1- جب آپ مخلوق سے بلند و برتر اپنے رب کا ذکر کریں اور اس کی تعظیم بجا لائیں تو اس کے نام کے ساتھ اس کی پاکیزگی بیان کریں۔

2- جس نے انسان کو صحیح سالم پیدا کیا اور اس کا قد کاٹھ برابر کیا۔

3- جس نے تمام مخلوقات کی جنسوں، قسموں اور صفات کا اندازہ مقرر کیا اور ہر مخلوق کی اس چیز کی طرف راہنمائی فرمائی جو اس کے مناسب اور موافق ہے۔

4- جس نے تمھارے جانوروں کے چرنے کے لیے زمین سے چارا نکالا۔

5- پھر اس کو سیاہی مائل خشک کوڑا بنا دیا جبکہ وہ سرسبز و شاداب اور تازہ تھا۔

6- اے رسول! ہم ضرور آپ کو قرآن پڑھائیں گے اور اسے آپ کے سینے میں اس طرح جمع کریں گے کہ آپ کبھی نہیں بھولیں گے، لہٰذا آپ اسے بھولنے کے خیال سے جبریل علیہ السلام کے ساتھ جلدی جلدی نہ پڑھیں جیسا کہ آپ پہلے کیا کرتے تھے۔

7- ہاں اللہ تعالیٰ جو کچھ اپنی کسی حکمت کے تحت آپ کو بھلانا چاہے، وہ آپ بھول جائیں گے، بلاشبہ وہ پاک رب جانتا ہے جو ظاہر کیا جائے اور جو چھپایا جائے۔ اس میں سے کوئی چیز اس سے چھپی ہوئی نہیں۔

8- اور ہم آپ کے لیے جنت میں داخل کرنے والے ان اعمال کی ادائیگی آسان کر دیں گے جو اللہ تعالیٰ کو راضی کرنے والے ہیں۔

9- لہٰذا جو قرآن ہم آپ کی طرف وحی کرتے ہیں، اس کے ساتھ لوگوں کو وعظ کریں اور انھیں نصیحت کریں جب تک نصیحت سنی جائے۔

10- یقیناً اللہ سے ڈرنے والا آپ کی نصیحتوں سے سبق حاصل کرے گا کیونکہ وہی وعظ و نصیحت سے فائدہ اٹھاتا ہے۔

11- اور کافر اس نصیحت سے دور بھاگتا اور نفرت کرتا ہے کیونکہ آخرت میں آگ میں داخل ہونے کی وجہ سے وہ سب لوگوں سے بڑھ کر بدبخت ہوگا۔

12-جو آخرت کی بڑی آگ (دوزخ) میں جائے گا جس کی وہ گرمی برداشت کرے گا اور اسے ہمیشہ جھیلے گا۔

13-پھر وہ ہمیشہ آگ میں رہے گا۔ نہ مرے گا کہ جو عذاب جھیل رہا ہے، اس سے راحت پا جائے اور نہ عزت و سکون کی زندگی جیے گا۔

14-یقیناً اپنا مطلوب حاصل کرنے میں وہ شخص کامیاب ہوا جو شرک اور گناہ سے پاک رہا۔

15-اور اس نے ذکر کے شرعی طریقوں کے ساتھ اپنے رب کو یاد کیا اور نماز اس کے مطلوبہ طریقے سے ادا کی۔

16-بلکہ تم دنیا کی زندگی کو مقدم رکھتے ہو اور اسے آخرت سے بہتر جانتے ہو، حالانکہ ان دونوں کے درمیان بہت بڑا فرق ہے۔

17- یقیناً آخرت دنیا اور اس کے ساز و سامان اور لذتوں سے بہت بہتر، افضل اور ہمیشہ رہنے والی ہے کیونکہ اس میں جو نعمتیں ہیں، وہ کبھی ختم نہیں ہوں گی۔

18- بلاشبہ یہ احکام اور خبریں جو ہم نے تمھیں بتائی ہیں، یقیناً قرآن سے پہلے نازل ہونے والے صحیفوں میں بھی تھیں۔

19- یہ وہ صحیفے ہیں جو ابراہیم اور موسیٰ علیہما السلام پر نازل کیے گئے۔