18 ۔” وان المساجد للہ “ یعنی وہ جگہیں جو نماز اور ذکر اللہ کے لئے بنائی گئی ہیں۔ ” فلا تدعوا مع اللہ احدا “ قتادہ (رح) فرماتے ہیں یہودونصاریٰ جب اپنے گرجوں اور عبادت خانوں میں داخل ہوتے تو اللہ تعالیٰ کے ساتھ شرک کرتے تو اللہ تعالیٰ نے مومنین کو حکم دیا کہ جب وہ مسجدوں میں داخل ہوں تو اللہ تعالیٰ کے لئے دعوت کو خالص کریں اور مراد تمام مساجد ہیں۔
وان المسجد للہ کی تفسیر
حسن (رح) فرماتے ہیں اس نے تمام جگہیں مراد لی ہیں اس لئے کہ ساری زمین نبی کریم ﷺ کے لئے مسجد بنائی گئی ہے اور سعید بن جبیر (رح) فرماتے ہیں جنوں نے نبی کریم ﷺ کو کہا ہمارے لئے کیسے ہوگا اگر ہم آپ (علیہ السلام) کے ساتھ نماز میں شریک ہوں اور ہم دور ہوں ؟ تو یہ آیت نازل ہوئی ” وان المساجد للہ “ سعید بن جبیر (رح) سے ہی روایت کیا گیا ہے کہ مساجد سے وہ تمام اعضاء مراد ہیں جن پر انسان سجدہ کرتا ہے اور وہ سات ہیں پیشانی، دونوں ہاتھوں، دونوں گھٹنے، دونوں پائوں، فرماتے ہیں یہ اعضاء جن پر سجدہ کیا جاتا ہے اللہ تعالیٰ کے پیدا کیے ہوئے ہیں تم ان پر اللہ کے غیر کے لئے سجدہ نہ کرو۔
ابن عباس ؓ سے روایت ہے کہ رسول اللہ ﷺ نے فرمایا کہ مجھے حکم کیا گیا ہے کہ میں سات اعضاء پر سجدہ کروں پیشانی اور اپنے ہاتھ سے اس کی طرف اشارہ کیا اور دونوں ہاتھ، دونوں گھٹنے اور پائوں کے اطراف اور میں کپڑا اور بال نہ سمیٹوں۔ پس اگر مساجد کو نماز کی جگہیں قرار دیا جائے تو اس کا واحد مسجد جیم کی زیر کے ساتھ ہے اور اگر تو اس کو اعضاء کے معنی میں قرار دے تو اس کا واحدمسجد جیم کے زبر کے ساتھ ہے۔