34. Surah Saba

رکوع نمبر 5 ۔ آیات 37 ۔ تا۔ 45 اسرار و معارف : دنیا کی نعمتوں میں مال اور اولاد بیشک بہت بڑی نعمت ہیں لیکن یہ سب کچھ طاقتور اقتدار اور صحت وغیرہ سب عظیم نعمتیں ہیں مگر انہیں اللہ کی رضا مندی کی دلیل سمجھ لینا سب سے بڑی جہالت ہے کہ یہ سب سب کچھ تو کفار و مشرکین کے پاس بھی دیکھا جاسکتا ہے۔ یہ سب کچھ وہ اپنی حکمت سے تقسیم فرماتا ہے اور اس کی حکمت سے وہ خود ہی واقف ہے ہاں اس کی رضامندی کی دلیل یہ ہے کہ ایمان کامل نصیب ہو اور نیک اعمال کی توفیق ارزاں ہو ایسے لوگوں کو یقینا ان کے اعمال سے کئی گنا زیادہ اجر دیا جائے گا اور یہ لوگ خوبصورت بالا خانوں کے جھروکوں میں مزے سے بیٹھے ہوں گے بغیر کسی قسم کے خوف یا اندیشے کے جبکہ ایسے لوگ جو دنیا میں نہ صرف گمراہ رہے بلکہ احکام الہی اور دین اسلام کو روکنے کی کوشش بھی کرتے رہے اللہ کے عذاب میں گرفتار ہوں گے۔ جہاں تک رزق کا تعلق ہے تو یہ محض اس کی اپنی تقسیم ہے جسے چاہے زیادہ عطا کردے اور جسے چاہے اپنے ہی بندوں میں سے تھوڑا عطا کرے یعنی مومنین میں بھی جو اس کے پسندیدہ اور نیک بندے ہیں ، ان میں بھی ایسے بندے ہیں ، ان میں بھی ایسے بندے ہیں جنہیں وہ دوسروں کی نسبت کم دولت دیتا ہے۔ اس سے پہلے کی آیت میں عمومی تذکرہ تھا کہ دولت و غربت وہ اپنی مرضی سے اور آزمائش و امتحان کے لیے بانٹتا ہے یہاں عبادہ فرما کر یہ ظاہر فرما دیا کہ مومونین میں بھی امارت و غربت دونوں باتیں ہوسکتی ہیں اور آج کے عہد کا یہ تصور کہ اچھے مسلمان کو ضرورت غریب ہی ہونا چاہیے باطل ٹھہرا حالانکہ صحابہ کرام رضوان اللہ علیہم اجمعین میں بھی بہت دولت مند لوگ تھے اور حضرت عثمان تو دولت مندوں کے سردار تھے پھر جب فتوحات نصیب ہوئیں مال غنیمت آیا تو حضرت علی اور حضرت حسن و حسین سب بہت امیر لوگ تھے اور یہ اللہ کا انعام تھا بلکہ ایمان کے ساتھ دولت اور قوت نصیب ہو اور بندہ اسے اللہ کی راہ میں خرچ کرے تو اسے مزید دولت نصیب ہوتی ہے کہ آخرت کی بخشش جو بہت بڑی دولت ہے وہ تو ملتی ہی ہے اکثر دنیا میں بھی مال اور طاقت میں زیادتی نصیب ہوتی ہے ہاں جو خرچ ناجائز کاموں میں کیا جائے اس میں بدلہ دینے کا وعدہ نہیں ہے اور یہ قانون بھی ارشاد ہوگیا کہ دنیا میں بھی جس چیز کا خرچ جتنا بڑھ جائے اللہ کریم وہ شئے اتنی زیادہ پیدا فرما دیتے ہیں اور جس کی ضرورت کم ہوتی جائے وہ شے کم ہوتی جاتی ہے اور اسے روز مرہ کے استعمال کی چیزوں میں دیکھا جاسکتا ہے اگر عضو بدن کو کام سے روک دیں بےکار ہوجائے گا کام کریں تو قوت پائے گا یا جیسے کتے بلی وغیرہ کہ متعدد بچے دیتے ہیں اور گائے بھیڑ بکری ایک یا دو مگر ہمیشہ تعداد میں گائے بکریاں ریوڑ کے ریڑ اور کتے بلی کم ہوتے ہیں۔ جہاں تک ان کے مشرکانہ عقائد کا تعلق ہے تو ایک روز تو سب لوگوں کو یکجا جمع کیا ہی جائے گا اگر اب نہیں مان رہے تو تب انہیں ضرور تسلی ہوجائے گی کہ جب ان کے روبرو فرشتوں تک سے پوچھا جائے گا یعنی یہ کسی انسان کی یا فرشتوں تک کی پوجا کرتے تھے تو ان کے روبرو بات ہوجائے گی جیسے دوسری جگہ انبیاء کرام سے پوچھنے کی بات ہے کہ کیا یہ لوگ دنیا میں تمہاری پوجا کیا کرتے تھے تو وہ عرض کریں گے اے اللہ تو ہر قسم کے باطل عقائد سے بہت بلند اور پاک ہے اور ہماری زندگی تو تیری معیت میں تیرے بھروسے تیری عبادت و اطاعت میں گزری یہ تو کبھی ہمارے ساتھ نہ تھے بلکہ یہ تو شیاطین کی پوجا کرتے تھے اور حق یہ ہے کہ اگر کوئی انبیاء صلحاء یا فرشتوں کی پوجا کرتا ہے تو وہ تو اس کی بات پر ہرگز راضی نہیں ہیں نہ ایسا کرنے کو کہتے ہیں یہ بات بھی اسے شیطان ہی سکھاتا ہے اور دراصل وہ شیطان ہی کی عبادت کرتا ہے اور کچھ لوگ واقعی جنوں اور شیاطین کو پوجتے ہیں۔ کچھ اعمال میں ان کی اطاعت کرکے اور کچھ عملیات میں کفر و شرک میں مبتلا ہو کر اور یوں دنیا کا مفاد حاصل کرنے کی امید میں لگے رہتے ہیں لیکن روز حشر ارشاد ہوگا کہ آج تو بات واضح ہوگئی کہ تم میں سے کوئی بھی کسی کے لیے کچھ نہیں کرسکتا نہ تو نفع ہی پہنا سکتا ہے اور نہ نقصان ہی کرسکتا ہے۔ یہ بہت عجیب بات ارشاد ہوئی کہ اکثر لوگ تو دنیا کے نفع کی امید پر عملیات باطلہ اور اعمال بد میں مبتلا ہوتے ہیں پھر یہ بھی مشاہدہ ہے کہ جنات لوگوں کو ایذا اور نقصان پہناتے ہیں تو حق یہ ہے کہ اگر دنیا میں ان کے باعث چند ٹکے مل بھی تو وہ نقصان ہی ہے کہ آخرت میں سزا کا سبب بنے گا اور اگر راہ حق پر چلتے ہوئے کسی کافر سے ایذا پہنچی وہ جن ہو یا انسان تو نقصان نہیں ہے کہ آخرت میں انعام اور مغفرت کا سبب بنے گا لہذا یہ بات آج بھی واضح ہے ارشادات نبوی میں موجود مگر کفار کو یقین نہیں تو روز حشر سامنے دیکھ کر یقین بھی کرلیں گے بلکہ تب تو دوزخ کو بھی مان لیں گے کہ سب کفار کو جن و شیاطین ہوں یا ان کے پجاری حکم ہوگا کہ اب آگ کا عذاب چکھو اور اس میں داخل ہوجاؤ جب کہ زندگی بھر تم اسے ماننے سے انکار کرتے رہے۔ جب ان لوگوں کے سامنے اللہ کی آیات اور اس کے ارشادات بیان کیے جائیں تو یہ بدبخت اس پہ غور نہیں کرتے بلکہ انہیں یہ فکر گھیر لیتی ہے کہ قبول کرنے سے ہمارا اقتدار جاتا رہے گا جبکہ رسومات باطلہ میں تو یہ سب کچھ اپنی مرضی سے کرتے ہیں تو کہنا شروع کردیتے ہیں کہ یہ بندہ ہمیں باپ دادا کی رسومات اور مذہب سے ہٹا کر اپنے پیچھے لگانا چاہتا ہے تاکہ اس طرح اسے ہم پر اقتدار حاصل ہوجائے اور یہ جو کچھ کہتا ہے اس میں سچائی کی کوئی بات نہیں بلکہ اس نے سب کچھ اپنے پاس سے گھڑ لیا ہے پھر جب حقائق ارشاد ہوتے ہیں جنہیں عقلاً اور نقلاً جھٹلانا ممکن نہیں رہتا نیز معجزات کا ظہور ہوتا ہے تو کہہ اٹھتے ہیں بلکہ یہ سب جادو ہے کس قدر بدبخت ہیں کہ انہیں تو آپ ﷺ سے پہلے کبھی ایسی کتاب نصیب ہوئی نہ ایسا صاحب کتاب۔ کہ پہلے انبیاء بھی اللہ کا بہت بڑا احسان تھا اور پہہلی کتب بھی اس کا انعام مگر نزول قرآن اور بعثت آقائے نامدار ﷺ تو بہت بہی بڑا اور بیحد و شمار احسان ہے جس کی یہ قدر کرتے اور جس پر قربان ہونے کو قابل فخر جانتے مگر انہوں نے انکار کی راہ اپنائی اور جن لوگوں نے انکار کی راہ اپنائی ہے وہ ذرا پہلی امتوں کو دیکھ لیں ان کے حالات پڑھ لیں کہ انہوں نے انبیاء کا انکار کیا تو کس انجام بد سے دو چار ہوئے جبکہ یہ لوگ تو قوت اور اقتدار میں ان کے ہزارویں حصے کو بھی نہیں پہنچے یعنی طاقت و اقتدار میں ان سے بہت کم ہیں اور آپ کی شان ان پہلوں کے انبیاء سے کس قدر بلند تو یہ سوچ لیں کہ ان کا انجام کیا ہوگا۔

رکوع نمبر 6 ۔ آیات 46 تا 54: اسرار و معارف : آپ ان کے اندیشوں کے جواب میں انہیں فرما دیجئے کہ ایک کام کرو محض جذباتی باتیں نہ کرو ذرا خلوص کے ساتھ جذبات سے الگ ہو کر محض اللہ کے لیے غور کرو اکیلے میں یا مل کر اور اچھی طرح سے فکر کرو کہ اللہ کا جو بندہ تم سے مخاطب ہے وہ کیسا ہے اتنا بڑا دعوی کرتا ہے اور پھر اکیلا بغیر کسی ظاہری مدد یا لاؤ لشکر اور مال و دولت کے وہ بات کہہ رہا ہے جو نہ صرف اہل مکہ بلکہ دنیا بھر کے کفار کے لیے چیلنج کی حیثیت رکھتی ہے ان کے صدیوں کے مذاہب کو باطل قرار دے رہا ہے اہل عرب کے سامنے صرف یہ ایک دعوی کہ جو کتاب میں پیش کر رہا ہوں دنیا کے سب اہل علم مل کر بھی اس جیسا ایک جملہ نہیں بنا سکتے بجائے خود کتنا عجیب ہے نیز دعوت پہ غور و فکر کرو اور دیانتدار سے خود فیصلہ کرو کہ کیا یہ سب کام بھلائی کے نہیں اور دنیا بھر کی برائیوں سے روکنے کا کام کر رہا ہے۔ بھلا ایسے کام کوئی مجنون یا سحر زدہ آدمی کرسکتا ہے جبکہ آپ ﷺ کی چالیس سالہ زندگی میں آپ ﷺ کی بصیرت و دانائی دینات و امانت اور راست بازی مثالی حالت میں تم سب کے سامنے موجود تو جب یہ حال ہے اور آپ ﷺ پاگل یا مجنون نہیں تو دوسری بات درست ثابت ہوگئی کہ آپ ﷺ اللہ کے برحق رسول ہیں اور یہ اللہ کا احسان ہے کہ تمہاری مشرکانہ رسومات اور ظالمانہ افعال کے باعث جو اللہ کا سخت ترین عذاب تم پر واقع ہونے والا ہے اس سے تم سب کو بروقت مطلع فرما رہا ہے اور بچنے کی راہ سمجھا رہا ہے۔ اور رہا دوسرا خطرہ کہ شاید سب حصول اقتدار کی خاطر ہو تو آپ فرما دیجئے کہ میں نے اگر کسی قسم کے مال و دولت اور اقتدار و اختیار کا مطالبہ کیا ہو تو وہ تم اپنے پاس رکھو کہ مجھے اس کام کے لیے کسی معاوضے کی کوئی تمنا نہیں کہ اگر اپنی حکومت بنانے یا اقتدار حاصل کرنے کا لالچ بھی ہو تو بات اللہ کے لیے تو نہ رہی جبکہ میں خالص اللہ کی رضا کے لیے سب کر رہا ہوں اور میرا معاوضہ وہی ذات کریم عطا فرمائے گی جو ہر آن ہر حال سے خوب واقف ہے اور یہ بھی سن لو کہ تمہارے حیلے اور مکر و فریب اب نہ چل سکیں گے کہ اللہ نے حق نازل فرما دیا ہے اور وہ تمام پوشیدہ رازوں سے باخبر ہے اس سے چھپا کر تم کوئی تدبیر بھی نہیں کرسکتے اور فرما دیجیے کہ جب دین حق آگیا تو باطل اب کسی کام کا نہ رہا نہ دلائل میں وہ جیت سکتا ہے اور نہ مکرو و فریب کرکے حق کو شکست دے سکتا ہے اگر تمہیں یہ خیال ہے کہ میں ہی غلطی پر ہوں تو میری غلطی میرا ہی نقصان کرے گی لیکن یاد رکھو جب میں ہی صحیح راستے پر ہوں تو یہ راستہ میرے پروردگار کی وحی سے متعین کردہ ہے وہ رب جو سب کچھ سنتا ہے اور سب سے قریب ہے اس کو چھوڑنے میں تم بھی تباہی کی طرف جا رہے ہو۔ یہ سب تو محض باتیں ہیں ایک وقت آ رہا ہے وہ موت کا ہو جو قیامت صغری ہے یا قیام قیامت تو انہیں دیکھیے گا کہ کس قدرگھبراہٹ میں گرفتار ہوں گے بھاگنا چاہیں گے مگر بھاگ نہ سکیں گے اور بغیر کسی دشواری کے پکڑ لیے جائیں گے تب کہہ اٹھیں گے کہ ہم قرآن کے ساتھ اور اللہ و رسول کے ساتھ ایمان لاتے ہیں ہم سب حقائق کو قبول کرتے ہیں مگر وہ وقت تو بیت چکا جب انہیں ایمان کی دعوت دی گئی تھی اب وہ گھڑی ان کی رسائی سے بہت دور ہے جب وقت ان کے ہاتھ میں تھا یہ کفر کرتے رہے اور بغیر کسی دلیل کے ہوا میں تیر چلاتے رہے کہ ان کے پاس کفر پر قائم رہنے کے لیے کوئی بھی دلیل نہ تھی اب انہیں ان کی پسندیدہ شے یعنی نجات عزت و آرام سے دور کردیا گیا ان اور اس کے درمیان رکاوٹ پڑگئی جس طرح پہلے کفار کا بھی یہی انجام ہوا کہ یہ سب اور ان کے پہلے بھی قیامت اور آخرت کے بارے شک میں مبتلا تھے اشیاء شیعہ کی جمع ہے جسکے معنی کسی خاص بات یا شخص کے پیروگروہ پر صادق آتے ہیں مگر قرآن نے کبھی اہل حق کے لیے یہ لفظ استعمال نہیں فرمایا ہمیشہ باطل گروہوں کو شیعہ کہا گیا ہے۔ تمت سورة سبا بحمداللہ تعالیٰ