1- اے رسول! اللہ تعالیٰ جو وحی آپ کی طرف کرتا ہے اس کی قراء ت کریں، اس حال میں کہ اس کی ابتدا اپنے رب کے نام سے کریں جس نے تمام مخلوقات کو پیدا کیا۔

2- اس نے انسان کو جمے ہوئے خون کے ایک لوتھڑے سے پیدا کیا جبکہ پہلے وہ ایک نطفہ تھا۔

3- اے رسول! اس وحی کی قراء ت کریں جو اللہ نے آپ کی طرف بھیجی ہے اور آپ کا رب بڑے کرم والا ہے جس کے کرم کا مقابلہ کوئی کریم نہیں کر سکتا۔ وہ بہت زیادہ سخاوت اور احسان کرنے والا ہے۔

4- جس نے قلم کے ذریعے سے تحریر کرنا اور لکھنا سکھایا۔

5- اس نے انسان کو وہ کچھ سکھایا جو وہ جانتا نہیں تھا۔

6- حقیقت یہ ہے کہ فاجر انسان، جیسے ابوجہل اللہ تعالیٰ کی حدود کی پامالی میں ہر حد سے گزر جاتا ہے۔

7- اس لیے کہ اس کے پاس جو مال اور مقام و مرتبہ ہے، اس کی بنا پر وہ خود کو بے نیاز سمجھتا ہے۔

8- اے انسان! بلاشبہ قیامت کے دن تمھیں اپنے رب کی طرف پلٹنا ہے تو وہ ہر ایک کو وہی جزا دے گا جس کا وہ حقدار ہے۔

9- کیا آپ نے ابوجہل سے بھی زیادہ عجیب معاملہ کسی کا دیکھا ہے جو روکتا ہے؟

10- ہمارے بندے محمد رسول اللہ صلى اللہ عليہ وسلم کو جب وہ کعبہ کے پاس نماز ادا کریں۔

11- بھلا بتائیں تو سہی جسے روکا جارہا ہے اگر یہ اپنے رب کی طرف سے ہدایت اور بصیرت پر ہو؟

12- یا وہ لوگوں کو اللہ سے ڈرنے کا حکم دیتا ہو کہ اس کے حکم بجا لاؤ اور اس کے منع کیے ہوئے کاموں سے بچ جاؤ تو کیا ایسے شخص کو روکا جائے گا؟

13- بھلا بتائیں تو سہی اگر یہ منع کرنے والا اسے جھٹلائے جو رسول اس کے پاس لایا اور اس سے منہ پھیرے، کیا وہ اللہ سے نہیں ڈرتا؟

14- اس بندے (محمد صلى اللہ عليہ وسلم ) کو نماز ادا کرنے سے روکنے والا کیا یہ نہیں جانتا کہ جو کچھ وہ کرتا ہے، اللہ اسے دیکھتا ہے، اس میں سے کوئی چیز اس سے چھپی نہیں؟

15- معاملہ ایسے نہیں جیسے یہ جاہل سمجھتا ہے۔ اگر یہ ہمارے بندے کو تکلیف دینے اور جھٹلانے سے باز نہ آیا تو ہم ضرور اس کی پیشانی سے سختی کے ساتھ پکڑ کر اسے آگ کی طرف گھسیٹیں گے۔

16-اس پیشانی والا بات کا جھوٹا اور غلط کار ہے۔

17- اسے چاہیے کہ جب اسےپیشانی سے پکڑ کر آگ میں ڈالا جائے گا، تو وہ اس وقت اپنے ساتھیوں اور حمایتیوں کو مدد کے لیے بلائے کہ وہ اسے عذاب سے بچائیں۔

18- تو ہم ضرور ان سخت گیر فرشتوں کو بلا لیں گے جو جہنم کے داروغے ہیں، جو اللہ کے حکم کی نافرمانی نہیں کرتے اور جو حکم انھیں ملے اسے بجا لاتے ہیں، پھر وہ دیکھے کہ کون سا گروہ زیادہ قوت والا اور طاقتور ہے۔

19- معاملہ ایسے نہیں جس طرح اس ظالم نے سمجھ لیا ہے کہ وہ آپ کو نقصان پہنچائے گا، لہٰذا اس کی کسی روک ٹوک کی پروا نہ کریں اور اللہ کے حضور سجدہ کریں، نیز اطاعت کے کام کر کے اس کے قریب ہو جائیں کیونکہ اطاعت والے کام اللہ تعالیٰ کے قریب کرتے ہیں۔