1- آسمانوں کی ہر چیز اور زمین کی تمام مخلوقات اللہ تعالیٰ کو نقص والی ہر بات سے پاک اور صاف قرار دیتی ہیں جو اس کی شان کے لائق نہیں۔ صرف اسی کی بادشاہی ہے۔ اس کے سوا کوئی بادشاہ نہیں۔ اچھی تعریف کا حقدار بھی وہی ہے اور وہ ہر چیز پر پوری طرح قادر ہے، اسے کوئی چیز بے بس نہیں کر سکتی۔

2- اے لوگو! وہی ہے جس نے تمھیں پیدا کیا، پھر تم میں سے کچھ اس کے منکر ہوگئے اور ان کا ٹھکانا آگ ہے۔ تم میں سے کچھ اس پر ایمان لائے اور ان کا ٹھکانا جنت ہے۔ اللہ تعالیٰ خوب دیکھتا ہے جو عمل تم کرتے ہو، اس سے تمھارے اعمال میں سے کچھ بھی چھپا ہوا نہیں اور وہ ضرور تمھیں ان اعمال کی جزا و سزا دے گا۔

3- اس نے آسمانوں اور زمین کو بامقصد پیدا کیا اور انھیں بے مقصد تخلیق نہیں کیا۔ اے لوگو! اس نے تمھاری صورتیں بنائیں تو اپنے فضل و احسان سے تمھیں نہایت خوبصورت بنایا اور اگر اللہ چاہتا تو تمھیں بدصورت بنا دیتا۔ قیامت کے دن تمھیں صرف اسی کی طرف لوٹنا ہے، پھر وہ تمھیں تمھارے اعمال کی جزا دے گا۔ اگر عمل اچھے ہوئے تو جزا بھی اچھی اور اگر عمل برے ہوئے تو جزا بھی بری۔

4- وہ جانتا ہے جو کچھ آسمانوں میں ہے اور اسے بھی جانتا ہے جو کچھ زمین میں ہے۔ جو اعمال تم چھپاتے ہو، وہ بھی اس کے علم میں ہیں اور جو ظاہر کرتے ہو، انھیں بھی جانتا ہے اور اللہ تعالیٰ سینوں میں چھپے ہر خیر یا شر کو بھی جانتا ہے۔ اس میں سے کوئی چیز اس سے چھپی ہوئی نہیں۔

5- اے مشرکو! کیا تمھارے پاس ان جھٹلانے والی امتوں کی خبریں نہیں آئیں جو تم سے پہلے تھیں، جیسے قومِ نوح، قومِ عاد اور ثمود وغیرہ، ان سب نے اپنے کفر کی سزا دنیا ہی میں پا لی اور ان کے لیے آخرت میں بھی دردناک عذاب ہے؟! کیوں نہیں، یقیناً تمھارے پاس ان کی خبریں آچکی ہیں، لہٰذا ان کے انجام سے عبرت پکڑو اور اللہ کے حضور توبہ کرو اس سے پہلے کہ تم پر بھی ویسا عذاب آجائے جیسا ان پر آیا تھا۔

6- یہ عذاب جو ان پر آیا، صرف اس وجہ سے آیا کہ ان کے پاس اللہ کی طرف سے ان کے رسول روشن دلائل اور واضح معجزات لے کر آئے تو انھوں نے کسی بشر کے رسول ہونے کا انکار کرتے ہوئے کہا: کیا بشر حق کی طرف ہماری راہنمائی کریں گے؟! چنانچہ انھوں نے کفر کیا اور ان پر ایمان لانے سے منہ موڑ لیا تو انھوں نے اللہ تعالیٰ کا کچھ نہ بگاڑا۔ اللہ تعالیٰ تو ان کے ایمان اور اطاعت سے بے نیاز ہے کیونکہ ان کی اطاعت اس کی کسی چیز میں اضافہ نہیں کر سکتی ۔ اللہ تعالیٰ بے نیاز ہے، اسے اپنے بندوں کی محتاجی نہیں۔ وہ اپنے اقوال و افعال میں تعریف کیا گیا ہے۔

7- اللہ تعالیٰ کے ساتھ کفر کرنے والوں نے گمان کر لیا کہ اللہ تعالیٰ ان کی موت کے بعد انھیں زندہ کر کے نہیں اٹھائے گا۔ اے رسول( صلى اللہ عليہ وسلم )! قبروں سے دوبارہ اٹھائے جانے کے ان منکروں سے کہہ دیں: کیوں نہیں، میرے رب کی قسم! تمھیں قیامت کے دن ضرور اٹھایا جائے گا، پھر تمھیں ان اعمال کی ضرور خبر دی جائے گی جو تم دنیا میں کرتے رہے۔ یہ دوبارہ اٹھانا اللہ تعالیٰ کے لیے نہایت آسان ہے۔ یقیناً اس نے تمھیں پہلی بار پیدا کیا اور وہ اس بات پر بھی قادر ہے کہ تمھیں تمھارے مرنے کے بعد حساب کتاب اور جزا و سزا کے لیے قبروں سے زندہ کر کے اٹھائے۔

8- لہٰذا اے لوگو! اللہ تعالیٰ پر ایمان لاؤ، اس کے رسول پر ایمان لاؤ اور اس قرآن پر ایمان لاؤ جو ہم نے اپنے رسول پر نازل کیا۔ اللہ تعالیٰ ان اعمال سے پوری طرح باخبر ہے جو تم کرتے ہو۔ تمھارے اعمال میں سے کوئی چیز اس سے چھپی نہیں اور وہ ضرور تمھیں ان کی جزا و سزا دے گا۔

9- اے رسول( صلى اللہ عليہ وسلم )! اس دن کو یاد کریں جس روز اللہ تعالیٰ قیامت کے دن تمھیں جمع کرے گا تاکہ تمھیں تمھارے اعمال کی جزا دے۔ وہ دن ہے جس میں کافروں کا خسارہ اور نقصان ظاہر ہو جائے گا، اس طرح کہ ایمان والے جنت میں ان جگہوں کے وارث بن جائیں گے جو دوزخیوں کے لیے بنائی گئی تھیں (اگر وہ نیک اعمال کرتے) اور دوزخ والے آگ میں ان جگہوں کو سنبھال لیں گے جو جنتیوں کے لیے تیار کی گئی تھیں (اگر وہ دوزخیوں والے اعمال کرتے۔) جو شخص اللہ تعالیٰ پر ایمان لائے اور نیک عمل کرے تو اللہ تعالیٰ اس سے اس کی برائیاں ختم کر دے گا اور اسے ایسی جنتوں میں داخل کرے گا جن کے محلات اور درختوں کے نیچے نہریں بہ رہی ہیں، جن میں وہ ہمیشہ رہیں گے۔ انھیں وہاں سے نکالا جائے گا نہ ان کی نعمتوں کا سلسلہ ٹوٹے گا۔ یہ جو کچھ وہ پائیں گے، یہی عظیم کامیابی ہے جس کا مقابلہ دوسری کوئی کامیابی نہیں کر سکتی۔

10- جن لوگوں نے اللہ کے ساتھ کفر کیا اور ہماری ان آیتوں کو جھٹلایا جو ہم نے اپنے رسول صلى اللہ عليہ وسلم پر نازل کیں، وہی لوگ دوزخی ہیں جو ہمیشہ اس میں رہیں گے اور ان کا ٹھکانا نہایت برا ہے۔

11- اللہ تعالیٰ کی قضا و قدر کے بغیر کسی انسان کو اس کی جان، مال اور اولاد کے حوالے سے کوئی مصیبت نہیں آسکتی۔ جو شخص اللہ تعالیٰ اور اس کی قضا و قدر پر ایمان رکھے تو اللہ تعالیٰ اس کے دل کو اپنے احکام تسلیم کرنے اور اپنے فیصلوں پر راضی رہنے کی توفیق دیتا ہے اور اللہ تعالیٰ ہر چیز کو خوب جاننے والا ہے، اس سے کوئی چیز چھپی نہیں۔

12- اللہ تعالیٰ کی اطاعت کرو اور اس کے رسول صلى اللہ عليہ وسلم کی بات مانو۔ اگر تم نے اس سے منہ پھیرا جو اس کا رسول تمھارے پاس لایا ہے تو اس منہ پھیرنے کا گناہ بھی تمھیں ہی ہوگا۔ ہمارے رسول صلى اللہ عليہ وسلم کے ذمے تو صرف وہ حکم پہنچانا ہے جس کے پہنچانے کا ہم نے اسے حکم دیا ہے اور وہ اس نے تمھیں پہنچا دیا ہے۔

13- اللہ تعالیٰ ہی معبود برحق ہے۔ اس کے سوا کوئی سچا معبود نہیں۔ اہلِ ایمان کو اپنے تمام معاملات میں صرف اللہ تعالیٰ پر بھروسا اور اعتماد کرنا چاہیے۔

14- اے اللہ تعالیٰ پر ایمان لانے اور اس کی شریعت پر عمل کرنے والو! بلاشبہ تمھاری بیویوں اور اولاد میں سے بعض تمھارے دشمن ہیں کیونکہ وہ تمھیں اللہ کے ذکر اور اس کی راہ میں جہاد کرنے سے غافل اورسست کر دیتے ہیں، لہٰذا ان سے ہوشیار رہنا، کہیں وہ تم پر اثر انداز نہ ہوں۔اگر تم ان کی کوتاہیوں سے درگزر کرو اور ان پر زیادہ توجہ نہ دو اور ان سے چشم پوشی کرو تو بلاشبہ اللہ تعالیٰ تمھارے لیے تمھارے گناہ معاف کردے گا اور تم پر رحم کرے گا۔ جس طرح کا عمل ہو، اس کی جزا بھی ویسی ہی ہوتی ہے۔

15- تمھارے مال اور تمھاری اولاد تو سراسر تمھاری آزمائش اور امتحان کے لیے ہیں، اس لیے کبھی وہ تمھیں حرام کمانے پر اکساتے ہیں اور اللہ تعالیٰ کی اطاعت چھوڑنے پر مجبور کرتے ہیں۔ اللہ تعالیٰ کے پاس اس شخص کے لیے عظیم ثواب ہے جس نے اس کی اطاعت کو اولاد کی اطاعت اور مال میں مشغول رہنے پر ترجیح دی اور یہ عظیم جزا اور ثواب اسے جنت کی صورت میں ملے گا۔

16-لہٰذا جس حد تک اللہ کی اطاعت ممکن اور تمھارے بس میں ہو، اس کے حکم مان کر اور اس کے منع کیے ہوئے کاموں سے بچ کر اس سے ڈرو اور بات سنو، نیز اللہ تعالیٰ اور اس کے رسول صلى اللہ عليہ وسلم کی اطاعت کرو اور جو مال اللہ تعالیٰ نے تمھیں عطا کیے ہیں، انھیں خیر کے کاموں میں خرچ کرو۔ جنھیں اللہ تعالیٰ اپنے نفس کے لالچ سے محفوظ رکھے، وہی لوگ اپنا مطلوب پانے میں کامیاب ہونے والے ہیں اور جس چیز سے وہ ڈرتے ہیں، اس سے نجات پانے والے ہیں۔

17- اگر تم اللہ تعالیٰ کو قرضِ حسنہ دو، اس طرح کہ اپنے کچھ مال اس کی راہ میں خرچ کرو تو وہ تمھارے لیے اجر بڑھاتا جائے گا، کہ ایک نیکی کا اجر دس گنا سے سات سو گنا تک بلکہ اس سے بھی کئی گنا بڑھا دے گا اور تمھارے لیے تمھارے گناہوں سے درگزر فرمائے گا۔ اللہ تعالیٰ بہت قدر دان ہے جو تھوڑے عمل پر بہت زیادہ اجر دیتا ہے۔ ایسا نرم دل اور حوصلے والا ہے جو جلد سزا نہیں دیتا۔

18- اللہ پاک ہر چھپی چیز کو جانتا ہے اور ہر ظاہر کا جاننے والا ہے۔ ان میں سے کوئی چیز اس سے چھپی ہوئی نہیں۔ وہ سب پر ایسا غالب ہے کہ اس پر کوئی غالب نہیں آسکتا، اپنی تخلیق، شریعت سازی اور تقدیر میں کمال حکمت والا ہے۔