1- آسمانوں اور زمین کی تمام مخلوقات اللہ تعالیٰ کی پاکی اور تقدیس بیان کرتی ہیں اور وہ سب پر ایسا غالب ہے کہ کوئی اس پر غالب نہیں آسکتا۔ وہ اپنی تخلیق و تقدیر میں کمال حکمت والا ہے۔

2- اسی اکیلے کی آسمانوں اور زمین میں بادشاہی ہے۔ وہ جسے زندگی دینا چاہے، اسے زندہ کرتا ہے اور جسے مارنا چاہے، اسے موت دے دیتا ہے اور وہ ہرچیز پر پوری طرح قادر ہے، اسے کوئی چیز بے بس نہیں کر سکتی۔

3- وہی سب سے پہلے ہے جس سے پہلے کوئی چیز نہ تھی، وہی سب سے پیچھے ہے، اس کے بعد کچھ نہ ہوگا، وہی ظاہر ہے، اس سے اوپر کچھ نہیں اور وہی باطن ہے، اس سے بڑھ کر پوشیدہ کوئی چیز نہیں، اور وہ ہر چیز کو خوب جاننے والا ہے، اس سے کوئی چیز اوجھل نہیں۔

4- اور وہی ہے جس نے چھ دنوں میں آسمان و زمین پیدا کیے۔ تخلیق کا آغاز اتوار کے دن ہوا اور اختتام جمعے کے دن ہوا، حالانکہ وہ انھیں پلک جھپکنے سے بھی تھوڑے وقت میں پیدا کرنے پر قدرت رکھتا ہے، پھر وہ سبحانہ و تعالیٰ اپنی شان کے لائق عرش پر مستوی اور بلند ہوا۔ وہ زمین میں جانے والی بارش اور بیجوں وغیرہ کوجانتا ہے اور زمین سے جو نباتات اور معدنیات وغیرہ نکلتی ہیں، انھیں بھی جانتا ہے اور آسمان سے جو بارش اور وحی وغیرہ اترتی ہے، اسے بھی جانتا ہے اور اس میں جو فرشتے اور بندوں کے اعمال اور ان کی روحیں چڑھتی ہیں، ان کا بھی اسے علم ہے۔ اے لوگو! تم جہاں بھی ہو، وہ اپنے علم کے اعتبار سے تمھارے ساتھ ہے۔ تمھاری کوئی چیز اس سے چھپی ہوئی نہیں۔ جو عمل تم کرتے ہو، اللہ اسے دیکھتا ہے۔ تمھارا کوئی عمل اس سے پوشیدہ نہیں اور وہ تمھیں ضرور ان کی جزا دے گا۔

5- اسی کے لیے آسمانوں کی بادشاہی ہے، وہی زمین کا مالک ہے اور اسی کی طرف تمام معاملات لوٹائے جائیں گے اور وہ قیامت کے دن مخلوقات کا محاسبہ کرے گا اور ان کے اعمال کا انھیں بدلہ دے گا۔

6- وہ رات کو دن پر داخل کرتا ہے تو تاریکی چھا جاتی ہے اور لوگ سو جاتے ہیں، دن کو رات پر داخل کرتا ہے تو روشنی ہو جاتی ہے اور لوگ اپنے کاموں پہ روانہ ہو جاتے ہیں اور وہ اپنے بندوں کے سینوں کی باتیں خوب جاننے والا ہے، اس سے ان میں سے کوئی چیز چھپی نہیں۔

7- اللہ پر ایمان لاؤ اور اس کے رسول پر ایمان لاؤ اور اس مال میں سے خرچ کرو جس کا اللہ تعالیٰ نے تمھیں وارث بنایا، جس کو تم اس کے مقرر کردہ جائز طریقے سے خرچ کرتے ہو، چنانچہ تم میں سے جو لوگ اللہ تعالیٰ پر ایمان لائے اور انھوں نے اپنے مال اللہ کی راہ میں خرچ کیے، ان کے لیے اس کے ہاں عظیم ثواب ہے اور وہ ہے جنت۔

8- تمھیں اللہ پر ایمان لانے سے کیا چیز روکتی ہے؟ جبکہ رسول صلى اللہ عليہ وسلم اس امید پر تمھیں اللہ کی طرف بلا رہے ہیں کہ تم اپنے پاک رب پر ایمان لاؤ۔ یقیناً اللہ تعالیٰ نے تم سے اس وقت پختہ عہد لیا جب اس نے تمھیں تمھارے آباء و اجداد کی پشتوں سے نکالا کہ تم اس پر ایمان لاؤگے اگر تم مومن ہو۔

9- وہی ہے جو اپنے بندے محمد( صلى اللہ عليہ وسلم ) پر واضح آیتیں نازل کرتا ہے تاکہ وہ تمھیں کفر اور جہالت کی تاریکیوں سے نکال کر ایمان اور علم کی روشنی کی طرف لائے۔ بلاشبہ اللہ تعالیٰ تم پر نہایت شفقت اور رحم کرنے والا ہے جب اس نے اپنے نبی ( صلى اللہ عليہ وسلم ) کو راہنمائی کرنے اور خوشخبری دینے کے لیے تمھاری طرف بھیجا۔

10- اور کون سی چیز تمھیں اللہ کی راہ میں خرچ کرنے سے روکتی ہے؟ حالانکہ آسمانوں اور زمین کی میراث کا مالک تو اللہ ہی ہے۔ اے ایمان والو! تم میں سے جن لوگوں نے فتح مکہ سے پہلے اللہ تعالیٰ کی خوشنودی حاصل کرنے کے لیے اس کی راہ میں اپنا مال خرچ کیا اور اسلام کی مدد کے لیے کافروں سے جہاد کیا، وہ ان لوگوں کے برابر نہیں جنھوں نے فتح مکہ کے بعد خرچ کیا اور کافروں سے جہاد کیا۔ جو لوگ فتح مکہ سے پہلے خرچ کرتے رہے اور اللہ کی راہ میں لڑتے رہے، وہ اللہ کے ہاں ان لوگوں سے بلند مرتبہ اور عظمت والے ہیں جنھوں نے فتح مکہ کے بعد اپنے مال اس کی راہ میں خرچ کیے اور کافروں سے جنگ کی۔ ہاں، اللہ تعالیٰ نے دونوں گروہوں سے جنت کا وعدہ کیا ہے اور اللہ تعالیٰ اس سے پوری طرح باخبر ہے جو عمل تم کرتے ہو۔ اس سے تمھارا کوئی عمل چھپا نہیں اور وہ ضرور تمھیں ان اعمال کی جزا دے گا۔

11- کون ہے جو دل کی خوشی سے اپنا مال اللہ تعالیٰ کی خوشنودی کے لیے خرچ کرے، تو اللہ تعالیٰ اسے اپنا مال خرچ كرنے كے ثواب كے طور پر دگنا بدلہ دے گا اور اس کے لیے قیامت کے دن نہایت پسندیدہ ثواب ہے اور وہ ہے جنت؟

12- جس دن آپ مومن مردوں اور مومن عورتوں کو دیکھیں گے کہ ان کا نور ان کے آگے اور ان کی دائیں جانب ہوگا اور اس دن ان سے کہا جائے گا: آج تمھیں ایسی جنتوں کی خوشخبری ہے جن کے محلات اور درختوں کے نیچے سے نہریں جاری ہیں جن میں تم ہمیشہ رہنے والے ہو۔ یہ جزا ملنا ہی بڑی عظیم کامیابی ہے جس کے برابر کوئی کامیابی نہیں۔

جب اللہ تعالیٰ نے اس دن مومنوں کی حالت کا ذکر کیا تو ساتھ ہی منافقوں کی حالت کا ذکر بھی کر دیا، چنانچہ فرمایا:

13- جس دن منافق مرد اور منافق عورتیں ایمان والوں سے کہیں گے کہ ہمارا انتظار تو کرو کہ ہم بھی تمھارے نور سے کچھ روشنی حاصل کر لیں جو پل صراط عبور کرنے میں ہماری معاون ہو۔ منافقوں کا مذاق اڑاتے ہوئے ان سے کہا جائے گا: تم پیچھے لوٹ جاؤ اور نور تلاش کرو جس سے تم روشنی حاصل کر سکو، پھر ان کے درمیان ایک دیوار کھڑی کر دی جائے گی۔ اس دیوار کا ایک دروازہ ہوگا۔ اس کی اندرونی جانب جہاں ایمان والے ہوں گے، رحمت ہوگی اور بیرونی جانب جہاں منافق ہوں گے، عذاب ہوگا۔

14- منافق ایمان والوں کو یہ کہتے ہوئے آواز دیں گے: کیا ہم اسلام اور اطاعت میں تمھارے ساتھ نہ تھے؟ مسلمان ان سے کہیں گے: کیوں نہیں، تم ہمارے ساتھ تھے مگر تم نے خود کو منافقت کے فتنے میں ڈالا اور اپنے آپ کو تباہ و برباد کر لیا۔ تم ایمان والوں کے مغلوب ہونے کا انتظار کرتے رہے تاکہ تم اپنے کفر کا اعلان کرو۔ تم اہلِ ایمان کے لیے اللہ تعالیٰ کی مدد و نصرت میں بھی شک کرتے رہے اور موت کے بعد دوبارہ اٹھائے جانے کے بارے میں بھی شکوک و شبہات کا شکار رہے اور جھوٹی خواہشات نے تمھیں دھوکے میں ڈالا یہاں تک کہ تم پر موت آگئی جبکہ تم اسی حال میں تھے اور اللہ کے معاملے میں شیطان نے تمھیں دھوکے میں ڈالے رکھا۔

15- لہٰذا اے منافقو! آج اللہ کے عذاب سے نجات پانے کے لیے تم سے کوئی فدیہ قبول نہیں کیا جائے گا اور نہ علانیہ اللہ کے ساتھ کفر کرنے والوں سے کوئی فدیہ قبول ہوگا۔ تمھارا اور کافروں کا ٹھکانا آگ ہے، وہی تمھارے زیادہ لائق ہے اور تم اسی کے حقدار ہو اور وہ لوٹنے کی نہایت بری جگہ ہے۔

16- کیا اللہ تعالیٰ اور اس کے رسول صلى اللہ عليہ وسلم پر ایمان لانے والوں کے لیے وقت نہیں آیا کہ ان کے دل اللہ پاک کے ذکر اور قرآن میں نازل ہونے والے وعدے وعید کے لیے نرم اور مطمئن ہوں اور وہ دل کی سختی میں ان یہودیوں کی طرح نہ ہو جائیں جنھیں ان سے پہلے تورات دی گئی، اور نہ ان عیسائیوں کی طرح ہو جائیں جنھیں انجیل دی گئی، پھر جب ان کے اور ان کی طرف بھیجے جانے والے نبیوں کے درمیان زیادہ وقت گزر گیا تو اس وجہ سے ان کے دل سخت ہو گئے اور ان میں سے بہت زیادہ اللہ کی اطاعت سے نکل کر اس کی نافرمانی کرنے والے ہیں؟

17- جان لو کہ بلاشبہ اللہ تعالیٰ زمین کے بنجر ہونے کے بعد اس میں نباتات اگا کر اسے آباد کرتا ہے۔ اے لوگو! یقیناً ہم نے تمھارے لیے اللہ کی قدرت اور اس کی توحید کے دلائل اور نشانیاں کھول کر بیان کر دی ہیں تاکہ تم انھیں سمجھو اور جان لو کہ وہ ذات جس نے زمین کو بنجر اور بے آباد ہو جانے کے بعد زندہ کیا، وہ تمھارے مرنے کے بعد تمھیں قبروں سے دوبارہ اٹھانے پر بھی قادر ہے اور اس بات کی بھی قدرت رکھتا ہے کہ تمھارے دلوں کی سختی کے بعد انھیں نرم کر دے۔

18- بلاشبہ اپنے کچھ مال خرچ کرنے والے مرد اور اپنے کچھ مال خرچ کرنے والی عورتیں جو احسان جتائے اور تکلیف دیے بغیر دل کی خوشی سے خرچ کرتے ہیں، ان کے اعمال کا ثواب انھیں بڑھا کر دیا جائے گا۔ ایک نیکی دس گنا سے سات سو گنا تک بلکہ اس سے بھی زیادہ بڑھائی جائے گی اور اس کے ساتھ ساتھ ان کے لیے اللہ کے ہاں انتہائی باعزت جزا ہوگی اور وہ ہے جنت۔

19- جو لوگ اللہ تعالیٰ پر ایمان لائے اور اس کے رسولوں پر ایمان لائے اور (ایمان لانے میں) ان کے درمیان فرق نہ کیا تو یہی لوگ سچے ہیں اور شہداء کے لیے ان کے رب کے ہاں نہایت عزت والا بدلہ ہے جو انھی کے لیے تیار کیا گیا ہے۔ انھیں ایسا نور ملے گا جو قیامت کے دن ان کے آگے آگے اور دائیں جانب دوڑ رہا ہوگا۔ جن لوگوں نے اللہ تعالیٰ اور اس کے رسولوں کے ساتھ کفر کیا اور ہمارے رسول صلى اللہ عليہ وسلم پر نازل کی گئی ہماری آیتوں کو جھٹلایا تو یہی دوزخ والے لوگ ہیں جس میں وہ قیامت کے دن داخل ہو کر ہمیشہ ہمیشہ اس میں رہیں گے۔ وہ اس سے نکل نہیں سکیں گے۔

20- جان لو کہ دنیا کی زندگی کھیل ہے جس میں بدن مصروف رہتے ہیں، اور تماشا ہے جس کے ساتھ دل بہلے رہتے ہیں، اور زینت ہے جس سے تم خوبصورتی حاصل کرتے ہو اور تم اس کی ملکیت اور مال و متاع کے بل بوتے پر آپس میں فخر کرتے ہو اور کثرتِ مال اور کثرتِ اولاد پر اتراتے ہو۔ اس کی مثال اس بارش کی سی ہے جس سے اگنے والی نباتات کسانوں کو بھلی لگتی ہیں، پھر یہ زیادہ دیر ہری بھری نہیں رہتیں بلکہ جلد خشک ہو جاتی ہیں، تو اے دیکھنے والے! تم ان کے سبز ہونے کے بعد ان کو زرد ہوتا دیکھتے ہو، پھر اللہ تعالیٰ انھیں چورا چورا کر دیتا ہے۔ آخرت میں کافروں اور منافقوں کے لیے سخت عذاب ہے اور اللہ کی طرف سے اپنے مومن بندوں کے لیے گناہوں کی بخشش اور بہت رضا مندی ہے۔ دنیا کی زندگی ختم ہونے والا سامان ہے جسے باقی نہیں رہنا، لہٰذا جس نے اس کے ختم ہونے والے ساز و سامان کو آخرت کی نعمتوں سے بہتر جانا تو وہ خسارے اور نقصان میں ہے۔

21- اے لوگو! ان نیک اعمال کی طرف دوڑو جن کے ساتھ تم اپنے گناہوں کی بخشش کروا سکتے ہو، جیسے توبہ اور قربت الٰہی کے دوسرے کام۔ تاکہ تم ان کے ذريعے سے جنت حاصل کر سکو جس کی چوڑائی آسمانوں اور زمین کی چوڑائی کے برابر ہے۔ یہ جنت اللہ تعالیٰ نے ان لوگوں کے لیے تیار کی ہے جو اس پر ایمان لائے اور اس کے رسولوں کو مانا۔ یہ جزا اللہ تعالیٰ کا فضل ہے جو وہ اپنے بندوں میں سے جسے چاہے گا، دے گا۔ اللہ پاک اپنے مومن بندوں پر عظیم فضل و احسان کرنے والا ہے۔

22- لوگوں کو زمین میں خشک سالی وغیرہ کی صورت میں جو بھی مصیبت پہنچتی ہے اور ان پر جو جسمانی آزمائش اور مصیبت آتی ہے، وہ مخلوقات کو ہمارے پیداکرنے سے پہلے لوح محفوظ میں درج اور طے شدہ ہے۔ بلاشبہ یہ اللہ تعالیٰ پر بہت آسان ہے۔

23- یہ اس لیے ہے تاکہ اے لوگو! تم اس چیز پر غم نہ کرو جو تم کھو بیٹھے ہو اور تم ان نعمتوں پر نہ اتراؤ جو اللہ تعالیٰ نے تمھیں عطا کی ہیں۔ بلاشبہ اللہ تعالیٰ ہر اس متکبر کو پسند نہیں کرتا جو اللہ تعالیٰ کے عطا کیے ہوئے کی بنیاد پر لوگوں پر فخر و غرور کرتا ہے۔

24-جو لوگ اس میں کنجوسی کرتے ہیں جس کا خرچ کرنا ان پر واجب ہے اور دوسروں کو بھی کنجوسی کا حکم دیتے ہیں، وہ گھاٹا پانے والے ہیں۔ جس شخص نے اللہ کی اطاعت سے منہ موڑا، وہ اللہ کو کچھ نقصان نہ پہنچائے گا، وہ صرف اپنا نقصان کرے گا۔ بلاشبہ اللہ تعالیٰ بے نیاز ہے، وہ اپنے بندوں کی اطاعت کا محتاج نہیں۔ وہ ہر حال میں تعریف کیا گیا ہے۔

25-یقیناً ہم نے واضح معجزات اور روشن دلائل دے کر اپنے رسول بھیجے اور ان کے ساتھ کتابیں اتاریں اور ترازو نازل کیا تاکہ لوگ عدل پر قائم رہیں اور ہم نے لوہا اتارا جس میں سخت لڑائی کا سامان ہے، چنانچہ اسی سے اسلحہ بنایا جاتا ہے اور اس کے علاوہ اپنی صنعت و حرفت میں بھی لوگ اس سے نفع اٹھاتے ہیں، تاکہ اللہ تعالیٰ جان لے، یعنی بندوں کے لیے ظاہر کر دے کہ اس کے بندوں میں سے کون بن دیکھے اس کی اور اس کے رسولوں کی مدد کرتاہے۔ بلاشبہ اللہ تعالیٰ زبردست، سب پر غالب ہے جس پر کوئی چیز غالب نہیں آ سکتی اور نہ وہ کسی چیز سے عاجز ہے۔

26- یقیناً ہم نے نوح اور ابراہیم علیہما السلام کو رسول بنا کر بھیجا اور ان کی اولاد میں نبوت اور نازل ہونے والی کتابوں کا سلسلہ جاری کیا، چنانچہ ان کی اولاد میں سیدھی راہ کی ہدایت اور توفیق پانے والے ہیں اور بہت سارے ان میں سے اللہ کی اطاعت سے منہ پھیرنے والے بھی ہیں۔

27- پھر ان کے بعد ہم نے اپنے رسول بھیجے، انھیں ان کی امتوں کی طرف پے در پے مبعوث کیا اور ان کے بعد عیسیٰ ابن مریم علیہما السلام کو بھیجا اور انھیں انجیل عطا فرمائی اور جو لوگ ان پر ایمان لائے اور ان کی پیروی کی، ہم نے ان کے دلوں میں نرمی اور رحمت ڈال دی، چنانچہ وہ ایک دوسرے کے ساتھ محبت و رحمت والا معاملہ کرنے والے ہیں۔ انھوں نے اپنے دین میں غلو، یعنی حد سے تجاوز کرنا ایجاد کر لیا اور اللہ تعالیٰ نے نکاح اور بعض لذیذ نعمتیں جو ان کے لیے حلال کی تھیں، انھوں نے وہ خود پر حرام قرار دے لیں، حالانکہ ہم نے ان سے اس کا مطالبہ نہیں کیا تھا۔ انھوں نے وہ چیزیں دین میں من گھڑت بدعت کے ذریعے سے خود پر لازم کر لیں۔ ہم نے تو ان سے صرف اللہ تعالیٰ کی رضا مندی کی پیروی کا مطالبہ کیا تھا جو انھوں نے پورا نہ کیا، پھر ہم نے ان میں سے ایمان لانے والوں کو ان کا اجر دیا جبکہ ان میں سے زیادہ تر لوگ اسے جھٹلا کر اللہ کی اطاعت سے نکل جانے والے ہیں جو ان کے پاس اس کے رسول محمد صلى اللہ عليہ وسلم لائے تھے۔

28- اے اللہ تعالیٰ پر ایمان لانے اور اپنے لیے اس کی مقرر کی ہوئی شریعت پر عمل کرنے والو! اللہ کے حکم مان کر اور اس کے منع کیے ہوئے کاموں سے بچ کر اس سے ڈرو اور اس کے رسول پر ایمان لاؤ، وہ تمھیں دوہرا اجر و ثواب عطا کرے گا: ایک تمھارے محمد رسول اللہ صلى اللہ عليہ وسلم پر ایمان لانے کا اور دوسرا پہلے نبیوں پر ایمان لانے کا۔ وہ تمھیں ایسا نور عطا کرے گا جس کے ساتھ تم اپنی دنیا کی زندگی میں ہدایت پاؤ گے اور قیامت کے دن پل صراط پر روشنی حاصل کرو گے اور وہ تمھارے گناہ بخش دے گا، اس طرح کہ ان پر پردہ ڈال دے گا اور ان پر تمھاری پکڑ نہیں کرے گا۔ اللہ پاک اپنے بندوں کو بے حد بخشنے والا، ان پر نہایت رحم کرنے والا ہے۔

29- اے ایمان والو! یقیناً ہم نے اپنا وہ فضل بھی کھول کر بیان کر دیا ہے جو ہم نے تمھارے لیے کئی گنا ثواب کی صورت میں تیار کیا ہے تاکہ اہلِ کتاب یہود و نصاریٰ یہ جان لیں کہ وہ اللہ تعالیٰ کے فضل و احسان پر ذرہ بھر اختیار نہیں رکھتے کہ وہ جسے چاہیں دے دیں اور جس سے چاہیں روک لیں اور تاکہ وہ جان لیں کہ فضل اللہ پاک کے ہاتھ میں ہے جو وہ اپنے بندوں میں سے جسے چاہے عطا کرتا ہے۔ اور اللہ تعالیٰ عظیم فضل والا ہے اور وہ اس کے ساتھ اپنے بندوں میں سے جسے چاہے خاص کرتا ہے۔