1- آسمانوں اور زمین کی تمام مخلوقات اللہ تعالیٰ کو ہر نقص و عیب والی ان صفات سے پاک قرار دیتی ہیں جو اس کی شان کے لائق نہیں۔ ساری سلطنت کا وہی یکتا اور اکیلا بادشاہ ہے جو ہر عیب سے پاک ہے۔ سب پر ایسا غالب ہے کہ کوئی اس پر غالب نہیں آسکتا۔ اپنی تخلیق، شریعت سازی اور تقدیر میں کمال حکمت والا ہے۔

2- وہی ہے جس نے ان عربوں میں جو پڑھ سکتے تھے نہ لکھ سکتے تھے، انھی کی جنس سے ایک عظیم رسول صلى اللہ عليہ وسلم بھیجے جو ان کے سامنے ان آیتوں کی تلاوت کرتے ہیں جو اللہ تعالیٰ نے ان پر نازل کیں اور وہ انھیں کفر اور برے اخلاق سے پاک صاف کرتے ہیں۔ انھیں قرآن کی تعلیم دیتے اور سنت سکھاتے ہیں اور بلاشبہ آپ صلى اللہ عليہ وسلم کے ان کی طرف بھیجے جانے سے پہلے وہ لوگ حق سے صاف بھٹکے ہوئے تھے، اس طرح کہ وہ بتوں کی عبادت کرتے، خون بہاتے اور رشتہ داریاں توڑتے تھے۔

3- اللہ تعالیٰ نے یہ رسول صلى اللہ عليہ وسلم عرب قوم اور ان کے علاوہ دیگر لوگوں کی طرف بھی بھیجے ہیں جو ابھی تک نہیں آئے اور عنقریب آئیں گے اور وہ سب پر ایسا غالب ہے کہ اس پر کوئی غالب نہیں آسکتا جو اپنی تخلیق و شریعت سازی اور تقدیر میں کمال حکمت والا ہے۔

4- یہ مذکورہ امر، یعنی رسول صلى اللہ عليہ وسلم کا عرب اور دیگر لوگوں کی طرف بھیجا جانا، اللہ تعالیٰ کا فضل ہے، وہ جسے چاہے دیتا ہے اور اللہ تعالیٰ عظیم احسان کرنے والا ہے۔ اس کے احسان عظیم میں سے اس امت کے رسول صلى اللہ عليہ وسلم کو پوری انسانیت کی طرف بھیجنا بھی ہے۔

جب اللہ تعالیٰ نے رسول اکرم صلى اللہ عليہ وسلم کی بعثت اور نزولِ قرآن کی صورت میں اپنے احسان کا ذکر کیا تو ساتھ ہی موسیٰ علیہ السلام کے بعض ایسے پیروکاروں کا ذکر کر دیا جنھوں نے تورات میں موجود احکام پر عمل کرنے سے منہ پھیرا اور اس کا مقصد اس امت کو ان کے نقش قدم پر چلنے سے روکنا تھا، چنانچہ فرمایا:

5- جن یہودیوں کو تورات کے احکام کا پابند کیا گیا تھا، پھر انھوں نے ان حکموں کو نظرانداز کر دیا جن کو بجا لانے کے وہ پابند تھے، ان کی مثال اس گدھے کی طرح ہے جو بہت زیادہ کتابیں اٹھائے ہوئے ہو۔ وہ نہیں جانتا کہ اس پر کیا لدا ہے، کتابیں ہیں یا کوئی اور چیز؟ نہایت بری مثال ہے ان لوگوں کی جنھوں نے اللہ کی آیتوں کو جھٹلایا۔ اور اللہ تعالیٰ ظالم قوم کو حق تک رسائی کی توفیق نہیں دیتا۔

6- اے رسول( صلى اللہ عليہ وسلم )! آپ کہہ دیں: تورات میں تحریف اور رد و بدل کے بعد بھی یہودیت پر قائم رہنے والو! اگر تم یہ سمجھتے ہو کہ تم اللہ کے پیارے ہو اور باقی لوگوں کو چھوڑ کر اس نے تمھیں دوستی کا شرف بخشا ہے تو پھر تم موت کی تمنا کرو تاکہ جو عزت اللہ تعالیٰ نے تمھارے خیال کے مطابق تمھارے لیے خاص کی ہے، وہ تمھیں دے۔ اگر تم اپنے دعوے میں سچے ہو کہ باقی لوگوں کو چھوڑ کر صرف تم اللہ کے دوست ہو تو ایسا کرو۔

7- وہ کبھی موت کی خواہش نہیں کریں گے بلکہ اپنے کفر، گناہوں، ظلم اور تورات میں تحریف و تبدیلی کی وجہ سے ہمیشہ اس دنیا میں رہنے کی تمنا کریں گے اور اللہ تعالیٰ ظالموں کو خوب جاننے والا ہے، اس سے ان کا کوئی عمل چھپا ہوا نہیں اور وہ ضرور انھیں ان کی جزا و سزا دے گا۔

8- اے رسول( صلى اللہ عليہ وسلم )! ان یہودیوں سے کہہ دیں: بلاشبہ وہ موت جس سے تم دور بھاگتے ہو، جلد یا بدیر ہر صورت میں تم اس سے دوچار ہونے والے ہو، پھر قیامت کے دن تم اللہ کی طرف لوٹائے جاؤ گے جو چھپے اور ظاہر کو جاننے والا ہے۔ ان دونوں میں سے کوئی چیز اس سے چھپی ہوئی نہیں اور وہ تمھیں ہر اس عمل کی خبر دے گا جو تم دنیا میں کرتے تھے اور اس کی جزا بھی دے گا۔

9- اے اللہ پر ایمان لانے اور اس کی شریعت پر عمل کرنے والو! جب مؤذن جمعہ کے دن خطیب کے منبر پر بیٹھنے کے بعد نماز کے لیے اذان دے تو خطبے اور نماز میں حاضر ہونے کے لیے مسجدوں کی طرف دوڑو اور خرید و فروخت چھوڑ دو تاکہ تم اس میں مشغول رہ کر اللہ تعالیٰ کی اطاعت سے محروم نہ رہو۔ اے ایمان والو! یہ جلد از جلد نماز کی طرف آنے اور جمعے کی نماز کے لیے اذان کے بعد خرید و فروخت چھوڑ دینے کا جو حکم دیا جا رہا ہے، یہ تمھارے لیے بہت بہتر ہے اگر تمھیں اس کا علم ہو، لہٰذا اللہ تعالیٰ نے تمھیں جو حکم دیا ہے، اس پر عمل کرو۔

10- پھر جب تم جمعے کی نماز سے فارغ ہو جاؤ تو رزقِ حلال کی تلاش اور اپنے کام کاج کے سلسلے میں زمین میں پھیل جاؤ اور حلال کمائی اور جائز منافع کے ذریعے اللہ تعالیٰ سے اس کا فضل مانگو اور رزق کی تلاش کے دوران میں کثرت سے اللہ تعالیٰ کا ذکر کرو۔ تمھاری تلاشِ رزق تمھیں اللہ کا ذکر بُھلا نہ دے تاکہ اس کامیابی کو پا سکو جو تمھیں پسند ہے اور جس آخرت کی پکڑ کا تمھیں ڈر رہتا ہے، اس سے نجات پاؤ۔

11- اے رسول( صلى اللہ عليہ وسلم )! بعض مسلمان جب کوئی سودا یا کھیل تماشا دیکھتے ہیں تو منتشر ہو کر اس کی طرف دوڑ جاتے ہیں اور آپ کو منبر پر کھڑا چھوڑ جاتے ہیں۔ اے رسول( صلى اللہ عليہ وسلم )! ان سے کہہ دیں کہ اللہ تعالیٰ کے ہاں جو نیک اعمال کی جزا ہے، وہ اس تجارت اور کھیل کود سے بہت بہتر ہے جس کی طرف تم نکلے تھے اور اللہ تعالیٰ بہترین رزق دینے والا ہے۔