75. Surah Al-Qiyaama

سورة القیامہ۔ آیات 1 تا 30۔ اسرار ومعارف۔ قیامت کے دن کی قسم یعنی قیامت کا دن خود اپنے واقع ہونے پر گواہ ہے کہ جب پیدا کیا عقل و شعور دیا ، نبی بھیجے اور اختیار دیا تو اب ضروری ہے کہ محاسبہ بھی کرے نیز وہ نفس کہ اپنا احتساب کرتا ہے یعنی وہ لوگ بھی گواہ ہیں جو زندگی بھر پھونک پھونک کر قدم رکھتے ہیں اللہ کی نافرمانی نہ ہو اور کفار کی طرح عیش نہیں کرتے یہ بات بھی دلالت کرتی ہے کہ حساب کتاب ضرور ہوناچاہیے۔ نفس اور اس کی اقسام۔ عناصر اربع کے ملنے سے نفس بنتا ہے چونکہ مادہ سے بنا ہے مادی لذات کی طرف کھینچتا ہے قرآن نے اسے نفس امارہ کہا ہے یعنی برائی کرنے والا کو جب ایمان نصیب ہوتا ہے اور بھلائی برائی میں تمیز کا پتہ چلتا ہے تو مومن کا نفس اپنامحاسبہ کرتا رہتا ہے اور جہاں خطا ہوجائے توبہ کرکے اپنی اصطلاح کی فکر کرتا ہے اسے قرآن میں نفس لوامہ کہا گیا ہے کہ خود کو گناہ پر ملامت کرتا ہے اور اتباع رسالت میں برکات نبوی سے ایسی صفائے قلب نصیب ہو کہ نیکی طبیعت ثانیہ بن جائے اور گناہ سے نفرت ہوجائے تو اسے نفس مطمئنہ کہا گیا ہے اللہ کریم سب مسلمانوں کو یہ نعمت نصیب فرمائے۔ آمین۔ کیابنی آدم نے یہ گمان کرلیا ہیی جب مرکرمٹی ہوجائے گ اور ہڈیاں گل سڑ جائیں گی پھرن ہ بن سکیں گی بلکہ ہم تو ایسے قادر ہیں کہ ہر ایک کے انگلیوں کے پور بھی ویسے بنائیں گے جیسے دنیا میں تھے۔ انگلی کے نشان ہر انسان کے الگ ہیں۔ عجیب بات ہے کہ کسی انسان کی انگلی کے نشانات دوسرے سے نہیں ملتے قرآن نے یہ تب بتادی تھی جسے صدیوں بعد سائنس دانوں نے اب ثابت کیا ہے یہاں دوبارہ پیدا کرنے کو پہلے پیدا کرنے سے ثابت فرمایا ہے کہ ہر بدن کے ذرات روئے زمین پر منتشر ہوتے ہیں پھر غذا دوا وغیرہ کے ذریعہ صلب پدر میں پھر نطفے پھر ممکن ہے کسی کو کسی سے مشابہت ہومگرانگلیوں کے نشانات قطعی سب کے الگ الگ بنائے لہذا یہاں فرمایا ہم تو ہر ایک کے انگلیوں کے پور تک پہلے جیسے ہی بنائیں گے آدمی اللہ کے سامنے ڈھٹائی سے پیش آتا ہے کہ اس کے رسول سے کہتا ہے کہ قیامت کا روز کون سا ہوگا تو سن جب نگاہیں چندھیا جائیں گی اور شمس وقمر بےنور ہوکرجھڑجائیں گے اور جب ہیبت سے کافر کہے گا کدھر کو بھاگوں تو اس کو پتہ چلے گا کہ بھاگنے کا کوئی راستہ نہیں بلکہ پروردگار کی بارگاہ میں جمع ہونا ہے اور تب سب کو ان کے اعمال نامے سنائے جائیں گے کہ کس نے کون سا عمل آگے بھیجا اور کون کتنی نیکیوں سے محروم رہا یقینا انسان اپنے حال سے پوری طرح باخبر ہوتا ہے ہاں بہانے بیشک کرتا رہے۔ چونکہ یہ سب احوال کتاب اللہ بیان کرتی ہے تو آپ پر جب وحی نازل ہو تو پڑھنے میں اور یاد کرنے میں جلدی نہ کریں بلکہ جبرائیل امین جو اللہ کی طرف سے پڑھتے ہیں پڑھ چکیں تو آپ پڑھا کریں کہ اسے آپ کو یاد کرانا اور آپ سے دوبارہ پڑھوانا ہمارا کام ہے پھر اس کا مفہوم بیان کرانا آپ کی زبان مبارک سے بھی ہمارا کام ہے۔ مسئلہ : آئمہ نے یہاں سے اخذ فرمایا ہے کہ امام قرات کررہا ہوتومقتدی خاموش رہے۔ مسئلہ : جس طرح قرآن کے الفاظ بتانامنصب نبوت ہے اسی طرح قرآن کا مفہوم بیان کرنا بھی نبی (علیہ السلام) کامنصب ہے کوئی شخص اپنی طرف سے مقرر کرنے کا مجاز نہیں۔ اللہ کو میدان حشر میں دیکھ سکیں گے۔ لیکن یہ کفار تو دنیا کی لذات کے اسیر ہیں اور آخرت کو پس پشت ڈال دیا ہے لیکن اس روز کتنے لوگ ہوں گے جن کے چہروں سے بشاشت ٹپکتی ہوگی اور اپنے رب کو واقعی دیکھ رہے ہوں گے آخرت میں آنکھ میں وہ قوت آجائے گی کہ دیدار باری کرسکے اور میدان حشر میں اللہ کے بندے دیدار سے مشرف ہوں گے ہاں کیفیات سب کی اپنی استعداد کے مطابق ہوگی اس پر اہل سنت کا اجماع ہے اور کفار کے چہرے لٹکے ہوئے ہوں گے دیدار سے محروم اور عذاب کی فکر میں گرفتار ہوں گے انسان کی طاقت کا پتہ توعندالموت چل جاتا ہے کہ جب جان حلق میں اٹکی ہوتی ہے یعنی موت قریب تر ہوجاتی ہے اور کوئی حیلہ اس سے بچنے کا نہیں ملتا تب پتہ چلتا ہے کہ دنیا سے جدائی کی گھڑی آپہنچی اور انسان تڑپتا ہے کہ ٹانگیں آپس میں لپٹ جاتی ہیں یہ اپنے رب کی طرف چل چلاؤ کی گھڑی ہوتی ہے۔

آیات 31 تا 40۔ اسرار ومعارف۔ کافر نے نہ تو تصدیق کی نہ ایمان لایا اور نہ اللہ سے تعلق جوڑا جو اس کی عبادت کے ذریعے جوڑا جاسکتا تھا بلکہ سارے دین یعنی نظام حیات کا انکار کردیا اور اس سے منہ موڑ لیا اور اپنے اہل و عیال اور دولت دنیا میں منہمک ہوگیا بڑے فخر اور تکبر کے ساتھ تباہ ہوگیا تباہ ہوگیا ، تباہ ہوگیا ۔ یعنی زندگی میں موت میں برزخ میں اور حشر میں ہر جگہ اپنے لیے تباہی خریدلی کیسا بیوقوف ہے سمجھتا ہے حساب کتاب نہ ہوگا اور یونہی عالم ختم ہوجائے گا حالانکہ ایک مربوط نظام ہے خود یہ ایک قطرہ منی سے بنایا گیا پھر شکم مادر میں محض خون تھا جماہوا پھر اسے انسان بناکرزندگی دی اور اس میں مردو عورت کے جوڑے بنائے اور بقائے نسل کو جاری فرمایا کہ ایک نظام کائنات بنایا جو پوری ذمہ داری سے اپنا پورا کام کررہا ہے ۔ ہر قطرہ آب ، ہر ذرہ خاک اپنے اپنے وقت پر اپنی اپنی جگہ پہنچ رہا ہے اور کتنا حساب وکتاب کا دخل ہے کہ ساعت بھریاذرہ بھر کمی زیادتی ہوتونظام کائنات چل نہ سکے کیا اتنی قدرت کاملہ کے مالک پروردگار کے لیے یہ مشکل ہے کہ مردوں کو دوبارہ بناکرزندہ نہ کرسکے ہرگز نہیں۔