36. Surah Yaseen

رکوع نمبر 3: آیات 33 تا 50: اسرار و معارف : اللہ کی قدرت کاملہ کا ایک بڑا مظہر تو مردہ زمین ہے جس پر یہ رہتے بستے ہیں جب اس پہ خشک سالی آتی ہے تو وہ بالکل اجاڑ ہوجاتی ہے ہر طرف گرد اڑتی ہے مگر جب اللہ چاہتے ہیں تو اس کی گود زندگی سے بھر دیتے ہیں اور ذرے ذرے سے زندگی ابلتی ہے پھل پھول اناج پیدا ہو کر نہ صرف زمین کی زندگی کا ثبوت دیتے ہیں بلکہ خود انسانوں کو زندہ رکھنے کا سبب بن جاتے ہیں یہی تو ان کی روز مرہ کی غذا ہے۔ زمین کے بعض حصوں کو ہم نے سرسبزی عطا کردی ہے کہ یہ بھی ضروری نہیں کہ وہ خشک ہو کر ہری ہو ہم نے اس میں چشمے جاری کردئیے اور اس کا سینہ باغات سے سجا دیا کہ ان لوگوں کے پاس بھی ایسے کھجوروں اور انگوروں کے باغات ہیں جن کے پھلوں سے یہ لذیذ غذا حاصل کرتے ہیں اور انہیں پھلوں کو ملا کر کبھی پکا کر اور کبھی کسی اور طرح سے یہ کس قدر لذیذغذائیں تیار کرتے ہیں کیا یہ نعمتیں اور ان کے استعمال کا شعور نیز فرصت و مہلت اور لذت حاصل کرنے کی طاقت جس نے دی ہے اس کا شکر نہ کیا جائے گا ؟ یہ کیوں اللہ کا شکر ادا نہیں کرتے۔ اللہ پاک ہے اس کی قدرت کاملہ میں کسی طرح کی کمی کا شائبہ تک نہیں اس نے بیشمار قسم کی مخلوق پیدا فرما دی ہے جن کے حلیے قدوقامت رنگ ، خصوصیات مختلف کوئی گن نہیں سکتا پھر ہر مخلوق کے اندر ایک نظام جو الگ ایک جہان ہے نباتات ہی کو دیکھو جو زمین سے اگتی ہے اس کا ایک ایک پتا پھل پھول یا وہ ذرات جو اس کے وجود میں شامل ہیں آگے ان سب کا اپنا ایک جہان ہے ایک ذرے میں کروڑوں ایٹم اور ہر ایٹم میں ایک الگ نظام موجود ہے۔ خود ان کے اپنے اجسام کے اندر۔ انسان سب ایک ہیں۔ ناک آنکھ کان ہاتھ پاؤں سب کے ہیں مگر اربوں انسانوں میں کوئی ایک کسی دوسرے سے نہیں ملتا پھر سب کی عقل شعور اور فکر الگ زندگی الگ صحت جدا علم و عمل اپنا اپنا اور پھر ان کے اندر ایک ایک خلیے میں الگ الگ جہان آباد ہیں اور کتنی ایسی مخلوق ہے جس تک انسانی نگاہ پہنچ ہی نہیں پائی ایک بہت بڑی نشانی رات کی ہے کہ اصل جہان تاریک ہے اللہ کی قدرت کاملہ نے سیارگان کو پیدا فرما کر اس میں دن کی روشنی بھیج دی جب وہ کھینچ لیتا ہے تو کہتے ہیں رات ہوگئی وار یہ شب و روز مھض اندھیرے اور روشنی کا کھیل ہیں بلکہ سورج اپنے مقرر شدہ مقام تک پہنچنے کے سفر پر ہے کہ اس رات دن کے کھیل نے ہر شے کی عمر ، پیدائش اور موت کے اوقات کو اس تک پہنچانے کا سلسلہ شروع کر رکھا ہے جو اپنے مقررہ انجام کی طرف یعنی یوم حشر کی طرف بڑھ رہا ہے یہ سفر اور اس پر بغیر کسی لمحہ کے فرق کے چلنا سورج کی مجبوری ہے کہ اس کے لیے اللہ نے جو بہت غلبہ رکھنے والا ہے یہ مقرر کردیا ہے یہاں پر مفسرین کرام نے سورج کے کچلنے یا ساکن ہونے کے فلسفے پر بھی بہت کچھ لکھا ہے مگر بےغبار بات یہی ہے کہ قرآن حکیم کا مضوع سائنس میں اصلاح خلق ہے جس کا تعلق قیامت سے ایمان پر بھی ہے تو سورج کا طلوع غروب جس طرح بیشمار اشیاء اور جانداروں کی تخلیق کا سبب اور ان کے دنیا میں آنے کا وقت لانے کا سبب ہے ایسے ہی ان کے وقت پورا کرکے رخصت کی گھڑی لانے کا سبب بھی ہے اور یہ عمل ہر آن قیامت قیامت کو قریب تر کر رہا ہے۔ یہی حال چاند کا ہے کہ اس کی منازل بھی متعین ہیں ہر منزل کا نتیجہ یہی ہے کہ مخلوق کی آمدورفت کو متاثر کر رہی ہے ہاں وہ گھٹتا بڑھتا بھی ہے کہ گھٹتے گھٹے ایک خشک سی ٹہنی سا ہوجاتا ہے اور پھر نئے سرے سے طلوع ہو کر بڑھنے لگ جاتا ہے۔ شمس و قمر کی ان منازل یا حرکات پر ایک پورے علم کی بنیاد رکھی گئی ہے جسے علم نجوم کہا جاتا ہے جہلا نے اس کے بہت سے اثرات مان رکھے ہیں جبکہ دوسرا فریق اسے کفر و شرک تک کہنے میں باک محسوس نہیں کرتا حق یہ ہے کہ شمس و قمر کی حرکات کا عالم تخلیق سے تعلق تو اللہ نے طے کردیا اور ہے اگر اگر انسانی عقل نے اس کے اندازے بھانپ لیے تو زیادہ سے زیادہ یہ ہوگا کہ کسی واقعہ کی سن گن اور کے ظہور پذیر ہونے سے قبل اندازا جان سکیں گے اور بس یہ ممکن نہیں کہ انسان ان کی تاثیر کو بدل دے یا ان کی رفتار کو متاثر کرے اس کی مثال صرف ایک نباض کی ہے کہ نبض پر ہاتھ رکھ کر جسم کی صحت وبیماری یا اس کی وجوہات کا اندازہ کرلیتا ہے جو ٹھیک بھی ہوسکتا ہے اور نہیں بھی۔ ایک بہترین مثال ہلاکو خان کے دربارکا واقعہ ہے جب اس نے درباری نجومی پہ سوال کیا کہ کیا علم نجوم کے سبب آنے والے کسی ناخوشگوار واقعہ کو روکا یا تبدیل کیا جاسکتا ہے اس نے کہا ممکن نہیں تو بولا اس علم کا فائدہ ؟ اس نے عرض کیا کل جب آپ دربار کریں تو کسی کو حکم دیجیے بالائی منزل سے تانبے کا تھال دربار میں پھینک دے پھر جواب دے سکوں گا دوسرے دن اہل دربار تو بادشاہ کے جلال میں کھوئے تھے کہ ایک زوردار گونچ سے تھال گرا سب پریشان ہوگئے بہادروں نے تلواریں سونت لیں کمزور دل بھاگ نکلے جبکہ بادشاہ اور نجومی پرسکون تھے تو اس نے عرض کیا یہ حاصل ہے کہ اگر کسی حادثے کا امکان ذہن میں ہو تو اس کا وقوع پریشانی پیدا نہیں کرتا اور بس۔ ان کے اوقات اس قدر سختی سے مقرر ہیں کہ اگر ان میں لمحوں کا فرق آتا تو صدیوں میں دنیا تباہ ہوجاتی مگر سورج کی جرات نہیں کہ چاند کو جا پکڑے یا دن رات کو عبور کرجائے ہرگز نہیں جبکہ سب سیارے اسی ایک فضا میں تیر رہے ہیں مگر نہ ٹکراتے ہیں نہ اوقات تدبیل کرتے ہیں اپنی مقررہ منزل کو گامزن ہیں۔ کیا انہیں اس میں بھی قدرت کا کرشمہ نظر نہیں آتا کہ ہر طرف سمندروں کی میلوں گہرائیاں پھیلا کر ایک محفوظ کشتی کی طرح زمین کو اس مٰں سجا دیا ہے جس پر نسل ا انسانی آبادی کے مزے لے رہی ہے اسی طرح جانداروں کے علاوہ بےجان مشینوں کو بھی ان کی سواری کے لیے بنا دیا ہے۔ اللہ نے عقل دی جس سے انسان نے ایجادات کیں۔ اللہ نے ہر شے پیدا کی جسے جوڑ کر سواری کے اسباب لاری کا ریل سمندری اور ہوائی جہاز یہ سب کچھ بنا لیا اگر اللہ چاہے تو ساری زمین کو غرق کردے وہ چاہے تو ان کی سواریوں کو تباہ کردے تو اس کے مقابلے میں تو کوئی ان کی فریاد بھی نہیں سن سکتا اور نہ مدد ہی کرکے چھڑا سکتا ہے سوائے اس کے کہ اللہ ہی رحم کرے اور کام چلتا ہے مگر کب تک کہ اس نے بھی ایک آخری لمحہ مقرر کردیا ہے لہذا ہر شخص اللہ کی دی ہوئی فرصے کے لمحات میں دنیا سے استفادہ بھی کرسکتا ہے۔ یہی بات جب ان سے کہی جائے کہ اللہ کے عذاب سے ڈرو جو دنیا کی زندگی مٰں بھی آسکتا ہے اور کفر پر مرنے سے آخرت میں تو ضرور سامنا ہوگا۔ آج حق قبول کرلو تو اللہ کی رحمت کو پاسکتے ہو اور اس کے غضب سے بچ سکتے ہو مگر ایسے بدبخت کہ جب بھی کوئی دلیل پیش کی جائے اسے ماننے سے انکار کردیتے ہیں۔ یہاں تک کہ مذاق اڑاتے ہیں۔ اگر کہا جائے کہ دولت اور نعمتیں اللہ نے بخشی ہیں ان میں سے اسی کی راہ پر خرچ کرو تو کفار مذاق اڑاتے ہیں اور کہتے ہیں کہ بھلا جن کو اللہ نے رزق نہیں دیا ان کو ہم کیوں کھانے پینے کو دیں تم لوگ جو ہمیں کھانے پینے کی دعوت دے رہے ہو غلط کر رہے ہو حالانکہ بات درست رزاق اللہ ہی ہے اور اس نے مخلوق کا رزق اسباب کے تابع مخلوق تک پہنچایا ہے لہذا اگر کوئی امیر کسی فقیر کو دیتا ہے یا مالک مزدور کو اور نوکر کو تو رزق اللہ کی طرف سے تھا جیسے زمین سے اناج درخت سے پھل دیتا ہے ایسے اس کی جیب سے انہیں سکے عطا کردئیے اور انہیں اس کا کام کرنا پڑا یہ نظام عالم کے چلنے کا سبب ہے لہذا جو کسی کا حق روکتا ہے وہ گویا نظام عالم کی تباہی کا سبب بن رہا ہے نیز یہاں حضرت استاذی المکرم (رح) کا ایک جمہ حاشیے پر درج ہے جسے نقل کرنا سعادت ہے۔ کفار کا انفاق غیر پر تبرع و احسان میں داخل ہے جس کا فائدہ کفار کو بھی ہوتا ہے۔ سبحان اللہ کیا خوبصور تتحقیق ہے واقعی کبھی تو کافر کو اس کے بدلے ایمان نصیب ہوجاتا ہے ورنہ دنیا کا فائدہ ضرور ہوتا ہے ۔ اور کہتے ہیں یار یہ قیامت قیامت سے ڈراتے رہتے ہو کہاں ہے وہ قیامت اگر تمہاری بات سچ ہے تو آ کیوں نہیں چکتی۔ مگر انہیں تکلیف نہیں کرنی پڑے گی وہ اپنے وقت مقررہ پر خود آجائے گی اور ان کی حیثیت تو یہ ہے کہ پہلی چنگھاڑ پر ہی چوکڑی بھول جائیں گے اور ایک دوسرے سے لڑیں گے کہ مجھے تو تیری باتوں نے کفر پہ لگایا اور تو میری تباہی کا سبب ہے مگر فرصت گزر چکی ہوگی کسی کے پاس وقت نہ ہوگا کہ کچھ کہہ ہی مرے یا کسی سے مل تو لے اپنے پیاروں کے پاس واپس پہنچ سکے ہرگز نہیں۔ بس ایک کڑک ہوگی جو سب کچھ تباہ کردے گی۔

رکوع نمبر 4 ۔ آیات 51 تا 67: اسرار و معارف : چنانچہ جب دوبارہ صور پھونکا جائے گا تو اپنی اپنی قبروں سے اٹھ کر اللہ کے حضور چل پڑیں گے یعنی وہ ایسا قادر ہے کہ ایک چنگھاڑ سے ہر شے تباہ کردے گا تو پھر ایک چنگھاڑ یا سخت آواز ہی سب مردہ جسموں کے ذرات کو یکجا کرکے زندہ بھی کردے گی اور ہر فرد چاہے یا نہ چاہے مگر رواں اللہ کی بارگاہ کی طرف ہی ہوگا جہاں سب کی پیشی ہوگی تب پریشان حال یہ کہہ رہے ہوں گے کہ ہمیں کس نے اٹھا دیا اگرچہ برزخ میں بھی کفار عذاب میں ہوں گے۔ مگر میدان حشر کی ہیبت کے سامنے کہیں گے یہاں سے وہاں ہی ٹھیک تھے یہ کس نے ہمیں ان ٹھکانوں سے نکال کھڑا کیا ہے تو جواب آئے گا فرشتے یا مومنین کہہ دیں گے کہ یہی وہ گھڑی ہے جس کا وعدہ اس اللہ نے جس کی رحمت بےپایاں ہے تم دنیا میں مستفید ہوتے رہے کیا تھا اور جو خبر انبیاء و رسل دیتے تھے وہی سچ تھی آج سامنے آگئی اور یہ سب کچھ کرنے کے لیے یعنی ساری مخلوق کو جمع کرنے کے لیے کوئی لمبا اہتمام نہیں ہوگا محض صور پھونکے جانے کی آواز سب کو زندہ بھی کردے گی اور پکڑ کر اللہ کے حضور کھڑے بھی کردئیے جائیں گے۔ تو ارشاد ہوگا کہ یاد رکھو آج کسی کے ساتھ کوئی زیادتی نہ ہوگی کہ یہ دنیا کی یا انسانی عدالت نہیں کہ کبھی عمدا اور کبھی بھولے سے کسی سے زیادتی ہوجائے یہاں ہرگز کسی کے ساتھ بھی کوئی زیادتی نہ ہوگی ہاں تمہارے ہر عمل کا بدلہ دیا جائے گا جو کچھ تم نے خود اپنی پسند سے کیا وہ بھگتنا ہوگا۔ اس گھڑی جب یہ ہیبت ناک منظر ہوگا اور لوگ تڑپ رہے ہوں گے اہل جنت یعنی مومن اور اطاعت گزار بندے اس سب حال سے الگ بڑے مزے سے گپ شپ کر رہے ہوں گے جیسے وہ لمبی مسافت طے کرکے منزل پر پہنچ کر سفر اور صعوبت سفر سے سبکدوش ہو کر آپس میں ہنس کھیل رہے ہوں وہ ان کی بیویاں مزیدار سایہ میں تختوں پر گاؤ تکیے لگا کر بیٹھے ہوں گے۔ یاد رہے بیویاں بھی مومن اور اطاعت گزار ہوں گی کہ یہ سب لوگ اصحب الجنۃ یعنی جنت کے مستحق لوگ ہوں گے اور کھانا پینا پھل میوے یا جو مانگیں گے یا چاہیں گے وہاں حاضر کیا جائے گا اور سب سے بڑی نعمت کہ اللہ بذات خود انہیں سلام کہیں گے کہ اے میرے اطاعت گزار بندے سلامتی ہو تم پر۔ آخرت اور جنت کی سب سے بڑی نعمت : آخرت کی نعمتوں میں میدان حشر کی ہیبت ناکی سے پناہ مل جانا پھر نجات پاجانا اور وہ بھی ایسی کہ لوگ حساب کے لیے پکڑے آئیں اور یہ بیٹھے گپ شپ کر رہے ہوں اور کھا پی رہے ہوں بہت بڑی نعمتیں ہیں مگر سب سے بڑی نعمت اللہ کی رضامندی اس کا خطاب اور اس کا دیدار ہوگا اس کی قدر عام مومن کو وہاں پہنچ کر معلوم ہوگی جبکہ دنیا میں انبیاء جانتے ہیں یا ولی اللہ اپنی حیثیت اور مقام کے ایک حد تک اس کی لذت سے آشنا ہوتے ہیں۔ لیکن اس سب سے پہلے اعلان کردیا جائے گا کہ اے گناہگارو یا عظمت باری کو تسلیم نہ کرنے والو آج کے روز اللہ کے اطاعت گزار بندوں سے الگ ہوجاؤ آج یوم حساب ہے اور سب سے ان کے اس حال کے مطابق سلوک ہوگا جو انہوں نے دنیا میں اپنے لیے منتخب کیا تھا۔ اے اولاد آدم آج کی عذر معذرت کا کیا معنی کیا تمہیں دنیا میں بار بار نہ کہا گیا کہ شیطان کی عبادت ہرگز نہ کرنا کہ یہ تمہارا دشمن ہے تمہیں دھوکا دے کر اپنی اطاعت کروائے گا اور اطاعت ہی عبادت ہے اگر اللہ کے حکم کے خلاف کسی کی بھی بات مانی تو گویا اس کی عبادت کی اور بالآخر یہ شیطان کی عبادت ہے۔ جب عبادت کے لائق صرف اور صرف ہماری ذات ہے۔ صرف اور صرف میری عبادت کرو میری اطاعت کرو کہ یہی سیدھا راستہ ہے مگر شیطان نے تم میں سے ایک جم غفیر کو گمراہ کردیا اور اپنی باتوں پہ لگا لیا کیا تم اتنا سمجھنے کی تکلیف بھی نہ کرسکے اور اس کے اشاروں پہ چلتے رہے۔ اب دیکھو یہ دوزخ سامنے ہے جس کے عذاب سے تمہیں ڈرایا جاتا تھا اور ارتکاب کفر پر جس کا وعدہ کیا گیا تھا مگر تم باز نہ آئے تو اپنے کفر کے سبب اب جہنم میں گھس جاؤ اور بھگتو۔ تب چلائیں گے کہ ہم ایسے تو نہ تھے ہم نے ایسا تو نہیں کیا تو ان کے مونہوں پہ مہر کردی جائے گی کہ بات ہی نہ کرسکیں اور نہ شور ڈالیں پھر ان کے ہاتھ اور پاؤں یعنی اعضاء جسد کو قوت گویائی عطا کردی جائے گی تو وہ ہم سے ہمکلام ہو کر ان کے ایک ایک کرتوت کا کچا چٹھہ کھول دیں گے۔ یہ تو ہمارا کرم ہے کہ یہ دنیا میں دنیا کی نعمتوں سے مستفید ہو رہے ہیں ورنہ اگر ہم چاہیں تو ان کے کفر کے بدلے دنیا میں انہیں اس حال میں پہنچا دیں کہ یہ دنیا کی نعمتوں سے بھی مستفید نہ ہوسکیں جیسے آنکھیں مسخ ہی کردیں تو کہاں سے دیکھ سکیں گے یا انہیں سارے کا سارا ہی مسخ کرکے محض ایک زندہ لاش بنا دیں کہ دیکھ سکیں نہ چل پھر سکیں تو یہ کیا کرلیں گے۔