37. Surah As-Saaffaat

کیا فرشتے اللہ کی بیٹیاں ہیں ؟ تشریح : کفار مکہ کی نالائقی اس حد تک بڑھی ہوئی تھی کہ وہ شرک و کفر کی غلاظت میں ڈوبے رہتے اور جو منہ میں آتا بکتے رہتے۔ اسی میں سے ایک انتہائی غلط بات جو انہوں نے کی وہ یہ تھی۔ وہ کہتے کہ نعوذ باللہ فرشتوں اور جنوں کے ساتھ اللہ کی رشتہ داریاں ہیں جنوں کی سردار زادیوں سے فرشتے پیدا ہوتے ہیں جو کہ اللہ کی بیٹیاں ہیں۔ اللہ معاف کرے قرآن پاک میں کئی جگہ پر اللہ کی بڑائی بیان کی گئی ہے اس کی ذات ہر قسم کی رشتہ داری سے بلند ہے۔ اسے کسی بیوی، بچے، بہن، بھائی، چچا، ماموں یا سسرالی رشتہ داروں کی قطعا ً کوئی ضرورت نہیں وہ بس اکیلا ہے ہمیشہ سے ہے اور ہمیشہ رہے گا۔ فرشتے نور سے بنائے گئے ہیں اور وہ جس کام کے لیے بنائے گئے ہیں وہ صف باندھے کھڑے رہتے ہیں حکم کے انتظار میں اور صرف اللہ کی تسبیح و تقدیس کرتے ہیں اور اپنی مقرر کردہ ڈیوٹی دیتے ہیں۔ ان کی مجال نہیں کہ وہ ایک لمحے کے لیے بھی ان دونوں کاموں سے غافل ہوجائیں۔ رہ گئے جنات تو جنات آگ سے بنائے گئے ہیں۔ جنات میں اچھے برے موجود ہیں جیسے انسانوں میں اچھے برے موجود ہیں۔ ان کو معلوم ہے کہ وہ بھی اللہ کے حضور حاضر ہو کر سزا و جزا پائیں گے۔ البتہ ان میں سے ایک جن شیطان کے عہدے پر فائز ہوچکا ہے۔ وہ بھی خود اپنی نافرمانی کی وجہ سے۔ جیسا کہ ذکر ہوچکا ہے۔ آدم کو سجدہ کرنے سے انکار کردیا تھا جس کی وجہ سے اللہ نے اس پر لعنت کی اور اس نے روز اوّل سے ہی اللہ سے کہا تھا کہ ” میں تیرے بندوں کو ضرور بہکاؤں گا۔ “ (النساء : 119) تو اس کے جواب میں اللہ جل شانہ فرماتے ہیں۔ ” شیطان کا زور تو انہی لوگوں پر چلتا ہے جو اس کو سر پرست بناتے ہیں اور اس کے بہکانے سے شرک کرتے ہیں۔ “ ( سورة نحل 100) اس سلسلے میں رب العزت نے اپنے بندوں کو صاف صاف الفاظ میں بتا دیا ہے۔ ” اے اولاد آدم ! دیکھو کہیں ایسا نہ ہو کہ شیطان تمہیں پھر بہکا دے، جس طرح اس نے تمہارے والدین کو جنت سے نکلوایا تھا “ ( سورة اعراف :27) کائنات کے مالک و خالق رب العٰلمین، رحمن و رحیم نے انسان کو مخاطب کر کے فرمایا۔ ” اے آدم کی اولاد ! کیا میں نے تم کو ہدایت نہ کی تھی کہ شیطان کی عبادت نہ کرو، وہ تمہارا کھلا دشمن ہے اور یہ کہ میری عبادت کرو یہ سیدھا راستہ ہے ( سورة یس 61-60) امید ہے اللہ کی بڑائی اور اس کی مہربانی اچھی طرح واضح ہوگئی ہے۔ اسی طرح فرشتوں کا کام اور پھر شیاطین کا کام اور جنوں کی مخلوقات کے بارے میں اچھی طرح سمجھ میں آگیا ہوگا۔ اب یہ کفار جو اپنے پاس سے رشتہ داریاں اور جنوں اور فرشتوں کے بارے میں بک رہے ہیں تو یہ صرف حسد، بغض اور اسلام کے ساتھ نفرت کی وجہ سے بک رہے ہیں۔ کیونکہ ان کے بیانات بالکل بےبنیاد اور من گھڑت ہیں۔ ان کے پاس اپنے اس قول کو ثابت کرنے کے لیے کوئی دلیل، کوئی کتاب اور ثبوت نہیں۔ کیونکہ کسی بھی دعوے کو ثابت کرنے کے لیے تین قسم کے دلائل ضروری ہوتے ہیں۔ 1۔ یہ کہ خود اپنی آنکھوں سے دیکھا ہو۔ 2۔ کسی مانے ہوئے سچے آدمی کا قول۔ 3۔ جس کو عقل مان سکے یعنی عقل سلیم مانے، تو ان لوگوں کے پاس اپنی اس فضول بات کو ثابت کرنے کے لیے کچھ بھی موجود نہیں۔ یہ تو صرف شیطان کی پیروی میں بک رہے ہیں۔ سورة انعام میں اللہ جل شانہ نے فرمایا ہے۔ ” انسانوں میں بھی شیطان ہوتے ہیں اور جنات میں بھی “۔ (آیت 112) انسانوں کو چوکنا رہنا چاہیے کیونکہ انسانوں میں بھی شیطان ہوتے ہیں جو اکثر بڑے خیر خواہ بن کر بڑی محبت بھری باتوں سے ہر برائی کو اچھائی بنا کر لوگوں کو گمراہ کرتے ہیں۔ لوگوں کو ہوشیار رہنا چاہیے کہ شیطان جن اور شیطان انسان، سب ہی دوزخ میں ڈالے جائیں گے۔ یہ اللہ کا فرمان ہے اور قرآن پاک میں بار بار بتایا گیا ہے اس لیے بالکل سچ ہے اور یہ بھی ثابت ہوگیا کہ جن، انسان اور فرشتے اللہ کے پیدا کیے ہوئے ہیں اور جن و انسان اپنے اعمال کے مطابق سزا اور جزا ضرور پائیں گے کیونکہ ان کو ارادہ و اختیار دیا گیا ہے جبکہ فرشتے اپنی مرضی سے ہرگز کچھ نہیں کرسکتے صرف اللہ کے حکم پر چلتے ہیں۔

رسولوں کی مدد اور کفار پر عذاب تشریح : نبی اکرم ﷺ کی بعثت سے پہلے کفار یہ کہا کرتے تھے کہ ” اگر ہمارے پاس بھی کوئی پیغمبر آتا جس طرح یہود و نصاریٰ کے پاس آئے تھے تو ہم ضرور نیک پاک فرمانبردار لوگ ہوتے “ لیکن اب جب کہ ان کے پاس پیغمبر آیا ہے تو یہ ماننے کے لیے ہرگز تیار نہیں بلکہ ہر وقت رسول اور ان کے پیرؤوں کے دشمن بنے رہتے ہیں تو اللہ الہ العٰلمین نبی اور مسلمانوں کو تسلی دیتے ہیں اور خوشخبری بھی دیتے ہیں کہ فتح ہمیشہ حق کی ہی ہوگی یہ لوگ چاہے جو مرضی ہے کرلیں اللہ کے نیک بندوں کی ہی مدد کی جائے گی اور انہی کو کامیابیاں بھی دی جائیں گی۔ یہ خوشخبری جنگ بدر اور فتح مکہ میں مسلمانوں کی شاندار کامیابی سے ثابت ہوگئی۔ پھر ان کفار و مشرکین اور گمراہ لوگوں کے لیے آخرت میں درد ناک عذاب کا پیغام بھی دیا گیا ہے۔ اور آخر میں صاف الفاظ میں اعلان کردیا گـیا ہے کہ اللہ کی ذات ان تمام لوگوں کی باتوں سے بہت بلند اور پاک و صاف ہے اور اس کی رحمتیں، برکتیں اور فضل و کرم اس کے نیک بندوں رسولوں اور پیغمبروں پر ہر وقت ہوتی رہتی ہیں۔ اس کی تعریف کرنا بہت مشکل کام ہے کیونکہ اس میں بیشمار صفات جمع ہیں وہی سب کا خالق، رب اور محافظ ہے۔ ہر کام کی ابتداء اللہ کے نام سے کرنا اور اسی پر بھروسہ کرتے ہوئے ہر کام کرنا چاہیے مگر مشکل یہ ہے کہ آج کا مسلمان لا الہ الا اللہ کہتا ضرور ہے مگر اس کی حقیقت تک نہیں پہنچتا اور نہ ہی پہنچنے کی کوشش ہی کرتا ہے بس وہ صرف اتنا ہی جانتا ہے کہ میں مسلمان ہوں ہم کیونکہ پیدائشی اور بنے بنائے مسلمان ہیں اس لیے کبھی گہرائی میں جا کر اسلام کا مطالعہ کرنے کی کوشش ہی نہیں، جبکہ حقیقی مسلمان وہ ہے جو اللہ تعالیٰ کے احکامات کو غور وخوض سے سمجھنے کی کوشش کرتا ہے۔ یہ شہادت گہ الفت میں قدم رکھنا ہے لوگ آسان سمجھتے ہیں مسلماں ہونا (علامہ اقبال ) خلاصہ سورة اَلصّٰٓفّٰت اس سورة مبارکہ کا خلاصہ ہم یوں بیان کریں گے اگر حمد وثناء کرنی ہے تو اللہ کی کرو۔ اگر تابعداری کرنی ہے تو نبی اکرم ﷺ کی کرو۔ اگر دینا چاہتے ہو تو اللہ کی راہ میں دو ۔ اگر جانا چاہتے ہو تو متبرک مقامات پر جاؤ۔ اگر مارنا چاہتے ہو تو اپنے نفس کو مارو۔ اگر کام آنا چاہتے ہو تو غریبوں کے کام آؤ۔ اگر پینا چاہتے ہو تو غصہ کو پیو۔ اگر ڈرنا چاہتے ہو تو اللہ سے ڈرو۔ اگر رونا چاہتے ہو تو اپنے گناہوں پر روؤ۔ اگر جھکنا چاہتے ہو تو اللہ کے سامنے جھکو۔ اگر بھروسہ کرنا چاہتے ہو تو اللہ پر بھروسہ کرو۔ اگر یاد رکھنا چاہتے ہو تو موت کو یاد رکھو۔ بہر حال سچا اور پکا مسلمان وہی ہے جو زندگی کی اس دوڑ میں اللہ کی توحید، پیغمبر ﷺ کی سنت اور آخرت کو ہر وقت نگاہ میں رکھ کر زندگی بسر کرنے کی کوشش کرے۔ بس پھر زندگی آسان اور معاملہ صاف ہے۔ اللہ تعالیٰ ہم سب کو ایسی ہی زندگی گزارنے کی توفیق عطا فرمائے۔ آمین ” وہ اللہ ہی ہے جس نے اپنے رسول کو ہدایت اور دین حق کے ساتھ بھیجا ہے تاکہ اسے باقی تمام ادیان پر غالب کر دے خواہ مشرکوں کو کتنا ہی ناگوار ہو “۔ ( سورة توبہ آیت 33)