83. Surah Al-Mutaffifin

[وَيْلٌ لِـلْمُطَفِّفِيْنَ؛تباہی ہے کمی کرنے والوں کے لیے ] طف [طَفَّا : (ض) ہاتھ یا پائوں سے کسی چیز کو اٹھانا۔] (تفعیل) تَطْفِیفًا کسی چیز میں ذرا سی کمی کرنا۔ پیمانہ کو تھوڑا سا کم بھرنا۔ زیر مطالعہ آیت۔ 1 ۔] نوٹ۔ 1: اس سورت کے انداز بیان اور مضامین سے صاف معلوم ہوتا ہے کہ یہ مکہ کے ابتدائی دور میں نازل ہوئی ہے جب اہل مکہ کے ذہن میں آخرت کا عقیدہ بٹھانے کے لیے پے در پے سورتیں نازل ہو رہی تھیں۔ بعض مفسرین نے اس کو مدنی قرار دیا ہے۔ اس غلط فہمی کی وجہ دراصل ابن عباس ؓ کی یہ روایت ہے کہ جب نبی ﷺ مدینے تشریف لائے تو یہاں کے لوگوں میں کم ناپنے اور تولنے کا مرض پھیلا ہوا تھا۔ پھر اللہ تعالیٰ نے یہ سورة نازل کی اور لوگ بہت اچھی طرح ناپنے تولنے لگے۔ لیکن جیسا کہ اس سے پہلے ہم بیان کرچکے ہیں کہ صحابہ کرام ؓ اور تابعین کا یہ عام طریقہ تھا کہ ایک آیت جس معاملہ پر چسپاں ہوتی ہو اس کے متعلق وہ یوں کہا کرتے تھے کہ یہ فلاں معاملہ میں نازل ہوئی۔ اس لیے ابن عباس ؓ کی روایت سے جو کچھ ثابت ہوتا ہے وہ یہ ہے کہ جب ہجرت کے بعد نبی ﷺ نے مدینہ کے لوگوں میں یہ بری عادت پھیلی ہوئی پائی تو اللہ تعالیٰ کے حکم سے آپ 1 نے یہ سورت ان کو سنائی اور اس سے ان کے معاملات درست ہوگئے۔ (تفہیم القرآن۔ ج 6 ۔ ص 278) نوٹ۔ 2: مُطَفِّفِیْن کا لفظ تَطْفِیْف سے مشتق ہے۔ عربی میں طَفِیْف چھوٹی اور حقیر چیز کے لیے بولتے ہیں اور تطفیف کا لفظ اصطلاحاً ناپ تول میں چوری چھپے کمی کرنے کے لیے استعمال کیا جاتا ہے۔ کیونکہ یہ کام کرنے والا ناپ کر یا تول کر چیز دیتے ہوئے کوئی بڑی مقدار نہیں اڑاتا بلکہ ہاتھ کی صفائی دکھا کر ہر خریدار کے حصے سے تھوڑا تھوڑا اڑاتا رہتا ہے۔ (تفہیم القرآن) قرآن وحدیث میں ناپ تول میں کمی کرنے کو حرام قرار دیا ہے۔ کیونکہ عام طور پر معاملات کا لین دین انہی دو طریقوں سے ہوتا ہے اور انہی کے ذریعہ کہا جاسکتا ہے کہ حقدار کا حق ادا ہوا یا نہیں۔ لیکن اس سے مقصود ہر ایک حقدار کا حق پورا پورا دینا ہے اور اس میں کمی کرنا حرام ہے۔ تو معلوم ہوا کہ یہ صرف ناپ تول کے ساتھ مخصوص نہیں بلکہ ہر وہ چیز جس سے حق پورا کرنا یا نہ کرنا جانچا جاتا ہے، اس کا یہی حکم ہے۔ حضرت عمر ؓ نے ایک شخص کو دیکھا کہ وہ نماز کے رکوع سجدے وغیرہ پورے نہیں کرتا بلکہ جلدی جلدی نماز ختم کر ڈالتا ہے۔ تو اس سے فرمایا کہ تو نے اللہ کے حق میں تطفیف کردی۔ حضرت عمر ؓ کے اس قول کو نقل کر کے امام مالک (رح) نے فرمایا کہ حق پورا دینا یا کم کرنا ہر چیز میں ہے، یہاں تک کہ نماز، وضو، طہارت وغیرہ میں بھی اور اسی طرح دوسرے حقوق اللہ اور عبادات میں کمی کوتاہی کرنے والا تطفیف کرنے کا مجرم ہے۔ اسی طرح حقوق العباد میں جو شخص مقررہ حق سے کم کرتا ہے وہ بھی تطفیف کے حکم میں ہے۔ ملازم نے جتنے وقت کی خدمت کا معاہدہ کیا ہے اس میں سے وقت چرانا اور چوری کرنا بھی اس میں داخل ہے۔ وقت کے اندر جس طرح محنت کرنے کا عرف میں معمول ہے اس میں سستی کرنا بھی تطفیف ہے۔ اپنی ملازمت کے فرائض میں کمی کرنے کو کوئی گناہ بھی نہیں سمجھتا۔ رسول اللہ ﷺ کا ارشاد ہے کہ جب قوم تطفیف کرتی ہے تو اللہ تعالیٰ ان کا رزق قطع کردیتا ہے۔ حدیث میں جو رزق قطع کردینے کا ارشاد ہے اس کی یہ صورت بھی ہوسکتی ہے کہ اس کو رزق سے بالکل محروم کردیا جائے۔ اور یہ صورت بھی قطع رزق میں داخل ہے کہ رزق موجود ہوتے ہوئے وہ اس کو کھا نہ سکے یا استعمال نہ کرسکے جیسے بہت سی بیماریوں میں اس کا مشاہدہ ہوتا ہے اور اس زمانے میں بہت عام ہے۔ اسی طرح قحط کی یہ صورت بھی ہوسکتی ہے کہ اشیاء ضرورت مفقود ہوجائیں اور یہ بھی ہوسکتی ہے کہ موجود ہونے کے باوجود ان کی گرانی اتنی بڑھ جائے کہ خریداری مشکل ہوجائے۔ جیسا کہ آج کل اس کا مشاہدہ اکثر چیزوں میں ہو رہا ہے۔ اس سے وہ شبہات رفع ہوجاتے ہیں جو حدیث کے الفاظ کے متعلق ظاہر حالات کے اعتبار سے ہوسکتے ہیں۔ (معارف القرآن) نوٹ۔ 3: معاشرے کی بیشمار خرابیوں میں سے ایک خرابی کو بطور مثال لے کر یہ بتایا گیا ہے کہ یہ آخرت سے غفلت کا لازمی نتیجہ ہے۔ جب تک لوگوں کو یہ احساس نہ ہو کہ خدا کے سامنے پیش ہونا ہے اور کوڑی کوڑی کا حساب دینا ہے، اس وقت تک یہ ممکن نہیں ہے کہ وہ اپنے معاملات میں کامل راستبازی اختیا کرسکیں۔ کوئی شخص دیانتداری کو اچھی پالیسی سمجھ کر بعض چھوٹے چھوٹے معاملات میں دیانت برت بھی لے، تو ایسے مواقع پر وہ کبھی دیانت نہیں برت سکتا جہاں بےایمانی ایک مفید پالیسی ثابت ہوتی ہو۔ آدمی کے اندر سچی اور مستقل دیانتداری اگر پیدا ہوسکتی ہے تو صرف آخرت پر یقین ہی سے ہوسکتی ہے، کیونکہ اس صورت میں دیانت ایک ” پالیسی “ نہیں بلکہ ” فریضہ “ قرار پاتی ہے اور آدمی کے اس پر قائم رہنے یا نہ رہنے کا انحصار دنیا میں مفید ہونے یا غیر مفید ہونے پر نہیں رہتا۔ (تفہیم القرآن۔ ج 6 ۔ ص 278 ۔ 279)

[الَّذِينَ اِذَا اكْتَالُوْا عَلَي النَاسِ : وہ لوگ جو جب کبھی ناپ کرلیتے ہیں لوگوں سے ][ يَسْتَوْفُوْنَ : تو پورا لینا چاہتے ہیں ]

[وَاِذَا كَالُوْهُمْ : اور جب کبھی ناپ کردیتے ہیں ان کو ][ اَوْ وَّزَنُوْهُمْ : یا تول کردیتے ہیں ان کو ][ يُخْسِرُوْن؛تو کمی کرتے ہیں ]

[اَلَا يَظُنُّ اُولٰۗىِٕكَ : کیا گمان نہیں کرتے وہ لوگ ][ انهُمْ مَّبْعُوْثُوْنَ : کہ وہ اٹھائے جانے والے ہیں ]

[لِيَوْمٍ عَظِيْمٍ : ایک عظیم دن کے لیے ]

[يَّوْمَ يَقُوْمُ النَاسُ : جس دن کھڑے ہوں گے لوگ ][ لِرَبِ الْعٰلَمِيْنَ : تمام جہانوں کے رب کے سامنے ]

[كَلَّآ ان كِتٰبَ الْفُجَّارِ : ہرگز نہیں ! بیشک نافرمانی کرنے والوں کی کتاب (نامہ اعمال)][ لَفِيْ سِجِّيْنٍ : یقینا سجین میں ہے ] نوٹ۔ 4: آیت۔ 7 ۔ میں لفظ سِجِّیْنٍ آیا ہے جو سجن سے مشتق ہے جس کے معنی تنگ جگہ میں قید کرنے کے ہیں۔ اور احادیث و آثار سے یہ معلوم ہوتا ہے کہ سجین ایک خاص مقام کا نام ہے اور کفار وفجار کی ارواح کا مقام یہی ہے اور اسی مقام پر ان کے نامۂ اعمال رہتے ہیں۔ جس کا مطلب یہ بھی ہوسکتا ہے کہ ان کے اعمال نامہ اس جگہ محفوظ کر دئیے جاتے ہیں اور یہ بھی ممکن ہے کہ اس جگہ کوئی ایسی جامع کتاب ہو جس میں تمام کفار وفجار کے اعمال لکھ دئیے جاتے ہوں۔ اس کے آگے کِتبٌ مَّرْقُوْمٌ کے الفاظ آئے ہیں ان کے متعلق امام بغوی اور ابن کثیر نے فرمایا کہ یہ جملہ مقام سجین کی تفسیر نہیں ہے بلکہ اس سے پہلے جو کِتٰبُ الفجار آیا ہے اس کا بیان ہے۔ (معارف القرآن)

[وَمَآ اَدْرٰىكَ مَا سِجِّيْنٌ: اور تو کیا جانے کیا ہے سجین ]

[كِتٰبٌ مَّرْقُوْمٌ: (وہ) ایک لکھی ہوئی کتاب ہے ]

[وَيْلٌ يَّوْمَىِٕذٍ : تباہی ہے اس دن ][ لِلْمُكَذِّبِيْنَ : جھٹلانے والوں کے لئے ]

[الَّذِينَ يُكَذِّبُوْنَ : وہ لوگ جو جھٹلاتے ہیں ][ بِيَوْمِ الدِّيْنِ : بِیَوْمِ الدِّیْنِ (11) چ ]

[وَمَا يُكَذِّبُ بِهٖٓ: اور نہیں جھٹلاتے اس کو ][ اِلَّا كُلُّ مُعْتَدٍ اَثِيْمٍ : مگر سارے حد سے بڑھنے والے گنہگار ]

[اِذَا تُتْلٰى عَلَيْهِ اٰيٰـتُنَا : جب کبھی پڑھ کر سنائی جاتی ہیں اس کو ہماری آیتیں ][ قَالَ اَسَاطِيْرُ الْاَوَّلِيْنَ : تو وہ کہتا ہے پہلے لوگوں کے افسانے ہیں ] نوٹ۔ 5: آیت۔ 14 ۔ میں رَانَ کا لفظ رین سے مشتق ہے جس کے معنی زنگ اور میل کچیل کے ہیں۔ مطلب یہ ہے کہ ان کے دلوں پر ان کے گناہوں کا زنگ لگ گیا ہے اور جس طرح زنگ لوہے کو کھا کر مٹی بنا دیتا ہے اسی طرح ان کے گناہوں کے زنگ نے ان کے دل کی اس صلاحیت کو ختم کردیا جس سے بھلے برے کی تمیز ہوتی ہے۔ رسول اللہ ﷺ نے فرمایا کہ بندہ جب کوئی گناہ کرتا ہے تو اس کے دل پر ایک سیاہ نقطہ لگ جاتا ہے۔ اگر اس نے توبہ کرلی تو یہ سیاہ نقطہ مٹ جاتا ہے اور دل اپنی اصلی حالت میں منور ہوجاتا ہے۔ اور اگر اس نے توبہ نہ کی بلکہ اپنے گناہوں میں زیادتی کرتا چلا گیا تو یہ سیاہی اس کے سارے قلب پر چھا جاتی ہے۔ (معارف القرآن)

[كَلَّا بَلْ ۫ رَان عَلٰي قُلُوْبِهِمْ : ہرگز نہیں ! بلکہ چھا گیا ان کے دلوں پر ][ مَا كَانوْا يَكْسِبُوْنَ : وہ جو یہ لوگ کماتے تھے ] ر ی ن (ض) رَیْنًا کسی کا کسی پر غالب آنا۔ چھا جانا۔ زیر مطالعہ آیت۔ 14 ۔

[كَلَّآ انهُمْ عَنْ رَّبِهِمْ : ہرگز نہیں ! بیشک یہ لوگ اپنے رب سے ][ يَوْمَىِٕذٍ لَّمَحْجوبُوْنَ : اس دن یقینا روکے ہوئے ہوں گے ]

[ثُمَّ انهُمْ : پھر بیشک یہ لوگ ][ لَصَالُوا الْجَــحِيْمِ : یقینا گرنے والے ہیں جہنم میں ]

[ثُمَّ يُقَالُ : پھر ان سے کہا جائے گا ][ هٰذَا الَّذِي : یہ وہ ہے ][ كُنْتم بِهٖ تُكَذِّبُوْنَ : تم لوگ جس کو جھٹلایا کرتے تھے ]

[كَلَّآ ان كِتٰبَ الْاَبْرَارِ : ہرگز نہیں ! بیشک نیکی کرنے والوں کی کتاب (اعمال نامہ)][ لَفِيْ عِلِيِّيْنَ : یقینا بلندیوں میں ہے ]

[وَمَآ اَدْرٰىكَ : اور تو کیا جانے ][ مَا عِلِيُّوْنَ : کیا ہیں (وہ) بلندیاں ]

[كِتٰبٌ مَّرْقُوْمٌ: (وہ) ایک لکھی ہوئی کتاب ہے ]

[يَّشْهَدُهُ الْمُقَرَّبُوْنَ : موجود ہوتے ہیں اس پر قربت دیئے ہوئے (فرشتے)]

[ان الْاَبْرَارَ : بیشک نیکی کرنے والے ][ لَفِيْ نَعِيْمٍ : یقینا دائمی خوشحالی میں ہوں گے ]

[عَلَي الْاَرَاۗىِٕكِ يَنْظُرُوْنَ : تختوں پر (بیٹھے) دیکھتے ہوئے ]

[تَعْرِفُ فِيْ وُجوهِهِمْ : تو پہچانے گا ان کے چہروں میں ][ نَضْرَةَ النَّعِيْمِ؛دائمی خوشحالی کی تروتازگی کو ]

[يُسْقَوْنَ مِنْ رَّحِيْقٍ مَّخْتُوْمٍ : وہ پلائے جائیں گے سربمہر کی ہوئی خالص (شراب) سے ]

[خِتٰمُهٗ مِسْكٌ ۭ: جس کی مہر مشک ہوگی ][ وَفِيْ ذٰلِكَ فَلْيَتَنَافَسِ : اور اس میں پس چاہیے کہ جان کھپائیں ][ الْمُتَنَافِسُوْنَ : جان کھپانے والے ] نوٹ۔ 1: تنافس کے معنی ہے کہ چند آدمیوں کا کسی خاص مرغوب و محبوب چیز کو حاصل کرنے کے لیے جھپٹنا اور دوڑنا تاکہ دوسروں سے پہلے وہ اس کو حاصل کرلیں۔ یہاں جنت کی نعمتوں کا ذکر فرمانے کے بعد حق تعالیٰ نے غفلت شعار انسان کو اس طرف متوجہ کیا ہے کہ آج تم لوگ جن چیزوں کو مرغوب و مطلوب سمجھ کر ان کو حاصل کرنے میں دوسروں سے آگے بڑھنے کی کوشش میں لگے ہوئے ہو، وہ ناقص اور فانی نعمتیں اس قابل نہیں کہ ان کو مقصود زندگی سمجھ کر ان کے لیے مسابقت کرو۔ بلکہ ان میں تو قناعت وایثار سے کام لے کر یہ سمجھ لو یہ چند روزہ راحت کا سامان ہاتھ سے نکل بھی گیا تو کچھ بڑے صدمے کی بات نہیں، یہ ایسا خسارہ نہیں جس کی تلافی نہ ہو سکے۔ البتہ تنافس اور مسابقت کرنے کی چیز یہ جنت کی نعمتیں ہیں جو ہر حیثیت سے مکمل بھی ہیں اور دائمی بھی۔ (معارف القرآن) مورخہ 2 شوال 1431 ھ بمطابق 12 ستمبر 2010 ء

[وَمِزَاجُهٗ مِنْ تَسْنِيْمٍ : اور اس (رحیق) کی ملاوٹ تسنیم سے ہوگی ]

[عَيْنًا يَّشْرَبُ بِهَا الْمُقَرَّبُوْنَ : (یعنی) ایک ایسا چشمہ ہے پئیں گے جس سے قربت دیئے ہوئے ]

[ان الَّذِينَ اَجْرَمُوْا : بیشک وہ لوگ جنھوں نے جرم کیا ][ كَانوْا مِنَ الَّذِينَ اٰمَنُوْا يَضْحَكُوْنَ : وہ ان سے جو ایمان لائے ہنسی ٹھٹھا کرتے تھے ]

[وَاِذَا مَرُّوْا بِهِمْ : اور جب گزرتے ان کے پاس سے ][ يَتَغَامَزُوْنَ : تو باہم ایک دوسرے کو آنکھ مارتے ]

[وَاِذَا انقَلَبُوْٓا اِلٰٓى اَهْلِهِمُ : اور جب لوٹتے ہیں اپنے گھر والوں کی طرف ][ انقَلَبُوْا فَكِهِيْنَ : تو لوٹتے ہیں اکڑ باز ہوتے ہوئے ]

[وَاِذَا رَاَوْهُمْ : اور جب وہ (مجرم) لوگ دیکھتے ہیں ان (اہل ایمان) کو ][ قَالُوْٓا ان هٰٓؤُلَاۗءِ لَضَاۗلُّوْنَ : تو کہتے ہیں بیشک یہ لوگ یقینا بھٹکنے والے ہیں ]

[وَمَآ اُرْسِلُوْا عَلَيْهِمْ : حالانکہ وہ (مجرم) لوگ نہیں بھیجے گئے ان (اہل ایمان) پر ][ حٰفِظِيْنَ : نگہبانی کرنے والے ہوتے ہوئے ]

[فَالْيَوْمَ الَّذِينَ اٰمَنُوْا : تو آج کے دن وہ لوگ جو ایمان لائے ][ مِنَ الْكُفَّارِ : انکار کرنے والوں سے ][ يَضْحَكُوْنَ : ٹھٹھا کریں گے ]

[عَلَي الْاَرَاۗىِٕكِ ۙ يَنْظُرُوْنَ : تختوں پر (بیٹھے) دیکھتے ہوئے ]

[هَلْ ثُوِّبَ الْكُفَّارُ : (تو) کیا بدلہ دے دیا گیا منکروں کو ][ مَا كَانوْا يَفْعَلُوْنَ : وہ (اس کا) جو وہ کرتے تھے ]