1- آسمانوں اور زمین کی تمام مخلوقات اللہ تعالیٰ کی تعظیم کرتی ہیں اور ہر ایسے نقص سے اسے پاک قرار دیتی ہیں جو اس کی شان کے لائق نہیں۔ وہ سب پر ایسا غالب ہے کہ کوئی اس پر غالب نہیں آسکتا۔ وہ اپنی تخلیق، شریعت سازی اور تقدیر میں کمال حکمت والا ہے۔

2- وہی ہے جس نے بنو نضیر کے لوگوں کو ان کے مدینے والے گھروں سے نکالا جنھوں نے اللہ کے ساتھ کفر کیا اور اس کے رسول محمد صلى اللہ عليہ وسلم کو جھٹلایا۔ یہ ان کی پہلی جلاوطنی کے وقت ہوا جو مدینہ طیبہ سے شام کی طرف تھی۔ بنو نضیر تورات کے پیروکار یہودیوں میں سے تھے۔ ان کی یہ جلاوطنی ان کی عہد شکنی اور معاہدے کے خلاف مشرکوں کی مدد کرنے اور ان کے ساتھ مل جانے کی وجہ سے ہوئی۔ اللہ تعالیٰ نے انھیں شام کی طرف نکال دیا۔ اے مومنو! جس عزت اور وقار کے ساتھ وہ رہتے تھے، اس کی وجہ سے تمھارے گمان میں بھی نہیں تھا کہ وہ اپنے گھروں سے نکلیں گے۔ وہ خود بھی یہ سمجھتے تھے کہ ان کے مضبوط اور پختہ قلعے انھیں اللہ کی سزا اور پکڑ سے بچا لیں گے، پھر جب رسول اللہ صلى اللہ عليہ وسلم نے ان سے لڑنے اور انھیں ان کے گھروں سے بے دخل اور جلاوطن کرنے کا حکم دیا تو ان پر اللہ کی پکڑ اور سزا اس انداز سے آئی جس کا وہ تصور بھی نہیں کر سکتے تھے۔ اللہ تعالیٰ نے ان کے دلوں میں شدید ڈر اور خوف ڈال دیا۔ وہ اندر سے خود اپنے ہاتھوں سے اپنے گھر توڑ پھوڑ رہے تھے تاکہ مسلمان ان سے فائدہ نہ اٹھا سکیں اور بیرونی جانب سے مسلمان انھیں تباہ کر رہے تھے، لہٰذا اے بصیرت رکھنے والو! نصیحت پکڑو کہ ان کے کفر کی وجہ سے ان پر کیا بیتی اور ان کی طرح نہ بنو ورنہ وہی بدلہ اور سزا تمھیں بھی ملے گی جو انھیں دی گئی۔

3-اگر اللہ تعالیٰ نے ان کے گھروں سے ان کی جلاوطنی نہ لکھی ہوتی تو یقیناً انھیں دنیا میں قتل اور قید کی سزا ضرور دیتا اور ان کے لیے آخرت میں آگ کا عذاب ان کا منتظر ہے جس میں وہ ہمیشہ رہیں گے۔

4- یہ سزا جو انھیں ملی اس وجہ سے ملی کہ انھوں نے اللہ تعالیٰ اور اس کے رسول صلى اللہ عليہ وسلم سے دشمنی کی، اس طرح کہ انھوں نے ان کے ساتھ کفر کیا اور ان سے کیے ہوئے وعدوں کو توڑا اور جو اللہ تعالیٰ سے دشمنی رکھے تو بلاشبہ اللہ تعالیٰ سخت سزا دینے والا ہے اور اسے اس کی سخت سزا ضرور ملے گی۔

5- اے مومنوں کی جماعت! غزوۂ بنو نضیر میں تم نے کھجوروں کے جو درخت کاٹ ڈالے تاکہ تم اللہ کے دشمنوں کو غصہ دلاؤ یا جو درخت تم نے تنوں پر کھڑے رہنے دیے تاکہ تم ان سے فائدہ اٹھاؤ تو وہ اللہ کے حکم سے تھا اور یہ زمین میں فساد اور بگاڑ نہیں تھا جیسا کہ ان کا خیال ہے اور تاکہ اللہ تعالیٰ اس کے ذریعے سے ان یہودیوں کو ذلیل کرے جو اس کی اطاعت سے نکلنے والے ہیں جنھوں نے عہد توڑا اور وفا کی بجائے غداری کا راستہ اختیار کیا۔

6- بنونضیر کے جو اموال اللہ تعالیٰ نے اپنے رسول صلى اللہ عليہ وسلم کی طرف لوٹائے ، تم نے انھیں حاصل کرنے کے لیے گھوڑے اور اونٹ دوڑائے نہ اس کے لیے تمھیں کوئی مشقت اٹھانی پڑی لیکن اللہ تعالیٰ اپنے رسولوں کو جس پر چاہتا ہے غالب کرتا ہے۔ یقیناً اس نے اپنے رسول صلى اللہ عليہ وسلم کو بنو نضیر پر غلبہ عطا کیا تو آپ نے بغیر جنگ کے ان کے علاقے فتح کر لیے اور اللہ تعالیٰ ہر چیز پر پوری طرح قادر ہے، اسے کوئی چیز عاجز نہیں کر سکتی۔

7- بستیوں والوں کا جو مال اللہ تعالیٰ نے اپنے رسول صلى اللہ عليہ وسلم کو بغیر جنگ لڑے عطا کیا تو وہ اللہ کا ہے، وہ جسے چاہے دے، اور اس کے رسول کی ملکیت ہے اور آپ کے رشتے داروں، یعنی بنوہاشم اور بنومطلب کے لیے ہے ان زکاۃ و صدقات کے عوض جو ان کے لیے حرام کیے گئے ہیں اور یتیموں، فقیروں اور اس اجنبی مسافر کے لیے ہے جس کا سفر خرچ ختم ہو جائے۔ ایسا اس لیے ہے کہ فقیروں کو چھوڑ کر مال صرف امیروں کے درمیان ہی گردش نہ کرتا رہے۔ اے ایمان والو! مالِ فَے میں سے رسول صلى اللہ عليہ وسلم تمھیں جو دے دیں، وہ لے لو اور جس سے روک دیں، اس سے رک جاؤ۔ اللہ سے ڈرو اس طرح کہ اس کے حکم مانو اور اس کے منع کیے ہوئے کاموں سے بچو۔ بلاشبہ اللہ تعالیٰ سخت سزا دینے والا ہے، لہٰذا اس کی سزا سے ڈر جاؤ۔

8- اس مال کا کچھ حصہ ان فقیروں پر خرچ کیا جائے گا جنھوں نے اللہ کی راہ میں ہجرت کی، جو اپنے مال اور اولادیں چھوڑنے پر مجبور کیے گئے۔ وہ یہ طلب رکھتے ہیں کہ اللہ تعالیٰ ان پر دنیا میں رزق کے ذریعے سے فضل کرے اور آخرت میں اپنی رضا اور خوشنودی کے ذریعے سے فضل فرمائے اور وہ اللہ کی راہ میں جہاد کر کے اللہ تعالیٰ اور اس کے رسول صلى اللہ عليہ وسلم کی مدد کرتے ہیں۔ مذکورہ صفات والے یہ لوگ ہی صحیح طور پر راسخ اور پختہ ایمان والے ہیں۔

جب اللہ تعالیٰ نے مہاجرین کا ذکر کیا اور ان کی تعریف و توصیف فرمائی تو ساتھ ہی انصار کا ذکر کر کے ان کی بھی تعریف فرمائی، چنانچہ فرمایا:

9- انصار جو مہاجرین سے پہلے مدینہ طیبہ میں مقیم تھے اور انھوں نے اللہ تعالیٰ اور اس کے رسول صلى اللہ عليہ وسلم پر ایمان لانا پسند کیا، وہ مکہ سے اپنی طرف ہجرت کرنے والوں سے محبت کرتے ہیں اور جب اللہ کی راہ میں ہجرت کرنے والوں کو مالِ فے میں سے دیا جائے اور انھیں نہ ملے تو انھیں دلی طور پر ذرہ بھر رنج نہیں ہوتا اور نہ وہ ان سے حسد کرتے ہیں۔ وہ دنیاوی ساز و سامان میں مہاجرین کو اپنے آپ پر ترجیح دیتے ہیں، خواہ وہ خود ضرورت مند اور محتاج ہی ہوں۔ جنھیں اللہ تعالیٰ اپنے مال کی حرص سے بچا لے اور وہ مال كو اس کی راہ میں خرچ کریں تو وہی لوگ اپنا مطلوب پا کر اور جس سے وہ ڈرتے ہیں، اس سے نجات حاصل کر کے کامیاب ہونے والے ہیں۔

10- جو لوگ ان کے بعد آنے والے ہیں اور قیامت تک احسان کے ساتھ ان کی پیروی کرنے والے ہیں، وہ کہتے ہیں: اے ہمارے رب! ہمیں اور ہمارے ان دینی بھائیوں کو بخش دے جو اللہ تعالیٰ اور اس کے رسول صلى اللہ عليہ وسلم پر ایمان لانے میں ہم سے آگے بڑھ گئے اور ہمارے دل میں کسی مومن کے بارے میں بغض اور دشمنی نہ رکھ۔ اے ہمارے رب! بلاشبہ تو اپنے بندوں پر بڑی شفقت کرنے والا اور ان پر نہایت رحم کرنے والا ہے۔

11- اے رسول( صلى اللہ عليہ وسلم )! کیا آپ نے ان لوگوں کو نہیں دیکھا جنھوں نے دل میں کفر چھپایا اور زبان سے ایمان کا اظہار کیا۔ وہ اپنے ان کافر یہودی بھائیوں سے کہتے ہیں جو تحریف شدہ تورات کے پیروکار ہیں: تم اپنے گھروں میں ڈٹے رہو، ہم تمھیں بے یار و مددگار چھوڑیں گے نہ تمھیں مسلمانوں کے سپرد کریں گے۔ اگر مسلمانوں نے تمھیں تمھارے گھروں سے نکالا تو ہم بھی تمھارے ساتھ یکجہتی کا اظہار کرتے ہوئے نکلیں گے اور ہم کسی ایسے شخص کی بات نہیں مانیں گے جس نے ہمیں تمھارے ساتھ نکلنے سے منع کرنا چاہا۔ اگر انھوں نے تمھارے ساتھ جنگ کی تو ہم ان کے خلاف ضرور تمھارا ساتھ دیں گے۔ اللہ گواہی دیتا ہے کہ منافق یہودیوں کی جلاوطنی کی صورت میں ان کے ساتھ نکلنے کا جو دعویٰ کر رہے ہیں اور ان سے جنگ ہونے کی صورت میں ان کے ساتھ مل کر مسلمانوں سے جنگ کرنے کی جو بات کر رہے ہیں، اس میں وہ سراسر جھوٹ بول رہے ہیں۔

12- اگر مسلمانوں نے یہودیوں کو نکالا تو وہ ان کے ساتھ نہیں نکلیں گے اور اگر انھوں نے یہودیوں سے جنگ کی تو بھی وہ ان کی مدد و نصرت نہیں کریں گے اور اگر انھوں نے مسلمانوں کے خلاف ان کی مدد و نصرت کرنے کی کوشش کی بھی تو وہ ضرور میدان سے بھاگ نکلیں گے، پھر اس کے بعد منافقوں کی مدد نہیں کی جائے گی بلکہ اللہ تعالیٰ انھیں ذلیل و رسوا کرے گا۔

13- اے مومنو! یقین مانو کہ منافقوں اور یہودیوں کے دلوں میں تمھارا خوف اللہ کی نسبت بہت زیادہ ہے۔ یہ مذکورہ بات کہ تم سے زیادہ ڈرنا اور اللہ سے اتنا خوف نہ کھانا، اس لیے ہے کہ وہ بے وقوف اور عقل سے عاری لوگ ہیں کیونکہ اگر وہ سوجھ بوجھ رکھتے تو ضرور جان لیتے کہ اللہ تعالیٰ زیادہ حق رکھتا ہے کہ اس سے ڈرا جائے اور اس کا خوف دل میں بٹھایا جائے، سو وہی ہے جس نے تمھیں ان پر غلبہ عطا کیا ہے۔

14-اے ایمان والو! یہ یہودی کبھی اکٹھے ہو کر تم سے نہیں لڑیں گے مگر قلعہ بند بستیوں میں یا پھر پسِ دیوار کیونکہ وہ اپنی بزدلی کی وجہ سے تمھارا سامنا کرنے کی ہمت نہیں رکھتے۔ ان کی آپس کی دشمنی کی وجہ سے ان کے درمیان لڑائی بہت سخت ہے۔ آپ انھیں متحد اور یکجا سمجھتے ہیں مگر حقیقت یہ ہے کہ ان کے دل الگ الگ اور اختلافات کا شکار ہیں۔ آپس میں یہ اختلاف اور دشمنی اس وجہ سے ہے کہ وہ عقل نہیں رکھتے۔ اگر وہ سوجھ بوجھ رکھتے تو یقیناً حق کو پہچان لیتے، اس کی پیروی کرتے اور اس میں اختلاف نہ کرتے۔

15- ان یہودیوں کے کفر اور انھیں ملنے والی سزا میں ان کی مثال ان سے پہلے زمانۂ قریب میں گزرنے والے مشرکینِ مکہ کی سی ہے جنھوں نے اپنے کفر کا برا انجام دیکھ لیا، چنانچہ بدر کے دن ان میں سے کچھ قتل کیے گئے اور کچھ قیدی بنائے گئے اور ان کے لیے آخرت میں دردناک عذاب ہے۔

16-منافقوں کی بات سن لینے اور اس پر اعتبار کر لینے میں ان کی مثال شیطان کی طرح ہے جب اس نے انسان کے لیے کفر کو خوشنما بنایا، پھر جب اس کے کفر کو خوشنما بنانے کے باعث اس نے کفر کر لیا تو اس نے کہا: تو نے جو کفر کیا ہے، میں اس سے بری ہوں۔ بلاشبہ میں مخلوقات کے رب اللہ سے ڈرتا ہوں۔

17- چنانچہ نتیجہ یہ نکلا کہ شیطان اور اس کا پیروکار، یعنی جس کی اطاعت کی گئی اور جس نے اطاعت کی، دونوں قیامت کے دن جہنم میں جائیں گے جہاں وہ ہمیشہ ہمیشہ رہیں گے۔ یہ بدلہ جو ان کے انتظار میں ہے، یہی جزا ہے ان لوگوں کی جو اللہ تعالیٰ کی حدیں پامال کر کے خود پر ظلم کرنے والے ہیں۔

18- اے اللہ پر ایمان لانے اور اس کی شریعت کے مطابق عمل کرنے والو! اللہ کے حکم مان کر اور اس کے منع کیے ہوئے کاموں سے بچ کر اس سے ڈرو۔ ہر انسان غور کرے کہ اس نے قیامت کے دن کے لیے کیا نیک عمل آگے بھیجا ہے اور اللہ سے ڈرو، بلاشبہ جو عمل تم کرتے ہو، اللہ تعالیٰ اس سے پوری طرح باخبر ہے۔ تمھارے اعمال میں سے کچھ بھی اس سے چھپا نہیں اور وہ ضرور تمھیں ان اعمال کی جزا دے گا۔

19- ان لوگوں کی طرح نہ ہو جاؤ جنھوں نے اللہ کے حکم نہ مان کر اور اس کے منع کیے ہوئے کاموں کی مخالفت کر کے اس کو بھلا دیا، تو اللہ تعالیٰ نے بھی انھیں ان کی جانوں سے غافل کر دیا اور انھوں نے ایسے عمل نہ کیے جو انھیں اللہ کے غضب اور اس کی سزا سے نجات دلاتے۔ یہی لوگ اللہ تعالیٰ کی اطاعت سے منہ پھیرنے والے ہیں جنھوں نے اللہ کے حکم نہ مان کر اور اس کے منع کیے ہوئے کاموں سے نہ رک کر اللہ تعالیٰ کو بھلا دیا۔

20- دوزخ والے اور جنت والے برابر نہیں ہو سکتے بلکہ جس طرح دنیا میں ان کے اعمال مختلف ہیں، اسی طرح ان کی جزا بھی مختلف ہوگی۔ جنت والے جس کی طلب رکھتے ہیں، اسے پا کر اور جس کا انھیں ڈر رہتا ہے، اس سے بچ کر کامیاب ہونے والے ہیں۔

21- اگر ہم یہ قرآن کسی پہاڑ پر نازل کرتے تو اے رسول ( صلى اللہ عليہ وسلم )! یقیناً آپ دیکھتے کہ پہاڑ اپنی مضبوطی اور سختی کے باوجود اللہ کے ڈر کی شدت سے عاجزی و انکساری کرتا اور پھٹ کر ریزہ ریزہ ہو جاتا۔ اس کی وجہ قرآن کے جھنجوڑ دینے والے وعظ، وارننگ اور سخت سزا کی وعیدیں ہیں۔ یہ مثالیں ہم لوگوں کے لیے بیان کرتے ہیں تاکہ وہ اپنی عقلوں کو کام میں لائیں اور ان نصیحتوں اور عبرتوں سے سبق سیکھیں جن پر اس کی آیات مشتمل ہیں۔

23-22- وہ اللہ ہی ہے جس کے سوا کوئی معبود برحق نہیں۔ وہ چھپے اور ظاہر کو جاننے والا ہے، اس سے کوئی چیز چھپی ہوئی نہیں۔ وہ دنیا و آخرت میں مہربانی کرنے والا، نہایت رحم کرنے والا ہے۔ اس کی رحمت تمام جہانوں پر وسیع ہے۔ وہ ایسا بادشاہ ہے جو ہر قسم کی کمزوری سے پاک اور بری ہے، ہر قسم کے عیب سے سالم و محفوظ، اپنے رسولوں کی کھلے معجزات دے کر تصدیق کرنے والا، اپنے بندوں کے اعمال پر نگران، سب پر ایسا غالب جس پر کوئی غالب نہیں آسکتا، ایسا زبردست جو اپنی طاقت سے ہر چیز پر حاوی ہے اور بڑائی والا ہے۔ اللہ تعالیٰ بری اور پاک ہے ان تمام بتوں اور دیگر چیزوں سے جنھیں مشرک اللہ کا شریک قرار دیتے ہیں۔

23-22- وہ اللہ ہی ہے جس کے سوا کوئی معبود برحق نہیں۔ وہ چھپے اور ظاہر کو جاننے والا ہے، اس سے کوئی چیز چھپی ہوئی نہیں۔ وہ دنیا و آخرت میں مہربانی کرنے والا، نہایت رحم کرنے والا ہے۔ اس کی رحمت تمام جہانوں پر وسیع ہے۔ وہ ایسا بادشاہ ہے جو ہر قسم کی کمزوری سے پاک اور بری ہے، ہر قسم کے عیب سے سالم و محفوظ، اپنے رسولوں کی کھلے معجزات دے کر تصدیق کرنے والا، اپنے بندوں کے اعمال پر نگران، سب پر ایسا غالب جس پر کوئی غالب نہیں آسکتا، ایسا زبردست جو اپنی طاقت سے ہر چیز پر حاوی ہے اور بڑائی والا ہے۔ اللہ تعالیٰ بری اور پاک ہے ان تمام بتوں اور دیگر چیزوں سے جنھیں مشرک اللہ کا شریک قرار دیتے ہیں۔

24- وہی اللہ ہے پیدا کرنے والا جس نے ہر چیز پیدا کی، چیزوں کو وجود بخشا، وہی اپنی مرضی سے مخلوقات کی تصویر بنانے والا ہے۔ اسی پاک رب کے لیے اچھے اچھے نام ہیں جو اس کی اعلیٰ صفات پر مشتمل ہیں۔ آسمانوں اور زمین کی ہر چیز اسے ہر قسم کے نقص سے پاک قرار دیتی ہے۔ وہ سب پر ایسا غالب ہے کہ اسے کوئی مغلوب نہیں کر سکتا جو اپنی تخلیق، شریعت سازی اور تقدیر میں کمال حکمت والا ہے۔