50. Surah Qaaf

(50:41) استمع : امر کا صیغہ واحد مذکر حاضر۔ استماع (افتعال) مصدر۔ تو سن ۔ تو کان لگا کر ایک منادی کرنے والے کی نداء (پکار) کو سن (یہ خطاب عام ہے اور ہر سننے والے کو غور سے سننے کے لئے حکم دیا گیا ہے۔ یوم : جس دن۔ منصوب بوجہ مفعول فیہ۔ یناد مضارع کا صیغہ واحد مذکر غائب۔ مناداۃ (مفاعلۃ) مصدر سے۔ وہ پکارے گا۔ المناد اسم فاعل واحد مذکر ، نداء (باب نصر) ۔ اصل میں یہ المنادی تھا۔ یاء کو بحالت رفع ساقط کردیا گیا۔ منادی کرنے والا۔ نداء کرنے والا۔ پکارنے والا۔ ترجمہ ہوگا :۔ (اے مخاطبین) گوش ہوش سے سنو ، پکارنے والے کی نداء کو جس دن وہ قریب سے پکاریگا ۔ یعنی ہر ایک سننے والا یوں محسوس کریگا اور اس طرح صاف طور پر آواز کو سنے گا گویا پکارنے والا کسی قریب مکان سے پکار رہا ہے۔ یہ منظر اس دن کا ہے جب حضرت اسرافیل (علیہ السلام) صور پھونکیں گے اور مردے قبروں سے زندہ ہوکر اٹھ کھڑے ہوں گے۔

(50:42) یوم یسمعون الصحۃ بالحق : یوم یسمعون بدل ہے یون ینادی سے۔ الصیحۃ۔ چیخ۔ کڑک۔ ہولناک آواز۔ نعرہ۔ چنگھاڑ۔ صاح یصیح (باب ضرب) کا مصدر ہے اور بمعنی حاصل مصدر بھی آتا ہے۔ صیحۃ بروزن فعلۃ یہ صیاح کے ایک مرتبہ وقوع میں آنے کو بتاتا ہے اور صیاح صوت شدید (سخت عذاب) کو کہتے ہیں۔ یہاں الصیحۃ سے مراد حضرت اسرافیل کی آواز یا وہ آواز جو ان کے صور بھونکنے سے پیدا ہوگی مراد ہے۔ بالحق : بالیقین۔ یعنی جس دن سب لوگ یقینی طور پر آوازہ حشر سن لیں گے اور انہیں کوئی شک و شبہ نہیں رہیگا کہ یہ واقعی آوازہ حشر ہے۔ ذلک : ای ذلک الیوم وہ دن۔ یوم الخروج : مضاف مضاف الیہ۔ (قبروں سے) باہر نکل آنے کا دن۔ یوم قیامت کا نام ہے۔

(50:43) المصیر : اسم ظرف ومصدر میمی۔ لوٹنے کی جگہ۔ لوٹنا۔ صار یصیر سے ۔

(50:44) یوم تشقق الارض عنہم سراعا : یہ یوم ینادی سے بدل ہے وہ دن جب ان کے اوپر سے زمین پھٹ جائے گی۔ تشقق مضارع واحد مؤنث غائب تشقق (تفعل) مصدر سے۔ بمعنی پھٹ جانا۔ شگاف ہونا۔ اصل میں تتشقق تھا۔ ایک تاء کو حذف کردیا گیا۔ وہ پھٹ جائے گی۔ یعنی زمین پھٹ جائے گی۔ سراعا : ھو حال من الضمیر المجرور فی قولہ : عنھم ای تشقق الارض عنھم فی حال کو نھم مرعین الی الداعی وھو الملک الذی ینفخ فی الصور۔ یدعو الناس س الی الحساب والجزائ۔ اور یہ عنھم میں ضمیر مجرور ہم سے حال ہے۔ مطلب یہ کہ زمین ان کے اوپر سے پھٹ جائے گی۔ درآں حالیکہ وہ پکارنے والے کی طرف تیز تیز بھاگ رہے ہوں گے ۔ اور وہ پکارنے والا فرشتہ ہوگا جو صور پھونکے گا۔ اور لوگوں کو حساب و کتاب اور جزاء و سزاء کے لئے پکارے گا۔ (اضواء البیان) قیامت کے روز لوگوں کا قبروں سے نکلنا اور محشر کی طرف تیز تیز دوڑنے کے متعلق قرآن مجید میں اور بھی بہت سی آیات ہیں جیسے یوم یخرجون من الاجداث سراعا کانہم الی نصب یوفضون (70:43) اس دن یہ قبروں سے نکل کر (اس طرح دوڑیں گے جیسے (شکاری) شکار کے جال کی طرف روذتے ہیں ۔ وغیرہ وغیر۔ دوڑتے ہوئے، جلدی کرتے ہوئے سریع کی جمع جو کہ سرعۃ (باب فتح) مصدر سے جس کے معنی جلدی کرنا کے ہیں بروزن فعیل بمعنی فاعل ہے۔ ذلک حشر علینا یسیر : ای ذلک علینا حشر یسیر : ذلک : اسم اشارہ مراد اس سے یہ یک دم سب کافروں سے زندہ ہو کر نکل آنا ہے۔ علینا ہمارے لئے حشر یسیر موصوف مشبہ کا صیغہ واحد مذکر یسر مادہ۔ آسان، سہل ، ترجمہ :۔ یہ ہمارے نزدیک ایک آسان جمع کرلینا ہے۔ علینا کا ذکر یسیر سے پہلے اظہار خصوصیت کے لئے ہے حشر اموات اسی کے لئے آسان ہوسکتا ہے جو بذات خود عالم و قادر ہو اور کسی کام میں مشغولیت دوسرے کاموں سے اس کو غافل نہ بنا سکے اور ایسی ذات صرف اللہ تعالیٰ ہی کی ہے۔

(50:45) اعلم خوب جاننے والا۔ علم نے افعل التفضیل کا صیغہ ہے۔ جبار۔ سرکش، جبر کرنے والا۔ زبردست دباؤ والا۔ جبر سے مبالغہ کا صیغہ خدا تعالیٰ کے اسماء حسنی میں سے ہے۔ ما انت علیہم بجبار۔ آپ ان پر جبر کرنے والے نہیں ہیں۔ فذکر : امر کا صیغہ واحد مذکر حاضر۔ تذکیر (تفعیل) مصدر۔ تو یاد لا۔ تو سمجھا ۔ تو نصیحت کر۔ بالقران قرآن کے ذریعے سے۔ من یخاف وعید : من موصولہ یخاف وعید صلہ۔ موصول اپنے صلہ کے ساتھ مل کر مفعول ذکر کا۔ یخاف مضارع واحد مذکر غائب خوف باب فتح مصدر۔ ڈرتا ہے۔ وعید مصدر، مضاف مجرور۔ اصل میں وعیدی تھا۔ میرا عذاب۔ میری طرف سے ڈراوا۔ ترجمہ :۔ آپ نصیحت کرتے رہئے اس قرآن سے ہر اس شخص کو جو میرے عذاب سے ڈرتا ہے۔