111. Surah Al-Masad

[1] ابو لہب جس کا اصل نام عبدالعزیٰ تھا رسول اکرم ﷺ کا حقیقی چچا تھا۔ سرخ رنگ کی وجہ سے اس کی کنیت ابو لہب مشہور تھی۔ قرآن نے اس کا اصل نام اس لئے نہیں لیا کہ وہ مشرکانہ تھا۔ علاوہ ازیں کنیت ابو لہب میں لہب جہنم سے ایک مناسبت بھی تھی۔ یہ شخص رسول اللہ ﷺ کا شدید دشمن اور اسلام کا نہایت سخت مخالف تھا۔ تبت یدآ ابی لہب وتب ایک پیشنگوئی ہے جس میں آئندہ پیش آنے والی بات کو ماضی کے صیغوں میں بیان کیا گیا ہے گویا اس کا ہونا ایسا یقینی ہے جیسے وہ ہوچکی ہو۔ اب فی الواقع وہی کچھ ہوا جو اس سورة میں چند سال پہلے بیان کیا جا چکا تھا۔ ہاتھ ٹوٹنے سے مراد جسمانی ہاتھ ٹوٹنا نہیں ہے بلکہ کسی شخص کا اپنے مقصد میں قطعی ناکام ہوجانا ہے جس کے لئے اس نے اپنا پورا زور لگا دیا ہو۔ جنگ بدر میں قریش کے اکثر و بیشتر وہ بڑے بڑے سردار مارے گئے تھے جو اسلام دشمنی میں ابو لہب کے ساتھی تھے۔ مکہ میں جب شکست کی خبر پہنچی تو اس کو اتنا رنج ہوا کہ وہ سات دن سے زیادہ زندہ نہ رہ سکا پھر اس کی موت بھی نہایت عبرتناک تھی۔ اسے شکم تحوکشہ (Malignant Pustule) عدسہ کی بیماری ہوگئی جس کی وجہ سے اس کے گھروالوں نے اسے چھوڑ دیا تھا کیونکہ انہیں چھوت لگنے کا ڈر تھا۔ مرنے کے بعد بھی تین روز تک کوئی اس کے پاس نہ آیا یہاں تک کہ اس کی لاش سڑ گئی اور بدبو پھیلنے لگی تو ایک روایت کے مطابق اس کے بیٹوں نے کچھ حبشیوں کو اجرت دے کر اس کی لاش اٹھوا دی اور انہی مزدوروں نے اس کو دفن کیا۔ دوسری روایت یہ ہے کہ اس کے بیٹوں نے ایک گڑھا کھدوایا اور لکڑیوں سے اس کی لاش کو دھکیل کر اس میں پھینکا اور اوپر سے مٹی ڈال کر اسے ڈھانک دیا۔

[2] اصل الفاظ ہیں حمالتہ الحطب جن کے لفظی معنی ہیں لکڑیاں ڈھونے والی۔ عرب کے محاورے میں چغل خوری کرنے والے کو حمالتہ الحطب کہا جاتا ہے۔ جیسے کوئی لکڑیاں جمع کر کے آگ لگانے کا سامان کرتا ہے، چغل خور کا عمل بھی ایسا ہی ہے کہ وہ اپنی چغل خوری کے ذریعے لوگوں کو بھڑکاتا ہے۔