62. Surah Al-Jumu'a

آیات 1 تا 8۔ اسرار ومعارف۔ ذکرالٰہی۔ ارض وسما کی ہر شے اپنے شعور وادارک کے مطابق اللہ کا ذکر کرتی ہے اور ہر ذرہ اپنے حال سے تو اس کی پاکی پہ دلالت کرتا ہے کہ وہی حقیقی بادشاہ ہے جو ہر عیب سے پاک اور زبردست ہے اور بڑاحکمت کا مالک ہے وہی عظیم ذات ہے جس نے ان پڑھ عربوں میں اپنارسول مبعوث فرمایا جو امی تھا کہ عربوں میں پڑھنے لکھنے کارواج نہ تھا بہت کم لوگ لکھنا پڑھنا جانتے تھے۔ معجزہ۔ خود رسول اللہ نے کبھی پڑھنالکھنا نہیں سیکھا عموما ایسی قوم کی اصلاح محال ہوتی ہے اور انہیں کچھ سمجھانا بہت مشکل مگر یہ بات روز روشن کی طرح واضح ہے کہ آپ نے انہیں ایسابنادیا کہ دنیا کے لیے وہ علم و حکمت کے خزینے ثابت ہوئے اور بجاطور پر جہانگیر وجہاں بان وجہاں دار وجہاں آرائ ، کا مصداق بن گئے اور خود نبی لامی نے پوری انسانیت کو معرفت باری کے ساتھ ایک خوبصورت اور حقوق وفرائض کا صحیح ترین ذمہ دار نظام حیات بخشا جو اسی امی قوم کے ہاتھوں زمانے میں رائج ہوا۔ فرائض نبوت۔ وہ نبی ان پر آیات تلاوت فرماتا ہے اور ان کا تزکیہ کرتا ہے اور نہیں کتاب اللہ کی اور حکمت کی یعنی سنت یا وہ تفسیر جو آپ نے ارشاد فرمائی کی تعلیم دیتا ہے یہ چہارگانہ فرائض نبوت ہیں اول دعوت کہ قرآنی تعلیمات کے مطابق اللہ پر ایمان لانے کی دعوت جو ایمان لائے اس کا تزکیہ کرے۔ تصوف۔ ظاہری پاکیزگی ، کپڑوں اور بدن کی غذا کے حلال اور پاکیزہ رکھنے کی تعلیم اور باطنی پاکیزگی اخلاقیات و عادات اور کردار سازی اس کا قاعدہ یہ تھا کہ جو ایمان لاکر آپ کی نگاہ پاک میں آیا صحابی ہوگیا یعنی باطنی پاکیزگی پا گیا یوں کہ ، ثم تلین جلودھم وقلوبھم الی ذکر اللہ ، کہ کھال سے لے کرنہال خانہ دل تک ہر ذرہ بدن اللہ کا ذاکر ہوگیا۔ یہ کیفیت جسے تزکیہ کہا گیا یہی تصوف کہلائی بلکہ تصوف تزکیہ ہی کا فارسی ترجمہ ہے کہ سب سے پہلے یہ عجمی زبان ہے جسمیں ترجمہ ہواصحابہ کی صحبت سے تابعی بن گئے تابعین کی صحبت نے تبع تابعی بنادیے مگر بعد میں وہ تیزی اور قوت نہ رہی لوگ ذکرقلبی کرتے اور برسوں ایسے حضرات کی صحبت میں بیٹھتے جن کے قلوب میں برکات نبوی کی کیفیات ہوتیں اور اپنے دل روشن کرتے جس سے ان کے اخلاق سدھرتے اور کردار میں نکھارآتا اور شریعت پر عمل کرنے میں خلوص دل بھی نصیب ہوتا مگر پھر اس میں بھی وراثت درآئی ناہل لوگ پیر بن گئے اور رسومات کا پلندہ بناکر اسے بدنام کردیامگر اس سب سے اصل کی افادیت مجروح نہیں ہوتی۔ قرآن کے مفاہیم متعین فرمانا فرائض نبوت میں سے ہے۔ اور جب ظاہری اور دلی پاکیزگی نصیب ہوئی تو انہیں کتاب کی تعلیم فرمائی اور حکمت یعنی کتاب اللہ کے مفاہیم کا شعور عطا فرمایا یعنی جس طرح الفاظ قرآن سکھائے ویسے ہی ان کے معانی ومفاہیم ارشاد فرمائے گویا قرآن کے معانی متعین کرنا فرائض نبوت میں سے ہے ہر کس وناقص اپنی پسند کے معانی پہنانے کا حق نہیں رکھتا حالن کہ یہ ایسی قوم تھی جو خود بھی اپنے حال سے نالاح تھی اور جانتی تھی کہ وہ جو کچھ کر رہے ہیں صاف گمراہی ہے مگر حق کیا ہے انہیں خبر نہ تھی۔ بعد میں آنے والوں کا اعزاز۔ اور بعد میں آنے والے ایسے لوگ جو انہی جیسے ہوگئے ان سے مل گئے یعنی قیامت تک آنے والے وہ لوگ جو عقیدہ وعمل میں صحابہ ہی کی پیروی کریں گے وہ بھی ایسی برکات رسالت پائیں گے یہ بعد والوں کے بڑے اعزاز کی بات ہے کہ انہیں ایسی عظیم الشان ہستیوں کے قدموں میں جگہ ملے اور عظمت صحابہ بھی اس سے واضح ہے کہ اللہ زبردست اور حکمت والا ہے۔ یہ اس کا کرم ہے اس کی مہربانی ہے اور وہ جس پر چاہے اپنا کرم کردے گویا جو بھی صحابہ کا اتباع کرلے اس نے اللہ کے فضل کو پالیا اور صحابہ نے نبی کریم کا اتباع کرکے یہ کرم حاصل کیا واقعی اللہ بہت بڑا فضل وکرم کرنے والا ہے یہ بات تو ان پڑھ لوگوں کی تھی جن کی قسمت چمک اٹھی مگر وہیں کچھ لوگ خود کو عالم وفافضل بھی سمجھتے تھے اور ان کے علم کا چرچا بھی تھا یعنی علماء یہود جن کو تورات نصیب ہوئی مگر وہ اس کے حق ادا نہ کرسکے ۔ علم کی صفت۔ علم کی صفت یہ ہے کہ انسان کا کردار علم کی روشنی میں ڈھل جائے اور اگر عمل کو متاثر نہ کرے تو وہ علم نہ ہوگامحض خبر کہہ سکتے ہیں ۔ چناچہ بڑی بڑی کتابیں پڑھنے کے باوجود ان کی مثال ایسی ہے جیسے کسی گدھے پر بڑی بڑی کتابیں لادی گئی ہوں کہ علوم تورات کا انہیں کوئی فائدہ نہ ہوا اور باوجود تورات میں سے جاننے کے اللہ کی کتاب کا انکار کردیا اور اس کے رسول پر ایمان نہ لائے اب اس سے زیادہ اور کیا برائی کرسکتے تھے اور اللہ ایسا بےنیاز ہے کہ ایسے ظالموں کو ہدایت نہیں فرماتا۔ یہود کو بھی نبی کریم کی صداقت پر شک نہ تھا۔ یہ بدنصیب کہتے ہیں کہ یہ ولی اللہ یعنی اللہ کے دوست ہیں اور باقی لوگوں کی طرح نہیں ہیں تو آپ انہیں فرمائیے گا کہ اگر تمہیں اپنی آخرت کی کامیابی کا اس قدر یقین ہے تو موت کی تمنا کرکے دیکھو کہ تمہارے دعوے کی صداقت کا پتہ چلے مگر یہ ہرگز موت کی تمنا نہ کریں گے انہیں یقین ہے کہ آپ کے فرمان پر تمنا کربیٹھے تو موت آجائے گی اور اپنے کرتوتوں کا بھی ان کو پتہ ہے لہذا آخرت سے ڈرتے ہیں کہ اللہ ایسے ظالموں کو جانتا ہے۔ کافر اور بدکار موت سے بہت ڈرتا ہے۔ یہ بات بھی واضح ہوگئی کہ کافر اور بدکار موت سے ڈرتا ہے اس کا تجربہ اپنے ہاں بھی ہے اور عالم کفر یامغرب میں تو اب اس ڈرنے ان کی زندگی اجیرن کردی ہے کہ ہر کافر ڈرتا ہے اور یہ نہیں جانتا کہ کیوں ڈرتا ہے لہذا انہوں نے اس کا نام ہی ، انجاناخوف رکھ دیا ہے لیکن ان پر یہ بھی واضح فرمادیجئے کہ تم جس موت سے بھاگتے ہو اپنے وقت پر آکر رہے گی اور پھر تمہیں اس اللہ کے حضور پیش ہوناپڑے گا جو تمام پوشیدہ اور ظاہر باتوں سے واقف ہے اور اس کی بارگاہ میں تمہارے سارے کاموں سے پردہ اٹھایاجائے گا۔

آیات 9 تا 11۔ اسرار ومعارف۔ اے ایمان والو جب جمعہ کی نماز کے لیے اذان ہوجائے تو اپنا کاروبار بند کردو اور پورے اہتمام سے اللہ کے ذکر کے لیے یعنی نماز جمعہ کی ادائیگی کے لیے مسجد میں پہنچو۔ جمعہ کے احکام۔ جمعہ مسلمانوں کا بہت ہی مبارک دن ہے جس میں ظہر کی نماز نہیں ہوتی بلکہ جمعہ کی نماز ادا کی جاتی ہے یہ نماز عورتوں ، مریضوں اور مسافروں پر فرض نہیں وہ ظہر کی نماز ادا کرسکتے ہیں اور جب اذان ہوجائے تو دنیاوی کاروبار حرام ہوجاتا ہے۔ جمعہ علماء کے نزدیک ایسی آبادی جس میں دکانیں ہوں یاسرکاری دفتر ، سکول ، ڈاکخانہ ، وغیرہ ہوہوسکتی ہے تفصیل فقہ کی کتب میں دیکھی جائے ۔ چناچہ یہاں نماز کی ادائیگی اور اس کے ارکان و شرائط سب کو ذکر اللہ سے تعبیر فرمایا کہ اس میں زبانی اور عملی ذکر دونوں شامل ہیں اور خلوص قلبی بھی ضروری کہ اگر تمہیں خبر ہے تویہی کام تمہارے لیے سب سے بہتر ہے پھر جب خطبہ اور نماز مکمل کرچکو تو اپنے اپنے کام پر چلے جاؤ اور اپنی روزی کی تلاش میں لگ جاؤ۔ ذکرقلبی۔ لیکن کام کاج کرتے ہوئے بھی اللہ کا ذکر کثرت سے کرتے رہو کام کام میں تو انسان کی زبان بھی مصروف ہوجاتی ہے ذکر کثیر تب ہی ممکن ہے جب قلب ذاکر ہوجائے اللہ کریم سب مسلمانوں کو نصیب کرے لیکن اگر یہ نعمت نصیب نہ ہو تو بھی کوئی نہ کوئی تسبیح ممکن حد تک کی جانی چاہیے ، ابتداء میں نماز کے بعد خطبہ ہوتا تھا ایک روز ایک تجارتی قافلہ مدینہ منورہ آیا اور اشیاء صرف کی کمی تھی کچھ لوگ خطبے کے دوران چلے گئے ان کا خیال تھا کہ نماز تو ہوچکی مگر اللہ کو یہ بات پسند نہ آئی کہ دو خطبے بھی دو رکعت کے قائم مقام ہیں اس کے بعد آپ نے خطبہ نماز سے پہلے کردیا جو تاحال ایسا ہی ہے تو ارشاد ہوا کہ لوگوں نے تجارتی قافلے کا سنا اور چلے گئے جبکہ آپ کھڑے تھے ، اور خطبہ ارشاد فرما رہے تھے تو انہیں فرمادیجئے کہ اللہ کے انعامات مادی تجارت سے بہت زیادہ قیمتی ہیں اور رہی بات روزی کی اللہ ہی بہترین روزی دینے والا ہے لہذا روزی کے لیے عبادات میں تیزی اور عجلت نہ کی جائے بلکہ پوری دل جمعی سے ارکان ادا کیے جائیں۔