Ayahs 52:1–161۔ 16۔ طور وہ پہاڑ ہے جس پر موسیٰ (علیہ السلام) نے اللہ تعالیٰ سے باتیں کیں۔ کتاب مسطور کے معنی لو محفوظ کشادہ ورق لوح محفوظ کے صفحہ کو فرمایا۔ ہر ایک آسمان پر ہر آسمان کے فرشتوں کی عبادت کا ایک مکان بنا ہوا ہے۔ ساتویں آسمان کے فرشتوں کے عبادت کا مکان جو بنا ہوا ہے اس کا نام بیت المعمور ہے۔ صحیح 1 ؎ بخاری میں ابوہریرہ ؓ سے اور صحیح مسلم 2 ؎ میں انس بن مالک سے معراج کی ذکر کی جو حدیث ہے اس میں بیت المعمور کا بھی ذکر ہے غرض کعبہ کی سیدھ پر یہ مکان ساتویں آسمان پر ہے اور ساتویں آسمان کے فرشتوں کا یہی کعبہ ہے۔ سقف مرفوع کے معنی آسمان۔ اکثر سلف بحر مسجور کی یہی تفسیر کی ہے کہ قیامت کے دن دنیا کے دریا آگ ہوجائیں اور آیت اذا البحار سجرت سے اس تفیرج کی تائید بھی ہوتی ہے۔ اس قسم کے بعد فرمایا کہ جس نافرمانی کی حالت میں یہ لوگ ہیں۔ اسی حالت میں جو لوگ ان میں سے مرجائیں گے تو جس عذاب کا ان لوگوں سے وعدہ ہے وہ ضرور قیامت کے دن اس طرح ان کو بھگتنا پڑے گا کہ اس عذاب کو کوئی ٹال نہیں سکتا۔ پھر فرمایا جس دنیا کی زندگی کے بھروسہ پر انسان اس عذاب سے غافل ہے وہ دنیا ہمیشہ رہنے کی چیز نہیں ہے بلکہ آسمان پہاڑ جو آج ایسے مضبوط نظر آتے ہیں پہلا صور شروع ہوتے ہی آسمان پہلے لرزنے لگے گا پھر پھٹ کر ٹکڑے ٹکڑے ہو کر اڑ جائے گا۔ پہاڑ اڑتے پھریں گے پھر فرمایا اس دن حشر کے جھٹلانے والوں اور دین کی باتوں کو کھیل تماشا ٹھہرانے والوں کی بڑی کم بختی ہے کہ دوزخ میں دھکیل کر اللہ کے فرشتے ان سے یہ کہیں گے اب خوب آنکھیں کھول کر اس آگ کو دیکھو جس سے ڈرانے کی نصیحت کو تم جھٹلاتے اور جادو بتاتے تھے۔ اب اس آگ میں تم کو چیخنا چلانا یا اس کی تکلیف پر صبر کرکے بیٹھ رہنا سب برابر ہے اور تم کو جو سزا ملی ہے کچھ بلا سبب نہیں ہے بلکہ دنیا میں جو تم نافرمانی کرتے تھے یہ اس کا خمیازہ ہے۔ صحیح بخاری 1 ؎ و مسلم میں ابوموسیٰ اشعری سے روایت ہے جس میں آنحضرت ﷺ نے احکام دین کو مینہ سے اور امت کے لوگوں کو زمین سے تشبیہ دی ہے اور زمین کی تیں قسمیں فرمائی ہیں۔ ایک کھیتی اور باغات کی زمین جس کو مینہ سے یہ فائدہ پہنچتا ہے کہ اس میں طرح طرح کے اناج اور میوہ جات پیدا ہوتے ہیں اور پھر ان اناج کے بیج اور میووں گٹھلیوں سے آگے پیداوار کا سلسلہ چلتا ہے۔ دوسرے وہ نشیب کی زمین جس میں پانی اکٹھا ہو کر چشمے اور تالاب ہوجاتے ہیں اور ان سے آدمیوں اور جانروں کی طرح طرح کا فائدہ پہنچتا ہے تیسرے وہ سخت زمین جس میں یہ دونوں باتیں نہیں ہیں بلکہ اس میں جو مینہ برستا ہے وہ رائیگاں جاتا ہے علماء نے کہا کہ زمین کی پہلی دو قسموں سے امت کے وہ لوگ مقصود ہیں جنہوں نے آنحضرت ﷺ کی ہدایت سے سلسلہ بہ سلسلہ خود بھی نفع دینی حاصل کیا اور لوگوں کو بھی نفع دینی پہنچایا۔ بعضوں نے علم دینی کی تعلیم سے وہ بیج بویا جس کا سلسلہ اناج کے بیج اور میوہ کی گٹھلیوں کی طرح قیامت تک چلے گا۔ بعضوں نے علم دین کی کتابیں تصنیف کرکے ان کتابوں کو ایک چشمہ فیض بنایا۔ تیسرے قسم سے وہ لوگ مقصود ہیں جن کے دنیا میں پیدا کرنے سے پہلے اللہ تعالیٰ نے اپنے علم ازلی میں یہ جان لیا تھا کہ کوئی آسمانی کتاب رسولوں کی نصیحت ان لوگوں کے دل پر اگر نہ کرے گی۔ اور آخر کار اپنی نافرمانی کی سزا میں یہ لوگ دوزخ میں جائیں گے ان آیتوں میں ان میں سے تیسری قسم کے لوگوں کے انجام کا ذکر ہے اور یہ حدیث ان آیتوں کی گویا تفسیر ہے۔
(1 ؎ صحیح بخاری باب المعراج ص 548 ج 1۔ )
(2 ؎ صحیح مسلم باب الاسراء برسول اللہ ﷺ ص 91 ج 1۔ )
(1 ؎ صحیح بخاری باب فضل منعلم و علم ص 18 ج 1 و صحیح مسلم باب مثل مابعث بہ النبی ﷺ الخ ص 247 ج 2۔ )
Ayahs 52:17–2017۔ 20۔ اوپر کی آیتوں میں اہل دوزخ کا ذکر فرما کر ان آیتوں میں اہل جنت کا ذکر فرمایا اہل جنت کے لئے یہ بھی ایک بڑی نعمت ہے کہ ان کی توحید کے طفیل سے اللہ تعالیٰ ان کے کم تر درجہ کے گناہ معاف فرما کر ان کو جنتی بنا دے گا۔ چناچہ صحیح بخاری 1 ؎ و مسلم کی عبد اللہ بن عمر کی حدیث گزر چکی ہے کہ اللہ تعالیٰ قیامت کے دن اپنے بعض بندوں سے فرمائے گا کہ جس طرح تمہارے گناہوں کو دنیا میں میں نے لوگوں پر ظاہر نہیں ہونے دیا آج بھی میں تمہارے ان گناہوں کو معاف کرتا ہوں اس لئے جنت کی نعمتوں میں اللہ تعالیٰ نے دوزخ سے بچانے کی نعمت کا ذکر فرمایا۔ سرر مصفوفہ کے معنی حضرت عبد اللہ بن عباس ؓ نے چھپر کھٹ کے کئے ہیں صحیح مسلم 2 ؎ اور ترمذی میں ابو سعید خدری ؓ سے روایت ہے جس کا حاصل یہ ہے کہ آنحضرت صلی علیہ اللہ وسلم نے فرمایا جب جنتی لوگ جنت میں پہنچ جائیں گے تو اللہ کے حکم سے ایک فرشتہ پکار کر یہ کہے گا اے اہل جنت اب تم ہمیشہ تندرست رہو گے کبھی بیمار نہ ہوگئے ہمیشہ زندہ رہوں گے کبھی مرو گے نہیں۔ ہمیشہ جوان رہو گے کبھی بوڑھے نہ ہو گے جنت کی نعمتوں کے باب میں ابوہریرہ ؓ کی صحیحین 3 ؎ کی روایت اوپر گزر چکی ہے کہ وہ نعمتیں نہ کسی نے آنکھوں سے دیکھیں نہ کانوں سے سنیں۔ نہ کسی کے دل میں ان کا خیال گزر سکتا ہے غرض نعمتیں وہ جن کا بیان نہیں ہوسکتا ان کی ہمیشگی وہ جس کی انتہا نہیں اللہ تعالیٰ اپنے فضل سے جب جنت نصیب کرے گا اس وقت ان نعمتوں کی تفصیل معلوم ہوگی اب تو زبان اور قلم ان کے بیان سے عاجز ہے۔
(1 ؎ صحیح بخاری باب ستر المومن علی نفسہ ص 896 ج 2۔ )
(2 ؎ صحیح مسلم باب الجنۃ وصفۃ نعیمھا واھلھا ص 380 ج 2۔ )
(3 ؎ صحیح مسلم باب الجنۃ وصفۃ نعیمھا واھلھا ص 378 ج 2۔ )
Ayahs 52:21–2321۔ 23۔ عقبیٰ میں ماں باپ سے اولاد کو اور اولاد سے ماں باپ کو اللہ تعالیٰ اپنی رحمت سے فائدہ پہنچائے گا چناچہ تفسیر ابن ابی حاتم اور طبرانی 1 ؎ میں حضرت عبد اللہ بن عباس کی روایت سے اس آیت کی تفسیر یوں ہے کہ قیامت کے دن بعض جنتی لوگ جنت میں داخل ہونے کے بعد اپنے ماں باپ اور بی بی بچوں کا حال فرشتوں سے پوچھیں گے کہ وہ سب کہاں ہیں فرشتے کہیں کے ان کے اعمال اس قابل نہ تھے کہ اس درجہ کی جنت میں وہ داخل ہوتے یہ جنتی لوگ اللہ سے دعا کریں گے اس پر اللہ تعالیٰ ان سب کو ایک جگہ اعلیٰ درجہ کی جنت میں اکٹھا کر دے گا۔ طبرانی کی سند میں ایک راوی محمد بن عبد الرحمن بن غزوان ضیفد ہے۔ لیکن یہ روایت مسند 2 ؎ بزار میں بھی ہے اس میں یہ راوی نہیں ہے۔ اس بزار کی روایت اور ابن ابی حاتم کی روایت سے طبرانی کی سند کا ضعف بھی ہلکا ہوجاتا ہے۔ معتبر سند سے مسند امام احمد 3 ؎ میں حضرت ابوہریرہ ؓ سے روایت ہے جس کا حاصل یہ ہے کہ آنحضرت ﷺ نے فرمایا بعض جنتی لوگوں کا درجہ ایک ایک ہی بڑھ جائے گا وہ لوگ کہیں گے یا اللہ ہمارے اعمال تو اس قابل نہ تھے یہ ہمارا درجہ کیونکر بڑھا اللہ تعالیٰ فرمائے گا تمہاری اولاد نے تمہارے حق میں دعا کی تھی اس لئے تمہارا درجہ بڑھا ہے۔ جس شخص کے تین یا دو نابالغ بچے مرجائیں اس کا جنتی ہونا اوپر حضرت حضرت ابوہریرہ کی صحیحین اور صحیح 4 ؎ مسلم کی حدیث میں گزر چکا ہے اور مسند امام 5 ؎ احمد اور ابو داؤود کی حضرت معاذجہنی کی حدیث بھی اوپر گزر چکی ہے جس کا حاصل یہ ہے کہ جن کی اولاد قرآن شریف پڑھ کر اس کی موافق عمل کرے گی ان کے ماں باپ کے سروں پر قیامت کے دن ایسا تاج رکھا جائے گا جس کی روشنی آفتاب سے بڑھ کر ہوگی اب آگے ماں باپ کی یہ تسلی بھی فرمائی کہ اللہ تعالیٰ جنتی ماں باپ کی اولاد کو یہ درجہ محض اپنی رحمت سے دے گا تاکہ اولاد کے اور ماں باپ کے ایک جگہ ہوجانے سے ماں باپ کا دل خوش ہوجائے اس درجہ کے معاوضہ میں ماں باپ کے عملوں میں سے کوئی عمل نہ گھٹایا جائے گا۔ معتبر سند سے تفسیر عبد الرازق اور تفسیر ابن ابی حاتم میں امام المفسرین حضرت عبد اللہ بن عباس کا جو قول ہے اس کے موافق آیت کے یہی معنی ہیں جو بیان کئے گئے ہر آدمی اپنی کمائی میں پھنسا ہے کا یہ مطلب ہے کہ ہر شخص کا عمل اس کے ساتھ ہے اگر نیک عمل ہے تو نجات کا سبب ہے ورنہ ہلاک کا۔ مسند 7 ؎ امام احمد اور ابو دائود میں معتبر سند سے براء بن عازب کی ایک بڑی حدیث ہے۔ اس کے ایک ٹکڑے کا حاصل یہ ہے کہ منکر نکیر کے سوال و جواب کے بعد نیک شخص کی قبر میں ایک اچھی صورت کا آدمی آتا ہے اور کہتا ہے میں تیرا نیک عمل ہوں۔ یہ شخص اپنی عمل کی حالت سے خوش ہو کر قیامت کے جلدی قائم ہونے کے ہر وقت دعا مانگتا رہتا ہے اور بد لوگوں کا حال قبر میں اس کے برعکس ہوتا ہے۔ حدیث کا یہ ٹکڑا آیت کے ٹکڑے کی گویا تفسیر ہے۔ سورة مدثر میں آئے گا کہ جن کے نامہ اعمال سیدھے ہاتھ میں دیئے جائیں گے وہ اپنے نیک عمل کے سبب رہائی پائیں گے۔ اور سیدھے ہاتھ کے اعمال نامے والے حساب و کتاب اور وزن اعمال تک ایک حالت منتظرہ میں رہ کر پھر جنت میں چلے جائیں گے غرض یہ ہے کہ ایک آیت مختصر ہے اور دوسری آیت مفصل۔ دونوں آیتوں میں کچھ اختلاف نہیں ہے۔ بیہقی 1 ؎ نے نے معتبر سند سے حضرت عبد اللہ بن عباس کی روایت بیان کی ہے جس کا حاصل یہ ہے کہ جنت کے میوے جنت کے کھانے جنت کی شراب غرض جنت کی سب چیزیں دنیا کی سب چیزوں سے بالکل مزہ میں الگ ہیں۔ دنیا کی چیزوں سے فقط ان کے نام ملتے ہوئے ہیں اسی لئے جنت کے میوے اور کھانے وغیرہ کو دنیا کے میوے اور کھانے سے تشبیہ دے کر کوئی تفسیر نہیں ہوسکتی۔ پھر فرمایا کہ دنیا کی شراب پینے کے بعد جس طرح آدمی کی عقل ٹھکانے نہیں رہتی اور بےہودہ باتیں اس کے منہ سے نکلنے لگتی ہیں جنت کی شراب میں یہ بات نہیں ہے جام شراب کا دور پر دور چلے گا اور کبھی کوئی بےہودہ بات کسی جنتی کے منہ سے نہ نکلے گی۔
(1 ؎ تفسیر ابن کثیر ص 242 ج 4۔ )
(2 ؎ تفسیر ابن کثیر ص 242 ج 4۔ )
(3 ؎ تفسیر ابن کثیر ص 242 ج 4۔ )
(4 ؎ صحیح مسلم باب فضل من یموت لہ ولد فیحتسبہ ص 330 ج 2۔ )
(5 ؎ مشکوٰۃ شریف کتاب فضائل القرآن۔ فصل ثانی ص 186۔ )
(6 ؎ تفسیر ابن کثر ص 341 ج 4۔ )
(7 ؎ مشکوٰۃ شریف باب فیما یقال عند من حضرۃ الموت فصل ثالث ص 142۔ )
(1 ؎ الترغیب و الترہیب۔ فضل فی ان اعلیٰ مایخطر علی البال اویجوزہ العقل الخ ص 1039 ج 4۔ )
Ayahs 52:24–2824۔ 28۔ جو موتی کام میں لایا جائے وہ ذرا میلا ہوجاتا ہے ان غلاموں کا رنگ ایسا آبدار ہوگا جس طرح بےکام میں لایا ڈبیا میں رکھا ہوا موتی آبدار ہوتا ہے۔ بعض مفسروں نے لکھا ہے کہ مشرکوں کے نابالغ بچے جو مرجاتے ہیں یہ وہی ہیں لیکن اوپر بیان ہوچکا ہے کہ یہ روایت ضعیف ہے۔ جنت میں اگرچہ غلام اور خدمت گار کی کچھ ضرورت نہیں وہاں سب کام اللہ کے حکم سے خود ہوجایا کریں گے لیکن عزت اور احتشام بڑھانے کے لئے ادنیٰ اہل جنت کو اسی ہزار غلام دیئے جائیں گے چناچہ ترمذی میں 1 ؎ ابو سعید خدری کی حدیث میں اس کا ذکر ہے اگرچہ ترمذی نے اس سند میں رشدین بن سعد کو منفرد کہا ہے جو بعض علماء کے نزدیک ضعیف ہے لیکن صحیح ابن حبان کی سند میں رشدین نہیں ہے۔ اب آگے یہ ذکر ہے کہ یہ متقی لوگ دنیا میں عذاب سے ڈرا کرتے تھے اور اللہ تعالیٰ سے اس عذاب سے بچانے کی دعا کیا کرتے تھے اس حالت کو یاد کرکے جنت میں اس کا تذکرہ یوں آپس میں کریں گے کہ اللہ بڑا غفور الرحیم ہے کہ اس نے ہماری دنیا کی وہ التجا سن لی اور ہم کو عذاب آخرت سے بچا لیا۔ صحیح 2 ؎ بخاری و مسلم میں ابوہریرہ ؓ سے روایت ہے کہ جس کے ایک ٹکڑے کا حاصل یہ ہے کہ آنحضرت ﷺ نے فرمایا بندوں کا ذکر الٰہی سننے کو جو فرشتے زمین پر آتے ہیں جب وہ آسمان پر جاتے ہیں تو اللہ تعالیٰ سے عرض کرتے ہیں یا اللہ تیرے بندے دوزخ کے عذاب سے خوفزدہ ہو کر اس عذاب سے تیری پناہ چاہ رہے تھے۔ اس پر اللہ تعالیٰ فرمائے گا میں نے ان کو عذاب آخرت سے اپنی پناہ دی۔ حدیث کا یہ ٹکڑا آیت کے اس ٹکڑے کی گویا تفسیر ہے کیونکہ آیت کا اور حدیث کا مطلب یہ ہے کہ جو شخص عذاب آخرت سے دنیا میں ڈرتا رہے گا اللہ تعالیٰ آخرت میں اس کو عذاب سے بچائے گا۔
(1 ؎ جامع ترمذی باب ماجاء مالا دنی اھل الجنۃ من الکرامۃ ص 93 ج 2۔ )
(2 ؎ صحیح بخاری باب فضل ذکر اللہ تعالیٰ ص 948 ج 2 و صحیح مسلم فضل مجالس الذکر ص 344 ج 2۔ )
Ayahs 52:29–3429۔ 34۔ تفسیر ابن جریر وغیرہ میں حضرت عبد اللہ بن عباس ؓ کی روایتیں ہیں کہ موسم حج میں باہر کے مسافر لوگ مکہ کو آتے تھے اہل مکہ ان دنوں میں کچھ آدمی اطراف مکہ میں بٹھا دیتے تھے کہ وہ ان مسافروں سے آنحضرت ﷺ کی طرح طرح سے مذمت کریں کسی سے کہہ دیں کہ یہ کاہن ہیں کسی سے کہہ دیں کہ یہ دیوانے ہیں کسی سے کہہ دیں کہ یہ شاعر ہیں۔ اس پر اللہ تعالیٰ نے یہ آیتیں نازل فرمائیں اور فرمایا کہ اے رسول اللہ کے تم ان لوگوں کی باتوں کا کچھ خیال نہ کرو۔ بلکہ تم اللہ کے کلام کے موافق عام لوگوں کو نصیحت کرتے جاؤ یہ لوگ جھوٹے ہیں اللہ نے اپنے فضل سے تم کو نبوت کی نعمت دی ہے۔ تم اللہ کے رسول ہو۔ عرب میں شاعر بہت ہوتے تھے اور عرب کا یہ بھی ایک دستور تھا کہ ہجو کے ڈر سے شاعروں کے منہ پر ان کی مذمت نہیں کیا کرتے تھے بلکہ جن شاعروں کو مخالف سمجھتے تھے ان شاعروں کی موت کی تمنا کیا کرتے تھے۔ قریش آنحضرت ﷺ کو شاعر خیال کرکے اپنی قوم کے دستور کے موافق آپ کی وفات کا انتظار کیا کرتے تھے۔ اس لئے فرمایا کہ اپنے گمان میں یہ لوگ اپنے آپ کو بڑا عقل مند گنتے ہیں ان کی عقل میں اتنی بات نہیں آتی کہ یہ اللہ کا کلام نہ ہوتا تو یہ لوگ جو عرب کے فصیح لوگوں میں کہلاتے ہیں اس کے موافق کچھ کلام بنانے سے عاجز کیوں ہوجاتے اور یہ بھی فرمایا کہ ان لوگوں سے کہہ دو کہ غیب کا یہ حال تو کسی کو معلوم نہیں کہ کس کی موت کب آنے والی ہے لیکن اے رسول اللہ کے ان لوگوں سے یہ کہہ دو کہ تم لوگ میری موت کا انتظام کرو میں تمہاری موت کا انتظار کرتا ہوں ‘ انجام ہر ایک کا معلوم ہوجائے گا۔ اللہ کا وعدہ سچا ہے اللہ کے رسول کی موت کے انتظار کرنے والے بدر کی لڑائی میں ختم ہوگئے اور اللہ تعالیٰ نے ان آیتوں کے بعد اپنے رسول کی جو مدد کی اور اللہ تعالیٰ کی مدد سے اسلام کی جو کچھ ترقی ہوئی وہ ظاہر ہے عرب میں مکہ کے لوگ بڑے عقل مند کہلاتے تھے اس لئے یہ بھی فرمایا کہ ان کی عقلوں نے یہی ان کی رہبری کی ہے کہ یہ دیوانوں کی سی باتیں کرتے ہیں کبھی اللہ کے رسول کو دیوانہ کہتے ہیں اور کبھی شاعر حالانکہ دیوانہ وہ ہے جو معمولی باتیں بھی ڈھنگ سے نہیں کرتا اور شاعر غیر معمولی دور دور کی باتوں کی تک بندی کرتا ہے پھر فرمایا کہ شیطان کے بہکانے سے بہک کر یہ لوگ حد سے زیادہ سرکش ہوگئے اور مر کر پھر جینے کا ان کو یقین نہیں ‘ اس واسطے یہ لوگ ایسی خلاف عقل باتیں کرتے ہیں کاہن جاہلی زمانہ میں وہ لوگ تھے جو جنات کی نذر نیا کرتے تھے اور وہ جنات چوری سے آسمان پر کی کچھ باتیں سن کر ان کاہنوں سے آ کر کہہ دیتے تھے اور وہ آئندہ کی جھوٹ سچ خبریں لوگوں کو بتایا کرتے تھے۔