75. Surah Al-Qiyaama

36 زوجین کا وجود قدرت کا ایک اور کرشمہ : سو ارشاد فرمایا گیا کہ پھر اس نے اس سے اس کا جوڑا بنایا نر اور مادہ : اور اس قدر عجیب و غریب طریقے سے ‘ اور حیرت انگیز طور پر کہ ان دونوں میں سے ہر ایک کے اندر وہ خصائص رکھے جو دوسرے کیلئے گویا کہ باعث تکمیل ہیں ‘ اور ایک عظیم الشان اور سعادت مند زندگی کیلئے لازم و ملزوم ہیں ‘ تو پھر یہ انسان بےمقصد اور غیر ذمہ دار کیونکر قرار دیا جاسکتا ہے ؟ کہ یہ کیڑے مکوڑوں اور برساتی مینڈکوں کی طرح یونہی مرکھپ کر ختم ہوجائے ‘ کلاثم کلا ہرگز ایسے نہیں ہوسکتا ‘ سو اس ارشاد ربانی میں انسان کیلئے خود اس کے اپنے مراحل تخلیق و تکمیل میں غور و فکر کی دعوت ہے ‘ کہ اس کے خالق ومالک نے اپنے کمال قدرت و حکمت اور اپنی بےپایاں رحمت و عنایات سے اس کو کہاں سے کہاں پہنچایا ؟ انسان کی پیدائش پانی کی ایک بوند سے ہوتی ہے ‘ جس کو رحم مادر میں ٹپکا دیا جاتا ہے اور اس کو ٹپکانے کے بعد یہاں پر یمنی کے صیغہ مجمول سے ذکر فرمایا گیا ہے ‘ جس سے اس کے عدم اعتناء و اہتمام کی طرف اشارہ ہوتا ہے ‘ کہ ٹپکانے والا ایک بوند ٹپکا کر الگ ہوجاتا ہے ‘ پھر اس کو کچھ خبر نہیں ہوتی کہ وہ بوند کہاں اور کس حال میں ہے ‘ اور نہ ہی اس ماں کو کچھ پتہ ہوتا ہے جس کے رحم کے اندر یہ بوند مختلف مراحل سے گزرتی ہے ‘ کہ اس پر کس باریکی سے کیا تبدیلی رونما ہو رہی ہے ‘ سو اس قادر مطلق کی قدرت مطلقہ اور حکمت بالغہ سے یہ تہ بہ تہ تاریکیوں کے انڈر اپنی بےمثال صنعت و کاریگری کے ذریعہ اس کو پایہ تکمیل تک پہنچاتی ہے اور اس کو بچے یا بچی کی صورت میں وجود میں لاتی ہے ‘ سو انسان اگر اسی میں صحیح طور سے غور کرے تو اس کا راستہ سیدھا ہوجائے اور وہ دل و جان سے اپنے اس خالق ومالک کے حضور جھک جھک جائے۔ سبحانہ و تعالیٰ ۔ اور اس طرح وہ سعادت دارین سرفراز و سرخرو ہوجائے۔

37 انسان کا وجود خود اعادئہ خلق کا ثبوت و شاہد : سو اس حقیقت کے اثبات و اقرار کے طور پر استفہام تقریری کی صورت میں ارشاد فرمایا گیا کیا وہی خداوند قدوس اس پر قادر نہیں کہ وہ مردوں کو زندہ کرے ؟ ہاں وہ اس پر قادر ہے ‘ اور ضرور قادر ہے سبحانہ و تعالیٰ ۔ اور وہ ایسا کرے گا اور اکمل طریقے سے کرے گا ‘ جل شانہ و عز برہانہ سو جب وہ اپنی قدرت مطلقہ اور حکمت بالغۃ سے انسان کو اس طرح حیظہ عدم سے نکال کر منصہ شہود پر لے آیا اور برابر لارہا ہے ‘ اور یہ سب کچھ تمہارے سامنے ہو رہا ہے اور لگاتار ہو رہا ہے ‘ تو پھر اس کیلئے اس انسان کو دوبارہ پیدا کرنا آخر کیوں اور کیا مشکل ہوسکتا ہے ؟ سبحانہ و تعالیٰ صحیح احادیث میں وارد ہے کہ اس آیت کریمہ کی تلاوت پر یوں کہنا چاہیے : " سبحانک اللھم فبلی فزدنا اللھم ایمانا بک و یقینا ‘ و خشوعا لک و خضوعا یا ذالجلال والاکرام و آخر دعوانا ان الحمد للہ رب العالمین۔ "