1- اللہ تعالیٰ نے ان گھوڑوں کی قسم کھائی ہے جو دوڑتے ہیں یہاں تک کہ ان کے تیز دوڑنے سے ان کے ہانپنے کی آواز سنائی دیتی ہے۔

2- اور ان گھوڑوں کی قسم کھائی ہے جو اپنے سُم زور دار طریقے سے چٹانوں سے ٹکرا کر ان میں سے آگ نکالتے ہیں۔

3- اور ان گھوڑوں کی قسم کھائی جو صبح کے وقت دشمن پر حملہ کرتے ہیں۔

4- پھر اپنے دوڑنے سے غبار اڑاتے ہیں۔

5- اور اپنے شہ سواروں کے ساتھ دشمن کے لشکر میں گھس جاتے ہیں۔

6- بلاشبہ انسان اس خیر کو بہت زیادہ روکنے والا ہے جو اس کا رب اس سے چاہتا ہے۔

7- اور بلاشبہ وہ یہ خیر روکنے پر خود بھی گواہ ہے اور یہ اتنا واضح معاملہ ہے کہ وہ اس کے انکار کی طاقت نہیں رکھتا۔

8- اور وہ مال کی بے حد محبت کی وجہ سے اس میں کنجوسی کرتا ہے۔

9- کیا دنیا کی زندگی سے دھوکا کھانے والا یہ انسان نہیں جانتا کہ جب اللہ تعالیٰ قبروں سے مردوں کو اٹھائے گا اور انھیں حساب کتاب اور جزا سزا کے لیے زمین سے نکالے گا تو معاملہ یوں نہ ہوگا جیسے وہ سمجھتا ہے؟

10- دلوں کی نیتیں اور عقائد وغیرہ سب ظاہر اور واضح کر دیے جائیں گے۔

11- بلاشبہ ان کا رب اس دن ان سے پوری طرح باخبر ہوگا۔ اس سے اپنے بندوں کی کوئی چیز چھپی نہ ہوگی اور وہ ضرور انھیں ان کی جزا دے گا۔