Ayah 42:3(3) جس طرح اے پیغمبر یہ سورت یا یہ کتاب آپ پر نازل کی گئی ہے اسی طرح اللہ تعالیٰ جو کمال قوت اور کمال حکمت کا مالک ہے آپ پر اور ان رسولوں پر جو آپ سے پہلے ہوئے ہیں وحی بھیجتا رہا ہے۔ مطلب یہ ہے کہ اللہ تعالیٰ پیغمبروں پر اپنے احکام بذریعہ وحی بھیجا کرتا ہے جس طرح یہ سورت آپ پر نازل کی گئی اسی طرح آپ پر اور آپ سے پہلے لوگوں پر بھی اللہ تعالیٰ جو عزیز بھی ہے اور حکیم بھی ہے اپنی وحی بھیجتا رہا ہے یعنی عزیز ہے اس لئے کوئی اس کو احکام بھیجنے سے روک نہیں سکتا اور چونکہ حکیم بھی ہے اس لئے اس کے نازل کردہ احکام میں اس کی مخلوق کے لئے بڑی حکمتیں پنہاں ہیں۔
Ayah 42:4(4) جو کچھ بھی آسمانوں میں اور زمین میں ہے سب اسی کا ہے اور وہی سب سے بلند اور برتر اور عظیم الشان ہے۔ یعنی سب زمین و آسمان میں اسی کی بادشاہت اور تصرف ہے وہی سب سے بلند وبالا اور سب سے بزرگ ہے۔
Ayah 42:5(5) قریب ہے کہ آسمان اپنے اوپر کی جانب سے پھٹ پڑیں اور فرشتے اپنے پروردگار کی حمد کے ساتھ پاکی بیان کرتے ہیں اور ان لوگوں کے لئے جو زمین میں ہیں بخشش طلب کرتے ہیں خوب سن لو اور یاد رکھو اللہ تعالیٰ ہی گناہوں کا بخشنے والا اور رحم کرنے والا ہے۔
حضرت شاہ صاحب (رح) فرماتے ہیں آسمان پھٹ پڑیں رب کی عظمت کے زور سے یا فرشتوں کی کثرت ذکر کی تاثیر ہو اور پھٹ پڑیں حضرت نے فرمایا آسمان میں چار انگشت جگہ نہیں جہاں کوئی فرشتہ سر نہیں رکھ رہا سجدے میں۔
خلاصہ : یہ ہے کہ آسمان کا پھٹ پڑنا یا تو عظمت الٰہی کی وجہ سے یا کثرت ملائکہ کے ذکر کی تاثیر سے جیسا کہ حدیث میں آتا ہے کہ آسمان چڑ چڑ بولتا ہے اور اس کو لائق ہے کہ وہ چڑ چڑ بولے آسمان میں کہیں چار انگل بھی ایسی جگہ نہیں جہاں فرشتے رکوع اور سجدے میں نہ ہوں یا آسمان اس وجہ سے پھٹ پڑے کہ رحمان کی طرف لوگ اولاد کی نسبت کرتے ہیں۔
جیسا کہ سورة مریم میں مذکور ہوا بوجھ پڑنے سے عام طور سے نیچے کا حصہ پھٹتا ہے لیکن من فوقھن بطور مبالغہ فرمایا کہ نیچے سے تو کیا آسمان اوپر سے پھٹ پڑے۔
بخشش مانگنے کا مطلب یہ ہے کہ یا تو ملن فی الارض سے مومن مراد ہوں جیسا کہ سورة مومن میں گزر چکا ہے اور اگر عام ہو تو پھر معافی طلب کرنے کا مطلب یہ ہوگا کہ عذاب استیصال سے بچنے کے لئے معافی طلب کرتے ہیں بہرحال ! کفار کے لئے معافی اگر مراد ہو تو ایک وقت خاص اور محدود وقت مراد ہوگا مرنے کے بعد یہ سلسلہ ختم ہوجاتا ہوگا اور یہ بھی ہوسکتا ہے کہ کافروں کے لئے ایمان کی توفیق کے لئے دعا کرتے ہوں۔
آگے اعلان فرمایا کہ یادرکھو کہ گناہ معاف کرنے والا اور رحم کرنے والا وہی ہے کوئی دوسرا یہ کام نہیں کرسکتا۔
Ayah 42:6(6) اور جن لوگوں نے اللہ تعالیٰ کے سوا دوسروں کو کارساز اور رفیق بنارکھا ہے اللہ تعالیٰ نے ان پر نگہبان ہے اور ان کو دیکھ رہا ہے اور آپ اے پیغمبر ان پر مختار کار نہیں ہیں اور آپ ان کوئی ذمہ نہیں ہے۔ یعنی جو ایسا کررہے ہیں ان کی دیکھ بھال ہم پر ہے اور ہم ہی ان کو وقت پر سزا دیں گے آپ سے ان کے جرائم کی کوئی باز پرس نہ ہوگی۔
Ayah 42:7(7) اور ہم نے اسی طرح اس قرآن عربی کو آپ پر نازل کیا ہے جیسا کہ آپ دیکھ رہے ہیں اور یہ قرآن عربی زبان میں اس لئے آپ پر نازل کیا ہے تاکہ آپ اہل مکہ کو اور مکہ کے چاروں طرف رہنے والوں کو خبردار کردیں اور اس دن سے ڈرادیں جو سب کے جمع ہونے کا دن ہے اس دن کے آنے میں ذرا شک نہیں ہے اس دن ایک فریق جنت میں داخل ہوگا اور ایک فریق جہنم میں داخل کیا جائے گا۔ وکذلک کی تشبیہ کا دو طرح ترجمہ کیا گیا ہے ہم تم دونوں کو ترجمہ اور تیسیر میں ظاہر کردیا ہے یعنی مطلب یہ ہے کہ جس طرح ہر پیغمبر کو اس کی قومی زبان میں وحی بھیجی گئی ہے اس طرح آپ کو عربی زبان کا قرآن دیا گیا ہے یا یہ کہ جیسا کہ آپ کو معلوم ہے ہم نے اس قرآن عربی کو آپ کی طرف اس لئے نازل کیا ہے کہ آپ ام القریٰ یعنی مکہ جو چھوٹے چھوٹے گائوں اور قصبات کی اصل ہے اور بڑا شہر ہے اس کے بسنے والوں کو ڈرا دیں اور خبر دار کردیں اور اس کے چاروں طرف کے رہنے والوں کو ڈرادیں اور جمع ہونے کے دن سے یعنی قیامت سے ڈرادیں جس کے آنے اور واقع ہونے میں کوئی گنجائش شک کرنے کی نہیں کیونکہ دلائل عقلی اور نقلی سے قیامت کا وقوع ثابت ہوچکا ہے۔
اس دن کا خلاصہ یہ ہے کہ اس دن ایک فریق یعنی مومن کنت میں ہوں گے اور ایک فریق یعنی منکر جہنم میں داخل کئے جائیں گے۔ ومن حولھا چونکہ مکہ دنیا کے وسط میں واقع ہے اس لئے ومن حولھا کا مطلب یہ ہے کہ تمام عالم کے لئے آپ ڈرانے والے ہیں اور اگر ومن حولھا سے عموم مراد نہ لیا جائے بلکہ مکہ معظمہ کے اس پاس کی بستیاں مراد لی جائیں تو پھر یہ مطلب ہوگا کہ ابتداء میں اول ان لوگوں کو ڈرایا جائے اوپر فرمایا تھا کہ ان پر وکیل اور مختار کار نہیں ہیں اب اس کو اور واضح فرماتے ہیں۔
حضرت شاہ صاحب (رح) فرماتے ہیں کہ گائوں فرمایا مکہ کو سارے عرب کا مجمع وہی ہوتا ہے اور ساری دنیا میں گھر اللہ کا وہیں آس پاس اول عرب بعد اس کے ساری دنیا۔
Ayah 42:8(8) اور اگر اللہ تعالیٰ چاہتا اور اس کو منظور ہوتا تو ان سب کو ایک فرقہ ایک ہی جماعت اور ایک ہی طریقہ کا بنادیتا لیکن وہ اللہ تعالیٰ جس کو چاہتا ہے اپنی رحمت میں داخل کرلیتا ہے اور جو ظالم اور نافرمان ہیں ان کا نہ کوئی یارہوگا نہ مددگار۔ یعنی یہ کفرو اسلام مشیت الٰہی پر موقوف ہے وہ چاہتا تو سب کو ایک طریقہ کا بناکر ایک ہی فرقہ کردیتا لیکن وہ جس کو چاہے اپنی رحمت و ہدایت کے سائے میں داخل فرمالیتا ہے اور جو لوگ کافر ہیں اور جن کا شیوہ ہی کفر ہے ان کا نہ کوئی دلی جو ان کی شفاعت کرے اور نہ کوئی مددگار جو عذاب کو دفع کرے۔
Ayah 42:9(9) کیا ان مشرکوں نے اللہ تعالیٰ کے سوا اور دوسروں کو کار ساز بنارکھا تھا اور اگر کسی کو کارساز بنارکھا ہے تو اللہ تعالیٰ ہی کارساز ہے اور وہی کام بنانے والا ہے اور روہی مردوں کو زندہ کرنے والا ہے اور وہی ہر چیز پر پوری طرح قادر ہے۔ یعنی کار ساز اللہ تعالیٰ کے علاوہ یہ مشرک دوسروں کو بناتے ہیں حالانکہ حقیقی کار ساز اللہ تعالیٰ ہی کی ذات ہے اور وہی مستحق ہے کہ اس کو کار ساز بنایا جائے۔
وہی مردوں کو زندہ کرنے والا ہے یہ شاید اس لئے فرمایا کہ مردوں کو زندہ عطا کرنا کسی کے قبضے میں نہیں اور خاص کر ایسے وقت جبکہ برائے نام کام آنے کا بھی سلسلہ منقطع ہوجائے ایک مردوں کا زندہ کرنا کیا وہ ہر چیز پر قدرت رکھتا ہے۔
Ayah 42:10(10) اور جو آپ سے اختلاف کرتے ہیں ان سے کہہ دیجئے کہ جس جس بات میں تم اختلاف کرتے ہو تو اس کا فیصلہ اللہ تعالیٰ ہی کے سپرد اور اسی کے حوالے ہے اور اللہ تعالیٰ میرا پروردگار ہے اور اسی پر میں نے توکل اور بھروسہ کررکھا ہے اور میں ہر بات میں اسی کی طرف رجوع کرتا ہوں۔ یعنی تم جو توحیدورسالت اور قیام قیامت وغیرہ میں باوجود دلائل اور براہین قاطعہ کے پھر بھی مجھ سے اختلاف کرتے ہو تو اس کا فیصلہ اللہ تعالیٰ کے سپرد ہے وہی پروردگار ہے اور تمہارے اختلاف کی وجہ سے جو نتائج برآمد ہونے کا اندیشہ ہے ان نتائج کے لئے میں نے اللہ تعالیٰ پر بھروسہ کررکھا ہے اور میں دین ودنیا کے تمام کاموں میں اسی کی طرف رجوع کرتا ہوں۔
Ayah 42:11(11) وہی اللہ تعالیٰ آسمانوں کا اور زمین کا پیدا کرنے والا ہے اسی نے تمہارے لئے تمہاری جنس میں سے جوڑے بنائے اور اسی نے چوپایوں میں سے جوڑے بنائے وہ تم کو اس تدبیر سے روئے زمین پر پھیلاتا اور بڑھاتا ہے کوئی چیز اس جیسی نہیں اس کی طرح کا سا کوئی اور نہیں اور وہی سب کی سننے والا سب کو دیکھنے والا ہے۔ یعنی تم میں اور دیگرحیوانات میں نرومادہ کے جوڑے پیدا کئے اور اس طریقہ سے وہ تم کو روئے زمین پر پھیلاتا اور بڑھاتا رہتا ہے کوئی چیز بھی اس جیسی نہیں یعنی اس اللہ تعالیٰ کی مثل کوئی دوسرا نہیں وہی سب کی سننے والا اور سب کو جاننے والا ہے۔
Ayah 42:12(12) آسمانوں کی اور زمین کی کنجیاں سب اسی کے اختیار میں ہیں جس کی روزی چاہتا ہے فراخ کردیتا ہے اور جس روزی کو چاہتا ہے کم کردیتا ہے اور نپی تلی کردیتا ہے اور اس کی روزی تنگ کردیتا ہے بیشک وہ ہر چیز کو پوری طرح جاننے والا ہے اور ہر چیز سے پوری طرح واقف ہے۔ یعنی آسمانوں اور زمین میں اسی کا تصرف ہے جس کی روزی چاہتا ہے کشادہ کردیتا ہے اور جس کی چاہتا ہے کم کردیتا ہے اور اس کو تنگدست بنادیتا ہے کیونکہ وہ ہر چیز کو جانتا ہے اور ہر شخص کو مصلحت سے خوب واقف ہے جس کو جس لائق سمجھتا ہے اپنی حکمت کے موافق اسی قدر روزی سے نوازتا ہے۔
Ayah 42:13(13) اللہ تعالیٰ نے تم لوگوں کے لئے وہی دین مقرر کیا ہے اور دین میں تمہارے لئے وہی راہ ڈال دی ہے جس دین کا حکم اس نے نوح (علیہ السلام) کو دیا تھا اور جس کو ہم نے آپ کے پاس بھی وحی کے ذریعہ بھیجا ہے اور جس دین کا حکم ہم نے ابراہیم اور موسیٰ اور عیسیٰ (علیہم السلام) کو بھی دیا تھا اور ان کی امتوں کو یہ کہا تھا کہ تم سب اس دین کو قائم رکھنا اور اس میں پھوٹ نہ ڈالنا اور متفرق نہ ہونا ان مشرکوں پر وہ بات جس کی طرف آپ ان کو بلاتے اور دعوت دیتے ہیں بہت گراں اور بھاری گزرتی ہے اللہ تعالیٰ جس کو چاہتا ہے اپنی طرف کھینچ لیتا ہے اور چن لیتا ہے اور جو اس کی طرف رجوع کرے وہ اس کی جانب رہنمائی کرتا اور اپنی طرف راہ دکھاتا ہے۔
حضرت شاہ صاحب (رح) فرماتے ہیں اصل دین ہمیشہ سے ایک ہی ہے اس کو قائم کرنے کے طریق ہر وقت اللہ نے جدا ٹھہرائے ہیں۔
خلاصہ : یہ کہ دین کی اصولی باتیں ہر زمانے میں ایک رہی ہیں یعنی توحید رسالت اور مرنے کے بعد جی اٹھنا اور قیامت وغیرہ یہ سب باتیں ہر پیغمبر کے دین میں یکساں ہیں ان میں کوئی فرق نہیں اس لئے اصولی اعتبار سے سب پیغمبروں کا دین ایک ہی ہے البتہ ضروریات زمانہ کے اعتبار سے اعمال کے طریقے مختلف ہیں کسی میں کم کسی میں زیادہ تاآنکہ آخری دور میں اس کی تکمیل ہوگئی۔
دین عطا کرکے رسولوں کی اتباع کرنے والوں سے فرمایا کہ آپس میں ٹکڑے نہ ہوجانا اور پھوٹ نہ ڈالنا۔ کبرعلی المشرکین کا یہ مطلب کہ انہی عقائد اور اسی دین کی طرف جو سابقہ انبیاء کا رہا ہے جب ان مشرکوں کو دعوت دیتے ہیں تو ان کو ناگوار اور ان پر گراں ہوتا ہے اور جب صحیح بات کو قبول کرنے میں ناگواری ہو تو ان کی ہدایت کس طرح نصیب ہوسکتی ہے کیونکہ ہدایت کے دو طریقے ہیں ایک تو یہ کہ اللہ تعالیٰ جس کو چاہے بلا اسباب کے اپنی طرف کھینچ لے اور توفیق ایمان کی عطا فرمادے۔
دوسرے یہ کہ کوئی بندہ اسکی جانب سے رجوع کرے اور ہدایت کا طالب ہو تو اللہ تعالیٰ اس کی اپنے تک رہنمائی فرمادیتا ہے اور اس کی حضرت حق تعالیٰ تک رسائی ہوجاتی ہے۔
انہی دو طریقوں کو حضرات صوفیائے کرام جذب اور سلوک سے تعبیر کرتے ہیں بہرحال ان کو ہدایت کے یہ دو طریقے ہیں یا یہ مطلب ہے کہ توفیق کے بعد اگر کوئی انابت اور رجوع الی اللہ کرتا ہے تو اس کو مراتب قرب اور درجات عالیہ سے نوازا جاتا ہے۔
Ayah 42:14(14) اور وہ امم سابقہ یعنی اہل کتاب بعد اس کے کہ ان کو صحیح علم پہنچ چکا تھا آپس کی ضد بحث اور حسد سے الگ الگ ہوگئے اور اے پیغمبر اگر آپ کے پروردگار کی طرف سے ایک وقت معین کی بات پہلے سے طے شدہ نہ ہوتی تو ان کے درمیان کبھی کا فیصلہ کردیا گیا ہوتا اور وہ لوگ جو ان کے بعد کتاب دی گئی وہ تو اس کتاب کی طرف سے ایک سخت تردد انگیز شک میں مبتلا ہوگئے۔
مطلب یہ ہے کہ باوجود ان اقیم والدین ولا تتفرقوافیہ کا صاف حکم دینے اور ان کے پاس صحیح علم پہنچ جانے کے بعد وہ لوگ تفرقہ اندازی کے مرتکب ہوئے اور یہ تفرقہ بھی محض ضد اور حسد کی وجہ سے ڈالا اور کتب سماویہ میں تحریف اور تغیر بالمعنی کرکے فرقے فرقے ہوگئے اور اس تفرقہ انگیز حرکت کے باعث ان کا فیصلہ دنیا ہی میں کردیا جاتا مگر چونکہ ازل میں مہلت اور وقت معین تک عدم گرفت کا قول ہوچکا ہے اور اجل مسمی والی بات نکل چکی ہے اس لئے وہ مانع ہوئی اور جو لوگ پیچھے آئے اور کتاب ان کے ہاتھ لگی تواب وہ سخت تردد اور خلجان میں پڑگئے کہ کس کی بات مانیں اور کون سے معنی اختیار کریں اور کون سے نہ کریں۔
چنانچہ حضرت شاہ صاحب (رح) فرماتے ہیں یعنی پہلے لوگ تو ضد سے اپنی بات ثابت کرنے کو معنی بدل گئے اور پیچھے والے مختلف باتیں دیکھتے ہیں حیران ہوتے ہیں کہ معنی اس طرح یا اس طرح یہ اختلاف برا ہے جن معنوں میں خلاف نکلتا ہو اور کسی طرح معنی کئے ہیں جس میں خلاف نہیں نکلتا اس کا منع نہیں۔
بعض حضرات نے وان الذین او ثوا الکتاب سے عہد نبوی ﷺ کے مشرکین مراد لئے ہیں کہ امم سابقہ کے بعد جب اس امت کو کتاب دی گئی تو یہ اس کی جانب سے شک اور تردد میں پڑگئے۔ بہرحال یہ معنی بھی ہوسکتے ہیں ہم نے حضرت شاہ صاحب (رح) کے معنی کو تیسیر میں پیش نظر رکھا ہے۔ (واللہ اعلم)
Ayah 42:15(15) پس اے پیغمبر آپ لوگوں کو اسی دین کی دعوت اور بلاوا دیتے رہیے اور آپ خود بھی جیسا کہ آپ کو حکم دیا گیا ہے اسی پر قائم رہیے اور آپ ان منکروں کو خواہشات فاسدہ پر نہ چلئے اور ان سے کہہ دیجئے کہ اللہ تعالیٰ نے جتنی کتابیں نازل فرمائی ہیں میں ان سب پر یقین اور ایمان رکھتا ہوں اور نیز مجھ کو حکم دیا گیا ہے کہ میں تمہارے درمیان نصاف کروں اللہ تعالیٰ ہی ہمارا پروردگار ہے اور وہی تمہارا پروردگار ہے ہمارے عمل ہم کو ملنے ہیں اور ہمارے عمل ہمارے لئے ہیں اور تمہارا کیا تم کو ملنا ہے اور تمہارے اعمال تمہارے لئے ہیں ہمارے تمہارے درمیان کوئی جھگڑا اور بحث نہیں ہے اللہ تعالیٰ ہم سب کو جمع کرے گا اور اسی کی طرف سب کی بازگشت ہے اور اس کی طرف سب کو جانا ہے۔
پیغمبر کو ارشادہوتا ہے کہ جب اس دین اور قرآن کی حقانیت ثابت ہے تو آپ اسی کی طرف لوگوں کو بلاتے رہیے اور دعوت اور بلانے پر قائم رہیے یا خود بھی اس دین پر مستقیم رہیے اور ان دین حق کے منکروں کی خواہشات نفسانی پر نہ چلئے اور ان کی خواہشات کی پیروی نہ کیجئے اور اپنے مکلف ہونے کا اعلان کردیجئے کہ جن باتوں کی طرف تم کو بلاتا ہوں میں بھی ان کا پابند ہوں۔
چانچہ اللہ تعالیٰ کی تمام کتابوں کو مانتا ہوں اور اسی کا حکم دیتا ہوں اور مجھے یہ بھی حکم ملا ہے کہ اگر تمہاری باہمی کوئی جھگڑا میرے پاس آئے تو اس میں انصاف کے ساتھ فیصلہ کروں یا یہ کہ اپنے اور تمہارے درمیان انصاف کروں جو تم کو بتائوں وہ میں خود بھی کروں جو تم پر واجب یا فرض کروں وہ اپنے پر واجب اور فرض کروں ہمارا تمہارا اللہ تعالیٰ ہی پروردگار اور مالک ہے تمہارے اعمال تمہارے لئے تمہارے اعمال ہمارے لئے ہمارے تمہارے درمیان کچھ کج بحثی نہیں کوئی جھگڑا نہیں اللہ تعالیٰ ہم سب کو جمع کرے گا اور اسی کی طرف سب کو پھرجانا ہے۔
حضرت شاہ صاحب (رح) فرماتے ہیں پہلے کتاب والوں سے اسی کلام کرنا چاہیے۔ یعنی اہل کتاب سے انداز گفتگو نرم ہوناچاہیے۔
Ayah 42:16(16) اور جو لوگ اللہ تعالیٰ کے دین میں بعد اس کے کہ وہ دین لوگوں میں مقبول ہوچکا اور خلق میں مان لیا گیا مسلمانوں سے جھگڑے نکالتے ہیں اور کٹ حجتی کرتے ہیں تو ایسے لوگوں کی کج بحثی اللہ تعالیٰ کے نزدیک باطل ہے اور ان پر اللہ تعالیٰ کا غضب واقع ہونے والا ہے اور آخرت میں ان کے لئے سخت عذاب ہے۔ یعنی لوگوں میں اللہ تعالیٰ کا دین مقبول ہوچکا پھر اس کے بعدجو لوگ مسلمانوں سے خواہ مخواہ کی کج بحثی کرتے ہیں اور مسلمانوں کو گمراہ کرنے کی کوشش کرتے ہیں تو ایسے لوگوں کی کج بحثی اللہ تعالیٰ کے نزدیک باطل ہے ایسے لوگوں پر دنیا میں اللہ تعالیٰ کا غضب نازل ہونے والا ہے اور آخرت میں یہ سخت سزا کے مستحق ہیں۔
حضرت شاہ صاحب (رح) فرماتے ہیں یہ ان کتاب والوں کو کہا جو سمجھے کے لوگوں کو بہکاتے ہیں شبہ ڈال کر۔
Ayah 42:17(17) اللہ تعالیٰ وہ ہے جس نے دین حق پر مشتمل کتاب نازل فرمائی اور نیز ترازو نازل فرمائی یعنی عدل و انصاف کا حکم نازل فرمایا اور اپنے پیغمبر آپ کو کیا خبر شاید قیامت قریب ہی ہو۔ یعنی قرآن جو سچے دین کو شامل ہے اور جس میں سچے دین کی تعلیم موجود ہے اور ترازو یعنی عدل و انصاف کا حکم نازل فرمایا ہوسکتا ہے کہ عین ترازو نازل کی گئی ہو۔
جیسا کہ بعض مفسرین نے فرمایا کہ یہ ترازو نوح (علیہ السلام) کے زمانے میں نازل کی گئی ترازو یا میزان ایک آلہ ہے انصاف اور تسویہ کا بہرحال معاملات میں عدل و انصاف چونکہ بہت ضروری ہے اس لئے تمام انبیاء علیہم الصلوٰۃ والسلام کی شرائع میں اس کی تاکید ہے اور چونکہ قیامت کے دن بھی اعمال وزن کئے جائیں گے اس مناسبت سے قیامت کا ذکر بھی فرمایا کہ آپ کو کیا معلوم کہ وقوع قیامت قریب ہی ہو کیونکہ جس چیز کے وقوع کا وقت معلوم نہ ہو تو کیا کہا جاسکتا ہے کہ وہ کب آجائے۔
حضرت شاہ صاحب (رح) فرماتے ہیں ترازو فرمایا دین حق کو جس میں بات پوری ہے نہ کم نہ زیادہ۔
Ayah 42:18(18) قیامت کو وہی لوگ جلدی چاہتے ہیں جو اس کے آنے کا یقین نہیں رکھتے اور جو لوگ اس پر یقین رکھتے ہیں وہ تو اس سے ڈرتے اور خوف کھاتے ہیں اور وہ یہ جانتے ہیں کہ اس قیامت کا وقوع ایک غیر مشتبہ حقیقت ہے آگاہ رہو جو لوگ قیامت کے بارے میں اور قیامت کے وقوع میں جھگڑا کرتے ہیں وہ یقینا پرلے درجے کی گمراہی میں مبتلا ہیں یعنی قیامت کے آنے کی وہی لوگ تعجیل کرتے ہیں اور جلدی مچاتے ہیں جن کو قیامت پر ایمان نہیں اور جو لوگ اس پر ایمان رکھتے ہیں وہ ڈرتے اور کانپتے رہتے ہیں اور اس بات کا یقین رکھتے ہیں کہ قیامت کا وقوع ایک غیر مشتبہ حقیقت ہے وہ یقینی طور پر آنے والی ہے۔
پھر تاکیداً فرمایا کہ جو لوگ قیامت کے آنے میں جھگڑتے ہیں وہ پرلے درجے کی گمراہی میں پڑے ہوئے ہیں۔
Ayah 42:19(19) اللہ تعالیٰ اپنے بندوں پر مہربانی اور نرمی کرنے والا ہے جس کو جس قدر چاہے روزی دیتا ہے اور وہ بڑی قوت والا بڑے غلبے والا ہے۔ یعنی اللہ تعالیٰ کا دنیا میں عام طور سے سب کے ساتھ نرم برتائو ہے وہ جس کو جس قدر چاہے روزی دیتا ہے اور چونکہ وہ کمال قوت اور کمال غلبہ کا مالک ہے اس نے اس کے معاملات میں کوئی مزاحمت نہیں کرسکتا۔
لطیف کے بہت سے معنی کئے گئے ہیں مثلاً مناقب پھیلانے والا عیبوں کو چھپانے والا گناہوں کو معاف کرنے والا ضرورت سے زیادہ روزی دینے والاطاقت سے زیادہ بوجھ نہ ڈالنے والا مہربانی کرنے والا۔
حضرت شاہ صاحب (رح) فرماتے ہیں جس کو چاہے جتنی چاہے۔
Ayah 42:20(20) جو شخص آخرت کی کھیتی کا خواہش مند ہو اور آخرت کی کھیتی چاہتا ہو ہم اس کے لئے اس کی کھیتی بڑھا دیتے ہیں اور ترقی کردیتے ہیں اور جو شخص دنیا کا خواستگار ہو اور دنیا کی کھیتی چاہتا ہو تو ہم اسی میں سے اس کو کچھ دے دیتے ہیں اور آخرت میں اس شخص کا کوئی حصہ نہ ہوگا۔ اعمال پر جو اثر مرتب ہوتا ہے اس کو کھیتی سے تعبیر کیا جس طرح بیج ڈالنے سے کھیتی پیدا ہوتی ہے اسی طرح اعمال سے جزا ملتی ہے اس لئے فرمایا جو شخص عمل آخرت کے نفع کے لئے کرتا ہے اور اس عالم کا فائدہ چاہتا ہے تو ہم اس کو کھیتی کو ترقی دیتے ہیں یعنی اعمال خیر کو مزید توفیق ملتی ہے یا ثواب دو چندوسہ چند اور اس سے بھی زیادہ بڑھا دیا جاتا ہے یا یہ کہ دنیا اور آخرت دونوں عطا فرمادیں اور جس شخص کا عمل اور اس کی جدوجہد صرف دنیا کے لئے ہو تو اس کو دنیا میں ہی جس قدر چاہیں گے دے دیں گے اور وہ آخرت میں محروم ہوگا۔ جیسا کہ بنی اسرائیل میں ہم عرض کرچکے ہیں۔
یہ ان لوگوں کا ذکر ہے جو آخرت پر ایمان نہیں رکھتے اور ان کا کوئی عمل آخرت کے غرض سے نہیں ہوتا وہ آخرت میں محروم ہوں گے۔ پھر دنیا دینے میں بھی یہ وعدہ نہیں کہ ان کی تمنا اور ان کی منشا کے موافق دیدیں گے بلکہ جس قدرہم چاہیں گی اس قدر دیں گے اور آخرت میں اس کا کوئی حصہ نہیں ہوگا۔
حدیث میں آتا ہے جس نے صرف ایک آخرت کا فکر اپنے ذمے لے لیا تو اللہ تعالیٰ اس کے تمام افکار کے لئے کافی ہوگا اور جو شخص دنیاوی ہموم اور احوال کے تفکرات اپنے ذمے لے لیتا ہے تو اللہ تعالیٰ کو اس کی پروا نہیں کہ وہ کونسی وادی میں ہلاک ہوگیا یعنی جس کو آخرت کا غم ہے اس کی کفالت فرمائی جاتی ہے اور جو دنیاوی ہموم لئے پھرتا ہے اور دنیا حاصل کرنے کا اس کو غم لگا ہوا ہے تو اس سے بےپروائی کا اظہار ہے۔
Ayah 42:21(21) کیا ان کافروں کے کچھ ایسے خود ساختہ شریک ہیں جنہوں ان کے لئے ایسا دین مقرر کردیا ہے اور دین کی کوئی ایسی راہ ڈالی ہے کہ جس دین کی اللہ تعالیٰ نے اجازت نہیں دی اور اللہ تعالیٰ نے اس دین کا حکم نہیں دیا اور اگر وہ فیصلے کی بات نہ ہوچکی ہوتی تو ان کے درمیان یقینا فیصلہ کردیا گیا ہوتا اور بلاشبہ ان ظالموں کے لئے دردناک عذاب ہے ۔ اوپرشرعلکممن الدین ماوصی بہ گزرا ہے اسی سلسلے میں ارشاد ہے اور استفہام انکاری کے طور پر فرمایا کہ کیا ان کے تجویز کردہ معبودوں نے کوئی اور ایسا دین ان کے لئے تجویز کردیا اور کوئی اور راستہ دین کے نام سے بنادیا ہے جس دین کا اللہ تعالیٰ نے حکم دیا۔
کلمۃ الفصل سے وہی مہلت اور عذاب موعود کا آخرت میں ہونا مراد ہے یعنی اگر وہ بات نہ ہوتی تو حق و باطل کا فیصلہ یہیں ہوجاتا اور ان کا فیصلہ چکادیا جاتا ہے اور یقین کرو کہ ان مشرکوں کے لئے دردناک عذاب ہے جو اللہ تعالیٰ کے حکم کے خلاف دین میں اختراع کرتے ہیں۔
حضرت شاہ صاحب (رح) فرماتے ہیں یعنی فیصلے کا وعدہ ہے اپنے وقت پر۔
Ayah 42:22(22) اے پیغمبر آپ ان ظالموں کو دیکھیں گے کہ یہ اپنے اعمال کے وبال اور اپنی کمائی کے نکال سے ڈر رہے ہوں گے۔ حالانکہ وہ ان کی کمائی کا وبال ان پر پڑنے والا ہے اور جو لوگ ایمان لائے اور نیک اعمال کے پابند رہے وہ بہشت کے باغوں میں ہوں گے ان کو ان کے پروردگار کے ہاں ہر وہ چیز ملے گی اور میسر ہوگی جس کی وہ خواہش کریں گے اور جو چاہیں گے وہ حاصل ہوگا، یہ ہر خواہش کریں گے اور جو چاہیں گے وہ حاصل ہوگا۔ یہ ہر خواہش کا پورا ہونا ہی بڑی بزرگی اور بڑا انعام ہے۔ آج تو یہ مشرک قیامت کی اور اس عذاب کی جلدی کررہے ہیں لیکن اس دن آپ ان کو دیکھیں کے کہ جب ان کی کمائی اور ان کے کسب کا وبال ان کے سامنے آئے گا تو خوف زدہ ہورہے ہوں گے اور سہمے جاتے ہوں گے کہ کہیں وہ وبال اور عذاب ان کو پکڑ نہ لے حالانکہ وہ ان پر ضرور واقع ہوکر رہے گا۔
پھر ان کے مقابلے میں اہل ایمان کا ذکر فرمایا کہ وہ لوگ بہشت کے باغوں اور نعمتوں میں ہوں گے وہاں ہر چیز جو یہ چاہئیں گے ان کو میسر ہوگی یہ بہت بڑا انعام ہے۔
چاہت پر ہر چیز کا ملنا ایسا ہی ہے جیسا آج دنیامیں ہر چیز کا تصور بآسانی کرسکتے ہیں لیکن اس چیز کو وجود خارجی نہیں دے سکتے یعنی انگور اور سیب کا مثلا تصور کرسکتے ہو لیکن خارج میں اس کو نہیں لاسکتے جنت میں یہ قوت عطا ہوگی کہ تصور کے ساتھ ہی وہ شے خارج میں بھی موجودہوجائے گی۔ ھوالفضل الکبیر۔
Ayah 42:23(23) یہی وہ نعمت ہے جس کی بشارت اور خوشخبری اللہ تعالیٰ اپنے ان بندوں کو دیتا ہے جو ایمان لائے اور نیک عمل کرتے رہے آپ ان سے فرمائیے کہ میں اسلامی تبلیغ پر بجز رشتہ داری کی محبت کے کوئی صلہ نہیں مانگتا اور جو کوئی نیکی کرے گا اور بھلائی کمائے گا تو ہم اس شخص کے لئے اس نیکی میں اور خوبی بڑھادیں گے بیشک اللہ تعالیٰ بڑی بخشش کرنے والا بڑا قدردان ہے۔
یعنی یہی وہ احسانات و انعامات ہیں جن کی بشارتوں سے اللہ تعالیٰ اپنے ایمان دار بندو کو نوازتا اور خوشخبری دیا کرتا ہے میں تم سے صرف رشتہ داری کی محبت کا برتائو کا مطالبہ کرتا ہوں یعنی اسلام کی اور قرآن کی تبلیغ پر کوئی اجرت تو طلب ہی نہیں کرتا جیسا کہ سورة ص کے آخر میں فرمایا۔
لیکن غضب تو یہ ہے کہ تم نے رشتہ داری اور برادری کے تعلقات کا پس بھی نہیں رکھا میرے دعویٰ کا ہنسی مذاق اڑانا میری بات پر غل شور کرنا آخر میرے تمہارے رشتے ناطے کے بھی تو تعلقات ہیں کیا ان کا اقتضا یہی ہے کہ تم میرے ساتھ ایسا سلوک کرو میری بات کو سنو اس پر غور کرو۔
تمہارا طریقہ میرے ساتھ بہت ہی سوقیانہ اور بالکل اجانب کا سا ہے میں چاہتا ہوں کہ اس کو چھوڑ دو ۔ اور قرابت داروں کا سا برتائو کرو اسلام قبول کرنے نہ کرنے کا معاملہ علیحدہ ہے بہرحال برتائو ایک رشتہ دار کے ساتھ شریفانہ ہو اور نیکی کے ساتھ خوبی کے زیادہ کرنے کا مطلب یہ ہے کہ نیکی کا ثواب زیادہ کردیں گے یا نیکی کرنے والے کو مزید نیکی کی توفیق عطا کریں گے۔
جس طرح بدی سے نیکی کی برکت جاتی رہتی ہے اسی طرح نیکی سے نیکی زیادہ ہوتی ہے اور نیک کاموں کی توفیق بڑھتی رہتی ہے کوتاہیوں کو معاف فرماتا ہے اور تھوڑے کام پر اجر زیادہ عطا کرتا ہے کیونکہ وہ قدردان اور قدر شناس ہے جو نیک کام کرو گے اس کی بےقدری نہ کی جائے گی بلکہ قدر شناسی کا برتائو ہوگا۔
حضرت شاہ صاحب (رح) فرماتے ہیں یعنی قرآن پہنچانے پر ایک نہیں چاہتا مگر قرابت کی دوستی یعنی میں تمہارا بھائی ہوں ذات کا مجھ سے بدی نہ کرو۔
Ayah 42:24(24) یہ دین حق کے منکریوں کہتے ہیں کہ اس شخص نے اللہ پر جھوٹ باندھا ہے اور اللہ تعالیٰ پر جھوٹا افترا کیا ہے سو اگر اللہ تعالیٰ چاہے تو آپ کے قلب پر مہر لگادے اور اللہ تعالیٰ باطل کو مٹاتا ہے اور حق کو اپنے احکام اور اپنی باتوں سے ثابت کرتا ہے بلا شبہ وہ سینوں کی چھپی ہوئی باتوں کو جانتا ہے۔
حضرت شاہ صاحب (رح) فرماتے ہیں یعنی اللہ اپنے اوپر کیوں جھوٹ بولنے دے دل کو بند کردے مضمون نہ آنے دے جس کو باندھے اور یوں ہی چاہے تو کفر کو مٹادے بن پیغام بھیجے مگر وہ اپنی باتوں سے دین کو ثابت کرتا ہے اس واسطے نبی پر کلام بھیجتا ہے۔
خلاصہ : یہ ہے کہ اللہ تعالیٰ کاذب کی مدد نہیں کیا کرتا اور جھوٹے مدعی نبوت کی بات کو چلنے نہیں دیتا اگر معاذ اللہ یہ نبی مفتری ہوتا تو اللہ تعالیٰ اس پر قادر ہے کہ آپ کے قلب پر مہر لگا کر آپ کے دل کو بیکار کردے اور جب دل ہی بند ہوگیا تو پھر آپ کی بات کیسے بڑھ سکتی ہے دماغ میں افترا پردازی کی صلاحیت ہی باقی نہ رکھیں اور اللہ تعالیٰ کا یہ طریقہ ہے کہ وہ باطل کو مٹاتا اور حق کو ثابت کرتا ہے اپنے کلمات یعنی احکامات اور اپنی باتوں سے بہر حال جب ایسا ہے تو یہ کیونکر ہوسکتا ہے کہ کسی افتراء پرداز کو اتنا موقعہ دیا جائے کہ وہ اللہ تعالیٰ پر افتراپردازی کرتا رہے اور چونکہ یہ افتراپرداز نہیں ہے بلکہ ہم اس پر جو وحی نازل کرتے ہیں وہی یہ بیان کرتا ہے اس لئے اس کو موقعہ دیا جاتا ہے بلکہ اس کی مدد کی جاتی ہے اور چونکہ سینوں کے پوشیدہ احوال کو جانتے ہیں اس لئے جس غرض سے تم افتراپرداز کہتے ہو وہ بھی ہم جانتے ہیں اور اس کی صداقت اور سچائی کو بھی جانتے ہیں۔
ہم نے یمحو اور یحق کی تفسیر میں حضرت مولانا شاہ ولی اللہ صاحب (رح) اور مولانا شاہ رفیع الدین صاحب (رح) کے ترجمہ کی رعایت رکھ کر حال سے ترجمہ کیا ہے اگرچہ صاحب کشاف حال اور استقبال دونوں کے قائل ہیں اگر استقبال کے معنی لئے جائیں تو یہ کلام پیشین گوئی ہوگا جو پیشین گوئی پوری ہوئی باطل مٹا دیا گیا اور حق ثابت کردیا گیا۔ والحمد للہ علی ذلک۔
Ayah 42:25(25) اور وہ اللہ تعالیٰ ایسا ہے جو اپنے بندوں کی توبہ قبول کرتا ہے اور وہ تمام گناہوں کو معاف کردیتا ہے اور جو کچھ تم کرتے ہو وہ اس سب کا جانتا ہے۔ یعنی جو کفر سے توبہ کرکے اسلام قبول کرلیتا ہے وہ پہلے تمام گناہوں کو معاف کردیتا ہے اور جو کچھ تم کرتے ہو اس کو جانتا ہے یعنی جس نیت سے توبہ کرو گے اس کو بھی بخوبی جانتا ہے کہ صدق دلی سے توبہ کرکے اسلام میں داخل ہوئے یا نفاق دل میں رکھ کر توبہ کا اظہار کیا ہے۔
حضرت شاہ صاحب (رح) فرماتے ہیں یعنی نبی پیغام پہنچاتا ہے اور بندوں کو سب معاملت اپنے رب سے ہے۔
Ayah 42:26(26) اور جو لوگ ایمان لائے اور نیک عمل کرتے رہے ان کی سنتا اور ان کی دعائیں اور عبادتیں قبول کرتا اور ان کو اپنے فضل سے اور زیادہ ثواب دیتا ہے اور جو منکر ہیں اور جنہوں نے کفر کی روش اختیار کررکھی ہے ان کے لئے سخت عذاب ہے۔
یعنی جو مسلمان ہوا اور نیک عمل کا پابند ہو اس کے تمام نیک اعمال بھی مقبول اور اس کی دعا بھی مقبول عبادت کی قبولیت کے ساتھ ثواب میں بھی زیادتی کا وعدہ اور کافروں کا کوئی عمل مقبول نہیں کیونکہ عمل کی بنیاد یعنی ایمان نہیں اس لئے وہ سخت عذاب کے مستحق ہیں۔
Ayah 42:27(27) اور اگر اللہ تعالیٰ اپنے سب بندوں کے لئے روزی فراغ کردیتا ہے تو وہ ضرور عام طور سے دنیا میں شرارت کرنے لگتے لیکن وہ جس قدر چاہتا ہے ایک مناسب انداز سے رزق اتارتا ہے بلاشبہ اللہ تعالیٰ اپنے بندوں کے حال کا دانا بینا ہے۔ مطلب یہ ہے کہ ہر ایک کی روزی فراخ ہوجائے گی تو احتیاج باہمی کا نظام ٹوٹ جائے اور ہر شخص دوسرے سے مستغنی ہوجائے تو نظام عالم گڑ بڑ ہوجائے اور ایک دسورے سے بغاوت کردے اور شرارت شروع ہوجائے۔ امن کی بجائے فسادات شروع ہوجائیں۔
اللہ تعالیٰ ایک انداز سے روزی نازل فرماتا ہے کیونکہ وہ اپنے بندوں کے تمام احوال سے باخبر اور ان کو دیکھنے والا ہے یعنی بندوں کی مصالح سے باخبر اور ان کی حالت کو دیکھنے والا ہے۔
Ayah 42:28(28) اور وہی ہے جو لوگوں کے ناامید ہوئے پیچھے مینہ برساتا ہے اور اپنی رحمت عام طور پر پھیلاتا ہے اور وہی کارساز اور سزاوار حمدوثنا اور سب خوبیوں سراہا ہے۔ یعنی بسا اوقات لوگ بارش سے ناامید ہوجاتے ہیں تو وہ منہ برساتا ہے اور بارش کردیتا ہے اور اپنی رحمت کے نشانات عام طور سے پھیلاتا ہے یعنی نباتات کی بہتات ہوتی ہے پھول اور پھل بکثرت پیدا ہوتے ہیں یہی اس کی رحمت کے آثار اور نشانات ہیں بھی، ولی، کارساز حمید محمود بالصفات الکاملہ سب خوبیوں سے متصف اور سزاوار حمدوثنا ہے۔
Ayah 42:29(29) اور منجملہ اس کی قدرت کی نشانیوں کے آسمانوں کا اور زمین کا پیدا کرنا اور ان جانداروں کا پیدا کرنا ہے جو اس نے آسمان اور زمین کے درمیان پھیلا رکھے ہیں وہ جب چاہے ان سب کے جمع کرلینے پر قادر ہے۔ یعنی اس اللہ تعالیٰ کے دلائل توحید اور نشانہائے قدرت میں سے آسمان و زمین کا پیدا کرنا اور ان کے درمیان جانداروں کا پیدا کرنا اور پھیلانا ہے۔
دابۃ ہر اس چیز کو کہتے ہیں جو زمین پر چلے جیسا کہ ہم بارھویں پارے میں عرض کرچکے ہیں۔
حضرت مجاہدہ نے فرمایا یہاں آدمی اور فرشتے مراد ہیں بہرچال جو سب کے پیدا کرنے اور پھیلانے پر قادر ہے وہ سب کو جمع کرنے اور سمیٹ لینے پر بھی قادر ہے یہ اشارہ قیامت اور میدان حشر کی طرف فرمایا یہاں تک توحید کے دلائل بیان فرمائے۔
اب آگے بعض شبہات کا جواب ہے۔
Ayah 42:30(30) اور تم کو جو مصیبت اور سختی پہنچتی ہے سو وہ تمہارے ہی ہاتھوں کی کمائی کی وجہ سے پہنچتی ہے اور بہت سے گناہ تو وہ معاف ہی کردیتا ہے اور درگزر فرمادیتا ہے۔ یہ خطاب مکلفین کو ہے کہ جو مصیبت یا آلام تم کو پہنچتے ہیں وہ تمہاری تقصیرات اور خطائوں کی وجہ سے پہنچتے ہیں خواہ وہ نافرمانی کا کوئی گناہ ہو یا طاعات میں کسی کوتاہی کی پاداش ہو ان تکالیف سے ان تقصیرات کا کفارہ ہوجاتا ہے تکالیف میں دنیا قبر اور حشر مراد ہوسکتے ہیں ہم پانچویں پارے میں من یعمل سوء ایجزبہ کی تسہیل میں مفصلاً عرض کرچکے ہیں اگر کسی مومن کو کانٹا چھبتا ہے یا وہ کوئی چیز رکھ کر بھول جاتا ہے اور اس چیز کے تلاش کرنے میں پریشانی ہوتی ہے تو یہ باتیں بھی تقصیرات کی معافی کا سبب بن جاتی ہیں۔
عام طور سے ایسا ہوتا ہے اور کبھی رفع درجات کے لئے بھی اس قسم کی تکالیف کا اللہ تعالیٰ کے بندوں کو سامنا کرنا پڑتا ہے تو اس کی بحث یہاں نہیں ہے۔
بہرحال معمولی سی تکلیف بھی گناہ سیات کا موجب ہوتی ہیں نبی کریم ﷺ نے قسم کھا کر فرمایا ہے کہ کوئی کھر نیچ لگ جائے یا پائوں پھسل جائے یا بخار ہوجائے یہ سب چیزیں کسی گناہ کی پاداش میں ہوتی ہیں۔
حضرت علی کرم علی وجہہ فرماتے ہیں کہ یہ آیت قرآن میں بڑی امید کی آیت ہے کیونکہ دنیا میں اللہ تعالیٰ جب کسی گناہ کی سزا دیدے گا تو آخر ت میں اس کا مواخذہ نہیں فرمائے گا مومنوں کے لئے اس آیت میں بڑی بشارت ہے۔
حضرت شاہ صاحب (رح) فرماتے ہیں یہ خطاب عاقل بالغ لوگوں کو ہے گنہگار ہوں یا نیک مگر نبی داخل نہیں اور سختی دنیا کی بھی آگئی اور قبر کی اور آخرت کی۔
خلاصہ : یہ ہے کہ یہ خطاب بالغوں کو ہے نابالغوں کو یہ خطاب شامل نہیں اور اسی طرح نبی بھی اس سے مستثنا ہے دنیا میں خواہ کوئی دیکھ پہنچے یا قبر میں کچھ پریشانی ہو یا میدان حشر کی کوئی پریشانی ہو مومن کے لئے یہ تمام تکلیف اور پریشانیاں کفارہ ہیں اس کے گناہوں سے۔
اب آگے ارشاد ہوتا ہے کہ اگر کہیں اہل زمین سے مواخذہ شروع ہوجائے تو پھر نجات کی کوئی صورت نہیں اور نہ بھاگ کر ہی بچ نکلنے کی شکل ہے۔
Ayah 42:31(31) اور تم زمین میں کہیں بھاگ کر ہرا اور تھکا نہیں سکتے اور اللہ تعالیٰ کے سوا نہ تمہارا کوئی کارساز ہے اور نہ مددگار۔ یعنی تم چاہو کہ کہیں بھاگ کر اللہ تعالیٰ کو عاجز کردو اور اس کو تھکا دو یا اس کو ہرادو تو یہ ممکن نہیں۔
حضرت شاہ صاحب (رح) فرماتے ہیں عاجز کرنے والے یعنی جو کچھ ہم نے مصیبتیں مقرر کی ہیں چاہے تم ان سے بھاگ سکو اور ہم کو تھکا دو سو ممکن نہیں اور نہ مددگار کو دفع کرے تم سے عذاب جب کہ وہ اترے تم پر۔ آگے پھر دلائل توحید مذکور ہے۔
Ayah 42:32(32) اور اسی کے نشانہائے قدرت میں سے چلنے والے ووہ جہاز جو ایسے ہیں جیسے پہاڑ۔
Ayah 42:33(33) اگر اللہ تعالیٰ چاہے تو ہوا کو ٹھہرا دے اور وہ جہاز سمندر کی پیٹھ پر کھڑے کے کھڑے رہ جائیں ۔ بلا شبہ اس میں ہر صبر کرنے والے اور شکر بجا لانے والے کے لئے بڑے دلائل ہیں اور بڑی نشانیاں ہیں۔
Ayah 42:34(34) یا اگر چاہے تو اہل جہاز کے اعمال اور ان کی کمائی کی وجہ سے ان جہازوں کو تباہ کردے اور بہت سے آدمیوں کو معاف بھی کردیتا ہے۔
Ayah 42:35(35) اور وہ لوگ جو ہماری نشانیوں میں جھگڑتے اور خواہ مخواہ کے جھگڑے نکالا کرتے ہیں ان کو یہ بات معلوم ہوجائے کہ ان کے لئے کہیں بھاگنے اور بچ نکلنے کی جگہ نہیں۔ یعنی اللہ تعالیٰ کی قدرت کی نشانیوں میں سے یہ بات کہ پانی اور لکڑی کا ایسا جوڑ لگا دیا کہ لکڑی پانی پر تیرتی ہے اور پانی اس کو ڈبوتا نہیں جس کی وجہ سے بڑے بڑے جہاز بنا کر لوگ پانی میں سفر کرتے ہیں اور جہاز بھی ایسے بڑے بڑے بناتے ہیں جیسے پہاڑ۔ جب یہ جہاز پانی میں چلتے ہیں تو ہوائیں چلتی ہیں تاکہ ہوائیں ان جہازوں کو جلدی سے جائیں یا آج کل اسٹیم سے چلتے ہیں جس کو بھاپ کہتے ہیں۔
بہرحال اگر وہ چاہے تو ہوا کو روک دے اور اسٹیم کی طاقت کو سلب کرلے اور بھاپ کو بیکار کردے پھر یہ جہاز بجائے چلنے کے سطح سمندر پر کھڑے رہ جائیں اس میں ہر صابر اور ہر شاکر کے لئے نشانیاں ہیں اور توحید الٰہی کے دلائل ہیں صابر اور شاکر سے مومن مراد ہیں کیونکہ یہی لوگ اللہ تعالیٰ کی نشانیوں سے سبق حاصل کرتے ہیں یا یہ کہ ان جہازوں کو بالکل تباہ کردے اور بیٹھنے والے اپنے گناہوں کی وجہ سے غرق کردیئے جائیں اور بہتوں کو معاف فرمادے اور اس وقت غرق نہ کرے ان کو پھر کسی اور سفر میں غرق کرے یا آخرت میں عذاب کرے یا خشکی میں کسی اور عذاب سے ہلاک کردے جیسا کہ بنی اسرائیل میں گزر چکا ہے اور ہماری نشانیوں اور ہماری قدرتوں میں بلاوجہ جھگڑنے والوں کو یہ معلوم ہوجائے کہ ان کو کہیں بچ کر نکلنے کی شکل نہیں ہے اور کہیں بھاگنے کا موقعہ نہیں ہے۔
حضرت شاہ صاحب (رح) فرماتے ہیں جو لوگ ہر چیز کو اپنی تدبیر سمجھتے ہیں اس وقت عاجز ہوجائیں گے۔
خلاصہ : یہ کہ جن لوگوں کو اپنی تدبیر پر ناز ہے وہ عاجز ہوجائیں اور ان کی کوئی تدبیر کار گرنہ ہو جیسا کہ ہم اس ترقی یافتہ دور میں بھی روزمرہ دیکھتے اور سنتے رہتے ہیں۔
Ayah 42:36(36) سو تم لوگوں کو جو کچھ دیا گیا وہ محض دنیوی زندگی کے لئے برتنا ہے اور جو کچھ اللہ تعالیٰ کے پاس ہے اور اللہ تعالیٰ کے ہاں ہے وہ بدرجہا اس سے بہتر ہے اور باقی رہنے والا ہے ان لوگوں کے لئے جو ایمان لائے اور اپنے پروردگار پر بھروسہ رکھتے ہیں۔ یعنی یہاں جو کچھ عطا ہوا ہے وہ عارضی زندگی کا عارضی سامان ہے اور اللہ رب العزت کے ہاں جو سامان اہل ایمان اور اہل توکل کو ملنے والا ہے وہ ہر اعتبار سے بہتر اور ہمیشہ رہنے والا ہے اوپر دنیا کی کھیتی اور آخرت کی کھیتی کا ذکر آیا تھا یہ اسی کا شاید تتمہ ہو دنیوی مال ومتاع کی اور یہاں کے فوائد جس میں مومن اور منکر دونوں برابر ہیں بلکہ منکر کچھ زائد ہیں اس کی تفصیل ظاہر کی کہ یہاں کی نعمتوں کا کوئی اعتبار نہیں آخرت کی نعمتیں بہتر بھی ہیں اور پائیدار بھی۔
Ayah 42:37(37) اور وہ کبیرہ گناہوں سے بےحیائی کے کاموں سے بچتے اور اجتناب کرتے ہیں اور جب ان کو غصہ آتا ہے تو قصور وار کو معاف کردیتے ہیں۔ کبائر الاثم سے حضرت ابن عباس نے شرک مراد لیا ہے اور جس میں برائی ہو وہ فاحشہ ہے جیسے زنا۔ اور مقاتل نے فرمایا بےحیائی اور فواحش وہ گناہ ہیں جن پر شریعت نے حد مقرر فرمائی ہے اور جب ان کو غصہ آئے تو غضب کی حالت میں معاف کردیا کرتے ہیں یعنی اپنے ذاتی معاملات میں اور دنیوی قصوں میں انتقام کی خواہش نہیں کرتے بلکہ عفو اور درگزر کردیا کرتے ہیں۔
Ayah 42:38(38) اور وہ اپنے پروردگار کا حکم مانتے ہیں اور نماز کی پابندی کرتے ہیں اور ان کا ہر کام آپس کے مشورے سے ہوتا ہے اور جو کچھ ہم نے ان کو دیا ہے وہ اس میں سے خرچ کرتے ہیں۔ یعنی اپنے پروردگار کا جو حکم ہوا اس کو قبول کرتے ہیں جیسے مدینے کے انصار اور نماز کے پابند رہتے ہیں اور ہر اہم کام میں آپس میں مشورہ کرنے کے بعد کرتے ہیں اور جو روزی ہم نے ان کو دی ہے اس کو خدا کی راہ میں خرچ کرتے ہیں۔
حضرت حسن بصری کا مشہور قول ہے کہ جس قوم نے باہم مشورے سے کام کیا تو اللہ تعالیٰ نے ان کی رہنمائی فرمائی۔ حضرت علی ؓ مرفوعاً فرماتے ہیں کہ میں نے حضور ﷺ سے عرض کیا یارسول اللہ ﷺ بعض دفعہ ہم کو ایسے امور اور حوادثات پیش آتے ہیں کہ قرآن کریم میں ان کے متعلق کوئی حکم نہیں ہوتا آپ ﷺ نے فرمایا جب کوئی ایساحادثہ پیش آئے تو میری امت میں سے عبادات گزار لوگوں کو جمع کرکے مشورہ کرلینا اور اس مشورے پر عمل کرلینا۔
حضرت ابوہریرہ ؓ سے بھی مرفوعاً ایسا ہی منقول ہے کہ اہل عقل سے مشورہ کرلیا کرو تم راہ پائو گے اور مشورے سے جو بات طے ہوجائے اس کی مخالفت نہ کرو ورنہ ندامت اٹھائو گے۔
خرچ کرنے سے مراد یہ ہے کہ اللہ تعالیٰ کی طاعت میں خرچ کرتے ہیں حضرت شاہ صاحب (رح) فرماتے ہیں مشورے سے کام کرنا پسند ہے دین کا ہو یا دنیا کا۔
Ayah 42:39(39) اور وہ ایسے ہیں کہ جب ان پر ظلم ہوتا ہے اور ان پر چڑھائی ہوتی ہے تو ہے تو وہ مناسب بدلا لیتے ہیں۔ یعنی دین کے بارے میں اگر کوئی زیادتی کرتا ہے تو مناسب یعنی برابر کا بدلا لیتے ہیں اوپر کی آیت میں درگزر کرنے پر تعریف تھی یہاں انتقام پر ان کی مدح فرمائی یعنی اپنے حق میں درگزر اور عفوکا شیوہ رکھتے ہیں لیکن دین کے بارے میں سخت گیر اور منتقم ہیں۔
حضرت شاہ صاحب (رح) فرماتے ہیں یعنی کافروں سے جہاد کرتے ہیں۔ بعض حضرات نے فرمایا مراد یہ ہے کہ اگر کسی کمزور پر کوئی ظلم کرتے تو قبیلے کے بزرگ جمع ہوکر ظالم سے بدلا لیں۔
Ayah 42:40(40) اوربرائی کی پاداش اسی برائی کی مثل ہے پھر جو شخص درگزر کرے اور باہم صلح و صفائی کرلے اور قفیے کو یہاں سے انتقام اور بدلے کا ایک ضابطہ بیان فرمایا کہ برائی کرنے والوں کو اتنی ہی برائی پہنچائو جتنی اس نے برائی کی ہے انتقام میں زیادتی نہ ہونے پائے اور سیئہ کے مقابلے میں انتقامی کاروائی کی گئی اس کو بھی سیئہ فرمایا حالانکہ پہلی سیئہ تو حقیقت میں سیئہ ہے لیکن جواباً جو عمل ہو وہ سیئہ نہیں بلکہ وہ تو آئندہ کی روک تھام کی غرض سے کیا گیا ہے تو اس کی وجہ شاید یہ ہو جیسا کہ علماء نے کہا ہے کہ چونکہ یہ سئیہ کا بدلا ہے اس لئے اس کو سیئہ فرمایا۔ یا اس لئے کہ یہ دوسرا فعل پہلے فعل کے مشابہ اور اس کی مثل ہے اس لئے اس کو سیئہ فرمایا یا اس لئے کہ بہرحال اس سے بددلی ہوتی ہے اگر اس سے پہلے سیئہ نہ ہوچکی ہوتی تو یقینی سیئہ تھی یا شاید اس لئے جوابی کاروائی کو سیئہ فرمایا کہ ہر حال میں معاف کردینا بہتر اور مستحب ہے۔
مقاتل نے کہا مراد اس سے قصاص لینا ہے زخم پہنچانے میں اور خون کرنے میں مجاہد اور رسدی کا قول ہے کہ اس سے مراد قبیح کا جواب قبیح سے دینا ہے یعنی جو تجھ کو برا کہے تو بھی اس کو برا کہہ سکتا ہے۔
ابن عینیہ کہتے ہیں میں نے سفیان ثوری سے اس کا مطلب دریافت کیا لیکن میں ان کے جواب سے مطمئن نہ ہوا تو میں نے ہشام بن حجرہ سے دریافت کیا تو انہوں نے فرمایا یہ زخمی کرنے والوں کے حق میں ہے اگر کوئی تجھ کو زخم پہنچائے تو تو بھی اس کو زخم پہنچا سکتا ہے اور یہ مراد نہیں کہ کوئی تجھ کو براک ہے تو تو بھی اس کو براک ہے۔
خلاصہ : یہ کہ اگر وہ فعل فی نفسہ شرعاً حرام ہے تو اس کے جواب میں حرام کرنے کی اجازت ہیں آگے معافی کا ذکر فرمایا کہ باوجود اجازت انتقام کے بھی کوئی شخص معاف کردے اور آپس میں سنوار کرے اور اصلاح کرے تو ایسے شخص کا اجروثواب اللہ تعالیٰ پر ہے کیونکہ اللہ تعالیٰ ظلم کرنے والوں کو پسند نہیں کرتا۔
ابن زید نے کہا اللہ تعالیٰ نے مسلمانوں کی دو قسمیں بیان فرمائی ہیں ایک وہ جو بالکل معاف کریدتے ہیں اور غصے کو پی جاتے ہیں دوسرے وہ جو انتقام لیتے ہیں اور برابر سرابر بدلا لیا کرتے ہیں پھر بھی معافی اور باہمی اصلاح کو ترجیح ہے۔