59. Surah Al-Hashr

سَبَّحَ لِلّٰهِ مَا فِی السَّمٰوٰتِ وَ مَا فِی الْاَرْضِ١ۚ وَ هُوَ الْعَزِیْزُ الْحَكِیْمُ ﴿١﴾Open ayah 59:1 in the Quran reader

اللہ ہی کی تسبیح (وتقدیس) کرتی ہیں (ساری چیزیں) جو آسمانوں میں ہیں اور جو زمین میں ہیں اور وہی زبردست (اور) حکمت والا ہے۔

هُوَ الَّذِیْۤ اَخْرَجَ الَّذِیْنَ كَفَرُوْا مِنْ اَهْلِ الْكِتٰبِ مِنْ دِیَارِهِمْ لِاَوَّلِ الْحَشْرِ١ؔؕ مَا ظَنَنْتُمْ اَنْ یَّخْرُجُوْا وَ ظَنُّوْۤا اَنَّهُمْ مَّانِعَتُهُمْ حُصُوْنُهُمْ مِّنَ اللّٰهِ فَاَتٰىهُمُ اللّٰهُ مِنْ حَیْثُ لَمْ یَحْتَسِبُوْا١ۗ وَ قَذَفَ فِیْ قُلُوْبِهِمُ الرُّعْبَ یُخْرِبُوْنَ بُیُوْتَهُمْ بِاَیْدِیْهِمْ وَ اَیْدِی الْمُؤْمِنِیْنَ١ۗ فَاعْتَبِرُوْا یٰۤاُولِی الْاَبْصَارِ ﴿٢﴾Open ayah 59:2 in the Quran reader

(مسلمانو، ) وہ ( اللہ) ہی تو ہے جس نے اہل کتاب کفار میں سے پہلے ہی ہلے میں ان کے گھروں سے نکال باہر کیا۔ تم کو (وہم و) گمان بھی نہ تھا کہ وہ نکل جائیں گے اور وہ اس خیال میں (مست) تھے کہ ان کے قلعے ان کو اللہ (کی پکڑ) سے بچا لیں گے مگر اللہ ان پر وہاں سے آ دھمکا جدھر سے ان کو گمان بھی نہ تھا اور ان کے دلوں میں (مسلمانوں کا) رعب ڈال دیا (جس کا نتیجہ یہ ہوا کہ) وہ اپنے گھروں کو خود اپنے ہاتھوں سے اجاڑ رہے تھے اور مسلمانوں کے ہاتھوں (اجڑ رہے تھے) ۔ پس عبرت پکڑو، اے (بصیرت کی) آنکھیں رکھنے والو !

وَ لَوْ لَاۤ اَنْ كَتَبَ اللّٰهُ عَلَیْهِمُ الْجَلَآءَ لَعَذَّبَهُمْ فِی الدُّنْیَا١ؕ وَ لَهُمْ فِی الْاٰخِرَةِ عَذَابُ النَّارِ ﴿٣﴾Open ayah 59:3 in the Quran reader

اور اگر اللہ نے ان کے حق میں جلاوطنی نہ لکھ دی ہوتی تو وہ دنیا ہی میں انہیں عذاب دے ڈالتا، اور آخرت میں (تو) ان کو دوزخ کا عذاب (ہونا ہی) ہے۔

ذٰلِكَ بِاَنَّهُمْ شَآقُّوا اللّٰهَ وَ رَسُوْلَهٗ١ۚ وَ مَنْ یُّشَآقِّ اللّٰهَ فَاِنَّ اللّٰهَ شَدِیْدُ الْعِقَابِ ﴿٤﴾Open ayah 59:4 in the Quran reader

(اور) یہ اس سبب سے کہ انہوں نے اللہ اور اس کے رسول کی مخالفت کی اور جو کوئی اللہ کی مخالفت کرے تو (جان لو) اللہ سزا دینے میں بہت سخت ہے۔

مَا قَطَعْتُمْ مِّنْ لِّیْنَةٍ اَوْ تَرَكْتُمُوْهَا قَآئِمَةً عَلٰۤى اُصُوْلِهَا فَبِاِذْنِ اللّٰهِ وَ لِیُخْزِیَ الْفٰسِقِیْنَ ﴿٥﴾Open ayah 59:5 in the Quran reader

(مسلمانو، ان کے) کھجوروں کے درخت جو تم نے کاٹ ڈالے یا جن کو (بدستور) اپنی جڑوں پر کھڑا رہنے دیا تو یہ (سب کچھ) اللہ ہی کے حکم سے تھا اور (اللہ نے یہ حکم اس لئے دیا) تاکہ وہ فاسقوں کو ذلیل (وخوار) کرے۔

وَ مَاۤ اَفَآءَ اللّٰهُ عَلٰى رَسُوْلِهٖ مِنْهُمْ فَمَاۤ اَوْجَفْتُمْ عَلَیْهِ مِنْ خَیْلٍ وَّ لَا رِكَابٍ وَّ لٰكِنَّ اللّٰهَ یُسَلِّطُ رُسُلَهٗ عَلٰى مَنْ یَّشَآءُ١ؕ وَ اللّٰهُ عَلٰى كُلِّ شَیْءٍ قَدِیْرٌ ﴿٦﴾Open ayah 59:6 in the Quran reader

اور جو (مال) اللہ نے اپنے رسول کو ان سے بطور فَے دلوا دئیے تو (مسلمانو، وہ ایسے مال ہیں) جن کے لئے تم نے نہ گھوڑے دوڑائے اور نہ اونٹ، مگر اللہ اپنے رسولوں کو جس پر چاہے مسلط فرما دیتا ہے اور اللہ ہر چیز پر قادر ہے۔

مَاۤ اَفَآءَ اللّٰهُ عَلٰى رَسُوْلِهٖ مِنْ اَهْلِ الْقُرٰى فَلِلّٰهِ وَ لِلرَّسُوْلِ وَ لِذِی الْقُرْبٰى وَ الْیَتٰمٰى وَ الْمَسٰكِیْنِ وَ ابْنِ السَّبِیْلِ١ۙ كَیْ لَا یَكُوْنَ دُوْلَةًۢ بَیْنَ الْاَغْنِیَآءِ مِنْكُمْ١ؕ وَ مَاۤ اٰتٰىكُمُ الرَّسُوْلُ فَخُذُوْهُ١ۗ وَ مَا نَهٰىكُمْ عَنْهُ فَانْتَهُوْا١ۚ وَ اتَّقُوا اللّٰهَ١ؕ اِنَّ اللّٰهَ شَدِیْدُ الْعِقَابِۘ ﴿٧﴾Open ayah 59:7 in the Quran reader

جو (مال) اللہ اپنے رسول کو (ان) بستیوں کے لوگوں سے بطور فَے دلوا دے تو وہ اللہ کا (حق) ہے اور رسول کا اور رسول کے قرابت داروں کا، اور یتیموں کا اور محتاجوں کا اور مسافروں کا۔ یہ (حکم) اس لئے (دیا گیا) کہ یہ (مال فے) تمہارے مالداروں ہی کے درمیان گردش نہ کرتا رہے۔ اور (مسلمانو، ) جو کچھ تمہیں رسول دے اسے لو اور جس سے تمہیں وہ منع کرے اس سے رک جاؤ، اور اللہ (کے غضب) سے ڈرتے رہو (کیونکہ) اللہ سزا دینے میں بہت سخت ہے۔

لِلْفُقَرَآءِ الْمُهٰجِرِیْنَ الَّذِیْنَ اُخْرِجُوْا مِنْ دِیَارِهِمْ وَ اَمْوَالِهِمْ یَبْتَغُوْنَ فَضْلًا مِّنَ اللّٰهِ وَ رِضْوَانًا وَّ یَنْصُرُوْنَ اللّٰهَ وَ رَسُوْلَهٗ١ؕ اُولٰٓئِكَ هُمُ الصّٰدِقُوْنَۚ ﴿٨﴾Open ayah 59:8 in the Quran reader

(نیز وہ مال) ان محتاج مہاجرین کے لئے ہے جو (کفار کے ظلم سے) اپنے گھروں اور اپنی املاک سے بےدخل کر دئیے گئے ہیں اور (اب) وہ اللہ کا فضل اور اس کی خوشنودی چاہتے ہیں اور اللہ اور اس کے رسول کی مدد کو کھڑے ہوجاتے ہیں۔ یہی لوگ سچے (مسلمان) ہیں۔

وَ الَّذِیْنَ تَبَوَّؤُ الدَّارَ وَ الْاِیْمَانَ مِنْ قَبْلِهِمْ یُحِبُّوْنَ مَنْ هَاجَرَ اِلَیْهِمْ وَ لَا یَجِدُوْنَ فِیْ صُدُوْرِهِمْ حَاجَةً مِّمَّاۤ اُوْتُوْا وَ یُؤْثِرُوْنَ عَلٰۤى اَنْفُسِهِمْ وَ لَوْ كَانَ بِهِمْ خَصَاصَةٌ١۫ؕ وَ مَنْ یُّوْقَ شُحَّ نَفْسِهٖ فَاُولٰٓئِكَ هُمُ الْمُفْلِحُوْنَۚ ﴿٩﴾Open ayah 59:9 in the Quran reader

اور (وہ مال ان لوگوں کے لئے بھی ہے) جو ان مہاجرین سے پہلے دارالاسلام میں مقیم ہیں اور ایمان لا چکے ہیں۔ یہ ان لوگوں کو دوست رکھتے ہیں جو ہجرت کر کے ان کے پاس آ رہے ہیں اور جو کچھ بھی ان (مہاجرین) کو (اس مال میں سے) دے دیا جائے (اس سے) وہ اپنے دلوں میں (اس کی) کوئی طلب نہیں پاتے اور (اپنے مہاجرین بھائیوں کو) اپنی ذات پر ترجیح دیتے ہیں خواہ اپنے اوپر تنگی ہی کیوں نہ ہو۔ اور (حقیقت یہ ہے کہ) جو شخص اپنی طبیعت کے بخل سے محفوظ رکھا گیا تو ایسے ہی لوگ فلاح پانے والے ہیں۔

وَ الَّذِیْنَ جَآءُوْ مِنْۢ بَعْدِهِمْ یَقُوْلُوْنَ رَبَّنَا اغْفِرْ لَنَا وَ لِاِخْوَانِنَا الَّذِیْنَ سَبَقُوْنَا بِالْاِیْمَانِ وَ لَا تَجْعَلْ فِیْ قُلُوْبِنَا غِلًّا لِّلَّذِیْنَ اٰمَنُوْا رَبَّنَاۤ اِنَّكَ رَءُوْفٌ رَّحِیْمٌ۠ ﴿١٠﴾Open ayah 59:10 in the Quran reader

اور ( وہ مال ان لوگوں کے لئے بھی ہے) جو ان (مہاجرین اولین) کے بعد آئے ہیں (اور یہ بھی اگلے آنے والوں کے خیرخواہ ہیں اور) دعائیں مانگا کرتے ہیں کہ '' اے ہمارے رب، ہمیں بھی بخش دے اور ہمارے (ان سب) بھائیوں کو بھی جنہوں نے ایمان لانے میں ہم پر سبقت کی اور ہمارے دلوں میں اہل ایمان کے لئے کوئی کینہ نہ ہونے دے۔ اے ہمارے رب، بیشک تو بڑا ہی شفیق (اور) ہمیشہ رحم کرنے والا ہے۔ ''

اَلَمْ تَرَ اِلَى الَّذِیْنَ نَافَقُوْا یَقُوْلُوْنَ لِاِخْوَانِهِمُ الَّذِیْنَ كَفَرُوْا مِنْ اَهْلِ الْكِتٰبِ لَئِنْ اُخْرِجْتُمْ لَنَخْرُجَنَّ مَعَكُمْ وَ لَا نُطِیْعُ فِیْكُمْ اَحَدًا اَبَدًا١ۙ وَّ اِنْ قُوْتِلْتُمْ لَنَنْصُرَنَّكُمْ١ؕ وَ اللّٰهُ یَشْهَدُ اِنَّهُمْ لَكٰذِبُوْنَ ﴿١١﴾Open ayah 59:11 in the Quran reader

(اے پیغمبر، ) کیا تم نے ان لوگوں (کے حال) پر نظر نہیں کی جنہوں نے منافقت (کی روش اختیار) کی ہے ؟ وہ اپنے اہل کتاب کافر بھائیوں سے کہتے ہیں کہ اگر تم گھروں سے نکالے گئے تو ہم بھی تمہارے ساتھ نکل کھڑے ہوں گے اور تمہارے بارے میں ہم کسی کی بات نہ مانیں گے اور اگر تم سے جنگ کی گئی تو ہم ضرور تمہاری مدد کریں گے، مگر اللہ گواہی دیتا ہے کہ یہ بالکل جھوٹے ہیں۔

لَئِنْ اُخْرِجُوْا لَا یَخْرُجُوْنَ مَعَهُمْ١ۚ وَ لَئِنْ قُوْتِلُوْا لَا یَنْصُرُوْنَهُمْ١ۚ وَ لَئِنْ نَّصَرُوْهُمْ لَیُوَلُّنَّ الْاَدْبَارَ١۫ ثُمَّ لَا یُنْصَرُوْنَ ﴿١٢﴾Open ayah 59:12 in the Quran reader

اگر وہ (اہل کتاب) نکالے گئے تو یہ ان کے ساتھ نہ نکلیں گے اور اگر ان سے جنگ کی گئی تو یہ (منافق) ان کی (کبھی) مدد نہ کریں گے اور اگر یہ ان کی مدد کریں بھی تو پیٹھ پھیر جائیں گے (اور) پھر ان کو کوئی مدد نہ ملے گی۔

لَاَنْتُمْ اَشَدُّ رَهْبَةً فِیْ صُدُوْرِهِمْ مِّنَ اللّٰهِ١ؕ ذٰلِكَ بِاَنَّهُمْ قَوْمٌ لَّا یَفْقَهُوْنَ ﴿١٣﴾Open ayah 59:13 in the Quran reader

(مسلمانو، ) تمہاری ہیبت تو ان کے دلوں میں اللہ سے (بھی) بڑھ کر ہے، یہ اس لئے کہ یہ ناسمجھ لوگ ہیں۔

لَا یُقَاتِلُوْنَكُمْ جَمِیْعًا اِلَّا فِیْ قُرًى مُّحَصَّنَةٍ اَوْ مِنْ وَّرَآءِ جُدُرٍ١ؕ بَاْسُهُمْ بَیْنَهُمْ شَدِیْدٌ١ؕ تَحْسَبُهُمْ جَمِیْعًا وَّ قُلُوْبُهُمْ شَتّٰى١ؕ ذٰلِكَ بِاَنَّهُمْ قَوْمٌ لَّا یَعْقِلُوْنَۚ ﴿١٤﴾Open ayah 59:14 in the Quran reader

یہ کبھی اکٹھے ہو کر تم سے نہ لڑیں گے مگر ہاں محفوظ بستیوں میں یا دیواروں کی آڑ میں۔ ان کی لڑائی آپس (ہی) میں تیز ہے۔ تم انہیں متحد سمجھتے ہو حالانکہ ان کے دل ایک دوسرے سے پھٹے ہوئے ہیں، یہ اس لئے کہ یہ عقل سے کام نہیں لیتے۔

كَمَثَلِ الَّذِیْنَ مِنْ قَبْلِهِمْ قَرِیْبًا ذَاقُوْا وَبَالَ اَمْرِهِمْ١ۚ وَ لَهُمْ عَذَابٌ اَلِیْمٌۚ ﴿١٥﴾Open ayah 59:15 in the Quran reader

(اور دیکھو، جن کو یہ منافقین شہ دے رہے ہیں) ان کی مثال ان لوگوں کی سی ہے جو ان سے کچھ ہی دن پہلے اپنی شامت اعمال کا مزہ چکھ چکے ہیں اور (آخرت میں) ان کے لئے دردناک عذاب ہے۔

كَمَثَلِ الشَّیْطٰنِ اِذْ قَالَ لِلْاِنْسَانِ اكْفُرْ١ۚ فَلَمَّا كَفَرَ قَالَ اِنِّیْ بَرِیْٓءٌ مِّنْكَ اِنِّیْۤ اَخَافُ اللّٰهَ رَبَّ الْعٰلَمِیْنَ ﴿١٦﴾Open ayah 59:16 in the Quran reader

(یہ شہ دینے والے) شیطان کے مانند ہیں جو انسان سے کہتا ہے کہ کفر کر، پھر جب وہ کفر کر بیٹھتا ہے (تو اس سے) کہتا ہے کہ میں تجھ سے بری الذمہ ہوں، میں تو اللہ رب العالمین (کے غضب) سے ڈرتا ہوں۔

فَكَانَ عَاقِبَتَهُمَاۤ اَنَّهُمَا فِی النَّارِ خَالِدَیْنِ فِیْهَا١ؕ وَ ذٰلِكَ جَزٰٓؤُا الظّٰلِمِیْنَ۠ ﴿١٧﴾Open ayah 59:17 in the Quran reader

پھر دونوں کا انجام یہ ہے کہ وہ دونوں دوزخ میں ہوں گے، اسی میں ہمیشہ (ہمیشہ) رہیں گے اور ظالموں کی یہی سزا ہے۔

یٰۤاَیُّهَا الَّذِیْنَ اٰمَنُوا اتَّقُوا اللّٰهَ وَ لْتَنْظُرْ نَفْسٌ مَّا قَدَّمَتْ لِغَدٍ١ۚ وَ اتَّقُوا اللّٰهَ١ؕ اِنَّ اللّٰهَ خَبِیْرٌۢ بِمَا تَعْمَلُوْنَ ﴿١٨﴾Open ayah 59:18 in the Quran reader

اے لوگو جو ایمان لائے ہو، اللہ (کے غضب) سے ڈرتے رہو اور ہر شخص یہ دیکھے کہ کل (قیامت) کے لئے اس نے کیا (زادِآخرت) بھیجا ہے۔ اور اللہ سے ڈرتے رہو، جو کچھ بھی تم کرتے ہو اللہ اس سے باخبر ہے۔

وَ لَا تَكُوْنُوْا كَالَّذِیْنَ نَسُوا اللّٰهَ فَاَنْسٰىهُمْ اَنْفُسَهُمْ١ؕ اُولٰٓئِكَ هُمُ الْفٰسِقُوْنَ ﴿١٩﴾Open ayah 59:19 in the Quran reader

اور ان لوگوں کی طرح نہ ہوجاؤ جنہوں نے اللہ کو بھلا دیا تو اللہ نے خود انہیں اپنی جانوں سے غافل کردیا۔ یہی لوگ نافرمان ہیں۔

لَا یَسْتَوِیْۤ اَصْحٰبُ النَّارِ وَ اَصْحٰبُ الْجَنَّةِ١ؕ اَصْحٰبُ الْجَنَّةِ هُمُ الْفَآئِزُوْنَ ﴿٢٠﴾Open ayah 59:20 in the Quran reader

دوزخی اور جنتی (کبھی) برابر نہیں (ہو سکتے کہ) اہل جنت ہی کامیاب ہیں۔

لَوْ اَنْزَلْنَا هٰذَا الْقُرْاٰنَ عَلٰى جَبَلٍ لَّرَاَیْتَهٗ خَاشِعًا مُّتَصَدِّعًا مِّنْ خَشْیَةِ اللّٰهِ١ؕ وَ تِلْكَ الْاَمْثَالُ نَضْرِبُهَا لِلنَّاسِ لَعَلَّهُمْ یَتَفَكَّرُوْنَ ﴿٢١﴾Open ayah 59:21 in the Quran reader

(اے پیغمبر، ) اگر ہم نے یہ قرآن کسی پہاڑ پر اتارا ہوتا (اور انسان کی طرح اس میں سمجھ کا مادہ ہوتا) تو تم دیکھتے کہ وہ اللہ کے خوف سے جھک گیا ہوتا (اور) پھٹ پڑا ہوتا۔ اور ہم یہ مثالیں لوگوں کے لئے بیان کرتے ہیں کہ وہ (اپنی حالت پر) غور کریں۔

هُوَ اللّٰهُ الَّذِیْ لَاۤ اِلٰهَ اِلَّا هُوَ١ۚ عٰلِمُ الْغَیْبِ وَ الشَّهَادَةِ١ۚ هُوَ الرَّحْمٰنُ الرَّحِیْمُ ﴿٢٢﴾Open ayah 59:22 in the Quran reader

وہ اللہ ہی ہے جس کے سوا کوئی معبود نہیں، غائب و حاضر (سب) کا جاننے والا، وہ بڑا مہربان (اور) ہمیشہ رحم کرنے والا ہے۔

هُوَ اللّٰهُ الَّذِیْ لَاۤ اِلٰهَ اِلَّا هُوَ١ۚ اَلْمَلِكُ الْقُدُّوْسُ السَّلٰمُ الْمُؤْمِنُ الْمُهَیْمِنُ الْعَزِیْزُ الْجَبَّارُ الْمُتَكَبِّرُ١ؕ سُبْحٰنَ اللّٰهِ عَمَّا یُشْرِكُوْنَ ﴿٢٣﴾Open ayah 59:23 in the Quran reader

وہ اللہ ہی ہے جس کے سوا کوئی معبود نہیں، (وہ) الملک القدوس (ہے) السلام، المومن (اور) المہیمن (ہے) ، العزیز، الجبار اور المتکبر (ہے) ۔ پاک ہے اللہ اس شرک سے جو یہ لوگ کر رہے ہیں۔

هُوَ اللّٰهُ الْخَالِقُ الْبَارِئُ الْمُصَوِّرُ لَهُ الْاَسْمَآءُ الْحُسْنٰى١ؕ یُسَبِّحُ لَهٗ مَا فِی السَّمٰوٰتِ وَ الْاَرْضِ١ۚ وَ هُوَ الْعَزِیْزُ الْحَكِیْمُ۠ ﴿٢٤﴾Open ayah 59:24 in the Quran reader

وہ اللہ ہی ہے خالق، باری (اور) مصور، اسی کے لئے ساری اچھی صفتیں ہیں۔ اسی کی تسبیح (وتقدیس) کرتی ہیں جو (چیزیں) آسمانوں اور زمین میں ہیں، اور وہی زبردست (اور) حکمت والا ہے۔