41. Surah Fussilat

اللہ کی رحمتیں قرآن کی صورت میں تشریحـ: ان آیات میں خدائے واحد کی صفات بیان کی گئی ہیں کہ وہ رحم کرنے والا بےحد مہربان ہے۔ اس نے انسانوں پر مہربانی کی کہ ایک کتاب جو ہر طرح سے مکمل اور بہترین کتاب ہے انسانوں کی بہتری، آسانی اور کامیابی کے لیے بہترین راہنما اصول بنا کر انسانوں کو وقت پر خبردار کردیا ہے کہ جو اس کے بتائے ہوئے راستوں کو اختیار کرے گا۔ دنیا و آخرت میں کامیاب و کامران ہوگا اور جو اس سے دور رہے گا وہ دنیا و آخرت میں سزا پائے گا ناکام ہوگا۔ عرب لوگوں کی سہولت کے لیے قران پاک ان کی مادری زبان عربی میں نازل کیا گیا اور بےحد آسان زبان، آسان مضمون اور آسان الفاظ میں نازل کیا گیا ہے۔ لیکن ہر دور میں نالائق ہٹ دھرم اور بیوقوف لوگ موجود ہوتے رہے، ہوتے ہیں اور ہوتے رہیں گے جو قرآن کو سمجھنے کی کوشش ہی نہیں کرتے بلکہ صاف کہتے ہیں کہ ہم سننے سمجھنے کے لیے نہ تیار ہیں اور نہ ہی ہمارے دل و دماغ اس کو ماننے کے لیے تیار ہیں۔ لہٰذا ہمارے اور تمہارے درمیان ایک پردہ ہے سو تم اپنا کام کرو اور ہم اپنا کام کرتے ہیں۔ (آیت 5:) ایسے ہی لوگ بد نصیب ہوتے ہیں جو اللہ کی رحمتوں سے ہمیشہ محروم رہتے ہیں اور دنیاوی چکا چوند میں پھنسے رہتے ہیں۔ اور اسی کو نجات کا ذریعہ سمجھتے ہیں۔ علم و حکمت پیغمبروں کی میراث ہے، اور مال و زر فرعون و قارون کی۔ (سیدنا ابوبکر صدیق ؓ

دنیا کی مصروفیات کے ساتھ ساتھ آخرت پر دھیان دینا ضروری ہے۔ اللہ کا حکم نبی ﷺ کی زبانی تشریح : ان آیات کو پڑھنے سے مسلمان کے خصوصی اعتقادات کھل کر سامنے آجاتے ہیں۔ معلوم ہوجاتا ہے کہ رسول کو عام انسانوں پر فوقیت کیوں دی گئی۔ اس لیے کہ وہ انسانیت کی بہترین مثال ہوتا ہے۔ اس کا کام یہ ہوتا ہے کہ اللہ کا پیغام بندوں تک پہنچا دے۔ سب سے پہلے وہ اللہ کی وحدانیت کا حکم سناتا ہے وہ واحد اس لیے ہے کہ اس جیسا خالق، مہربان، منتظم، انصاف کرنے والا اور باخبر اور کوئی نہیں جن، بشر یا فرشتے کوئی بھی اس کے برابر نہیں ہوسکتا۔ اس کی بنائی ہوئی تمام مخلوقات بہترین، مکمل اور نقص سے پاک ہیں۔ مثال کے طور پر زمین کو ہی دیکھ لیں۔ یہاں اللہ غور و فکر کرنے والوں کے لیے کچھ ہلکے پھلکے سائنسی نکات کی طرف بھی اشارہ کرتے ہیں مثلاً زمین کی پیدائش اللہ کے معیار کے مطابق دو دن میں ہوئی یہ دو دن ہمارے 48 گھنٹوں کے دنوں کے برابر نہیں بلکہ بقول قرآن اللہ کا ایک دن ہمارے کئی ہزار سالوں کے برابر ہے اس کا ذکر بہت دفعہ ہوچکا ہے۔ مثلاً : سورة السجدہ آیت 05، سورة اکحج آیت 47، سورة المعارج آیات ایک تا 07 اللہ کے دن کی وضاحت کرتی ہیں مطلب تو صرف یہ ہے کہ زمین کا پیدا کرنا اس کو ایک خاص شکل دینا اور اس کا گردش کرنا اور زمین میں بےبہا خصوصیات کا موجود ہونا، یہ سب صرف اللہ کی ہی حکمت اور قدرت ہے کوئی شخص ایک ریت کا زرہ بھی اپنی قدرت سے پیدا نہیں کرسکتا۔ یہ سب کچھ جان کر بھی اکثر بےعقل انسان اللہ کو ایک ماننے سے انکار کرتے ہیں بلکہ اس کے سوا کئی دوسرے معبود بنا کر ان کی عبادت کرتے ہیں۔ ان سے مصبیت میں مدد مانگتے ہیں جب کہ یہ کام ہرگز نامناسب، کفر اور شرک ہے۔ کوئی ایسے لوگوں سے پوچھے کہ خود ان کو اللہ نے پیدا کیا پھر ان کی پرورش کیلئے یہ کائنات اور بیشمار نعمتیں اور برکتیں پیدا کردیں۔ ہر شخص چاہے وہ کافر ہو، مسلمان ہو، عیسائی ہو یا مشرک، اللہ اپنی یہ تمام نعمتیں اور برکتیں ہر ایک کو برابر دیتا رہتا ہے۔ یہ نہیں کرتا کہ یہ مجھے چھوڑ کر بتوں کی پوجا کرتا ہے تو چلو اس کو زندگی نہ دو ، اولاد نہ دو ، کھانے پینے کو نہ دو ، ہوا، روشنی اور پانی نہ دو ۔ ایسا ہرگز نہیں ہوتا بلکہ اللہ کی یہ وسیع و عریض زمین اور اس میں پیدا ہونے والی ہر نعمت ہر انسان کو برابر ملتی رہتی ہے۔ مگر انسان ہی بےوقوف، ناقدر شناس اور ناشکرا ہے کہ الٹی سیدھی حرکتیں کرتا رہتا ہے اور رسول کے بتائے ہوئے راستوں سے اعراض کرتا ہے۔ پھر اللہ کی قدرتوں کا ذکر کرتے ہوئے آسمانوں اور جہانوں کا ذکر کیا گیا ہے۔ جیسا کہ رب العٰلمین یعنی وہ جہانوں کا رب ہے۔ موجودہ سائنس دان بھی اس نتیجہ پر اب پہنچا ہے کہ اس کائنات میں اس دنیا کے علاوہ بیشمار دنیائیں موجود ہیں۔ اس زمین کی حیثیت پوری کائنات میں ایک باریک ذرے کے برابر ہے کیونکہ ہمارا تعلق اس زمین سے بہت قریب ہے اس لیے صرف اسی کا ہی یہاں ذکر کیا گیا ہے۔ اسی طرح آسمان بھی سات بنائے گئے ہیں جن میں ہمارا قریب ترین آسمان وہ ہے جس کو اللہ نے فرمایا کہ ستاروں سے سجایا گیا ہے۔ اس کے بارے میں سائنسی حقائق کی روشنی میں تفصیلات پچھلے اسباق میں گزر چکی ہیں۔ ایک بہت بڑی حقیقت کہ زمین کی تخلیق پہلے ہوئی اور آسمان کی بعد میں ہوئی جبکہ دوسری بڑی حقیقت کہ آسمان دھوئیں اور مختلف گیسوں کا مجموعہ ہے۔ تیسری بڑی حقیقت یہ بیان کی گئی کہ آسمان صرف یہ ہی نہیں جو ہمیں ستاروں سے بھرا ہوا چھت کی صورت میں نظر آتا ہے۔ چوتھی حقیقت یہ ہے کہ ہر آسمان کا علیحدہ علیحدہ کام ہے۔ جیسا کہ ہمارے آسمان دنیا میں حفاظت کے لیے کئی مختلف مفید قسم کی گیسوں کی بیشمار مضبوط تہیں بنائی گئی ہیں جو انپا اپنا کام کرتے ہوئے ہمیں شہاب ثاقب کی بارش سے محفوظ کرتی ہیں اور اسی طرح بیشمار فضائی آفات سے بچا کر ہمیں مناسب ترین فوائد مہیا کرتی ہیں : مثلاً اوزون کی تہہ ہمیں سورج کی جلا دینے والی تپش سے بچا کر انتہائی مناسب روشنی اور گرمی مہیا کرتی ہے جو انسان کی بقا کے لیے بےحد ضروری ہے۔ آج سائنسدان ان گیسوں کو مختلف نام دیتے ہیں۔ مثلاً وہ یوں کہتے ہیں کہ یہ دھواں۔ کاربن ڈائی آکسائیڈ، نائٹروجن آکسیجن اور آبی بخارات کا آمیزہ ہے۔ جب کہ زمین کا سب سے پہلا ہوائی کرہ کاربن ڈائی آکسائیڈ اور آبی بخارات پر مشتمل ہے اور یہ دونوں گیسیں دھوئیں کے اہم اجزاء ہیں۔ اس گیسی حالت سے ستاروں کے وجود میں آنے کا عمل اب بھی جاری ہے اور جاری رہے گا، اس گیسی عمل کو سائنسدان Nelulae یعنی ستاروں کے وجود میں آنے کا عمل کہتے ہیں۔ یہ تمام نظام کائنات بےحد پیچیدہ مگر انتہائی مناسب موزوں اور مستحکم ہے۔ اس میں ذرہ برابر فرق نہیں آسکتا۔ اللہ کے حکم کے مطابق اور اس کے منظم منصوبے کے مطابق زمین و آسمان کو مل کر ایک کام پر لگنا تھا جس پر ان کو لگا دیا گیا اور اب قیامت تک وہ اس کام سے ہرگز کو تاہی، لاپرواہی یا سستی نہیں کرسکتے یہ اللہ کا ان کو حکم ہے جس کی نافرمانی وہ ہرگز نہیں کرسکتے۔ اس سے اللہ کی حاکمیت اور قدرت کا اندازہ ہوسکتا ہے۔ ڈاکٹر دلدار احمد قادری صاحب اس آسمان و زمین کے رابطہ کو کچھ ان الفاظ میں بیان کرتے ہیں اللہ کا تخلیقی منصوبہ یہ تھا کہ آسمان و زمین باہم مربوط رہیں۔ جیسا کہ فی الحقیقت یہ ہیں۔ زمین شمسی نظام کا حصہ ہے۔ جو خلاء میں سفر کر رہا ہے۔ اور ایسے کرنے کے دوران وہ کئی coments کے راستوں سے گزرتا ہے۔ اور یہ کہ وہ تمام مادہ جو اللہ نے پیدا کیا ہے ان قوانین کی پیروی کرتا ہے۔ جو اللہ تعالیٰ نے اس کے لیے مقرر کئے ہیں۔ (از کائنات قرآن اور سائنس) مندرجہ بالا آیات کافی مشکل آیات ہیں۔ میں نے ان کی وضاحت بڑے ہی عام الفاظ میں کی ہے۔ کیونکہ ان کی وضاحت یا پوری طرح تمام رازوں سے واقف ہونا ابھی تک بڑے بڑے سائنسدانوں کی عقل سے بھی پوشیدہ ہیں۔ جب کہ کائنات کے بارے میں مختلف ماہرین مثلاً کا سمولوجی، ایسٹرو فزکس یا ایسٹرونومی کے ماہرین دن رات تحقیقات اور تجربات میں مصروف ہیں۔ کچھ معلومات بڑے دلچسپ انداز میں داکٹر دلدار احمد قادری صاحب نے لکھی ہیں ملاحظہ ہو : Horizons by Michael A. Seeds - Page 386" زمین ابتدا میں Protoplanet (زمین کی ابتدائی شکل) کے طور پر ظہور میں آئی۔ یہ مندرجہ ذیل چار مدراج سے گزر کر موجودہ شکل تک پہنچی : پہلا مرحلہ ” تفریق “ ( Differentiation ) یہ مرحلہ زمین کے ابتدائی طور پر وجود میں آنے کے دوران یا فوراً بعد میں شروع ہوا۔ یہاں تفریق سے مراد زمین کے مادوں کا کثافت کے فرق کی بنیاد پر علیحدہ علیحدہ ہونا ہے۔ اس مرحلے کے دوران زمین کے بھاری عناصر لوہا اور نکل زمین کے مرکز میں جمع ہوئے اور ہلکے مادے سلیکیٹس (Silicates) باہر کی طرف تیرتے ہوئے اٹھے اور سطح پر آگئے انہوں نے بالآخر ٹھوس حالت اختیار کر کے ایک پتلی تہہ کی شکل اختیار کی اس تہہ کو قشر (Crust) (زمین کا چھلکا) کہتے ہیں۔ چناچہ تفریق کے مرحلے میں زمین بلند کثافت کے مرکز اور ادنیٰ کثافت کے قشر کی شکل میں متمیز ہوئی۔ گڑھوں کی تشکیل (cratering) یہ مرحلہ قشر ارض کے ٹھوس حالت اختیار کرنے پر شروع ہوا۔ شمسی بادل (nebula Solar) میں موجود شہابوں کی بو چھاڑ سے قشر میں گڑھے بننے لگے۔ یہ عمل شمسی بادل کے چھٹنے تک جاری رہا۔ اس عمل میں زمین کے قشر میں اونچ نیچ پیدا ہوئی یعنی نشیب و فراز ظاہر ہوئے۔ سیلاب اندازی (Flooding) یہ اس مرحلے میں زمین کے قشر میں بننے والے نشیب (گڑھے) لاوا یا پانی یا دونوں سے بھر گئے۔ جب تابکار عناصر (Radioactive elements) کے زوال (Decay) کے عمل نے زمین کے اندرونی حصہ کو گرم کیا تو اندر کالا وا زمین کے قشر میں موجود زروں کے ذریعے عود کر باہر نکلنے اور گہرے نشیبوں میں جمع ہونے لگا۔ بعد میں جیسے جیسے کرہ ہوائی ٹھنڈا ہوا تو آبی بخارات کی تکثیف (Condensation) ہوئی اور وہ بارش کی شکل میں برسنے لگے پھر یہ پانی زمین کے قشر کے نشیبوں (گڑھوں) میں جمع ہوا اور اس نے ابتدائی سمندروں کی تشکیل کی۔ سطح کا سست رو ارتقاء (Slow Surface Evolution) زمین کی سطح آہستہ آہستہ تبدیلی کے عمل سے گزرتی ہوئی کوئی 3.5 ارب سالوں میں موجودہ شکل تک پہنچی۔ کئی عوامل (Factors) ہیں جنہوں نے زمین کی سطح کو موجودہ شکل تک لانے میں اپنا کردار ادا کیا۔ قشر زمین بڑے بڑے قطعوں (Sections) پر مشتمل ہے جو حرکت میں ہیں اور آپس میں باہمی عمل (Interaction) کرتے رہتے ہیں۔ قشر زمین کی قدیم تر تاریخ تو معلوم نہیں لیکن تقریبا 250 ملین سال (25 کروڑ سال) قبل آج کے تمام برِاعظم (contenents) آپس میں جڑے ہوئے اور ایک ہی قطع کی شکل میں تھے جسے پنگائیا (Pangaea) کہتے ہیں۔ 25 کروڑ سال قبل زمین کے قشر کے نیچے کے حصے (Mantle) میں چلنے والی لہروں نے Pangaea کو دو قطعوں میں توڑ دیا۔ آگے چل کر ان قطعوں میں مزید تقسیمی عمل ہوا اور نئے قطعے وجود میں آئے اور سطح نے موجودہ شکل اختیار کی۔ پانی کے بہاؤ اور ہواؤں نے بھی زمین کی سطح کو تبدیل کرنے میں اہم کردار ادا کیا ہے۔ زمین کے قشر میں موجود قطعوں کے باہمی عمل کو Plate Tectonics کہا جاتا ہے اکثر پہاڑوں کی تشکیل اسی عمل میں ہوئی ہے۔ شروع میں زمین کا کر رہ ہوائی زیادہ تر کاربن ڈائی آکسائید اور آبی بخارات پر مشتمل تھا۔ جیسے جیسے زمین کا درجہ حرارت گرتا گیا کرہ ہوائی کے بخارات بارش بن کر برستے رہے اور سمندروں کی جسامت بڑھتی گئی۔ کاربن ڈائی اکسائیڈ نے پانی میں حل ہو کر حل شدہ مرکبات کے ساتھ تعامل کر کے کاربونیٹس (carbonates) اور دوسرے Mineral sediments) دھاتیں بنائیں۔ ہوا میں بڑی مقدار میں نائٹروجن گیس باقی رہ گئی۔ جب زمین 25 ارب سال کی ہوئی تو اس کا کرہ ہوائی میتھین (Methane) اور امونیا سے صاف ہوچکا تھا۔ زندگی کا آغاز زمین کی تشکیل کے ایک ارب سال کے اندر ہوا۔ شروع میں جو زندہ اشیاء وجود میں آئیں انہوں نے کرہ ہوائی کو کوئی خاص متاثر نہیں کیا۔ لیکن کوئی 33 ارب سال قبل جب پودوں میں ضیائی تالیف (Photosynthesis) کا عمل شروع ہوا تو کرہ ہوائی کی کاربن ڈائیـ آکسائیڈ اس عمل میں استعمال ہونے لگی۔ اس عمل میں آکسیجن گیس پیدا ہوتی ہے۔ اس آکسیجن کے ہوا میں خارج ہونے سے ہوا میں آکسیجن کی مقدار بڑھی۔ آج ہوا میں کوئی 21 فیصد آکسیجن گیس ہے اور 18 فیصد نائٹروجن ہے۔ باقی دوسری گیسیں ہیں جیسے ارگن، کاربن ڈائی آکسائیڈ وغیرہ۔ (از کائنات قران اور سائنس ) یہ سب کچھ قرآن کے حکم کے مطابق ہے کہ کائنات میں غور و فکر کرو۔ ماہرین فلکیات و سائنسدان دن رات نئی نئی دریافتوں اور کائنات کے رازوں پر سے پردہ اٹھانے کی کوشش میں لگے رہتے ہیں۔ کبھی ٹھیک اور کبھی غلط نتائج سامنے آتے رہتے ہیں۔ جبکہ قرآن پاک کے بتائے ہوئے راز اور بیشمار طبی سائنسی حقائق کی طرف کئے گئے اشارات بالکل سچ اور نہ بدلنے والے ہیں۔ انسان لگا ہوا تو ضرور ہے لیکن اللہ کی بنائی ہوئی اس کائنات کے راز انتہائی معمولی حد تک جان سکے ہیں۔ اور جو جان سکے ہیں ان میں بھی اکثر غلط ثابت ہوتا ہے مثلاً سورج کا ٹھہرے رہنا۔ جب کہ قرآن نے صاف الفاظ میں بتا دیا ہے کہ سورج اپنے مستقر کی طرف چل رہا ہے۔ اب سائنسدان بھی اس سے متفق ہوگئے ہیں۔ اسی طرح بہت سی بنیادی حقیقتیں قرآن پاک میں چودہ سو سال پہلے بتائی جا چکی ہیں۔ اور یہی حقیقتیں قرآن کے سچ ہونے، نبی کے اللہ کا رسول ہونے اور اللہ کے واحد لاشریک ہونے کے پکے ثبوت ہیں۔ حیرت کی بات ہے اتنا کچھ صاف صاف جان لینے کے بعد بھی ہمیشہ سے لوگ اللہ کا انکار، نبی کا انکار اور قرآن کا انکار کرتے چلے آ رہے ہیں۔ تو ایسے نافرمان لوگوں کے برے انجام سے تاریخ بھری پڑی ہے۔ بیشمار قوموں نے اللہ کا انکار کیا خراب اور ناشکری کی زندگیاں گزار دیں اور پھر اللہ کے عذاب کا شکار ہو کر دنیا سے ذلیل و خوار ہو کر رخصت ہوئے اور اس وقت قوم عاد اور ثمود کی مثال دی گئی ہے مگر آج کل کئی قومیں اسی ذلت و خواری کا شکار ہوچکی ہیں۔ ابھی حال ہی میں بہت بڑے ملک روس کا انجام ہمارے سامنے ہوچکا ہے۔ مسلمان بھی جب تک اللہ کی پوری فرمانبرداری کرتے رہے۔ پکے اور سچے مسلمان بنے رہے اللہ نے ان کے لیے فرمایا ہے کہ ہم نے ان کو بچا لیا جو ایمان لائے تھے اور بچ کر چلتے تھے۔ (آیت (18) مگر جو ایمان نہ لائے یا ایمان تو لے آئے مگر سچا اور پکا ایمان نہ لائے تو ان کے لیے اگلی آیات آنکھیں کھول کر چلنے اور محتاط راستے اختیار کرنے کے لیے کافی زیادہ بڑی خبر کا درجہ رکھتی ہیں۔ کیونکہ ان میں نافرمان لوگوں کی سخت سزاء کا ذکر بڑی وضاحت سے کیا گیا ہے۔ اور یہ اللہ کی طرف سے بہت بڑی سہولت ہے انسان کے لیے کہ اللہ خبردار کر رہا ہے بار بار خبردار کر رہا ہے کہ اس زندگی کو کھیل نہ سمجھو۔ اس کو اچھی طرح گزارو کیونکہ اس زندگی کے ایک ایک لمحے کا حساب لیا جائے گا اور اس آنے والی زندگی میں اس کا انعام یا سزا بھی ضرور دی جائے گی۔ تو ملاحظہ ہو۔

حشر کے میدان کی تصویر کشی یعنی حالات تشریح : ان آیات میں تمام انسانوں کو ایک بہت بڑا راز اور ایک بہت بڑی خبر بڑے واضح الفاظ میں دے دی گئی ہے۔ تاکہ لوگ خبردار ہوجائیں اور جہنم کے درد ناک عذاب سے بچ سکیں۔ اور پھر میدان حشر میں دوبارہ زندہ ہو کر اپنے اعمال کو اپنی آنکھوں سے دیکھنا بظاہر ممکن نہیں لگتا مگر قران پاک میں اور احادیث میں بیشمار مرتبہ اس بات کا یقین دلایا گیا ہے۔ پھر انصاف کو برقرار رکھنے کے لیے یہ بھی بتا دیا گیا ہے کہ ہر شخص کے جسم کا ہر عضو خود انسان کے خلاف گواہی دے گا اور انسان اپنے اعمال نامے کی فلم بھی اپنی آنکھوں سے خود دیکھ سکے گا۔ جیسا کہ اللہ نے فرمایا : ان کے کان، آنکھیں چمڑے اور دوسرے اعضاء ان کے خلاف ان کے اعمال کی شہادت دیں گے “ (آیت 20:) قرآن و حدیث کے علاوہ مادی اور سائنسی علوم بھی اس بات کی گواہی دے رہے ہیں۔ جیسا کہ سلطان بشیر محمود صاحب اس کی وضاحت بڑے خوبصورت انداز سے کرتے ہیں لکھتے ہیں : خالقِ کائنات نے کسی بھی چیز کو شعور اور زندگی کے بغیر پیدا نہیں کیا۔ اور انسانی خلیہ اپنی تخلیق میں دراصل نہایت چھوٹے پیمانے پر انسان ہی ہے۔ اس کے علاوہ بھی انسان کی پوری زندگی کا ایک ایک واقعہ اس کے بدن کے ذرات میں جاگزیں ہوتا رہتا ہے۔ قیامت کے دن جسم کے یہی پوشیدہ خلیات زندہ کردیے جائیں گے اور یہی ہمارے خلاف گواہ ہوں گے۔ مزید لکھتے ہیں : اب یہ بھی معلوم ہوچکا ہے کہ ہماری زمین پر ہر سکینڈ باہر کی فضا سے اربوں کھربوں تابکاری کے ذرات برستے رہتے ہیں اور وہ اس قدر طاقت ور ہیں کہ ان میں سے کچھ ہماری زمین کا جگر چیر کر اس سے اس طرح آر پار ہوجاتے ہیں جس طرح روشنی صاف شفاف شیشہ سے گزر جاتی ہے۔ یہ تابکار شعائیں زمین پر ہونے والے تمام حالات واقعات کا ریکارڈ تیار کر رہی ہیں۔ مستقبل قریب میں یہ ممکن ہوگا کہ سائنسدان ان ریکارڈوں کا کھوج لگا سکے اور ان کے اندراج کو پڑھ سکے اور زمین ایک کھلی کتاب کی طرح بولنا شروع کر دے۔ اس لیے قرآن حکیم میں یہ جو بتایا گیا ہے کہ روز جزاء کو انسانی جسم کے اجزاء اس کے اعمال اور خیالات پر شاہد ہوں گے ایک قابل سمجھ سائنسی حقیقت بھی ہے اور وقت آنے پر یہ سب کچھ ظاہر ہوجائے گا مگر اس وقت سزا ملنی ضروری ہوچکی ہوگی کیونکہ اسوقت نہ سفارش چلے گی نہ مال و دولت کام آئے گا اور نہ ہی توبہ قبول کی جائے گی۔ (از قیامت اور حیات بعد الموت) ایسے ہی لوگوں کے لیے اللہ تعالیٰ فرماتے ہیں کہ ہم بھی کفار کو سخت عذاب کے مزے چکھائیں گے اور ان کے برے اعمال کی جو وہ کرتے تھے سزاء دیں گے (آیت 27) تو یہ ہیں غیب کی باتیں اور مستقبل کی خبریں جو بڑے اچھے وقت پر بار بار بتا دی گئی ہیں پھر بھی لوگ اس کی طرف توجہ نہیں دیتے اور کفر و شرک اور برائیوں کی زندگیاں گزارتے ہیں۔ مگر جو لوگ نیک راہیں اختیار کرتے ہیں وہ ہمیشہ فائدے میں رہیں گے۔ سائنس آج ان نتیجوں پر پہنچی ہے جن کی اسلام نے پہلے ہی نشاندہی کردی تھی۔ مگر افسوس اس بات کا ہے کہ انسان سب کچھ جانتے بوجھتے بھی اللہ کا انکار کرتا ہے تو پھر سوائے نقصان کے اس کو اور کیا مل سکتا ہے۔ لیکن جو لوگ اللہ کو مانتے ہیں ان کا ذکر قرآن میں یوں کیا گیا ہے۔ ملاحظہ ہو۔

ایمان والوں کے درجات تشریح : مندرجہ بالا آیات میں پکے اور سچے مسلمانوں کو جنت کی بشارت دی گئی ہے۔ جنت کی تعریف کیا کریں ! جنت ایسے بہترین پر سکون اور پر آسائش باغات اور محلات کی جگہ ہے کہ جس کی مثال دنیا میں نہیں دی جاسکتی کیونکہ وہ اللہ کا دیا ہوا انعام ہے وہاں فرشتے رحمتیں اور برکتیں تقسیم کرتے رہتے ہیں۔ بلکہ وہ ایسی طلسماتی جگہ ہے کہ جو سوچا وہ پا لیا۔ مگر جنت کو حاصل کرنے کے لیے بڑی سخت محنت، خلوص محبت اور قربانی کی ضرورت ہے۔ یہ جس قدر زیادہ ہوگا انعام اسی قدر زیادہ بہترین ہوگا۔ اس کا حاصل کرنا کوئی بہت زیادہ دشوار بھی نہیں اللہ کو مان لینا اس کے احکامات کو مان لینا اور صرف اسی کی ہی عبادت کرنا محض حصول جنت ہی کا باعث نہیں بلکہ دنیاوی زندگی میں بھی سکون کا باعث بنتا ہے۔ ان آیات میں کچھ اخلاقی ہدایات بھی دی گئی ہیں مثلاً برائی کا جواب برائی سے نہیں بلکہ صبر و سکون سے اچھائی میں دو ۔ ایک روایت میں ہے کہ ” محمد ﷺ نے دیکھا ایک شخص غصہ میں آپے سے باہر ہوگیا ہے تو آپ ﷺ نے فرمایا کہ ایسی حالت میں اعوذ باللہ پڑھ لیا کرو “۔ (مشکوٰۃ) پھر توحید پر پوری طرح قائم رہنے کا سبق دیا گیا ہے۔ شرک کو اللہ تعالیٰ نے بہت بڑا ظلم کہا ہے۔ کیونکہ اللہ کو ہماری عبادت کی ضرورت نہیں بلکہ خود ہماری زندگیوں میں سکون، ترتیب اور حسن و خوبی تب ہی پیدا ہوسکتی ہے جب ہم ایک سب سے بڑے ارفع و اعلیٰ ، مضبوط ترین رب العٰلمین کو اپنا مالک و آقامان کر صرف اسی کی عبادت کریں۔ اسی کے سامنے جھکیں اور اسی سے ہر طرح کی مدد مانگیں۔ بجائے اس کے کہ اس کی پیدا کردہ چیزوں کو معبود بنا بیٹھیں اور بجائے یکسو ہو کر مطمئن زندگی گزارنے کے ادھر ادھر بھٹکتے پھریں دنیا بھی خراب اور آخرت تو بہت ہی خراب کرلیں۔ اسی لیے شرک کو خود اپنے اوپر ظلم کرنے کا درجہ دیا گیا ہے جو کہ ہر لحاظ سے نقصان کی بات ہے۔ ہر شخص کو معلوم ہے کہ دین اسلام کی بنیاد ہی توحید پر ہے۔ جیسا کہ سورة لقمان میں سب سے پہلی نصیحت ان الفاظ میں کی کئی ہے : اے میرے بیٹے اللہ کے ساتھ شرک مت کرنا، یقینا شرک بہت بڑا ظلم ہے۔ جو لوگ اللہ پر پکا یقین رکھتے ہیں۔ وہ نیکی کا حکم دیتے ہیں نیک عمل کرتے ہیں۔ حسن سلوک اور درگزر کو اپنی زندگی کا معیار بناتے ہیں۔ وہی اللہ کے مقبول ترین بندے ہوتے ہیں اور آخر میں توحید کی تاکید دوبارہ کی گئی ہے۔ اللہ کی پیدا کردہ کسی چیز کو سجدہ نہ کرو بلکہ صرف اللہ کو سجدہ کرو جس نے انہیں (تمام کائنات مخلوقات) بنایا اگر تم اسی ( اللہ ) کی عبادت کرتے ہو “۔ (آیت 37) اگلی آیت میں سجدہ ہے۔