طٰهٰ ۟ۚطٰهٰ
طہ
— تفسیرِ بغوی
Tafseer of 20:1
1۔ طہ، ، ابوعمرو نے طاء کے فتحہ کے ساتھ پڑھا ہے اور ھاء کے کسرہ کے ساتھ۔ حمزہ، کسائی ، ابوبکر نے دونوں کے کسرہ کے ساتھ ذکر کیا ہے اور دوسرے قراء نے دونوں کے فتحہ کے ساتھ پڑھاے۔ بعض نے کہا کہ یہ لفظ قسم ہے بعض نے کہا کہ اللہ کے اسماء میں سے ہے۔ مجاہد عطائ، ضحاک کا قول ہے کہ ، طہ کا معنی ہے اے مرد۔ قتادہ نے کہا کہ سریانی زبان میں اس کا معنی ہے اے مرد۔
کلبی کا قول ہے کہ قبیلہ عک کے محاورے میں، طہ، ، کا ترجمہ ہے اے انسان۔ مقاتل کا بیان ہیے کہ طہ کا معنی ہے زمین کو اپنے دونوں قدموں سے پامال کردو یعنی تہجد کی نماز میں ۔ محمد بن کعب قرظی کا قول ہے کہ یہ قسم ہے جو اللہ تعالیٰ نے اٹھائی ہے۔ سعید بن جبیرؓ کا قول ہے کہ طاء سے طاہر اور ھا سے مراد ھاد ہے۔ کلبی کا بیان ہے کہ جب مکہ میں رسول اللہ ﷺ پر وحی نازل ہوئی تو آپ عبادت میں زیادہ سرگرم رہنے لگے نماز میں طویل قیام کی وجہ سے کبھی ایک پاؤں ٹیکتے اور کبھی دوسرا پاؤں اٹھاتے اور دوسرا ٹیکتے۔ توپہلا اٹھالیتے ، اور رات بھر نماز میں مشغول رہتے تھے اس پر یہ آیت نازل ہوئی اور حکم ہوا کہ اپنے نفس کے لیے تخفیف کریں۔