واما بنعمۃ ربک فحدث کی تفسیر
11 ۔” واما بنعمۃ ربک فحدث “ مجاہد (رح) فرماتے ہیں یعنی نبوت۔ ان سے ابوبشر نے روایت کیا ہے اور اس کو زجاج (رح) نے اختیار کیا ہے اور فرمایا یعنی آپ تبلیغ کریں اس کی جس کے ساتھ آپ (علیہ السلام) بھیجے گئے ہیں اور اس نبوت کو بیان کریں جو آپ (علیہ السلام) کو دی ہے اور لیث نے مجاہد سے نقل کیا ہے یعنی قرآن اور یہی کلبی (رح) کا قول ہے۔ آپ (علیہ السلام) کو حکم دیا کہ وہ قرآن کو پڑھیں اور مقاتل (رح) فرماتے ہیں ان نعمتوں کا شکر کریں جو اس سورت میں آپ (علیہ السلام) کو یاد دلائی گئی ہیں ضلالت کے بعدہدایت فقر کے بعد غنی کرنا اور اللہ کی نعمتوں کو شکرانہ کے طور پر بیان کریں۔ جابر بن عبداللہ ؓ سے روایت ہے کہ رسول اللہ ﷺ نے فرمایا جس شخص کی طرف بھلائی کی جائے تو اس کی جزا دے ، اگر پائے۔ پس اگر نہ پائے وہ چیز جس کو بطور جزادے تو اس کی تعریف کرے کیونکہ جب اس کی تعریف کردی تو اس کا شکریہ ادا کردیا اور اگر اس کو چھپالیا تو اس کی ناشکری کی اور جس نے زیب وزینت اختیار کی اس چیز کے ساتھ جو وہ نہیں دیا گیا تو وہ جھوٹ کے کپڑے پہننے والے کی طرح ہے۔ نعمان بن بشیر ؓ سے روایت ہے فرماتے ہیں میں نے رسول اللہ ﷺ کو منبر پر فرماتے سنا جو شخص تھوڑی چیز کا شکر ادا نہیں کرتا وہ کثیر کا بھی شکر ادا نہیں کرتا اور جو شخص لوگوں کا شکر ادا نہیں کرتا وہ اللہ کا شکرادا نہیں کرتا، اللہ کی نعمت کو بیان کرنا شکر ہے اور اس کو چھوڑنا ناشکری ہے اور جماعت رحمت ہے اور جدا ہونا عذاب ہے۔
اوراہل مکہ کی قرات کا طریقہ یہ ہے کہ تکبیر کہے اول سورة سے اور والضحیٰ ہر سورت کے آخر میں حتیٰ کہ قرآن کو ختم کرلے پھر کہے اللہ اکبر۔ اسی طرح میں نے امام مقری ابونصر محمد بن احمد بن علی حامدی سے مروشہر میں پڑھا۔ انہوں نے سند کے ساتھ اپنے اساتذہ سے جو اصل کتاب میں موجود ہے اور تکبیر کا سبب یہ ہے کہ وحی جب رک گئی تو مشرکین نے کہا اس کو اس کے شیطان نے چھوڑ دیا ہے تو نبی کریم ﷺ اس کی وجہ سے غمزدہ ہوئے تو جب نازل ہوئی ” والضحیٰ “ تو رسول اللہ ﷺ نے تکبیر کہی نزول وحی پر خوش ہوتے ہوئے۔ پس تم اس کو سنت بنالو۔