1- اے اللہ تعالیٰ پر ایمان لانے اور اس کی شریعت کی پیروی کرنے والو! اپنے قول و فعل میں اللہ تعالیٰ اور اس کے رسول( صلى اللہ عليہ وسلم ) سے آگے نہ بڑھو اور اللہ تعالیٰ سے ڈرو، اس طرح کہ اس کے حکم مانو اور اس کے منع کیے ہوئے کاموں سے بچو۔ بلاشبہ اللہ تعالیٰ تمھاری باتیں خوب سننے والا، تمھارے افعال خوب جاننے والا ہے، ان میں سے کوئی چیز اس سے اوجھل نہیں اور وہ ضرور تمھیں ان کی جزا دے گا۔

2- اے اللہ پر ایمان لانے اور اس کی شریعت کی پیروی کرنے والو! اللہ کے رسول( صلى اللہ عليہ وسلم ) سے ادب کے ساتھ پیش آؤ اور نبیٔ اکرم صلى اللہ عليہ وسلم کو مخاطب کرتے ہوئے اپنی آوازیں آپ کی آواز سے اونچی نہ کرو اور نہ بلند آواز سے آپ کا نام لے کر آپ کو آواز دو جس طرح تم ایک دوسرے کو بلاتے ہو بلکہ آپ کو نبی یا رسول کہہ کر نرمی سے مخاطب کرو۔ (بصورت دیگر) خطرہ ہے کہ کہیں اس وجہ سے تمھارے اعمال کا ثواب ضائع نہ ہو جائے اور تمھیں ان کا ثواب ضائع ہونے کی خبر اور احساس بھی نہ ہو۔

3- بلاشبہ جو لوگ رسول اللہ صلى اللہ عليہ وسلم کے سامنے اپنی آوازیں نیچی رکھتے ہیں، یہی وہ لوگ ہیں جن کے دلوں کو اللہ تعالیٰ نے اپنے تقویٰ کے لیے جانچ لیا ہے اور انھیں اس کے لیے چن لیا ہے۔ ان کے لیے ان کے گناہوں کی بخشش ہے کہ وہ ان کی پکڑ نہیں کرے گا اور ان کے لیے قیامت کے دن عظیم بدلہ ہے اور وہ یہ ہے کہ اللہ تعالیٰ انھیں جنت میں داخل کرے گا۔

4- اے رسول( صلى اللہ عليہ وسلم )! بلاشبہ دیہاتیوں میں سے جو آپ کو آپ کی بیویوں کے حجروں کے پیچھے سے پکارتے ہیں، ان میں سے اکثر بے عقل ہیں۔

5- اے رسول( صلى اللہ عليہ وسلم )! اگر یہ لوگ، جو آپ کو آپ کی بیویوں کے حجروں کے پیچھے سے پکارتے ہیں، صبر کرتے اور آپ کو آوازیں نہ دیتے یہاں تک کہ آپ خود ان کے پاس تشریف لے آتے اور یہ نہایت نیچی آواز سے آپ سے بات کرتے تو یہ ان کے لیے حجروں کے باہر سے پکارنے سے کہیں بہتر ہوتا، اس لیے کہ اس میں نبیٔ اکرم صلى اللہ عليہ وسلم کا احترام و تعظیم ہے۔ ان میں سے اور ان کے علاوہ جو بھی توبہ کرے، اللہ تعالیٰ اس کے گناہ بے حد بخشنے والا، ان کی جہالت کی وجہ سے انھیں معاف کرنے والا اور ان پر نہایت رحم کرنے والا ہے۔

6- اے اللہ تعالیٰ پر ایمان لانے اور اس کی شریعت پر عمل کرنے والو! اگر کوئی فاسق و فاجر کسی قوم کے بارے میں کوئی خبر دے تو اس کی خبر کے صحیح یا غلط ہونے کی تحقیق کر لیاکرو اور اس کی تصدیق میں جلد بازی کا مظاہرہ نہ کرو۔ ایسا نہ ہو کہ تم بغیر تحقیق کے اس خبر کو سچا سمجھتے ہوئے کسی قوم کو تکلیف دینے کا جرم کر بیٹھو جبکہ ان کے معاملے کی حقیقت سے تم ناواقف ہو، پھر جب اس کی خبر کا جھوٹ ہونا تم پر واضح ہو تو تمھیں ان کو تکلیف پہنچانے پر پچھتانا پڑے۔

7- اے ایمان والو! تم جان لو کہ تمھارے درمیان اللہ کے رسول( صلى اللہ عليہ وسلم ) موجود ہیں جن پر وحی نازل ہوتی ہے، لہٰذا جھوٹ بولنے سے بچو ورنہ ان پر وحی نازل ہوگی جو انھیں تمھارے جھوٹ کی خبر دے دے گی۔ رسول اللہ صلى اللہ عليہ وسلم زیادہ بہتر جانتے ہیں کہ تمھاری بھلائی اور بہتری کس میں ہے۔ اگر وہ بہت سے معاملات میں تمھاری تجاویز مان لیں تو یقیناً تم ایسی مشکلات میں پڑ جاؤ جو وہ تمھارے لیے پسند نہیں کرتے۔ لیکن اللہ تعالیٰ نے اپنے فضل سے ایمان کو تمھارا محبوب بنا دیا اور اسے تمھارے دلوں میں سجا دیا تو تم ایمان لے آئے اور اس نے کفر، اپنی اطاعت سے منہ موڑنے اور گناہ و نافرمانی کو تمھاری نگاہوں میں ناپسندیدہ بنا دیا۔ انھی صفات کے حامل لوگ ہی رشد و ہدایت کی راہ پر چلنے والے ہیں۔

8- یہ جو تمھارے دلوں میں خیر اور بھلائی کی چاہت اور شر سے نفرت تمھیں نصیب ہوئی ہے، یہ محض اللہ تعالیٰ کا فضل و احسان ہے جو اس نے تم پر کیا ہے اور اس کا خاص انعام ہے جو اس نے تمھیں عطا فرمایا ہے۔ اللہ تعالیٰ اپنے بندوں میں سے شکر گزار کو خوب جانتا ہے اور اسے توفیق عطا کرتا ہے اور وہ کمال حکمت والا ہے کہ ہر چیز کو اس کی مناسب جگہ رکھتا ہے۔

9- اگر مومنوں کے دو گروہ آپس میں لڑ پڑیں تو اے ایمان والو! انھیں اللہ کی شریعت کے مطابق اپنے اختلاف کا فیصلہ کرانے کی دعوت دے کر ان میں صلح کر ا دو، پھر اگر ان میں سے کوئی ایک صلح کا انکار کرے اور زیادتی کرے تو اس زیادتی کرنے والے گروہ سے لڑو یہاں تک کہ وہ اللہ کے فیصلے کی طرف لوٹ آئے، پھر اگر وہ اللہ کے فیصلے کی طرف لوٹ آئے تو ان کے درمیان عدل و انصاف کے ساتھ صلح کرا دو اور ان کے درمیان اپنے فیصلے میں عدل کرو۔ بلاشبہ اللہ تعالیٰ ان لوگوں سے محبت کرتا ہے جو اپنے فیصلوں میں انصاف کرتے ہیں۔

10- بلاشبہ سارے ایمان والے آپس میں اسلامی بھائی ہیں اور اے ایمان والو! اسلامی اخوت اور بھائی چارے کا تقاضا ہے کہ تم اپنے دو جھگڑنے والے بھائیوں کے درمیان صلح کراؤ۔ اللہ سے ڈرو اس کے حکم مان کر اور اس کے منع کیے ہوئے کاموں سے بچ کر تاکہ تم پر رحم کیا جائے۔

11- اے اللہ تعالیٰ پر ایمان لانے اور اس کی شریعت پر عمل کرنے والو! تم میں سے کوئی قوم دوسری قوم کا مذاق نہ اڑائے۔ ہو سکتا ہے کہ جن کا مذاق اڑایا جا رہا ہو، وہ اللہ کے نزدیک زیادہ بہتر ہوں اور اعتبار اسی کا ہے جو اللہ کے پاس ہے۔ اور نہ عورتیں عورتوں کا مذاق اڑائیں۔ ہو سکتا ہے کہ جن عورتوں کا مذاق اڑایا جا رہا ہو، وہ اللہ تعالیٰ کے نزدیک زیادہ بہتر ہوں۔ اپنے بھائیوں پر عیب نہ لگاؤ، وہ تمھارے اپنے قائم مقام ہیں۔ نہ تم ایک دوسرے کو برے القاب دے کر عار اور شرم دلاؤ جیسا کہ بعض انصاری رسول اکرم صلى اللہ عليہ وسلم کی آمد سے پہلے کرتے تھے۔ تم میں سے جس نے ایسا کیا، وہ فاسق ہے۔ ایمان کے بعد نہایت برا وصف یہ ہے کہ کوئی فسق و فجور میں پڑے اور جنھوں نے ان نافرمانیوں سے توبہ نہ کی، وہی لوگ اپنی کی ہوئی نافرمانیوں کی وجہ سے خود کو ہلاکت کے منہ میں ڈال کر اپنے آپ پر ظلم کرنے والے ہیں۔

12- اے اللہ تعالیٰ پر ایمان لانے اور اس کی شریعت کے مطابق عمل کرنے والو! ایسے بہت سے گمانوں سے دور رہو جن کو ثابت کرنے کے لیے اسباب و قرائن کی کوئی بنیاد نہ ہو۔ بلاشبہ بعض گمان گناہ ہوتے ہیں جیسے ظاہری طور پر نیک آدمی کے بارے میں برا گمان رکھنا۔ ایمان والوں کے عیبوں کی ٹوہ میں رہو نہ تم میں سے کوئی اپنے بھائی کا اس انداز میں ذکر کرے جو اسے ناپسند ہو، بلاشبہ اس انداز سے اس کا ذکر کرنا جو اسے ناپسند ہو، اس کے مردہ ہونے کی صورت میں اس کا گوشت کھانے کی طرح ہے۔ کیا تم میں سے کوئی پسند کرتا ہے کہ وہ اپنے مردہ بھائی کا گوشت کھائے؟! لہٰذا اس کی غیبت کو بھی ناپسند کرو کیونکہ وہ بھی مردہ بھائی کا گوشت کھانے کی طرح ہے۔ اللہ تعالیٰ سے ڈرو، اس طرح کہ اس کے حکم مانو اور اس کے منع کیے ہوئے کاموں سے بچو۔ بلاشبہ اللہ تعالیٰ اپنے رجوع کرنے والے بندوں کی توبہ بہت قبول کرنے والا، ان پر نہایت رحم کرنے والا ہے۔

13- اے لوگو! بلاشبہ ہم نے تمھیں ایک مرد، اور وہ ہیں تمھارے باپ آدم( علیہ السلام )، اور ایک عورت، اور وہ ہیں تمھاری ماں حوا، سے پیدا کیا، اس لیے تمھارا نسب ایک ہی ہے، لہٰذا نسب کے معاملے میں تم ایک دوسرے پر فخر نہ کرو، پھر ہم نے تمھیں بہت سے کنبوں اور مختلف قبیلوں میں تقسیم کر دیا تاکہ تم ایک دوسرے کو پہچان سکو، نہ کہ اس پر فخر کرو کیونکہ امتیاز اور برتری تو صرف تقویٰ سے ہے، اس لیے فرمایا: تم میں سے زیادہ عزت والا اللہ کے نزدیک وہ ہے جو زیادہ تقوے والا ہے۔ بلاشبہ اللہ تعالیٰ تمھارے احوال خوب جاننے والا اور تمھارے کمال اور نقص سے پوری طرح باخبر ہے۔ اس میں سے کوئی چیز اس سے چھپی نہیں۔

14- بعض دیہاتی جب نبیٔ اکرم صلى اللہ عليہ وسلم کے پاس آئے تو انھوں نے کہا: ہم اللہ تعالیٰ اور اس کے رسول( صلى اللہ عليہ وسلم ) پر ایمان لائے۔ اے رسول( صلى اللہ عليہ وسلم )! ان سے کہہ دیں: تم ایمان نہیں لائے بلکہ یہ کہو: ہم نے تسلیم کر لیا ہے اور مطیع ہو گئے ہیں جبکہ ایمان ابھی تک تمھارے دلوں میں نہیں اترا اور امید ہے کہ اتر جائے گا۔ اے دیہاتیو! اگر تم ایمان لانے، نیک عمل کرنے اور حرام کی ہوئی چیزوں اور باتوں سے بچنے میں اللہ تعالیٰ اور اس کے رسول( صلى اللہ عليہ وسلم ) کی اطاعت کرو تو اللہ تعالیٰ تمھارے اعمال کے ثواب میں کوئی کمی نہیں کرے گا۔ بلاشبہ اللہ تعالیٰ اپنے توبہ کرنے والے بندوں کو بے حد بخشنے والا، ان پر نہایت رحم کرنے والا ہے۔

15- مومن تو صرف وہ لوگ ہیں جو اللہ تعالیٰ اور اس کے رسول پر ایمان لائے، پھر ان کے ایمان میں شک کی ملاوٹ نہ ہو اور انھوں نے اپنے مالوں اور جانوں سے اللہ کی راہ میں جہاد کیا اور اس میں ذرا کنجوسی سے کام نہ لیا۔ انھی مذکورہ صفات کے حامل لوگ ہی اپنے ایمان میں سچے ہیں۔

16- اے رسول( صلى اللہ عليہ وسلم )! ان دیہاتیوں سے کہہ دیں: کیا تم اپنے دین کے بارے میں اللہ تعالیٰ کو آگاہ کر رہے ہو؟! حالانکہ اللہ تو آسمانوں اور زمین میں موجود ہر چیز کو جانتا ہے اور اللہ ہر چیز کو خوب جاننے والا ہے، اس سے کوئی چیز چھپی نہیں، اس لیے وہ تمھارا محتاج نہیں کہ تم اسے اپنے دین سے آگاہ کرو۔

17- اے رسول( صلى اللہ عليہ وسلم )! یہ دیہاتی اپنے مسلمان ہونے کا آپ پر احسان جتاتے ہیں۔ ان سے کہہ دیں: مجھ پر احسان نہ جتاؤ کہ تم اللہ کے دین میں داخل ہوئے ہو۔ اس کا فائدہ اگر ہوا تو تمھیں ہی ہو گا بلکہ اللہ تعالیٰ نے تم پر احسان کیا ہے کہ اس نے تمھیں ایمان لانے کی توفیق دی اگر تم اپنے دعوے میں سچے ہو کہ تم دینِ اسلام میں داخل ہو گئے ہو۔

18- بلاشبہ اللہ تعالیٰ آسمانوں کے غیب جانتا ہے اور زمین کے غیب بھی جانتا ہے، اس میں سے کوئی چیز اس سے چھپی نہیں اور جو عمل تم کرتے ہو، اللہ اسے خوب دیکھنے والا ہے۔ اس سے تمھارا کوئی عمل چُھپا نہیں اور وہ ضرور تمھیں اچھے اور برے اعمال کا بدلہ دے گا۔