Ayah 56:41(41) اور بائیں ہاتھ والے سو وہ بائیں ہاتھ والے کیسی بری حالت میں ہیں۔ یعنی جن کے نامہ اعمال بائیں ہاتھ میں دیئے گئے یا ان کو بائیں جانب کھڑا کیا گیا۔
Ayah 56:42(42) وہ لوگ آگ میں اور کھولتے ہوئے گرم پانی میں۔
Ayah 56:43(43) اور سیاہ دھوئیں کے سائے کے نیچے ہوں گے۔
Ayah 56:44(44) وہ سایہ نہ ٹھنڈا ہوگا نہ وہ باعزت اور فرحت بخش ہوگا یعنی اہل شقاوت مختلف اور گونا گوں عذابوں میں مبتلا ہوں گے۔ اسی کی یہ تفصیل ہے سموم گرم بھاپ جو آگ کی طرح تیز ہوا اور آگ کا کام کریاسی لئے کسی نے آگ کا ترجمہ کیا اور کسی نے لو اور گرم ہوا ترجمہ کیا اور گرم پانی پینے کو یا گرم کھولتا ہوا پانی سروں پر ڈالا جائے گا۔ سیاہ دھوئیں کے سائے تلے یعنی سروں پر سیاہ دھوئیں کے بادل چھائے ہوئے ہوں گے یعنی نہ اس سائے تلے سائے کی سی ٹھنڈک نہ کو ب آبرو مندانہ فرحت ومنفعت اور نہ وہ سایہ نفع بخش۔
Ayah 56:45(45) یہ لوگ اس سے پہلے بڑے خوش عیش آسودہ اور ناز پروردہ تھے۔ یعنی دنیا میں آسودہ حالی کی زندگی بسر کرتے تھے۔
Ayah 56:46(46) اور یہ بڑے بھاری گناہ پر اڑتے اور اصرار کرتے تھے۔ یعنی شرک پر مداومت اور ضد کرتے تھے۔
Ayah 56:47(47) اور یوں کہا کرتے تھے کہ جب ہم مرگئے اور مٹی اور ہڈیاں ہوگئے تو کیا ہم دوبارہ زندہ کرکے اٹھائے جائیں گے۔
Ayah 56:48(48) اور کیا ہمارے اگلے باپ دادا بھی اٹھائے جائیں گے۔
Ayah 56:49(49) اے پیغمبر آپ فرمادیجئے کہ سب اگلے اور پچھلے۔
Ayah 56:50(50) ایک مقررہ دن میں جب اس کا وقت آئے گا ضرور جمع کئے جائیں گے۔ ظاہر ہے کہ وہ بعث بعدالموت کے منکر تھے اس لئے ان کو جہنم میں وہ بات یاد دلائی جائیگی اور یہاں ان کو نبی کریم ﷺ کی زبان مبارک سے جواب بھی دلوایا گیا یعنی یہ امر کوئی مستبعد نہیں اس دن کا جو وقت مقرر ہے جب وہ وقت آئے گا تو سب اگلے پچھلے جمع کئے جائیں گے۔
Ayah 56:51(51) پھر اے گمراہو اور دین حق کی تکذیب کرنے والو۔
Ayah 56:52(52) تم کو زقوم کے درخت سے کھانا ہوگا۔ زقوم کی تفصیل والصفت میں گزر چکی ہے۔
Ayah 56:53(53) پھر اسی سے پیٹوں کو بھرنا ہوگا۔
Ayah 56:54(54) پھر اس زقوم کے اوپر سے گرم کھولتا ہوا پانی پینا ہوگا۔
Ayah 56:55(55) پھر اس پانی کو اس طرح پیو گے جیسے ان پیاسے اونٹوں کا پینا جو استسقاء کی بیماری میں مبتلا ہوں۔
Ayah 56:56(56) قیامت کی دن یہ ان لوگوں کی مہمانی کا سامان ہوگا۔ یعنی زقوم جیسا بدمزہ بدبودار درخت تمہاری خوراک ہوگا اس سے کھانے والے ہوگے اور اسی سے پیٹ بھرنے والے ہوگے پھر اس تکلیف دہ خوراک کے اوپر سے ایسا گرم کھولتا ہوا پانی پیو گے اور پیو گے بھی اس طرح جیسے تو نس کے مارے اونٹ پانی پیا کرتے ہیں۔
ھیم الجمل الذی بہ الھیام۔ ہیام کوئی بیماری ہے جو استسقاء کے مشابہ ہوتی ہے اس میں پیاس بہت لگتی ہے اور کتنا ہی پانی پئے پیاس نہیں بجھتی ۔ یا تین دن کے پیاسے اونٹ، جیسا کہ بعض نے کہا ہے مطلب یہ ہے کہ جس طرح پیاسے اونٹ پانی پر گرتے ہیں اسی طرح تم بھی پانی پر گروگے مگر پانی ایسا تیز گرم ہوگا کہ انتڑیاں کٹ کر باہر آپڑیں گی ، یو م الدین یعنی قیامت کے دن اور روز جزا کو یہ ان کی مہمانی ہوگی۔ یہ تمام اس عذاب کی تفصیل بیان فرمائی جو پناہ بخدا جہنم میں پیش آنے والا ہے اب آگے دلائل قدرت کیساتھ بعث بعدالموت کا ذکر فرماتے ہیں۔
Ayah 56:57(57) ہم ہی نے تم کو پیدا کیا ہے پھر تم یقین کیوں نہیں کرتے۔ یعنی دوبارہ زندہ ہونے کا یقین کیوں نہیں کرتے اور یہ کیوں نہیں سمجھتے کہ جس نے پہلی مرتبہ بنایا ہے وہ دوبارہ بھی بنا سکتا ہے اور زندہ کرسکتا ہے۔
Ayah 56:58(58) بھلا دیکھو تو جو مٹی تم ٹپکاتے اور پہنچاتے ہو۔ یعنی عورتوں کے رحم میں۔
Ayah 56:59(59) کیا تم اس کو انسان بناتے ہو یا ہم اس کے بنانے والے ہیں۔ یعنی مادہ منویہ کا ڈال دینا اور منی کا رحم میں پہنچانا بظاہر تمہارا کام ہے۔ لیکن نطفے کے رحم میں پہنچنے کے بعد اس کو بنانا اور رحم مادر میں اس کی تخلیق یہ کس کا کام ہے اور اندھیری کوٹھری میں کس کا دست صنعت اپنی کاریگری کے جوہر دکھاتا ہے اور وہ کس کی کلک قدرت ہے جو پانی کی بوند کو جیتا جاگتا خوش نما انسان بنانکالتا ہے۔
Ayah 56:60(60) ہم ہی نے تم میں مرنے کا ایک وقت معین کررکھا ہے اور موت کو تم میں اور تمہارے درمیان ٹھہرارکھا ہے اور ہم اس بات سے عاجز نہیں ہیں۔
Ayah 56:61(61) کہ تمہاری جگہ تم ہی جیسی کوئی اور قوم لے آئیں اور تم کو وہاں اٹھا کر کھڑا کریں جہاں تم نہیں جانتے - یعنی موت کو تمہارے مابین ٹھہرا رکھا ہے اور ایک اندازہ مقرر کررکھا ہے جس طرح رزق تقسیم شدہ ہے اور ایک اندازے سے بٹتا ہے اسی طرح موت بھی تقسیم شدہ ہے اور مقررہ وقت پر پہنچتی ہے اور جب موت اور زندگی پر ہمارا قبضہ اور کنٹرول ہے توہ ہم اس بات سے عاجز نہیں ہیں کہ تم کو مار کر ختم کردیں ار تم کو موت بھیج کر ماردیں اور تمہاری جگہ تم ہی جیسی شکل وشباہت کی کوئی اور قوم لے آئیں جیسا کہ انقلاب ارضی میں یہ عام طور پر ہوتا رہا ہے بلکہ ہزار ہا تاریخی شواہد موجود ہیں کہ ایک قوم کو ختم کیا دوسری قوم کو لے آئے اور اگر لفظ موت نہ ہوتا تو شاید تبادلہ آبادی بھی آیت شامل ہوجاتی۔
الایہ کہ یوں کہا جائے کہ موت حقیقی ہو یا مجازی یعنی تمکو مار کر کسی دوسری قوم کو تم سے بدل دیں یا تم کو ایک حصہ ارضی سے بالکل نکال دیں اور تمہاری جگہ دوسری قوم کو لاکر آباد کردیں۔
جیسا کہ فرمایا ان یشایذھبکم ایھا الناس ویات باخرین والمحصنات۔ وہاں تبادلہ آبادی کا استدلال بلا تکلیف موجود ہے لیکن یہاں تکلف وتعسف سے خالی نہیں ہے اس لئے ہم نے اس کو ترک کردیا اور آزاد منش لوگوں کی طرح تفسیر نہیں کی۔
بہرحال ہم اس بات سے عاجز نہیں کہ تم کو موت دے کر مٹا دیں اور تم ہی جیسی کوئی اور قوم یعنی انسانوں کی قوم کو لابسائیں اور تم کو کہیں اور لے جائیں جس کو تم نہ جانتے ہو یعنی تمہاری شکل و صورت کو مسخ کردیں بندر اور سور بنادیں جیسا کہ صاحب جلالین نے فرمایا۔
حضرت شاہ صاحب (رح) فرماتے ہیں یعنی تم کو اور جہاں میں لے جاویں تمہاری جگہ یہاں اور خلقت بسا دیں۔
خلاصہ : یہ کہ صورت شکل بدل دیں یا اس عالم میں لے جائیں جس کو تم نہیں جانتے اور اس عالم کا انکار کرتے ہو یعنی عالم برزخ اور عالم آخرت۔
Ayah 56:62(62) اور بلا شبہ تم ابتدائی پیدائش اور پہلی مرتبہ کے پیدا کرنے کو تو جان ہی چکے پھر تم دوبارہ پیدا ہونے کو کیوں نہیں سمجھتے۔ یعنی پہلی مرتبہ کا پیدا ہونا تو تمہاری نگاہوں کے سامنے ہے اور تم کو اس کا علم ہے پھر دوبارہ اعاد سے اور دوبارہ پھر پیدا کرنے کی بات کیوں نہیں سمجھتے اس میں کیا دشواری ہوگئی جو بعث پر ایمان نہیں لاتے۔
Ayah 56:63(63) بھلا دیکھو تو جو بیج اور تخم بوتے اور زمین میں ڈالتے ہو۔
Ayah 56:64(64) اس کو تم اگاتے ہو یا ہم اس کے اگانے والے ہیں۔ یعنی زمین میں جو تخم ریزی کرتے ہو پھر بتائو کہ اس کو اگاتا کون ہے اور نباتات کا نمو کون کرتا ہے تم یا ہم۔
Ayah 56:65(65) اگر ہم چاہیں تو اس پیداوار کو سوکھا ہوا چورا کردیں پھر تم متعجب اور نادم ہوکر رہ جائو اور سارے دن باتیں بناتے رہو۔
Ayah 56:66(66) کہ ہم پر تو مفت کا تاوان اور چٹی ہی پڑی۔
Ayah 56:67(67) بلکہ ہم تو بالکل ہی محروم اور بےنصیب رہ گئے۔ یعنی کچھ بھی پلے نہ پڑا اور نقصان ہی نقصان میں رہ گئے۔
Ayah 56:68(68) بھلا دیکھو تو جو پانی تم پیتے ہو۔
Ayah 56:69(69) اس کو بادل سے تم برساتے ہو یا ہم برسانے والے ہیں۔
Ayah 56:70(70) اگر ہم چاہیں تو اس بارش کے پانی کو کھاری کردیں پھر تم شکر کیوں نہیں بجا لاتے۔
Ayah 56:71(71) بھلا دیکھو تو جس آگ کو تم سلگایا کرتے ہو۔
Ayah 56:72(72) تو کیا اس آگ کے درخت کو تم نے پیدا کیا ہے یا ہم پیدا کرنے والے ہیں۔
Ayah 56:73(73) ہم نے اس آگ کو موجب نصیحت اور مسافروں کے لئے بڑے فائدے کی چیز بنایا ہے۔
Ayah 56:74(74) سو اے پیغمبر آپ اپنے عظیم الشان پروردگار کے نام کی پاکی بیان کیجئے۔ حضرت حق جل مجدہ نے اپنی قدرت کا مہ کو کیا خوب ترتیب سے بیان فرمایا ہے پہلے انسانی پیدائش اور عطائے وجود کا ذکر فرمایا اور یہ بات بتائی کہ انسان کی پیدائش اور اس کی ساخت میں ہماری ہی قدرت کا ظہور ہے گو بظاہر تم کو یہ معلوم ہوتا ہے کہ تمہاری مشقت کو دخل ہے لیکن حقیقتاً سب جگہ ہماری ہی فرماں روائی کو دخل ہے۔
مثلاً چند قطروں کا رحم میں ڈال دینا یہ تمہارا کام ہے لیکن رحم مادر میں ان قطروں کو انسانی شکل میں بنانا یہ کس کا کام ہے زمین میں تخم پاشی بظاہر تم کرتے ہو ہل چلاتے ہو بیج ڈالتے ہو لیکن اناج کا اگانا اور کھیتی کو پروان چڑھانا یہ کس کا کام ہے اگر ہم چاہیں تو اس کھیتی کو خشک کردیں اور چورا کردیں جیسا کہ سوروہ یونس اور سو رہ کہف میں گزر چکا ہے پھر سوائے اس کے کہ تم نقصان اور خسارا پکارتے پھرو اس کے سوا اور کیا کرسکتے ہو چونکہ پیدا ہونے کے بعد کھانے پینے کی ضرورت اور کھانے کے لئے آگ کی ضرورت ہوتی ہے اسی ترتیب سے حضرت حق نے اپنی نعمتوں کا اظہار فرمایا۔
فظلتم تفکھون کے کئی طرح ترجمے کئے گئے ہیں ہم نے سب کو تیسیر میں جمع کردیا ہے۔
مغرم، کے معنی تاوان اور مقروض کئے گئے ہیں تاوان کو شاہ صاحب (رح) نے کہیں کہیں چٹی بھی لکھا ہے۔ شاید سرکاری محصول زمین کا خراج یا بیج کا نقصان مراد ہو بادلوں سے پانی کا برسنا اور اترنا یہ بھی علاوہ ضروری ہونے کے قدرت کاملہ کی ایک بہت بڑی نشانی ہے جو ہر سال دیکھنے میں آتی ہے اور چونکہ اس پانی کے برسنے میں کسی کو مجازاً بھی دخل نہیں نہ کوئی ایک قطرہ بادلوں سے گراسکتا ہے اور نہ برستے ہوئے بادلوں کو روک سکتا ہے اس لئے فرمایا کہ اگر ہم چاہیں تو میٹھے پانی کی بجائے اس کو کڑوا اور کھاری کردیں۔
بہرحال تم شکر کیوں نہیں کرتے اور افراد شکر میں سے بڑا فرد توحید الٰہی ہے اس کے قائل کیوں نہیں ہوتے آخر میں آگ کی طرف اشارہ فرمایا چونکہ انسانی زندگی میں آگ کو بڑا دخل ہے حرارت سے غذاپکتی ہے ۔ تاپتے ہیں روشنی حاصل کرتے ہیں پانی گرم کرتے ہیں لوہا پگھلاتے ہیں غرض ہزار ہاکام آگ سے وابستہ ہیں۔ اس کو فرماتے ہیں کہ ہرے درخت سے آگ کو کون نکالتا ہے۔ مرخ اور عقار کی رگڑ سے آگ نکلتی ہے یہ کس کی قدرت ہے۔ تورون آگ سلگاتے ہو یا آگ درخت کی شاخ سے نکالتے ہو ہم نے اس حصول آگ کے طریقے اور آگ کو موجب نصیحت بنایا یعنی اس آگ کو استعمال کرنے اور کام میں لانے کے بعد اللہ تعالیٰ کی وحدانیت اور اس کی الوہیت پر ایمان لائو یا دوزخ کی آگ کو یاد کرکے ڈرو۔ بہرحال آگ کا وجود بھی نصیحت ہے ۔ مقوین مسافروں کے لئے بڑے فائدے کی چیز اور نفع بخش ہے ورنہ جنگل میں آگ کا حاصل ہونا سخت دشوار ہے یا مقیم اور مسافروں دونوں مراد ہیں۔
جیسا کہ اہل لغت نے کہا ہے کہ یہ اضداد میں سے ہے تو مطلب یہ ہوگا کہ مسافر اور مقیم دونوں کے فائدے کے لئے اس آگ کو بنایا ہے اور چونکہ تمام مخلوق کا انتفاع آگ کے ساتھ وابستہ ہے اور وہ انتفاع موقوف علی القدرۃ ہے تو سب مخلوق محتاج ہوئی قدرت کی اور یہی حق تعالیٰ کی قدرت استحاق الوہیت و عبادت کی دلیل ہے آگ حاصل کرنے کے طریقے بھی کئی ہیں بانس کی رگڑ سے چقماق وغیرہ سے چونکہ اہل عرب خاص طور سے مرخ اور عقائد سے آگ نکالا کرتے تھے اس لئے اس درخت کا ذکر فرمایا ۔
آخر میں اپنے پیغمبر کو ارشاد فرمایا کہ اے پیغمبر آپ اپنے پروردگار کے ناک کی پاکی بیان کیجئے وہ آپ کا پروردگار بڑی عظمت والا ہے یعنی سبحان ربی العظیم کہیے۔
حدیث میں آتا ہے کہ جب یہ آیت اتری تو نبی کریم ﷺ نے فرمایا اجعلوھا فی رکوعکم یعنی اس تسبیح کو اپنے رکوع میں داخل کرلو۔
حضرت شاہ صاحب (رح) فرماتے ہیں کئی درخت ہیں سبز جن کو رگڑنے سے آگ نکلتی ہے آگے سورة یاسین میں اس کا ذکر ہوچکا ہے۔
اور فرماتے ہیں یا دیہ کہ اس آگ سے دوزخ کی آگ یاد آوے اور جنگل والوں کو آگ سے بہت کام ہیں اور کام سبھی کا چلتا ہے اس سے۔
خلاصہ : یہ کہ حق تعالیٰ نے جو امور ان آیتوں میں فرمائے اور جن نعمتوں کا ذکر فرمایا ہے وہ توحید کے لئے بھی سبب ہیں اور قدرۃ علی البعث کے ئے بھی موجب ہیں لہٰذا ان دونوں باتوں پر ایمان لانا چاہیے۔
Ayah 56:75(75) پس میں قسم کھاتا ہوں ستاروں کے غروب ہونے اور چھپنے کی۔
Ayah 56:76(76) اور اگر تم سمجھو تو یہ قسم بہت بڑی قسم ہے - حضرت حق جل مجدہ کی قسم واقعی بہت عظیم اور بڑی عظمت والی ہے تاروں کا ڈوبنا یعنی رات کا پچھلا حصہ جو تاروں کے غروب ہونے کا وقت اور تہجد گزاروں کی نماز کا وقت ہے اور رحمت الٰہی اور رضائے الٰہی کے نزول کا وقت ہے چونکہ اوپر قیامت اور اللہ تعالیٰ کی توحید کے لئے عقلی دلائل مذکور تھے اب نقلی دلائل کے سلسلے میں قرآن کا ذکر فرماتے ہیں کہ قرآن جیسی باعظمت اور مکرم کتاب بھی اس امور کا وقوع یقینی بتاتی ہے اور چونکہ یہ ایک مکرم اور آسمانی کتاب ہے اس لئے جو چیز دلائل عقلیہ سے ثابت تھی وہ نقلی دلائل سے بھی ثابت ہے۔
لہٰذا تم کو بھی توحید اور بعث بعدالموت پر ایمان لانا چاہیے بعض لوگوں نے کہا تاروں کے ٹوٹنے کی قسم اور بعض نے کہا کہ قرآن کے اترنے اور پیغمبر کے قلب پر نازل ہونے کی قسم ہے۔ بہرحال آگے قسم کا جواب ہے اور جس پر قسم کھائی ہے وہ آگے مذکور ہے۔
حضرت شاہ صاحب (رح) فرماتے ہیں ایک معنی یہ ہے کہ آیتیں اترنے کی پیغمبر کے دل میں۔
خلاصہ : یہ کہ نجوم سے مراد قرآن کی آیتیں ہیں جو پیغمبر کے دل میں اترتی ہیں۔
Ayah 56:77(77) قسم اس بات پر کھاتا ہوں کہ یہ کتاب جو اس نبی پر نازل ہوئی ایک گرامی قدر قرآن ہے۔
Ayah 56:78(78) کتاب مکنون یعنی لوح محفوظ میں درج اور لکھا ہوا ہے۔
Ayah 56:79(79) اس لوح محفوظ کو سووائے مقدس اور پاکیزہ فرشتوں کے کوئی چھو نہیں سکتا اور ہاتھ نہیں لگا سکتا۔
Ayah 56:80(80) یہ قرآن تمام عالموں کے پروردگار کی جانب سے نازل کیا گیا ہے اور بھیجا گیا ہے - قرآن کو کریم فرمایا اس لئے کہ اس میں دونوں عالم کی زندگی اور مکرم ہونے کا سامان موجود ہے یعنی اس کی تعلیم پر عمل کرنے سے اللہ تعالیٰ کے نزدیک بندہ مکرم ہوجاتا ہے اور اس میں خیر کثیر ہے اس لئے اس کو قرآن کریم فرمایا۔
کتاب مکنون چھپی کتاب سے مراد لو ح محفوظ ہے جس کو سوائے فرشتوں کے اور کوئی ہاتھ نہیں لگا سکتا ہے۔ پاکیزہ فرمایا فرشتوں کو وہ روحانی مخلوق ہر قسم کی مادی آلائشوں سے پاک اور منزہ ہے ، پروردگار عالموں کی جانب سے نازل ہوا ہے چونکہ یہ کتاب جملہ اقوام عالم کے لئے نازل ہوئی ہے اسی لئے فرمایا کہ جملہ اقوام عالم کے مالک کی نازل کردہ ہے۔
بعض حضرات نے لا یحسہ سے قرآن مراد لیا ہے اور نفی سے نہی مراد لی ہے یعنی اس قرآن کو حدیث اور جنابت سے پاک لوگ ہاتھ لگائیں یعنی اگر وضو نہ ہو تو وضو کرکے اور اگر کوئی ناپک ہو تو غسل کرکے ہاتھ لگائے یہ مسائل کتب فقہ میں دیکھے جائیں۔