1- اللہ تعالیٰ نے حُرمت والے شہر کی قسم کھائی جو کہ مکہ مکرمہ ہے۔

2- اور اے رسول! آپ کے لیے (فتح مکہ کے موقع پر) حلال ہے کہ آپ اس میں جو چاہیں کریں، یعنی جو قتل کا حقدار ہے، اسے قتل کریں اور جو قید و بند کا مستحق ہے، اسے قید کریں۔

3- اور اللہ تعالیٰ نے انسانیت کے باپ آدم علیہ السلام اور اُن کی نسل سے پیدا ہونے والی اولاد کی قسم کھائی۔

4- یقیناً ہم نے انسان کو بڑی مشکل اور مشقت میں پیدا کیا، کیونکہ دنیا میں اس کی زندگی محنت و مشقت اور مشکلات سے بھری ہوئی ہے۔

5- کیا انسان یہ خیال کرتا ہے کہ جب وہ گناہوں کا ارتکاب کرتا ہے تو کوئی اس کی گرفت کر سکتا ہے نہ اس سے کوئی بدلہ لے سکتا ہے، خواہ اس کا رب ہی ہو جس نے اسے پیدا کیا؟

6- وہ کہتا ہے: میں نے تو پے در پے بہت زیادہ مال خرچ کر ڈالا۔

7- کیا یہ اپنے خرچ کرنے کو فخریہ بیان کرنے والا سمجھتا ہے کہ اللہ تعالیٰ اسے نہیں دیکھتا؟ اور وہ اس سے اس کے مال کا حساب نہیں لے گا کہ اس نے کہاں سے کمایا اور کن کاموں میں خرچ کیا؟

8- کیا ہم نے اس کی دو آنکھیں نہیں بنائیں جن کے ساتھ وہ دیکھتا ہے؟

9- اور ایک زبان اور دو ہونٹ نہیں بنائے جن کے ذریعے سے وہ بات کرتا ہے؟

10- اور ہم نے اسے خیر اور بھلائی كے راستے اور باطل کے راستے کی پہچان نہیں کرائی؟

11- اور اس سے مطالبہ ہے کہ وہ اس گھاٹی کو عبور کرے جو اسے جنت سے دُور رکھے ہوئے ہے، وہ اس سے گزر رہا ہے اور اسے عبور کر رہا ہے۔

12- اور اے رسول! آپ کو کیا معلوم کہ وہ گھاٹی کیا ہے جس کے عبور کرنے کا اس سے مطالبہ ہے تاکہ وہ جنت میں داخل ہو جائے؟

13- یہ گردن آزاد کرنا ہے، خواہ مرد کی ہو یا عورت کی۔

14- یا ایسے بھوک والے دن کھانا کھلانا ہے جس میں کھانے پینے کی چیزوں کی کمی ہو۔

15- ایسے بچے کو جس کا باپ دنیا میں نہ رہا ہو اور اس کی اس کے ساتھ رشتے داری ہو۔

16-یا ایسے فقیر کو جس کی ملکیت میں کچھ بھی نہ ہو۔

17- پھر وہ ان لوگوں میں سے ہو جو اللہ تعالیٰ پر ایمان لائے اور جو ایک دوسرے کو اطاعت کے کام کرنے، گناہوں سے باز رہنے اور آزمائشوں پر صبر کرنے کی تاکید کرتے رہے اور ایک دوسرے کو اللہ کے بندوں پر رحم کرنے کی وصیت کی۔

18- انھی مذکورہ صفات والے لوگ ہی دائیں جانب والے ہیں۔

19- اور جن لوگوں نے ہمارے رسول پر نازل ہونے والی آیتوں کا انکار کیا، وہی بائیں جانب والے ہیں۔

20- ان پر قیامت کے دن بند آگ ہوگی جس میں انھیں عذاب دیا جائے گا۔