70. Surah Al-Ma'aarij

بت پرستی کا انجام۔ (ف 1) شان نزول : مشرکین مکہ قرآن شریف کی آیتیں سن کر نبی ﷺ کے دائیں بائیں ہوکر نکل جاتے تھے اور قرآن شریف کی پوری نصیحت سننے سے کنیاتے تھے اور آپس میں یہ باتیں کرتے تھے کہ یہ ساری نصیحت اس لیے ہے کہ مرنے کے بعد پھر زندہ ہوں گے اور اس نئی زندگی میں میوہ کھانے کو باغ ملیں گے پھر کہتے تھے کہ اگر یہ بات سچ ہے تو جس طرح بہ نسبت ان مسلمانوں کے دنیا میں ہم راحت و آرام سے ہیں اسی طرح ان پہلے ہم کو بھی وہ باغ ملیں گے اللہ نے یہ آیتیں نازل فرمائیں اور فرمایا کہ جنت کچھ انکے بڑے بوڑھوں کے بنائے ہوئے باغ نہیں کہ بغیر مرضی اللہ کے یہ ان باغوں میں گھس جائیں گے نہیں یہ خیال ان کا بالکل غلط ہے آدمی وایک ایسی ناچیز شے سے یعنی نطفہ سے پیدا ہوا ہے کہ اصل پیدائش کی رو سے اس کی کچھ قدرومنزلت نہیں ہاں اللہ نے انسان کے پیچھے اپنی فرمانبرداری جو لگائی ہے اس کے پورے طور پر ادا ہوجانے کی حالت میں انسان قابل قدرومنزلت کے ہوسکتا ہے۔ قرآن مجید کی جن آیتوں میں اللہ نے اپنی فرمانبرداری کی شکلیں اور شرطیں بیان کی ہیں ان آیتوں کے سننے سے تو یہ لوگ وحشیوں کی طرح بھاگتے ہیں اور اس پر دعوی یہ کہ اللہ کی جنت میں یہ زبردستی گھس جائیں گے اس سے بڑھ کر اور کیا نادانی ہوگی پھر قسم کھاکر فرمایا کہ قدرت سے یہ بھی کچھ بعید نہیں کہ وہ اپنا دین پھیلنے کے لیے ان لوگوں سے بہتر لوگ پیدا کردے۔ اللہ سچا ہے ، ہجرت کے بعد اس کا ظہور ہوگیا کہ انصار لوگ اللہ نے اپنے نبی کی صحبت میں دیدیے جن کی مدد سے اللہ کا دین بہت پھیل گیا اور پھر فرمایا کہ ان کفار کو مسخراپن کی باتیں بنانے کی حالت میں چھوڑ دیاجائے تاکہ ان میں سے جو بغیر فرمانبرداری بجالانے کے مر گئے ان کا پھر زندہ ہوکر اللہ کی جنت میں زبردستی گھس جانا تو درکنار بلکہ جس طرح یہ لوگ دنیا میں بتوں کی طرف دوڑتے ہیں اسی طرح حشر کے دن قبروں سے اٹھ کر حساب وکتاب اور اس بت پرستی کا خمیازہ بھگتنے کے لیے آگے پیچھے میدان حشر کی طرف دوڑیں گے اور بت پرستی کا خمیازہ بھگتنے کے لیے جو کچھ ہوگا اس کا ذکر شروع سورة میں گذرچکا ہے کہ ایک گناہ گار اپنے سارے رشتہ داروں اور تمام دنیا کے مال ومتاع کو معاوضہ میں دے کر عذاب آخرت میں جو کچھ سختی ہوگی اس کا بیان دوزخ کے ذکر کی آیتوں میں اوپر کئی جگہ گذرچکا ہے اللہ اس عذاب سے سب کو اپنی پناہ میں رکھے اور اس عذاب سے بچنے کی توفیق عطا فرمائے۔