50. Surah Qaaf

آیات 30 تا 45۔ دوزخ اس قدر وسیع ہے کہ کفار انسان اور شیاطین جب اس میں پھینکے جائیں گے اور پوچھا جائے گا کہ کیا توبھرگئی تو کہے گی کہ اگر اور ہیں تو ضرور ان کو بھی جھونکا جائے یعنی کفار یہ نہ جانیں کہ پہلے کافر بہت گزر چکے شاید وہ جہنم بھردیں گے اور ان کی جگہ ہی نہ ہوگی ان کے مقابلے میں نیک لوگوں کے لیے جنت کو بھی پاس ہی آراستہ کردیاجائے گا کہ انہیں خوشی ہو اور کفار کو حسرت بڑھے۔ اللہ کے نیک بندوں سے کہاجائے گا کہ یہ وہ جنت ہے اور اللہ کی رضا کا مقام ہے جس کا وعدہ ہراواب اور حفیظ کے ساتھ کیا گیا تھا۔ اواب اور حفیظ ۔ اواب کا معنی رجوع ہونے کا ہے جس شخص کو اپنی کمزوریوں کا احساس ہوجائے اور اپنی خطاؤں سے توبہ کرلے پھر اس توبہ کی حفاظت کرے اس پر قائم رہنے کی بھرپور کوشش کرے اور اللہ کریم سے استقامت طلب کرتا رہے اپنے گناہوں اور کمزوریوں کو یاد کرکے اللہ کریم سے مادد مانگتا رہے۔ ایسابندہ جو غائبانہ ایمان ویقین کے ساتھ اور رحیم ورحمن کی نافرمانی کرنے سے ڈرے اور ایسا دل لے کر آئے جس میں ہر آن اللہ کی یاد موجود رہی ہو۔ قلب منیب۔ وہ دل جس میں اللہ کی عظمت ہر آن مستحضر رہے اور اس کے نتیجے میں خواہشات نفس کی تکمیل کے لیے اللہ کی نافرمانی سے رک جائے انہیں ارشاد ہوگا کہ آج سلامتی کے ساتھ جنت میں داخل ہوجاؤ جہاں سے تمہیں کبھی نکالانہ جائے گا اور جنت میں ہمیشہ رہنے کے لیے داخلے کا وقت آپہنچا ہے جہاں ہر وہ نعمت موجود ہے جس کی اہل جنت خواہش کریں گے اور اس سے بڑھ کر ایسی نعمتیں بھی ہیں جن کا انسان کو وہم گمان بھی نہ ہوگا کہ وہ ان کی خواہش کرسکے۔ ان سے پہلے کتنی ایسی قومیں جو ان سے کہیں طاقتور اور شان و شوکت والی تھیں اور دور دراز شہروں تک ان کی تجارت پھیلی ہوئی تھی اپنے جرم کی پاداش میں تباہ ہوچکیں۔ جب ان پر اللہ کی گرفت آئی تو انہیں پاس فہم و شعور رکھنے والا دل ہو یا کم ازکم جب بات سنیں تو اس پر خود غور توکریں۔ حصول علم کے ذرائع۔ یہاں قلب سے مراد مفسرین کرام کے نزدیک وہ دل ہے جس میں شعور ہو۔ ذکر الٰہی کانوں اور معرفت الٰہی کی کیفیات ہوں اور اگر اس سے کمتر ہو تو وہ درجہ تو ضرور حاصل ہو کہ کسی پر اعتماد کرکے اس کی بات پوری توجہ سے سنے توسہی۔ صاحب تفسیر مظہری فرماتے ہیں کہ پہلی قسم کے لوگ کاملین ہیں اور دوسری قسم کے مردین۔ اگر انہیں یہ خیال ہو کہ اتنا کچھ بنانے کے بعد شاید قدرت باری کو سب کو دوبارہ زندہ کرنا مشکل ہوتویہ ان کا خیال فاسد ہے کہ ہم نے زمین آسمان اور ان کی ساری مخلوق کو چھ روز کی مقدار کے برابر عرصے میں پیدا کردیا مگر کسی طرح کی تھکان نے ہمیں چھوا تک نہیں کہ یہ نقص ہے اور اللہ کی ذات نقائص سے بہت بلند ہے۔ اگر اس کے باوجود بھی یہ لوگ اپنے انکار پر ہی بضد ہوں تو آپ رنج نہ کیجئے بلکہ صبر کیجئے اور اپنے پروردگار کی تسبیح وتحمید کرتے رہیے سورج طلوع ہونے سے قبل اور غروب ہونے کے بعد یعنی شام وسحر اور دن کی ابتدا وانتہا اللہ کے ذکر پر کیجے اور رات کو کیجئے اور سجدوں کے بعد بھی فرض نمازوں کے بعد بھی ذکر وتسبیحات جاری رکھیے مفسرین کرام کے مطابق یہاں فرض نمازیں بھی مراد ہیں۔ ذکر الٰہی کی تلقین۔ اور ان کے علاوہ تسبیحات اور زبانی اذکار بھی جو احادیث مبارکہ میں ارشاد ہوئے نیز ذکر دوام مراد ہے نیز مسنون اذکار صحابہ کرام کو ارشاد فرمائے گئے جن کے قلوب ذاکر تھے اور جنہیں ذکر دوام حاصل تھا یہاں بھی صبح وشام اور رات دن سے ذکر دوام ہی مراد لیاجاسکتا ہے اور اس کے ساتھ تسبیحات مسنونہ پڑھی جائیں توبرکات کا اندازہ نہیں ہوسکتا۔ اے مخاطب ! ذراغور سے سن کہ جس دن منادی کرنے والا بڑے قریب سے پکارے گا یعنی اسرافیل (علیہ السلام) جب دوسری دفعہ صور پھونکیں گے اور روایت ہے کہ خطاب کرکے کہیں گے اے گلی سڑی ہڈیوں اور ریزہ ریزہ ہوجانے والی کھالو۔ اور بکھر جانے والے بالو سن لو تم کو اللہ تعالیٰ حکم دیتا ہے کہ حساب کے لیے جمع ہوجاؤ تو ان کی آواز ہر دورنزدیک والا ایسے سنے گا جیسے اس کے کان میں کہی جارہی ہو اور اس روز صور کی چنگھار کو جب سن لیں گے یہی دن دوبارہ زندہ ہو کر زمین سے نکل پڑنے کا دن ہوگا۔ اس کی مثال تو موجود ہے کہ اب بھی ہم ہی زندگی عطا کرتے ہیں اور ہم ہی مارتے ہیں اور اس روز بھی ہم ہی زندہ کریں گے اور سب کو ہماری ہی بارگاہ میں حاضر ہونا ہوگا اس روز زمین پھٹ پڑے گی اور تمام لوگ زندہ ہو کر بھاگتے ہوئے نکل کھڑے ہوں گے اور دوڑ دوڑ کر حاضر ہو رہے ہوں گے اس طرح سب کو جمع کرنا قدرت باری کے لیے آسان ساکام ہے اور اس کی عقلی ونقلی دلیلیں دے کر بھی ثابت کیا جاچکا اگر اس کے بعد بھی ہی انکار کیے جا رہے ہیں تو ہمیں ان کی باتوں کا علم ہے آپ ان کی پرواہ نہ کیجئے کہ آپ کی ذمہ داری نہیں ہے کہ ان سے زبردستی قبول کرائیں بلکہ آپ قرآن حکیم کے ذریعے نصیحت جاری رکھیے اگرچہ فائدہ اسی کو نصیب ہوگاجو اللہ کے عذاب سے ڈرتا ہوگا۔