1- اللہ تعالیٰ نے انجیر اور اس کے اگنے کی جگہ کی قسم کھائی اور زیتون اور اس کے اگنے کے مقام کی قسم کھائی جو سرزمین فلسطین میں ہے، جس سرزمین میں عیسیٰ علیہ السلام بھیجے گئے۔

2- اور سینا کے پہاڑ کی قسم کھائی جس کے پاس اللہ تعالیٰ نے اپنے نبی موسیٰ علیہ السلام سے سرگوشی کی۔

3- اور حرمت والے شہر مکہ کی قسم کھائی، جس میں داخل ہونے والے کو امن مل جاتا ہے اور اسی میں محمد رسول اللہ صلى اللہ عليہ وسلم بھیجے گئے۔

4- بلاشبہ یقیناً ہم نے انسان کو نہایت مناسب تخلیق اور افضل شکل و صورت میں پیدا کیا۔

5- پھر ہم نے اسے دنیا میں بڑھاپے اور کم عقلی کی طرف لوٹا دیا تو وہ اپنے جسم سے فائدہ نہیں اٹھا سکتا، بالکل اسی طرح جیسے بگڑی ہوئی فطرت والا اپنے اعضاء سے فائدہ نہیں اٹھاتا اور آگ میں داخل ہو جاتا ہے۔

6- مگر جو لوگ اللہ پر ایمان لائے اور انھوں نے نیک عمل کیے، پھر بے شک وہ لوگ اگر بوڑھے بھی ہو جائیں تو ان کے لیے کبھی نہ ختم ہونے والا، ہمیشہ کا ثواب ہے اور وہ ہے جنت کیونکہ انھوں نے اپنی فطرت کو پاک صاف رکھا۔

7- اے انسان! جب تو نے اللہ تعالیٰ کی قدرت کی بے شمار نشانیاں اپنی آنکھوں سے دیکھ لیں تو پھر کون سی چیز تجھے جزا کے دن کو جھٹلانے پر آمادہ کرتی ہے؟

8- کیا اللہ تعالیٰ تمام حاکموں سے بڑا حاکم اور سب سے بڑھ کر عدل و انصاف کرنے والا نہیں جس نے روزِ قیامت كو جزا اور بدلے کا دن ٹھہرایا؟ کیا یہ بات عقل میں آسکتی ہے کہ اللہ تعالیٰ اپنے بندوں میں فیصلہ کیے بغیر انھیں بے کار چھوڑ دے اور نیک شخص کو اس کی نیکی کا اور برے کو اس کی برائی کا بدلہ نہ دے؟