93. Surah Ad-Dhuhaa

[1] اصل میں لفظ '' سجٰی '' استعمال ہوا ہے جس میں صرف تاریکی چھا جانے ہی کا نہیں بلکہ سکون طاری ہونے کا مفہوم بھی شامل ہے۔

[2] روایات صحیحہ میں ہے کہ جبرائیل (علیہ السلام) کچھ عرصے تک رسول اکرم ﷺ کے پاس نہ آئے، یعنی وحی کا سلسلہ بند رہا۔ مشرکین نے طعنہ دینا شروع کردیا کہ محمد ﷺ کو (نعوذ باللّٰہ) اس کے رب نے ناراض ہو کر چھوڑ دیا ہے۔ اس پر یہ سورت نازل ہوئی۔ اس میں دن اور رات کی قسم کھا کر نبی ﷺ سے فرمایا گیا کہ تمہارے رب نے تمہیں چھوڑا ہے اور نہ تم سے ناراض ہوا ہے۔ اس بات پر دن اور رات کی قسم جس مناسبت سے کھائی گئی ہے وہ یہ ہے کہ جس طرح اللہ تعالیٰ ظاہر میں اپنی قدرت و حکمت کے مختلف نشان ظاہر کرتا ہے، دن کے پیچھے رات کو اور رات کے پیچھے دن کو لاتا ہے۔ یہی کیفیت باطنی حالت کی سمجھنا چاہیے۔ اگر دن کے بعد رات کا آنا اللہ تعالیٰ کی خفگی اور ناراضگی کی دلیل نہیں اور نہ اس کا ثبوت ہے کہ اس کے بعد دن کا اجالا پھر کبھی نہ ہوگا تو چند روز وحی کے رکے رہنے سے یہ کیونکر سمجھ لیا جائے کہ اللہ اپنے پیغمبر سے ناراض ہوگیا ہے اور ہمیشہ کے لئے وحی کا سلسلہ بند کردیا ہے۔ اس کے علاوہ دوسری مناسبت قسم سے یہ ہے کہ جس طرح دن کی روشنی اگر مسلسل آدمی پر طاری رہے تو وہ اسے تھکا دے گی لہذا ایک وقت خاص تک دن کے روشن رہنے کے بعد رات کا آنا ضروری ہے تاکہ اس میں انسان کو سکون ملے۔ اسی طرح وحی کی روشنی مسلسل اگر نبی ﷺ پر پڑتی رہے تو آپ کے اعصاب اس کو برداشت نہ کرسکیں گے۔ اس لئے وقتاً فوقتاً نزول وحی کے سلسلے کا رک جانا اللہ تعالیٰ نے مصلحت کی بناء پر رکھا ہے تاکہ وحی کے نزول سے جو بار مسلسل آپ پر پڑتا ہے اس کا اثر زائل ہوجائے اور آپ کو مکمل سکون حاصل ہو۔ گویا آفتاب وحی کا طلوع بمنزلہ روز روشن ہے اور وحی کے رک جانے کا زمانہ بمنزلہ سکون شب۔

[3] یعنی آنے والے حالات آپ کے لئے گزشتہ حالات سے بہتر و برتر ہوں گے۔