54. Surah Al-Qamar

آیات 41 تا 55۔ اسرار ومعارف۔ اسی طرح آل فرعون کو دیکھ لیجئے۔ آل : قرآن حکیم نے آل میں سب متبعین کو شمار کیا ہے جو بہت طاقتور اور شان و شوکت کے مالک تھے ان کے پاس بھی اللہ کا نبی اعمال بد کے نتائج سے خبردار کرنے کو آیا مگر انہوں نے تمام دلائل معجزات کو ٹھکرادیا اور اس کے نتیجے میں انہیں اللہ کے عذاب نے بہت ہی سختی سے پکڑ اور تباہ کردیاتوکیایہ آج کے کفار ان سے کچھ بہتر ہیں کہ یہ نہ پکڑے جائیں گے یا ان کے لیے عذاب سے برات آسمانی کتابوں میں کہیں لکھ دی گئی ہے یعنی کسی آسمانی کتاب میں کوئی ایسی خبر نہیں کہ ان کے کفر اور برائی پر عذاب نہ ہوگایا انہیں یہ خیال ہے کہ ہم بڑی زبردست اور طاقتور قوم ہیں ہم مقابلہ کریں گے ، سو عذاب الٰہی کا مقابلہ توکیاکریں گے جبکہ یہ عنقریب شکست سے دوچار ہوں گے اور پیٹھ پھیر کر بھاگیں گے۔ شکست کفار کی پیش گوئی۔ چنانچہ بدر اور احد اور خندق میں ہر بار اہل مکہ بھاگ نکلے اور اس کے بعد اگلی دنیا کے عذاب ان کا انتظار کر رہے ہیں قیامت کا دن وعدہ کا روز ہے بہت مصیبت کی گھڑی ہے اور بہت تکلیف دہ اور کڑوی ہے کہ جو لوگ آپ کی نافرمانی میں پڑکر گناہ کی راہ چل رہے ہیں لگتا ہے انہیں پاگل پن یاسوداء ہوگیا ہے کہ اس وقتی اور لمحاتی خواہش میں پڑ کر ایسادردناک عذاب مول لے رہے ہیں کہ انہیں آگ میں اوندھے منہ گھسیٹا جائے گ اور ارشاد ہوگا اب دوزخ کا مزہ چکھو ، یادرکھو ہم نے ہر شے کو درست اور ٹھیک انداز سے پیدا فرمایا ہے اور جس شے یا کام کا جو نتیجہ مقرر فرمادیا ہے وہ ہر حال مرتب ہوتا ہے دنیا کے ہر کام میں اس کی مثال موجود ہے لہذا تمہارا کفر وگناہ بھی اپنا نتیجہ ضرور بھگتے گا اور اللہ کا حکم تو پلک جھپکنے میں یعنی بلاتاخیر نافذ ہوجاتا ہے کہ کہیں تمہیں یہ خیال ہو بھلا یہ سب کچھ کیسے ہوگایامشکل ہے بلکہ تم سے پہلے جو گمراہ گروہ تھے ۔ شیعہ۔ اور قرآن کریم نے یہاں بھی شیعہ کا اطلاق گمراہ گروہ پر کیا ہے ایسا گمراہ گروہ جو باطل پر ہونے کے باوجود اپنے حق پر ہونے کا دعوی رکھتا ہے ان سے پہلے گروہوں کو بھی ہم نے ہلاک کردیا اور ان کی بداعمالی رنگ لائی لہذا ان کے حال سے نصیحت حاصل کی جانی چاہے کہ سب لوگ اور یہ کفار بھی عمل کرتے ہیں وہ اعمال ناموں میں لکھاجارہا ہے اور علم الٰہی میں توہرشے موجود ہے یہ اعمال نامے بھی ایسے ہیں کہ ان میں ہر بڑی سے بڑی اور چھوٹی سے چھوٹی بات لکھی جاتی ہے لہذا ہر ہرکام کا حساب ہوگا اور ہر بات کی جواب طلبی تو کفر و برائی پہ یقینا عذاب ہوگا جبکہ اللہ سے ڈرنے والے اور خلوص دل سے اس کی اطاعت کرنے والے باغوں اور نہروں میں یعنی جنت کے سداباغوں میں جن میں نہریں جاری ہیں اللہ کے پاس ہوں گے جو حقیقی بادشاہ وسلطان ہے جسکے قبضہ قدرت میں سب کچھ ہے یعنی جنت کی نعمتوں کے ساتھ انہیں قرب الٰہی نصیب ہوگا۔