1- ﴿الٓمٓ﴾ اس طرح کے حروف پر تفصیلی کلام سورۂ بقرہ کے شروع میں گزر چکا ہے۔

2- یہ قرآن جو محمد رسول اللہ صلى اللہ عليہ وسلم لے کر آئے ہیں، یہ ان پر رب العالمین کی طرف سے نازل کیا ہوا ہے جس میں کوئی شک و شبہ نہیں۔

3- یہ کافر کہتے ہیں کہ بلاشبہ محمد( صلى اللہ عليہ وسلم ) نے یہ قرآن گھڑ کر اپنے رب کی طرف منسوب کر دیا ہے۔ معاملہ اس طرح نہیں جیسے انھوں نے کہا، بلکہ یہ ایسا حق ہے جس میں کوئی شک و شبہ نہیں۔ اے رسول( صلى اللہ عليہ وسلم )! یہ آپ کے رب کی طرف سے آپ پر نازل کیا ہوا ہے تاکہ آپ ایک ایسی قوم کو ڈرائیں جن کے پاس آپ سے پہلے انھیں اللہ کے عذاب سے ڈرانے کے لیے کوئی رسول نہیں آیا تاکہ وہ حق کی طرف راہ پا کر اس کی پیروی کریں اور اس پر عمل کریں۔

3-اللہ ہی ہے جس نے آسمانوں، زمین اور جو کچھ ان کے درمیان ہے، انھیں چھ دن میں پیدا کیا جبکہ وہ انھیں آنکھ جھپکنے سے بہت کم وقت میں پیدا کرنے پر بھی قادر ہے۔ پھر وہ عرش پر بلند اور مستوی ہوا جیسے اس کی شان کے لائق ہے۔ اے لوگو! اس کے سوا تمھارا کوئی مددگار نہیں جو تمھارے معاملے کو سنبھالے یا ایسا کوئی سفارشی نہیں جو تمھارے رب کے ہاں تمھاری سفارش کرے۔ کیا تم غور و فکر نہیں کرتے اور اس اللہ کی عبادت نہیں کرتے جس نے تمھیں پیدا کیا اور اس کے ساتھ غیروں کی عبادت کرنا ترک نہیں کرتے؟!

5-اللہ سبحانہ و تعالیٰ آسمانوں اور زمین کی تمام مخلوقات کے ہر امر کی تدبیر کرتا ہے، پھر یہ امر اس کی طرف ایسے دن میں بلند ہوتا ہے جس کی مقدار اے لوگو! تمھارے دنیا کے شمار کیے ہوئے ہزار سال کے برابر ہے۔

6-وہ ذات جو ان سارے معاملات کی تدبیر کرتی ہے، وہ ہر غیب و حاضر کو جاننے والی ہے اور ان میں سے کوئی چیز اس سے چھپی نہیں۔ وہ ایسا غالب ہے کہ کوئی اسے مغلوب نہیں کر سکتا۔ جو اپنے دشمنوں سے انتقام لیتا ہے۔ اپنے مومن بندوں پر خوب مہربان ہے۔

7-جس نے ہر چیز کو مضبوط اور مستحکم طریقے سے پیدا کیا اور آدم علیہ السلام کو کسی پچھلے نمونے کے بغیر مٹی سے بنایا۔

8-پھر اس کے بعد اس کی اولاد کو اس پانی سے پیدا کیا جو مادہ منویہ کی صورت میں اس سے نکلا۔

9-پھر انسان کی تخلیق مکمل کر کے اسے ٹھیک ٹھاک کیا، پھر اس میں اپنی روح سے پھونکا، اس طرح کہ روح پھونکنے پر مقرر فرشتے کو روح پھونکنے کا حکم دیا۔ اے لوگو! اس نے تمھارے کان بنائے تاکہ تم ان کے ذریعے سے سنو، آنکھیں بنائیں تاکہ تم ان سے دیکھو اور دل بنائے تاکہ تم ان کے ساتھ سمجھو۔ تم ان نعمتوں پر جو اللہ تعالیٰ نے تمھیں عطا کی ہیں، کم ہی اللہ کا شکر ادا کرتے ہو۔

10-موت کے بعد دوبارہ جی اٹھنے کو جھٹلانے والے مشرکوں نے کہا: جب ہم مر جائیں گے، زمین میں گم ہو جائیں گے اور ہمارے جسم خاک ہو جائیں گے تو کیا ہمیں نئے سرے سے زندہ کر کے اٹھایا جائے گا؟! یہ بات ان کی سمجھ میں نہیں آتی، بلکہ حقیقت یہ ہے کہ وہ دوبارہ اٹھائے جانے کے منکر ہیں اور اس پر ایمان ہی نہیں رکھتے۔

11-اے رسول( صلى اللہ عليہ وسلم )! موت کے بعد دوبارہ جی اٹھنے کو جھٹلانے والے ان مشرکوں سے کہہ دیں: وہ موت کا فرشتہ تمھیں فوت کرے گا جسے اللہ تعالیٰ نے تمھاری روحیں قبض کرنے کی ذمہ داری سونپی ہے، پھر تم قیامت کے دن حساب کتاب اور جزا کے لیے ہماری طرف اکیلے ہی لوٹائے جاؤ گے۔

12-عنقریب قیامت کے دن مجرم اس حال میں ظاہر ہوں گے کہ وہ ذلیل ہوں گے، ان کے سر شرمندگی و ندامت سے جھکے ہوں گے جس کا سبب ان کا دوبارہ اٹھائے جانے کا انکار ہوگا۔ وہ اس ذلت و رسوائی کو محسوس کریں گے اور کہیں گے: اے ہمارے رب! جس دوبارہ زندہ کر کے اٹھائے جانے کا ہم انکار کرتے اور اسے جھٹلاتے تھے، وہ آج ہم نے دیکھ لیا ہے اور جو کچھ رسول تیری طرف سے لائے تھے، اس کی سچائی کو بھی سن لیا، لہٰذا ہمیں دنیا کی زندگی کی طرف لوٹا دے کہ ہم نیک عمل کریں جو تجھے ہم سے راضی کر دیں۔ ہمیں اب دوبارہ جی اٹھنے اور رسولوں کی لائی ہوئی شریعت کی سچائی کا یقین ہوگیا ہے۔ اگر آپ مجرموں کو اس حال میں دیکھ لیں تو آپ بہت بڑا معاملہ دیکھیں گے۔

13-اگر ہم ہر شخص کو اس کی ہدایت اور توفیق دینا چاہتے تو اسے اس کے لیے تیار کر دیتے لیکن میری طرف سے حکمت اور عدل کے ساتھ یہ بات طے ہوچکی ہے کہ میں قیامت کے دن جہنم کو جنوں اور انسانوں میں سے کافروں کے ساتھ ضرور بھروں گا، یہ اس وجہ سے ہوگا کہ انھوں نے ایمان اور استقامت کی راہ کے مقابلے میں کفر اور گمراہی کا راستہ اپنایا۔

14-قیامت کے دن ان کی سرزنش اور ڈانٹ ڈپٹ کے لیے ان سے کہا جائے گا: اب اس غفلت کے سبب عذاب کا مزہ چکھو جس کا دنیا میں تم شکار رہے اور قیامت کے دن اپنے حساب کتاب کے لیے اللہ سے ملاقات کی پروا نہ کی۔ بلاشبہ ہم تمھیں عذاب میں اس طرح بے یارو مددگار چھوڑیں گے کہ اس کی پروا نہیں کریں گے کہ تمھارے ساتھ کیا ہو رہا ہے۔ انھیں کہا جائے گا: آگ کا دائمی عذاب چکھو جو دنیا میں تمھارے کیے ہوئے گناہوں کی وجہ سے کبھی ختم نہ ہوگا۔

جب اللہ تعالیٰ نے مجرموں کا حال ذکر کیا تو ساتھ ہی ایمان والوں کا حال بھی ذکر کر دیا، چنانچہ فرمایا:

15-بلاشبہ ہمارے رسول پر نازل کی ہوئی آیات پر وہ لوگ ایمان لاتے ہیں کہ جب انھیں ان آیات کے ساتھ نصیحت کی جاتی ہے تو وہ اللہ کی حمد کے ساتھ اس کی تسبیح کرتے ہوئے سجدے میں گر جاتے ہیں اور وہ کسی حال میں بھی اللہ کی عبادت اور اس کے حضور سجدہ کرنے سے تکبر نہیں کرتے۔

16-ان کے پہلو ان بستروں سے الگ رہتے ہیں جن پر وہ سوتے ہیں۔ وہ انھیں چھوڑ دیتے ہیں اور اللہ کی طرف متوجہ ہوتے ہیں۔وہ اس کے عذاب سے ڈرتے اور اس کی رحمت کی امید رکھتے ہوئے اپنی نماز وغیرہ میں اسے پکارتے ہیں اور جو مال ہم نے انھیں دیے ہیں، انھیں اللہ کی راہ میں خرچ کرتے ہیں۔

17-اب کوئی شخص نہیں جانتا کہ اللہ تعالیٰ نے ان کی آنکھوں کی ٹھنڈک کے لیے کیا کیا تیار کر رکھا ہے۔ یہ اس کی طرف سے ان کے لیے ان نیک اعمال کا بدلہ ہے جو وہ دنیا میں کرتے تھے۔ یہ اتنی بڑی جزا اور بدلہ ہے کہ اس کی عظمت کے پیش نظر اس کا احاطہ صرف اللہ تعالیٰ کر سکتا ہے

18-جو شخص اللہ پر ایمان لانے والا ہو، اس کے حکموں پر عمل کرنے والا ہو اور اس کی منع کی ہوئی چیزوں سے بچنے والا ہو، وہ اس کی طرح نہیں جو اس کی اطاعت سے سرکش اور باغی ہو۔ اللہ کے ہاں بدلے اور جزا میں یہ دونوں گروہ برابر نہیں ہوسکتے۔

19- جو لوگ اللہ تعالیٰ پر ایمان لائے اور انھوں نے نیک عمل کیے تو ان کے لیے جو جزا تیار کی گئی ہے، وہ ایسی جنتیں ہیں جن میں وہ ٹھہریں گے۔ یہ اللہ کی طرف سے ان کی عزت و تکریم ہوگی اور ان نیک اعمال کا بدلہ ہوگا جو وہ دنیا میں کرتے تھے۔

20-جو لوگ کفر اور گناہ کر کے اللہ کی اطاعت سے نکل گئے تو قیامت کے دن ان کے لیے جو ٹھکانا تیار کیا گیا ہے، وہ آگ ہے جس میں وہ ہمیشہ ہمیشہ رہیں گے۔ جب بھی وہ اس سے نکلنا چاہیں گے، دوبارہ اس میں لوٹا دیے جائیں گے اور ان کی سرزنش کے لیے ان سے کہا جائے گا: اب اس آگ کا عذاب چکھو جسے تم دنیا میں اس وقت جھٹلاتے تھے جب تمھارے رسول تمھیں اس سے ڈراتے تھے۔

21-ان جھٹلانے والوں اور اپنے رب کی اطاعت سے نکلنے والوں نے اگر توبہ نہ کی تو آخرت کا بڑا عذاب جو ان کے لیے تیار کیا گیا ہے، اس سے پہلے ہم انھیں دنیا میں مشکلات اور مصیبتوں کا مزہ ضرور چکھائیں گے تاکہ وہ اپنے رب کی اطاعت کی طرف لوٹ آئیں۔

22-اس شخص سے بڑھ کر کوئی ظالم نہیں جسے اللہ کی آیتوں کے ذریعے سے وعظ کیا گیا، اس نے نصیحت حاصل نہ کی اور انھیں نظر انداز کر کے ان سے منہ پھیر لیا۔ بلاشبہ ہم کفر اور نافرمانیاں کرنے والے مجرموں سے، جو اللہ تعالیٰ کی آیتوں سے منہ پھیرتے ہیں، ہر صورت میں ضرور انتقام لینے والے ہیں۔

23-یقیناً ہم نے موسیٰ( علیہ السلام ) کو تورات عطا کی، لہٰذا اے رسول ( صلى اللہ عليہ وسلم )! آپ اسراء و معراج کے موقع پر موسیٰ( علیہ السلام ) سے اپنی ملاقات کے بارے میں شک نہ کریں۔ہم نے موسیٰ( علیہ السلام ) پر نازل ہونے والی کتاب کو بنی اسرائیل کے لیے گمراہی سے ہدایت کی طرف لانے والی بنایا تھا۔

24-جب بنی اسرائیل نے اللہ کے حکم ماننے، اس کے منع کیے ہوئے کاموں سے رک جانے اور دعوتِ دین کی راہ میں آنے والی مصیبتوں پر صبر کیا تو ہم نے ان میں ایسے پیشوا بنائے جن کی حق و ہدایت میں لوگ پیروی کرتے تھے اور وہ حق کی طرف لوگوں کی راہنمائی کرتے تھے۔ وہ یہ سب کچھ ہمارے حکم دینے کی وجہ سے اور ہماری تائید و تقویت کے ساتھ کرتے تھے۔ وہ اپنے رسولوں پر نازل ہونے والی اللہ کی آیتوں کی بھرپور انداز میں تصدیق کرتے تھے۔

25-اے رسول( صلى اللہ عليہ وسلم )! بلاشبہ آپ کا رب ہی ہے جو قیامت کے دن ان کے درمیان ان چیزوں کا فیصلہ کرے گا جن میں وہ دنیا میں اختلاف کرتے تھے، چنانچہ وہ واضح کر دے گا کہ کون سچا تھا اور کون جھوٹا۔ پھر وہ ہر ایک کو وہ بدلہ دے گا جس کا وہ حق دار ہوگا۔

26-کیا یہ اندھے ہیں کہ انھیں پتا نہیں چلتا کہ ان سے پہلے ہم نے کتنی پچھلی قوموں کو ہلاک کیا؟! اور یہ ہیں کہ ان کے مکانوں میں چل پھر رہے ہیں جن میں وہ ہلاکت سے پہلے رہتے تھے اور پھر بھی ان کی حالت سے نصیحت نہیں پکڑتے۔ بلاشبہ ان پچھلی قوموں کے کفر اور نافرمانیوں کی وجہ سے ان کی ہلاکت و تباہی کے جو واقعات پیش آئے، ان میں یقیناً عبرتیں ہیں جن سے ان تعلیمات کی سچائی ثابت ہوتی ہے جو ان کے رسول، اللہ کی طرف سے ان کے پاس لے کر آئے۔ کیا اللہ کی آیات کو جھٹلانے والے لوگ قبول کرنے اور نصیحت حاصل کرنے کی غرض سے نہیں سنتے؟

27- مرنے کے بعد دوبارہ جی اٹھنے کو جھٹلانے والے یہ لوگ دیکھتے نہیں کہ ہم بارش کا پانی بنجر اور خشک زمین کی طرف بھیجتے ہیں جس میں کوئی سبزہ نہیں ہوتا، پھر اس پانی کے ساتھ ہم کھیتی نکالتے ہیں جس سے ان کے اونٹ، گائیں اور بکریاں کھاتی ہیں اور وہ خود بھی اس سے کھاتے ہیں؟! کیا وہ یہ دیکھتے نہیں اور انھیں یہ شعور اور سمجھ نہیں کہ جس نے خشک زمین کو سرسبز و شاداب کیا، وہ مُردوں کو زندہ کرنے پر قادر ہے؟!

28- دوبارہ جی اٹھنے کو جھٹلانے والے لوگ عذاب کی جلدی مچاتے ہوئے کہتے ہیں: وہ فیصلہ کب ہوگا جس کے بارے میں تمھارا خیال ہے کہ وہ قیامت کے دن ہمارے اور تمھارے درمیان جدائی ڈال دے گا، پھر ہمارا ٹھکانا آگ ہوگا اور تمھارے لوٹنے کی جگہ جنت ہوگی؟!

29- اے رسول( صلى اللہ عليہ وسلم )! ان سے کہہ دیں: یہ وعدہ قیامت کا دن ہے۔ بلاشبہ وہ بندوں کے درمیان فیصلے کا دن ہے جس دن کو دیکھ لینے کے بعد ان لوگوں کا تصدیق کرنا انھیں کوئی فائدہ نہ دے گا جنھوں نے دنیا میں اللہ کے ساتھ کفر کیا اور نہ انھیں ڈھیل دی جائے گی کہ وہ اپنے رب کے حضور توبہ کریں اور اس کی طرف رجوع کریں۔

30- چنانچہ اے رسول( صلى اللہ عليہ وسلم )! جب یہ اپنی گمراہی پر اڑ ہی گئے ہیں تو آپ ان لوگوں سے منہ پھیر لیں اور انتظار کریں کہ ان کے ساتھ کیا ہوتا ہے۔ یہ بھی اس عذاب کے انتظار میں ہیں جس کی آپ انھیں دھمکی دیتے ہیں۔