے فرعون کی طرف واضح اور کھلی دلیل دے کر بھیجا یعنی معجزہ دے کر بھیجا۔
Ayah 51:39(39) پھر فرعون نے اپنی فوجی طاقت کے بل پر روگردانی اور سرتابی کی اور کہنے لگا تو یہ جادو گر ہے یا یہ دیوانہ ہے۔ یعنی جب موسیٰ (علیہ السلام) آیا اور اس کا معجزہ دیکھا تو اس کو شعبدہ باز جادوگر اور دیوانہ وغیرہ کہنے لگے۔ برکنہ کا ترجمہ یہ بھی ہوسکتا ہے کہ اپنے ارکان سلطنت کے ساتھ اس نے سرتابی کی…… اور یہ بھی ہوسکتا ہے کہ رو گردانی اس طرح کی کہ بازوہ اور کھوئے تک پھیر لئے یعنی اعضاء بھی پھیر لئے لیکن ہم نے فوجی قوت کا بل کیا ہے اور ہم اسی کو اس موقع پر مناسب سمجھتے ہیں فرعون کے وقت سے لے کر آج کے دم تک ہم دیکھ رہے ہیں کہ فوجی طاقت کو حکمرانوں میں بڑا دخل ہے۔ (واللہ اعلم)
Ayah 51:40(40) پھر ہم نے اس فرعون کو اور اس کے لشکر کو پکڑ لیا اور ان سب کو دریا میں جاپھینکا اور اس کی حالت یہ تھی کہ وہ ملامت زدہ تھا اور اس نے کام ہی ایسا ہی کیا تھا جو اولاہنے اور ملامت کا موجب تھا۔