87. Surah Al-A'laa

سورة الاعلی۔ آیات 1 تا 19۔ اسرار ومعارف۔ اپنے پروردگار کے اعلی نام کی پاکی بیان کیجئے جس نے مخلوق کو عدم سے وجود بخشا کچھ بھی نہ تھا پھر سب کچھ پیدا فرمایا۔ مسئلہ : جب یہ آیہ مبارکہ نازل ہوئی تو آپ نے اسے سجدے کے لیے مقرر فرمایا۔ پھر تمام اجسام کو ایک انتہائی مناسب اندازے کے مطابق شکل و صورت دی اور جس کو جس کام کے لیے بنایا اسے اس کام کی استعداد بھی بخشی اور اس کی طرف میلان بھی عطا فرمایا۔ قدرت کا عطیہ۔ یہ سارے نظام کائنات میں مشاہدہ کیا جاسکتا ہے کہ ہر ذرے کو صورت ، شعور ، اور فطری کام کی استعداد عطا کرکے ایسا میلان بخشا کہ سوج ، چاند ، ستارے ، بادل ، ہوا ، جمادات ونباتات ہر ایک شے اپنے وقت پر اپنا کام کررہی ہے اسی طرح حیوانات کو ان کے کاموں کا فطری شعور بخشا پرندے اڑتے ہیں پانی کے جانور تیرتے ہیں ، جنگلی حیات اپنے تحفظ ، غذا اور بقائے نسل کے لیے کیسے کیسے اہتمام کرتی ہے۔ سائنس۔ اسی طرح انسان کو دنیا کی اشیاء کا استعمال اور اس کے استعمال کے طریقے جاننے کی استعداد عطا کردی جو ان طریقوں کو جان لیتا ہے سائنسدان کہلاتا ہے کہ سائنس نئی شے تخلیق نہیں کرتی انہی اشیاء کو جوڑ کر کچھ بناتی ہے اسی طرح انسانی فطرت میں اللہ کی طلب اس کے قرب کے حصول کی استعداد بھی رکھ دی اور سامان ہدایت بھی مہیا فرمایا ، فتبارک اللہ احسن الخالقین ، سب اسی کی قدرت ہے کہ سرسبزچارہ اگاتا ہے اور پھر وہ فرسودہ ہوکرسیاہ کوڑا بن جاتا ہے ہر زندگی کا جو دنیا میں ہے انجام سامنے ہے جلدی یابدیر ایسا ہی ہونے والا ہے اور اے حبیب ہم آپ کو قرآن پڑھائیں گے جو کبھی آپ کو بھولے گا نہیں یعنی آپ فکرنہ کیجئے کہ جبرائیل امین کے جانے کے بعد آپ کے وحی بھول جائے گا ایسانہ ہوگا۔ عالم اسباب کا قانون۔ عالم اسباب میں فرشتے کا آناسبب ہے کہ یہ عالم اسباب کا قانون ہے ورنہ آپ کو کلام الٰہی یاد کر انایہ خود اللہ کا کام ہے ہاں وہ آیات جو اللہ منسوخ کردے وہ بھول جائیں تو الگ بات ہے کہ ان کا بھلانا ہی اللہ کو منظور ہے ، علماء کا ارشاد ہے کہ نسخ کی ایک صورت یہ بھی تھی کہ آیت آپ اور مسلمانوں کے حافظہ سے محو کردی جاتی ، کہ اللہ ہر بات سے باخبر ہے وہ ظاہر ہو یا بہت پوشیدہ کی گئی ہو۔ شریعت کا طبیعت ثانیہ بن جانا۔ ہم زندگی کی آسان راہ یعنی دین یا شریعت کو آپ کے لیے آسان تر کردیں گے یعنی طبیعت ثانیہ بنادیں گے یہ کمال ہے نبی اکرم کا کہ دین پر عمل آپ کا مزاج مبارک تھا یہی نعمت والی اللہ کو بقدر استطاعت اتباع ، نبوت سے نصیب ہوتی ہے اور آپ نصیحت کیجئے کہ اسی سے فائدہ متوقع ہے۔ نصیحت اور ذکرالٰہی۔ اور یہ بھی مراد ہے کہ اللہ کا ذکر کیا جائے کہ شریعت مطہرہ کا مزاج اور طبیعت ثانیہ بنانے کا نسخہ ہے اس سے چھوڑ کر الگ ہونے والا وہی ہوسکتا ہے یعنی شریعت اور ذکر الٰہی کو کہ جو بہت ہی بدقسمت ہوگا اور جہنم کا ایندھن بنے گا جہاں نہ تو کوئی زندگی کا تصور ہوگا اور نہ موت ہی آئے گی یقینا اس نے کامیابی حاصل کی جس نے آپ آپ سنوار لیا۔ ذکر اسم ذات۔ اور خود کو عقیدے اور عمل کی نجاست سے پاک کرلیا کہ اللہ کے نام کا ذکر کیا ، اللہ اللہ کی تکرار کرتا رہا جس سے توفیق عبادت اور عبادت میں خشوع و خضوع نصیب ہوا اور عملی زندگی ، کاروبار ، صلح اور جنگ ، گھر اور خاندان سے لے کر قومی زندگی تک ہر عمل عبادت کی شکل اختیار کر گی اور نہ جو لوگ اللہ کے ذکر سے محروم رہے وہ دنیا کی محبت میں گرفتار ہوئے اور دنیا حاصل کرنے کے لیے آخرت سے ہاتھ دھوبیٹھے حالانکہ دنیا اور اس کی لذتیں فانی تھیں اور ہیں اور آخرت اس سے بہت ہی بہتر ہے اور ہمیشہ رہنے والی بھی۔ یہ ایسی حقیقت ہے کہ ذکر الٰہی سے توفیق اطاعت نصیب ہو کر حصول آخرت کی توفیق کا سبب بنتی ہے جو صحیفوں اور آسمانی کتابوں میں بھی بتادی گئی تھی خواہ کتابیں ابراہیم (علیہ السلام) پر اتریں یاموسی (علیہ السلام) پر۔