73. Surah Al-Muzzammil

سورة المزمل۔ آیات 1 تا 19۔ اسرار ومعارف۔ اے کمبل پوش یہ بات ایک خوبصورت انداز محبت میں ارشاد فرمائی اور فرمایا کہ راتوں کو اٹھیں یعنی قیام فرمائیں اور اللہ کی عبادت کریں اور تھوڑا وقت آرام کریں قیام کے لیے آدھی رات یا اس سے کچھ کم زیادہ کرلیاکریں اس میں نہایت خوبصورت انداز سے قرآن کی تلاوت کریں۔ نماز تہجد۔ یہ آیات ابتدائے اسلام کی ہیں اور ان میں آپ پر اور مسلمانوں پر تہجد کی نماز فرض کی گئی نیز رات کا اکثر حصہ قیام کرنے کا حکم دیا گیا ہے جس میں قرآن کریم کو ٹھہر ٹھہر کر درست طریقے سے اور خوبصورت انداز می پڑھنے کا حکم ہوا چناچہ آپ اور صحابہ کرام سال بھر تک تہجد ہی ادا فرماتے رہے جس میں طویل قیام سے قدوم مبارک پر ورم آجاتا تھا پھر شب معراج کو پانچ نمازیں فرض ہوئیں توتہجد کی فرضیت منسوخ ہوگئی مگر آپ نے تمام عمر یہ نمازادافرمائی لہذا یہ سنت شمار ہوتی ہے۔ ترتیل قرآن۔ یعنی سہولت کے ساتھ اور درست ادائیگی کے ساتھ الفاظ ادا کیے جائیں اس میں آواز خوبصؤرتی بھی شامل ہے نبی (علیہ السلام) نے (رح) خوش آوازی سے تلاوت کو بہت پسند فرمایا ہے ۔ ہم آپ پر بہت بڑی ذمہ داری ڈالنے والے ہیں یعنی اصلاح خلق کافریضہ اور پوری انسانیت کے لی دعوت حق اور تمام عالم کفر سے مقابلہ لہذا راوں کا اٹھنا اگرچہ مشکل ہے مگر دل و زبان میں یکسوئی پیدا کردیتا ہے۔ مقابلے کے لیے قوت قلبی کی ضرورت ہے۔ گویا مجاہدہ کرایا جارہا ہے کہ کفر کے مقابلے کے لیے اصل طاقت قوت قلبی اور کیفیات ایمانی ہیں جو تہجد میں حاصل ہوتی ہیں بیشک دن بھر آپ کے لیے بہت مشقت ہے کہ اپنے معاشی مسائل بھی ہیں اور تبلیغ وتعلیم بھی جس پر کفر کی شدید مخالفت کا سامنا ہے مگر اس سب کے لیے آپ اپنے پروردگار کے نام کا ذکر کیجئے اور اس قدر مخلوق سے انقطاع نصیب ہو کہ صرف اللہ کا نام قلب ونظر میں رہ جائے۔ ذکر اللہ۔ اس آیہ مبارکہ میں اس عبات کا حکم جو رات یا دن کے کسی وقت سے مخصوص نہیں بلکہ ہر وقت اور ہر حال میں جاری رہنا مقصود ہے صاحب مظہری نے ذکر دوام میں لکھا ہے اور صاحب معارف القرآن فرماتے ہیں کہ اس کو شب روز ہمہ وقت جاری رکھیں اس میں کبھی ذہول ہوناچاہیے اور نہ سستی اور یہ مراد اسی وقت لی جاسکتی ہے جب ذکر اللہ سے عام مراد لیاجائے خواہ زبان سے ہو یا قلب سے یا اعضاء جوارح سے چندے بعد لکھتے ہیں کہ آپ سے بیت الخلا میں ذکرلسانی نہ کرنا ثابت ہے لہذا ذکرقلبی ہر وقت جاری رہ سکتا ہے۔ ذکر اسم ذات یعنی اللہ اللہ کی تکرار مامور بہ عبادت ہے۔ تفسیر مظہری میں ہے کہ ذکر اللہ کے حکم کو اسم کے ساتھ مقید فرمادیا اس میں اشارہ نکلتا ہے کہ اللہ کی تکرار بھی مطلوب ومامور بہ ہے اور مفتی محمد شفیع (رح) معارف القرآن میں فرماتے ہیں کہ بعض علماء نے جو صرف اسم ذات اللہ اللہ کے تکرار کو بدعت کہہ دیا ہے اس سے معلوم ہوا کہ اس کو بدعت کہنا صحیح نہیں ہے اور حق یہی ہے کہ ذکر قلبی جس کا حکم آپ کو دیا گیا تمام امت کے ہر مرد وزن کے لیے اللہ کا انعام ہے نبی کا وجود کا توہرذرہ نہ صرف خود ذاکر ہوتا ہے بلکہ جو لباس ، جوتا ، وغیرہ بدن سے مس کرتا ہے ذاکر ہوجاتا ہے جس زمین پر قدم مبارک رکھتے ہیں ذاکر ہوجاتی ہے اور آپ نے جدھر نگاہ فرمائی شجر وحجر جو ریت کے ذرات اور فضائیں تک ذاکر ہوگئیں۔ ہر مسلمان اگر برکات نبوی سے قلب کو ذاکر کرلے تو کفر کے مقابلے کی ہمت پالیتا ہے ۔ ورنہ زندگی سمجھوتوں کی نذر ہوجاتی ہے وہی پروردگار ہے مشرق ومغرب کا یعنی سب کائنات کا پالنے والا ہے اس کے علاوہ کوئی عبادت کا مستحق نہیں لہذا آپ اسی کو اپنا کارساز جانیں اور کفار کی زبانوں سے جو طعنے سننے پڑتے ہیں برداشت کریں یابھلے طریقے سے ان سے الگ ہوجائیں۔ اعلی اخلاقیات۔ اس میں بھی مسلمان کے اخلاق بلند ہوناچاہیے اور فضولیات کا جواب دینے کی بجائے صبر کرے اگر حد برداشت سے باہر ہوں تو اچھے طریقے سے الگ ہوجائے کہ الگ ہو کر بھی شکوہ نہ کرے۔ اور کفر و انکار کی راہ کرنے والوں کو مجھ پر چھوڑ دیں کہ ان کے لیے بہت کم مہلت ہے لہذا دنیا میں بھی کفار کو شکست ہوئی اور تھوڑے عرصے میں اسلام غالب آیا اور آخرت میں ان کے لیے دوزخ کی بیڑیاں ہیں اور آگ کے ڈھیر اور ایسا کھانا جو گلے میں پھنس جانے والا ہے اور دردناک عذاب ایک روز زمین پھر لرز اٹھے گی اور پہاڑ ٹوٹ پھوٹ جائیں گے اور دنیا تباہ ہو کر اس انجام کو پہنچے گی۔ لوگوہم نے تمہارے پاس ایسارسول بھیجا ہے جو قیامت کے روز تم پر گواہ ہوں گے تم نے ان کی کسی قدراطاعت کی جیسے فرعون کے پاس بھیجا تھا جس نے رسول کی بات نہ مانی اللہ کے عذاب کی گرفت میں آگیا اگر تم نہ مانوگے تو تمہاراحال بھی ایسا ہی ہوگا اور اگر باز نہ آئے تو روز قیامت کیا جواب دو گے جس کی شدت اور طوالت سے بچے بوڑھے ہوجائیں گے اس روز تو آسمان پھٹ جائیں گے بیشک اس روز حساب کتاب کا وعدہ ربانی پورا ہو کر رہے گا اس میں بہت ہی جامع نصیحت ہے ان لوگوں کے لیے جو اپنے پروردگار کا پسندیدہ راستہ اختیار کرنا چا ہیں۔

آیات 20۔ اسرار ومعارف۔ بے شک آپ کا رب جانتا ہے کہ آپ کا رب جانتا ہے کہ آپ اور آپ کے ساتھ آپ کے رفیق قیام کرتے ہیں کبھی دو تہائی رات کبھی نصف شب کبھی تہائی رات اللہ کریم شب وروز کی مقدار کو خوب جانتا ہے کہ خود خالق ہے لہذا یہ بھی جانتا ہے کہ دن بھر کی انسانی ضرورتوں کو پورا کرنے اور تبلیغ وتعلیم میں محنت اٹھانے کے بعد مسلمانوں کے لیے یہ بہت مشکل کام ہورہا ہے۔ پہلے قیام میں طوالت فرض تھی۔ چنانچہ آپ نے سب کے حال پر کرم فرمایا وہ فرضیت طوالت یعنی لمبا قیام کرنے کی فرضیت ختم فرمادی اب ہر کوئی اپنی برداشت کے مطابق قیام کرے اور جس قدر آسانی سے قرات کرسکے پھرج ب نماز فرض ہوگئی توتہجد کی نماز کی فرضیت بھی ختم ہوگئی۔ وہ جانتا ہے کہ کچھ بیمارہوں گے کوئی حصول رزق حلال میں مصروف اور کوئی جہاد و قتال میں رات دن ایک کیے ہوئے ہوں گے لہذا ممکن حد تک تلاوت کرلیا کرو اور نماز پنجگانہ کی پابندی کرو اور زکوۃ ادا کرتے رہو نیز صدقات نافلہ سے اللہ کو خوبصورت قرض دو ۔ فرضیت صلوۃ وزکوۃ۔ نماز شب معراج میں فرض ہوئی اور زکوۃ بھی حکم تو مکہ مکرمہ میں آگیا مگر اس کی مقدار وغیرہ کے احکام مدینہ منورہ میں آئے لہذا اس سے پہلے عمومی صدقات پر اس کا اطلاق ہوتا رہا ، اور اللہ کی راہ میں خرچ کرنا ایسا ہے جیسے تم اپنے لیے اللہ کریم کو قرض دے رہے ہو تو جس قدر اپنی خاطر آگے روانہ کرسکو بہت بہتر ہے کہ تمہیں اس کا بہت زیادہ اجر ملے گا اور اللہ سے بخشش طلب کرتے رہا کرو بیشک وہ بخشنے والا مہربان ہے۔