1- اللہ سبحانہ نے فجر (پو پھٹنے) کی قسم کھائی۔

2- اور ذوالحجہ کی پہلی دس راتوں کی قسم کھائی۔

3- اور جفت اور طاق اشیاء کی قسم کھائی۔

4- اور رات کی قسم کھائی جب وہ آئے، جاری رہے اور چلی جائے۔ ان قسموں کا جواب یہ ہے کہ تمھارے اعمال کی جزا تمھیں ضرور ملے گی۔

5- کیا ان مذکورہ چیزوں کی قسم عقل مند کو مطمئن کرنے کے لیے کافی نہیں؟

6- اے رسول! کیا آپ نے نہیں دیکھا کہ جب ہود علیہ السلام کی قوم عاد نے اپنے رسول کو جھٹلایا تو آپ کے رب نے ان کے ساتھ کیا کیا؟

7- اپنے دادا اِرم کی طرف منسوب قبیلۂ عاد جو نہایت طاقتور اور لمبے قد کے لوگ تھے۔

8- جن کے مانند کوئی قوم اللہ تعالیٰ نے ملکوں میں پیدا نہیں کی۔

9- اور کیا آپ نے نہیں دیکھا کہ آپ کے رب نے صالح علیہ السلام کی قوم ثمود کے ساتھ کیا کیا جنھوں نے پہاڑوں کی چٹانوں کو تراشا اور حِجر کے مقام پر ان سے گھر بنائے۔

10- اور کیا آپ نے نہیں دیکھا کہ آپ کے رب نے فرعون کے ساتھ کیا کیا جس کے پاس میخیں تھیں جن سے وہ لوگوں کو عذاب دیتا تھا؟

11- یہ سب لوگ ظلم و جبر میں حد سے بڑھ گئے۔ ہر ایک نے اپنے اپنے ملک میں سرکشی کی۔

12- انھوں نے کفر اور گناہوں کو رواج دے کر ان شہروں اور علاقوں میں بہت زیادہ فساد برپا کیا۔

13- پھر اللہ تعالیٰ نے ان پر اپنے سخت عذاب کا کوڑا برسایا اور زمین سے ان کی جڑیں کاٹ دیں۔

14- اے رسول( صلى اللہ عليہ وسلم )! بلاشبہ آپ کا رب لوگوں کے اعمال کی گھات میں ہے اور ان کی نگرانی کر رہا ہے تاکہ جس نے اچھے عمل کیے، اسے جنت کی صورت میں جزا دے اور جس نے برے عمل کیے، اسے آگ کے ساتھ عذاب دے۔

اور جب پہلی امتیں جنھیں اللہ تعالیٰ نے ہلاک کیا، جن پر قوت و طاقت اور شان و شوکت کے ذریعے سے انعام کیا گیا تھا تو اللہ تعالیٰ نے واضح کر دیا کہ کسی قوم پر اللہ تعالیٰ کے انعامات کا یہ مطلب ہرگز نہیں کہ وہ ان سے راضی بھی ہے، چنانچہ فرمایا:

15- انسان کا یہ مزاج ہے کہ جب اس کا رب اسے آزمائے اور عزت دے اور اسے مال و اولاد اور مقام و مرتبہ جیسی نعمتیں عطا کرے تو وہ یہ خیال کرتا ہے کہ یہ سب کچھ اسے اللہ کے ہاں عزت کی وجہ سے ملا ہے اور وہ کہتا ہے: میرے رب نے مجھے جو عزت دی ہے، میں اس کے نزدیک اس عزت دیے جانے کا حق دار تھا۔

16-اور جب اس کا رب اس کا امتحان لے اور اس کے لیے اس کی روزی تنگ کر دے تو وہ خیال کرتا ہے کہ یہ اس وجہ سے ہے کہ وہ اپنے رب کے نزدیک بے قیمت اور ذلیل ہے تو وہ کہتا ہے: میرے رب نے مجھے ذلیل کر دیا۔

17- ہرگز نہیں، معاملہ ایسے نہیں جیسے یہ شخص خیال کرتا ہے کہ کسی بندے پر انعامات اللہ کی رضا کی دلیل ہیں اور پکڑ اس بات کی دلیل ہے کہ یہ بندہ اپنے رب کے ہاں بے قیمت ہے، بلکہ حقیقت یہ ہے کہ اللہ تعالیٰ نے تمھیں جو رزق دیا ہے، اس میں سے تم یتیم پر خرچ نہیں کرتے۔

18- اور نہ تم ایک دوسرے کو شوق دلاتے ہو کہ وہ اس فقیر کو کھلائے جسے خوراک میسر نہیں۔

19- اور تم کمزوروں، یعنی عورتوں اور یتیموں کا حق حلال و حرام کی تمیز كيے بغیر ہڑپ کر جاتے ہو۔

20- اور تم مال کو جی بھر کر عزیز رکھتے ہو اور اس کے لالچ کی وجہ سے اسے اللہ کی راہ میں خرچ کرنے سے باز رہتے ہو۔

21-تمھارا یہ عمل نہیں ہونا چاہیے۔ یاد کرو کہ جب زمین کو بڑے زور سے ہلایا جائے گا اور اس میں بھونچال آجائے گا۔

22- اے رسول( صلى اللہ عليہ وسلم )! آپ کا رب اپنے بندوں کے درمیان فیصلے کے لیے آئے گا اور فرشتے بھی صفیں بنائے آجائیں گے۔

23- اور اس دن جہنم لائی جائے گی جس کی ستر ہزار لگامیں ہوں گی۔ ہر لگام کو ستر ہزار فرشتے تھامے اسے کھینچ رہے ہوں گے۔ اس دن انسان یاد کرے گا کہ اس نے اللہ تعالیٰ کے بارے میں کیا کوتاہیاں کیں ليكن اس دن نصیحت پکڑنا بھلا اسے کیا فائدہ دے گا کیونکہ وہ جزا کا دن ہوگا، عمل کا نہیں؟

24- وہ شخص بہت پچھتاتے ہوئے کہے گا: کاش! میں نے اپنی آخرت کی زندگی کے لیے، جو کہ حقیقی زندگی ہے، نیک اعمال آگے بھیجے ہوتے۔

25- اس دن اللہ کے عذاب جیسا عذاب کسی کا نہ ہوگا کیونکہ اللہ کا عذاب بڑا سخت اور باقی رہنے والا ہے۔

26- اور جس طرح اس نے کافروں کو زنجیروں میں جکڑا ہوگا، اس طرح کبھی کسی نے نہ جکڑا ہوگا۔

جب اللہ تعالیٰ نے کافروں کی سزا کا ذکر کیا تو ساتھ ہی مومنوں کی جزا کا بھی ذکر فرما دیا، چنانچہ فرمایا:

27- رہی مومن کی بات تو اس سے موت کے وقت اور قیامت کے دن کہا جائے گا: اے ایمان اور نیک اعمال سے مطمئن ہونے والے انسان!

28- تم اپنے رب سے راضی خوشی اس کی طرف لوٹ جاؤ، اس لیے کہ تمھیں نہ ختم ہونے والا بدلہ ملنے والا ہے اور تم اپنے نیک اعمال کی بدولت اپنے رب کے ہاں پسندیدہ ہو۔

29-اور تم میرے باقی نیک بندوں میں شامل ہو جاؤ۔

30- اور ان کے ساتھ اس جنت میں داخل ہو جاؤ جو میں نے ان کے لیے تیار کر رکھی ہے۔