86. Surah At-Taariq

سورة الطارق۔ آیات 1 تا 17۔ اسرار ومعارف۔ قسم ہے آسمان کی اور اندھیروں میں چمکنے والے ستارے کی ، وہ جو تاریکی میں ظاہر ہوتا ہے یعنی جس طرح آسمان پرستارے موجود ہیں مگر جب دن ختم ہوتا ہے توجگمگانے لگتے ہیں ایسے ہی انسانی اعمال کا نظام ہے کہ ہر عمل محفوظ ہے جب موت کا اندھیراچھائے تو سامنے آجاتا ہے اور یقینا ہر متنفس پر نگہبان فرشتے جو اس کے کردار کو لکھتے ہیں۔ حدیث شریف میں یہ بھی ارشاد ہے کہ ہر متنفس پہ محافظ فرشتے مقرر ہیں جو اسے ہر بلا سے محفوظ رکھتے ہیں سوائے اس کے کہ کوئی اللہ کی طرف سے اس پر آئے۔ ذرادوبارہ زندگی کا انکار کرنے والا انسان یہ تو دیکھے کہ اسے کس طرح پیدا فرمایا اور کس چیز نے اسے وجود بخشا ایک اچھلتے ہوئے پانی یعنی ایک نطفے سے جو انسان کے بدن سے کشید ہو کر بنتا ہے کہ صلب اور سینے سے سارابدن مراد ہوسکتا ہے یعنی کتنا طویل عمل ہے کہ روئے زمین سے ایک ایک ذرہ جمع فرما کر مختلف چیزوں میں ڈھال کر انسانی بدن میں پہنچاتا ہے اور پھر کشیدکرکے نطفہ بنادیتا ہے اور پھر اسے انسانی قالب میں ڈھال کر کتنی خوبیوں سے سجا دیتا ہے بلاشبہ وہ اسے دوبارہ وجود بخشنے پر قادر ہے۔ اور نہ ماننے والوں کو بھی اس روز خبر ہوجائے گی جب ہر کسی کے پوشیدہ رازوں تک سے پردہ ہٹا دیاجائے گا یعنی روز حشر جب سب کے اعمال نامے سامنے آجائیں گے۔ منکرین میں نہ تو خود کوئی قوت ہوگی اور نہ کوئی دوسرا ان کی مدد کرسکے گا۔ یہ آسمان سے باربار پرستی بارش اور ہر بار زمین کا سینہ پھاڑ کرنکلتی روئیدگی بھی تو اس بات پہ گواہ ہے کہ ایک ہی بار نہیں وہ جتنی بار چاہے پیدا کرے اور یہ بالکل دوٹوخ بات ہے ہرگز مذاق نہیں ہے ہاں کفار اپنے خیال میں اپنے لیے بہت تدبیریں کرتے ہیں مگر اللہ کا نظام موجود ہے جوہر ایک کو اس کے منطقی انجام تک پہنچاتا ہے ۔ کفار کو چندے مہلت ہے کہ اپنے لیے راہ عمل متعین کرلیں۔