Ayahs 27:1–4سورة النمل : (1 تا 4) سورتوں کے شروع میں جو حرف مقطعات ان کا حال مفصل طور سے سورة بقرہ کے شروع میں بیان ہوچکا ہے لفظ تلک سے یہ سورت اور تمام قرآن کی آیتیں مقصود ہیں اور مبین کے معنی واضح اور ظاہر کے ہیں اور دوسری آیت کا یہ مطلب ہے کہ قرآن شریف سے اسی کو ہدایت اور بشارت ہوتی ہے جس نے قرآن کے کلام الٰہی ہونے کا یقین کیا اور اس پر ایمان لایا اور جو احکام اس میں ہے ان پر عمل کیا فرض نماز پڑھے زکوٰۃ دے اور آخرت کو سچا جاننا کہ مرنے کے بعد زندہ ہونا ہے اور نیکی بدی پر جزا و سزا ضرور ملے گی اور جنت اور دوزخ حق ہیں جیسا کہ سورة حم السجدہ میں فرمایا قُلْ ھُوَ لِلَّذِیْنَ آمَنُوْا ھَدْیً وَّشَفَآئٌ وَالَّذِیْنَ لَا یُوْء مِنُوْنَ فِیْ اٰذَانِھِمْ وَفُرْ وَّھُوْ عَلَیْھِمْ عَمًٰی اَوْ لٰئِکَ یُنَا دَوْنَ مِنْ مَّکَانٍ بَّعِید جس کا مطلب یہ ہے کہ ایمانداروں کو قرآن سے سوجھ ہے اور روگ کا دفعیہ اور جو ایمان نہیں لاتے ان کے کانوں میں بوجھ ہے اور یہ ان کو اندھاپن ہے ان کی مثال ایسی جیسے کسی کو دور سے بلایا جائے اور وہ نہ سنے غرض اور اسی قسم کی اور آیتیں ہیں پھر فرمایا جو لوگ آخرت پر ایمان نہیں لاتے ان کو چھا کر دکھایا ان کے عملوں کو اس لیے وہ سرگرداں ہیں اپنی گمراہی میں اور یہ سزا ہے ان کو آخرت کے جھٹلانے کی جیسا کہ سورة الانعام میں فرمایا ونقلب افئد تھم وابصار ھم کمالم یؤمنوابہ اول مرۃ ونذرھم فی طغیانھم یعمھون جس کا مطلب یہ ہے کہ جو لوگ اپنے ارادہ سے راہ راست پر نہیں آتے تو اللہ تعالیٰ ان کو ان کی حالت پر چھوڑ دیتا ہے اس واسطے نہ ایسے لوگوں کے دل پر نیک بات کا اثر پڑتا ہے نہ وہ آنکھوں سے اللہ کی قدرت کی نشانیوں کو دیکھتے ہیں پھر فرمایا یہ لوگ ہیں جن کے لیے بری مار ہے صحیح بخاری و مسلم کے حوالہ سے ابو موسیٰ اشعری ؓ کی حدیث ایک جگہ گزر چکی ہے جس میں آنحضرت ﷺ نے قرآن کی نصیحت کی مثال مینہ کے پانی کی اور اچھے برے لوگوں کی مثال اچھی بری زمین کی بیان فرمائی ہے یہ حدیث ھدی وبشری للمؤمنین کی گویا تفسیر ہے جس کا حاصل یہ ہے کہ قرآن کی نصیحت سے اچھے ایمان دار لوگ نفع حاصل کرتے ہیں اور بدلوگوں کے حق میں قرآن کی نصیحت اسی طرح رائیگاں ہے جس طرح بری زمین میں مینہ کا پانی رائیگاں جاتا ہے نیک عمل کے قبول ہونے میں عقبیٰ کے ثواب کی نیت اور دنیا کے دکھاوے سے بچنا ضروری ہے اس لیے نماز اور زکوٰۃ کے ساتھ عقبیٰ کے یقین کا ذکر فرمایا رمضان کے روزے اور حج ہجرت کے بعد فرض ہوئے ہیں اس واسطے مکی آیتوں سے ان کے قول کی تائید ہوتی ہے صحیح بخاری ومسلم کے حوالہ سے حضرت علی ؓ کی حدیث ایک جگہ گزر 1 ؎ چکی ہے (1 ؎ ص 18 جلد ہذا۔ ) جس میں آنحضرت ﷺ نے فرمایا جو لوگ علم الٰہی میں بدقرار پاچکے ہیں ان کی نشانی یہ ہے کہ ایسے لوگوں کو دنیا میں برے کام اچھے معلوم ہوتے ہیں۔ یہ حدیث زینا لھم اعمالھم کی گویا تفسیر ہے جس کا مطلب یہ ہے کہ ایسے لوگ برے کاموں کو اچھا جانتے ہیں اور اللہ تعالیٰ نے انہیں ان کی حالت پر چھوڑ دیا ہے کیونکہ مجبور کر کے کسی کو راہ راست پر لانا انتظام الٰہی کے برخلاف ہے اس لیے کہ دنیا نیک وبد کے امتحان کے لیے پیدا کی گئی ہے کسی کے مجبور کرنے کے لیے نہیں پیدا کی گئی سوء العذاب سے مقصود دنیا کا عذاب ہے جیسے مثلا مکہ کا قحط جس کا ذکر صحیح بخاری کی عبداللہ بن مسعود ؓ کی روایت کے حوالہ سے کئی جگہ گزرچکی ہے کیونکہ آخرت کے عذاب کا ذکر اسی آیت میں جدا آیا ہے۔ “
Ayah 27:55۔ جو لوگ عاقبت میں اپنی دنیا کی زیست سے نفع اٹھاویں گے اور جو لوگ عاقبت میں ٹوٹا پاویں گے ان کی نشانی کو سمجھایا ہے اس مثال سے یہ نشانی خوب اچھی طرح سمجھ میں آجاتی ہے حاصل اس مثال کا یہ ہے کہ دنیا ایک تجارت کا بازار ہے اللہ کی مرضی اور نا مرضی کی چیزیں اس بازار میں موجود ہیں اللہ تعالیٰ نے اپنے کلام میں ان اچھی بری چیزوں کی تفصیل بتلادی ہے جس شخص نے اس بازار میں کی اچھی چیزوں کو اختیار کیا اسی نے تجارت میں نفع پایا اور جس نے بری چیزوں کو اختیار کیا اس نے ٹوٹا پایا اور خراب ہوا معتبر سند سے ابن ماجہ میں ابوہریرہ ؓ سے روایت 2 ؎ ہے (2 ؎ مشکوٰۃ باب اثبات عذاب القبر فصل تیسری۔ ) جس میں آنحضرت ﷺ نے فرمایا اللہ تعالیٰ نے ہر شخص کے لیے ایک ٹھکانا جنت میں اور ایک ٹھکانا دوزخ میں بنایا ہے قیامت کے دن جو لوگ ہمیشہ کے لیے دوزخی قرار پاویں گے ان کے نام کی جنت کی خالی جگہ جنتیوں کو مل جاوے گی یہ حدیث وھم فی الآخرۃ ھم الا خسرون کی گویا تفسیر ہے جس سے ایسے لوگوں کے ٹوٹے کا حال اچھی طرح سمجھ میں آجاتا ہے کہ ان کے نام کے جنت کے مکان باغ سب کچھ ان کے ہاتھ سے جاتا رہے گا۔
Ayahs 27:6–13(6 تا 13) مشرکین مکہ قرآن کو انسان کا کلام کہتے تھے اس لیے فرمایا اے رسول اللہ کے تم نے تو قرآن ایسے صاحب حکمت سے پایا ہے جو حکمت والا ہے اپنے حکموں میں اور خبردار ہے تمام امور میں اب آگے حضرت موسیٰ ( علیہ السلام) کا قصہ بیان فرمایا کہ کس طور سے ان کو اللہ تعالیٰ نے نبوت کے لیے انتخاب کرلیا اور ان سے باتیں کیں اور ان کو بڑی بڑی نشانیاں دیں اور بھیجا ان کو فرعون اور اس کی قوم کے پاس تو ان لوگوں نے کفر اور تکبر کیا اور جو معجزات حضرت موسیٰ (علیہ السلام) نے ان کو دکھائے ان کو کھلا ہوا جادو بتلایا صحیح بخاری ومسلم کے 1 ؎ (1 ؎ مشکوٰۃ باب فضائل سید المرسلین فصل اول) حوالہ سے ابوہریرہ ؓ کی حدیث ایک جگہ گزر چکی ہے جس میں آنحضرت ﷺ نے فرمایا علاوہ اور معجزوں کے مجھ کو قرآن کا ہی ایک معجزہ ایسا دیا گیا ہے جس کے سب سے کثرت سے لوگ راہ راست پر آویں گے جس کثرت سے مجھے امید ہے کہ قیامت کے دن میرے پیروکار لوگوں کی تعداد اور امتوں کے نیک لوگوں سے زیادہ ہوگی یہ حدیث من لدن حکیم علیم کی گویا تفسیر ہے جس کا حاصل یہ ہے کہ قرآن شریف میں ایسی حکمت اور علم غیب کی باتیں ہیں جس کا اثر قیامت تک لوگوں کے دلوں پر پڑے گا ان آیتوں میں موسیٰ (علیہ السلام) کا جو قصہ ہے اس کا حاصل یہ ہے کہ جب موسیٰ (علیہ السلام) اپنی بی بی کو ساتھ لے کر مدین سے مصر کو آرہے تھے تو اندہیری رات میں راستہ بھول گئے تھے اور جاڑے کے موسم کے سبب سے ان کو اور ان کی بی بی کو سردی بھی بہت لگ رہی تھی اسی حالت میں طور پہاڑ کے پاس ان کو آگ کی سی روشنی نظر آئی اسی روشنی کو دیکھ کر انہوں نے اپنی بیوی سے کہا کہ تم یہاں ٹھہرو میں اس آگ کی روشنی کی طرف جاتا ہوں آگ کے پاس کوئی شخص ملا تو اس سے راستہ کی خبر بھی مل جاوے گی کہ سیدھا راستہ کدہر کو ہے اور سردی میں تاپنے کے لیے تھوڑی سی آگ بھی لیتا آؤں گا اگرچہ اللہ تعالیٰ کی نظر تمام مخلوقات کو گھیرے ہوئے ہے لیکن مخلوقات میں یہ تاب نہیں کہ اللہ تعالیٰ کی نظر کی برداشت کرسکے اس لیے اللہ تعالیٰ کے منہ کے آگے پردے ہیں چناچہ صحیح مسلم کی ابو موسیٰ اشعری ؓ کی حدیث 2 ؎ میں ان پردوں کا ذکر تفصیل سے ہے (2 ؎ صحیح مسلم ص 99 جلد اول۔ ) صحیح مسلم کی بعض روایتوں میں ناری پردہ کا ذکر ہے اور بعض میں نوری پردے کا اسی واسطے بعضے سلف نے یہاں نار کے معنے آگ کے لیے ہیں اور بعضوں نے نور کے اور صحیح مسلم میں دونوں معنے کی روایت ہے اس لیے دونوں معنے صحیح ہیں لیکن امام مسلم کی طرز روایت 3 ؎ سے نور کے پردے کی روایت زیادہ صحیح معلوم ہوتی ہے (3 ؎ حوالہ مذکور۔ ) اس روشنی کے اندر اور آس پاس جو فرشتے تھے ان کو صاحب برکت فرمایا کیونکہ وہ مقرب فرشتے نور الٰہی کی روشنی میں تھے اب غیب سے موسیٰ (علیہ السلام) کو آواز آئی کہ اے موسیٰ اللہ کی ذات سب عیبوں سے پاک ہے اور وہ بڑا زبردست حکمتوں والا ہے اس کے بعد موسیٰ (علیہ السلام) کو قدرت اور حکمت الٰہی دکھانے کے لیے یہ ارشاد ہوا کہ موسیٰ تم اپنے ہاتھ کی لکڑی زمین پر ڈال دو وہ لکڑی زمین پر ڈالتے ہی اب تو پتلا سا ایک سانپ بن گئی اور فرعون کے سامنے اور جادوگروں کے مقابلہ کے وقت بڑا سانپ بن گئی اس لیے اس قصہ میں کہیں سانپ کے بیان ہیں ایک لفظ آیا ہے کہ اور کہیں دوسرا پہلے پہل لکڑی کو سانپ بنتے ہوئے دیکھ کر موسیٰ (علیہ السلام) ڈرے اور جھجک کر پیچھے کو ہٹ گئے اس لیے فرمایا موسیٰ ڈر نہیں اللہ تعالیٰ نے تم کو اپنا رسول مقرر کیا ہے اور اللہ کے رسول سوا اللہ کے اور کسی چیز سے نہیں ڈرتے اور ایک فرعونی شخص پر جو تم نے زیادتی کی اگرچہ وہ اللہ سے ڈرنے کا کام تھا لیکن ایسے کام کے بعد جو شخص نام ہو تو للہ غفور رحیم ہے اس کے بعد ہاتھ کے سورج کی طرح چمکدار ہوجانے کا معجزہ عنایت ہوا ان دونوں معجزوں کے ساتھ زبان کے تو تلاپن کے اچھے ہوجانے کو دریا میں راستہ پیدا ہوجانے کے طورفان کو ٹڈیوں چیچڑیوں کی مینڈکوں اور خون کو ملایا جائے تو یہ نو معجزے ہوئے ان سب کو فرعون اور اس کی قوم نے جادو بتلایا صحیح بخاری ومسلم کے حوالہ سے حضرت علی ؓ کی حدیث اوپر گذر چکی ہے کہ جو لوگ علم الٰہی میں بد قرار پاچکے ہیں اس کی نشانی یہ ہے کہ ایسے لوگوں کو دنیا میں برے کام اچھے معلوم ہوتے ہیں یہ یہ حدیث اس کی تفسیر ہے کہ فرعون اور اس کی قوم نے آنکھیں بند کر کے ایسے ایسے بڑے معجزوں کو جادو کیوں بتلایا۔
Ayah 27:1414۔ فرعون کے زمانہ کے بڑے بڑے جادوگر جب حضرت موسیٰ (علیہ السلام) کا مقابلہ نہ کرسکے اور حضرت موسیٰ کے مقابلہ سے عاجز آن کر آخر کو مسلمان ہوگئے تو فرعون کے ساتھ کے لوگ اپنے دل میں یہ سمجھ گئے تھے کہ حضرت موسیٰ کا معاملہ بناوٹی اور جادو کا نہیں ہے کیونکہ اگر حضرت موسیٰ کا معاملہ بناوٹی اور جادو کا ہوتا تو اس طرح کے جادو گر جن کے باپ دادا سے جادو کا پیشہ چلا آتا تھا اسی کام کی تنخواہ اور جاگیر فرعون کی طرف سے ان کی مقرر تھی وہ اس طرح موسیٰ (علیہ السلام) سے عاجز نہ ہوتے لیکن باوجود اس بات کے دل میں سمجھ جانے کے وہ لوگ ظاہر میں حضرت موسیٰ (علیہ السلام) پر ایمان نہ لائے اور انجام یہ ہوا کہ غرق ہو کر سب غارت ہوگئے یہی حال قریش کا تھا کہ بارہ تیرہ برس آنحضرت ﷺ کی ہجرت سے پہلے مکہ میں رہنے اور طرح طرح کے معجزہ دیکھنے سے ان کے دلوں کو تو یہ بات معلوم ہوگئی تھی کہ آنحضرت ﷺ سچے نبی ہیں کیونکہ ان کے جتنے کام ہیں وہ بغیر تائید یعنی کے ممکن نہیں لیکن باوجود اس بات کے دل میں سمجھ جانے کے قریش بھی شیطان کے بہکاوے سے ظاہر میں ایمان نہ لاتے تھے اس لیے قریش کو حضرت موسیٰ (علیہ السلام) اور فرعون کا قصہ بیان فرما کر سمجھا دیا کہ یہ ضروری فہمایش طے ہوجانے کے بعد اگر یہ لوگ نبی وقت کی اطاعت قبول نہ کریں گے تو اس کا انجام بھی وہی ہوگا جو انجام فرعون اور اس کا قوم کا ہوا اللہ کا وعدہ سچا ہے آخر وہی انجام ہوا کہ قریش میں سے جو لوگ ایمان نہ لائے وہ دنیا میں طرح طرح کی خواری سے ہلاک ہوئے اور عاقبت کا عذاب جدا اپنے سر لیا غرض ہر شخص کی نجات کی صورت اس میں ہے کہ ہر طرح ہر حال میں اللہ کے رسول کی اطاعت قبول کرے ورنہ دین و دنیا میں خوار ہوگا صحیح بخاری میں حضرت ابوہریرہ ؓ سے روایت 1 ؎ ہے (1 ؎ مشکوٰۃ باب الا عتصام بالکتاب والنسۃ فصل اول ‘ )
جس کا حاصل یہ ہے کہ آنحضرت ﷺ نے فرمایا کہ میری امت کے سب لوگ جنت میں داخل ہوں گے لیکن وہ شخص جنت میں داخل نہیں ہوسکتا جس نے میری اطاعت سے کسی قدر بھی انکار کیا یہاں یہ بات بھی یاد رکھنے کے قابل ہے کہ آنحضرت ﷺ سے ایک طرح کا انکار تو کفر ہے وہ یہ کے اللہ تعالیٰ کی طرف سے جو حکم اللہ کے رسول لائے ہیں اس کو سرے سے کوئی شخص سچا رسول جانے ہی نہیں یہ انکار تو کفار کی عادت ہے کلمہ گو لوگوں میں اگرچہ یہ عادت تو نہیں ہے لیکن جو شخص کلمہ گو ہو کر رسول وقت کے قول کی مخالف کسی رسم دنیایا کسی خواہش نفسانی پر چلے گا وہ بھی رسول وقت کا پورا اطاعت گزار نہیں کہلا سکتا اور آپ نے فرمایا ہے کہ اس طرح کا شخص پورا مسلمان نہیں ہے امام نووی نے اربعین میں حضرت عبداللہ بن عمر ؓ کی صحیح روایت 2 ؎ سے جو حدیث روایت کی ہے (2 ؎ ایضا فصل دوسری۔ )
اس کا حاصل یہ ہے کہ آنحضرت ﷺ نے فرمایا کوئی شخص اس وقت تک ایمان دار نہیں کہلا سکتا جب تک اپنی ہر طرح کی خواہش دلی کو اللہ کے احکام شریعت کے مقابلہ میں نہ چھوڑ دے جن احکام کو میں اللہ تعالیٰ کے طرف سے لایا ہوں حاصل معنی حدیث کے یہ ہیں کہ شریعت کے حکم کے آگے اور کوئی امر قابل اطاعت نہیں ہے حکم شرعی کے مخالف جو شخص کسی امر کی اطاعت کرے گا وہ اسی امر کا اطاعت گزار کہلاوے گا شریعت کا اطاعت گزرا نہیں کہلا سکتا اور جو شخص شریعت کا اطاعت گزار نہ ہو وہ ایماندار کیوں کر کہلا سکتا ہے
Ayahs 27:15–2615 تا 26 بعضے مفسروں نے یہ جو لکھا ہے کہ اس زمانہ میں جانور انسان کی سی بولی بولتے تھے یہ قرآن شریف کے مخالف ہے اس لیے کے قرآن شریف میں اللہ تعالیٰ نے حضرت سلیمان (علیہ السلام) کا قصہ خصوصیت کے طور پر یہ فرمایا ہے کہ اللہ تعالیٰ نے ان کو جانوروں کو بولی سمجھنے کی نعمت عنایت فرمائی تھی جو نعمت مخلوق الٰہی میں سے کسی کو عنایت نہیں ہوئی اور حضرت سلیمان کا قول اللہ تعالیٰ نے جو قرآن شریف میں نقل کیا ہے اس میں حضرت سلیمان (علیہ السلام) نے اللہ کی اس نعمت کو اپنی خصوصیت کے طور پر ذکر کیا ہے جب یہ کہا جاوے گا کہ اس زمانہ میں جانور انسان کی سی بولی بولتے تھے تو پھر حضرت سلیمان (علیہ السلام) کی خصوصیت کیا باقی رہ جائے گی اس لیے کہ انسان کی بولی کو تو ہر انسان سمجھ سکتا ہے غرض صحیح بات یہی ہے کہ دنیا کے پیدائش سے آج تک چرند وپرند جانوروں کی حالت وہی ہے جو سب کی آنکھوں کے سامنے ہے حضرت سلیمان جن اور انسان دونوں پر حکومت کرتے تھے اور چرند اور پرند سب جانوروں کی اصلی بولی سمجھتے تھے حضرت داؤد (علیہ السلام) کو پرواز جانوروں اور پہاڑروں کی تسبیح کے سمجھنے کا اور سلیمان (علیہ السلام) کو پرند اور چرند کی ہر ایک بولی کے سمجھ لینے کا علم جو اللہ تعالیٰ نے عنایت فرمایا تھا اسی کو فرمایا کہ ہم نے داؤد اور سلیمان ( علیہ السلام) کو ایک علم دیا نبوت بادشاہت حضرت سلیمان (علیہ السلام) کا لشکر جن انسان اور پرند کو فرمایا ہے اس سے معلوم ہوا کہ پرندوں اور جانوروں پر بھی سلیمان (علیہ السلام) کی اسی طرح کی حکومت تھی جس طرح جن اور انسان پر ان کی حکومت تھی فھم یوزعون کی تفسیر حضرت عبداللہ بن عباس ؓ کے قول کے موافق لشکر کے باقاعدہ صف بندی کے ہے یہی قول شاہ صاحب نے ترجمہ میں لیا ہے قتادہ (رح) کے قول کے موافق یہ چیونٹیوں کا میدان ملک شام میں تھا۔ چیونٹیوں کی سمجھ داری کی بات سے سلیمان (علیہ السلام) کو تعجب ہوا اس لیے ان کو ہنسی آئی حضرت عبداللہ بن عباس ؓ کا صحیح قول ہے کہ ہد ہد کی نظر زمین کے اندر دور تک پہنچتی ہے اس لیے بغیر پانی کے جنگل میں جہاں کہیں سلیمان (علیہ السلام) کا لشکر اترتا تھا تو ہد ہد سے پانی کے نکلنے کا اندازہ پوچھا جاتا اور جنات سے پانی چشمہ کھودوایا جاتا تھا ایک روز ایسے ہی جنگل میں سلیمان (علیہ السلام) کا لشکر اترا اور تلاش کے وقت ہد ہد غیر حاضر نکلا اسی واسطے ہد ہد کی غیر حاضری پر سلیمان (علیہ السلام) کو غصہ آیا۔ حضرت عبداللہ بن عباس ؓ کے صحیح قول کے موافق پرند جانوروں کی سزا سلیمان (علیہ السلام) نے یہ مقرر کی تھی کہ قصور وار جانوروں کے پر اکھیڑ کر ان جانوروں کو دھوپ میں ڈال دیا جاتا تھا اسی کو عذاب شدید فرمایا اور زیادہ غصہ کی حالت میں یہ بھی فرمایا کہ اس معمولی سزا سے بڑھ کر ہد ہد کو یہ سزادی جاوے گی کہ اس کو ذبح کر ڈالا جاوے گا۔ معتبر سند سے تفسیر ابن ابی حاتم میں حضرت عبد اللہ بن عباس ؓ سے روایت 1 ؎ ہے (1 ؎ تفسیر ابن کثیر ص 531 ج 3۔ )
جس میں آنحضرت ﷺ نے فرمایا۔ سبا ایک شخص کا نام تھا اسی کے نام پر ملک یمن میں یہ جگہ ہے یہ بڑی شاداب جگہ تھی پھر یہاں کے لوگوں کی سرکشی کے سبب سے و یران ہوگئی یہ قصہ سورة سبا میں تفصیل سے آوے گا قتادہ کے قول کے موافق سبا کی بادشاہ زادی کا نام بلقیس تھا سبا کے لوگ آتش پرست پارسی تھے اسی واسطے یہ لوگ آگ اور سورج کی پرستش کرتے تھے کیونکہ ان لوگوں کے مذہب میں آگ کی بڑی تعظیم ہے ان لوگوں کا یہ اعتقاد ہے کہ دنیا میں آگ سورج کی شعاع سے پیدا ہوئی ہے آسمان کی پوشیدہ چیز مینہ ہے زمین کی پوشیدہ چیز پیداوار ہے کیونکہ سوا اللہ تعالیٰ کے کسی کو معلوم نہیں کہ مینہ کب برسے گا اور اس سے کس قدر پیدا وار ہوگی ہد ہد نے بلقیس کے تخت کا ذکر کیا تھا اس لیے اس کی شان گھٹانے کے لیے عرش معلی کا تذکرہ کیا۔ صحیح بخاری میں ابوہریرہ ؓ سے روایت 2 ؎ ہے (2 ؎ مشکوٰۃ باب بدء الخلق وذکر الانبیائ (علیہ السلام)
کہ داؤد (علیہ السلام) اپنے ہاتھ کی مزدوری میں اپنی گزر بسر کرتے تھے سورة صٓ میں آوے گا کہ سلیمان (علیہ السلام) ایک دن کچھ گھوڑوں کے دیکھنے میں لگ گئے جس سے ان کی نماز کو دیر ہوگئی اس پر غصہ ہو کر انہوں نے ان گھوڑوں کو ذبح کر ڈالا۔ اس سے معلوم ہوا کہ باوجود اتنی بڑی بادشاہت کے داؤد (علیہ السلام) اور سلیمان (علیہ السلام) دنیا کو ہیچ سمجھتے تھے۔
Ayahs 27:27–31(27 تا 31) جب ہد ہد نے حضرت سلیمان (علیہ السلام) سے بلقیس کی بادشاہت اور اس کے تخت کا حال آن کر کہا تو حضرت سلیمان (علیہ السلام) کو شبہ ہوا کہ ہد ہد لشکر سے پیچھے جو رہ گیا تھا اس لیے اس نے یہ بات بنائی ہے کہ ایک عورت کی بادشاہت اور نئی نئی چیزیں ملک سبا میں دیکھ کر آیا ہے اس واسطے اس کا جھوٹ آزمانے کو یہ بات فرمائی کہ اب معلوم ہوجاوے گا کہ تو سچا ہے یا جھوٹا ہے اور یہ بات فرما کر بلقیس کے نام خط لکھ کر ہد ہد کو دیا۔ صحیح سند سے مسند امام احمد ابن ماجہ اور ابوداؤد کی حضرت عبد اللہ بن عباس ؓ روایت 1 ؎ میں (1 ؎ مشکوٰۃ ص 362 باب مایحل اکلہ وما یحرم) آنحضرت ﷺ نے چیونٹی۔ شہد کی مکھی کے مارنے کی جہاں ممانعت فرمائی ہے
وہاں ہد ہد کے مارنے کو بھی آپ ﷺ نے منع فرمایا ہے جس طرح کا یہ مختصر خط سلیمان (علیہ السلام) نے بلقیس کو لکھا ہے آنحضرت ﷺ نے بھی ایسے ہی مختصر خط کسریٰ قیصر اور نجاشی کو لکھے ہیں سبا بن شحب جو ایک شخص تھا جس کا ذکر اوپر گزرا اس کی نسل میں ایک شخص شراحیل تھا بلقیس اس کی بیٹی تھی یہ شراحیل تمام سر زمین یمن کا بادشاہ تھا تفسیر ابن ابی حاتم وغیرہ میں قتادہ کا جو قول ہے کہ شراحیل اپنے آپ کو بڑا بادشاہ سمجھتا تھا جس زمانہ میں حضرت سلیمان (علیہ السلام) بیت المقدس کی عمارت سے فارغ ہو کر مکہ معظمہ گئے اور مکہ سے واپس ہوتے وقت ایک روز دوپہر کو یمن کی سر زمین پر ٹھہرے اور ہدہد سیر کے طور پر لشکر سے جدا ہو کر مارب بستی کو چلا گیا جہاں بلقیس رہتی تھی اس زمانہ میں تمام ملک یمن کی بادشاہ بلقیس ہی تھی صحیح بخاری میں ابی بکرہ ؓ سے روایت 2 ؎ ہے (2 ؎ ایضا باب الامارۃ والقضاء )
جس کا حاصل یہ ہے کہ ملک فارس میں جب کسریٰ کی بیٹی بادشاہ ہوئی اور آنحضرت ﷺ نے یہ خبر سنی تو آپ نے فرمایا جس قوم کی حاکم عورت ہو وہ قوم کبھی راحت نہیں پاسکتی۔ غرض جب ہدہد نے حضرت سلیمان (علیہ السلام) کا خط بلقیس کی چھاتی پر ڈال دیا تو بلقیس پڑھی لکھی ایک عورت تھی اس نے اس خط کو پڑھا اور اللہ کے نبی کے خط کی ایک ہیبت اس کے دل میں بیٹھ گئی اور تین سو آدمیوں کے قریب اس کے مصاحب تھے ان سے اور اپنے وزیروں سے اس خط کے باب میں اس نے صلاح لی اور آخر کو حضرت سلیمان (علیہ السلام) سے ملنے آئی اور مسلمان ہوئی قرآن شریف میں بس اسی قدر بلقیس کا ذکر ہے بعضی تفسیروں یہ جو لکھا ہے کہ خود حضرت سلیمان ( علیہ السلام) نے پھر بلقیس سے نکاح کرلیا اور بعضی تفسیروں میں یہ ہے کہ کسی اور سے بلقیس کا نکاح حضرت سلیمان (علیہ السلام) نے کرادیا اس کی صراحت کسی آیت یا حدیث صحیح سے پائی نہیں جاتی حضرت عبد اللہ بن عباس ؓ کے شاگردوں میں سے فقط عکرمہ کا یہ قول ہے کہ سلیمان (علیہ السلام) نے بلقیس سے نکاح کرلیا تھا لیکن اس طرح غیب کی باتوں کا جب تک قرآن حدیث سے کچھ پتانہ لگے کوئی بات یقینی طور پر نہیں کہی جاسکتی ثم تول عنھم فانظر ماذا یرجعون کی صحیح تفسیر حافظ ابوجعفر ابن جریر نے یہ قرار دی ہے کہ ہد ہد خط پہنچا کر کہیں کنارہ ٹھہرا رہے اور خط ڈال کر چلا آوے کیونکہ اس میں فانظر ما ذا یرجعون کا کچھ مطلب حل نہیں ہوتا۔