84. Surah Al-Inshiqaaq

سورة انشقاق۔ آیات 1 تا 25۔ اسرار ومعارف۔ جب آسمان پھٹ جائے گا اور اپنے پروردگار کا حکم سن کر اطاعت کرے گایہی اسے زیب دیتا ہے اور زمین کھینچ کر پھیلادی جائے گی اور جو کچھ اسکے اندر دفن ہے انسان ، حیوان ، یامع دنیات ہر شے نکال حاضر کرے گی اور اپنے رب کے حکم کی تعمیل کرے گی اسے یہی سزا وار ہے۔ احکام کی قسمیں۔ احکام دو طرح سے ہیں اول تکوینی جو حکما نافذ کیے جاتے ہیں جن کا ہرـذرہ پابند ہے حتی کہ جن اور انسان بھی زمین وآسمان اور سب کچھ جو ان میں ہے جیسے انسان کی پیدائش شکل و صورت ، قد کاٹھ ، عقل وخرد وغیرہ ذالک اور دوسرے تشریعی احکام جن میں قانون بتاکرعمل کرنے کا اختیار دیا جاتا ہے اور اس کی جزا وسزا کا بتادیاجاتا ہے یہ مکلف مخلوق کے لیے ہے۔ سو اے انسان ! تجھے زندگی کے مشکل ترحالات سے گزر کر بالآخر اپنے پروردگار کے حضور پیش ہونا ہے اور جو کچھ کرچکا ہوگاوہ سب اس کے سامنے ہوگا۔ زندگی کی مشکلات اس کا خاصہ ہے۔ راہ حیات مشکلات سے عبارت ہے ولادت سے لے کر موت تک نہ صرف نیک آدمی کو مشکلات پیش آتی ہیں بلکہ بدکار اس سے زیادہ تکالیف اٹھاتا ہے اور نہ صرف غریب مشکل میں ہوتا ہے امیر کی مشکلات اس سے بڑی ہوتی ہیں رعیت کے مقابل حکمرانوں کو اور زیادہ تکالیف درپیش ہوتی ہیں تو تقاضائے عقل یہی ہے کہ اگر مشکلات ہی اٹھانا مقدر ہے تو پھر نیکی کے لیے کیوں نہ اٹھائی جائیں جبکہ گناہ نیکی سے مشکل ہے اور پھر انجام کا رذلت بھی۔ لہذا اس روز جسکو اعمال نامہ دائیں ہاتھ میں عطا کیا گیا اس کا حساب بہت آسان ہوگا حساب سے مراد کہ اللہ رب العزت جواب طلبی نہ فرمائیں گے کہ ایسا کیوں کیا تو وہ خوش خوش اپنے گھروالوں کے پاس لوٹے گا کہ نیکوں کا نیک خاندان بھی ان کے ساتھ جمع ہوگا اور جس کو اعمال نامے پیٹھ پیچھے سے دیا گیا کہ بائیں ہاتھ والوں کا ہاتھ پیچھے لاکر پیٹھ سے گھسیٹر کر آگے نکال دیاجائے گا اور اعمال نامہ تھمادیاجائے گا وہ تو اپنے لیے موت کی تمنا کر رہے ہوں گے مگر موت کہاں ، انہیں تو دوزخ کی بھڑکتی آگ میں ڈالاجائے گا کہ یہ دنیا میں اپنے عیال میں عیش کرتا تھا اور اسے خیال ہورہا تھا کہ شاید یہ میدان حشر میں نہ جائے گا قسم ہے شفق کی کہ جب سرخی بکھیرتی ہے پھر قسم ہے اس کے بعد چھاجانے والی تاریک رات کی جو ہر شے کو اپنی لپیٹ میں لے لیتی ہے اور پھر پورے چاند کی جب روشنی پھیلادیتا ہے اسی طرح تمہارا نظام بھی ہے کہ تم درجہ بدرجہ اپنے انجام کی طرف رواں دواں ہو۔ ولادت سے موت تک یہ سارا نظام شمسی اس پہ شاہد ہے اور خود تمہاری زندگی اس کی گواہ ، تو پھر یہ لوگ کیوں ایمان نہیں لاتے کہ نقلی اور عقلی دونوں طرح کے دلائل موجود ہیں اگر ذراغور وفکر کریں تو انہیں اندازہ ہوجائے اور جب قرآن پڑھاجاتا ہے توسربسجود کیوں نہیں ہوتے کیوں خلوص دل سے اطاعت نہیں کرتے (حنفیہ کے نزدیک یہاں سجدہ ہے) بلکہ کفار الٹا انکار کرتے ۔ اللہ جانتا ہے جو کچھ ان کے دلوں میں ہے کہ اعمال بد کی وجہ سے عناد سے دلوں کو بھر رکھا ہے لہذا انہیں اس کے نتیجے میں ہونے والے دردناک عذاب سے آگاہ فرمادیجئے اور مومنوں کو جو یقین کی دولت سے آراستہ کرتے ہیں بتادیجئے کہ ان کے لیے نہ ختم ہونے والے انعامات ہیں۔