1- اللہ کی خیر و برکت بہت زیادہ اور عظیم ہے جس اکیلے کے ہاتھ میں ساری بادشاہی ہے اور وہ ہر چیز پر پوری طرح قادر ہے، اسے کوئی چیز عاجز نہیں کر سکتی۔

2- وہ جس نے موت اور زندگی کو پیدا کیا تاکہ اے لوگو! وہ تمھیں آزمائے کہ تم میں سے کون زیادہ اچھے عمل والا ہے اور وہ سب پر ایسا غالب ہے کہ اس پر کوئی غالب نہیں آسکتا۔ وہ اپنے توبہ کرنے والے بندوں کے گناہ بے حد بخشنے والا ہے۔

3- وہ جس نے سات آسمان پیدا کیے۔ ہر آسمان دوسرے سے اوپر ہے، اس طرح کہ ایک آسمان دوسرے آسمان کے سہارے پر نہیں ہے۔ اے دیکھنے والے! تو اللہ تعالیٰ کی تخلیق میں کسی قسم کا فرق اور بگاڑ نہیں دیکھے گا۔ تو اپنی نگاہ کو بار بار اس کی طرف پھیر، کیا تجھے کوئی شگاف اور دراڑ نظر آتی ہے؟ تو ایسا ہرگز نہیں دیکھے گا۔ تجھے صرف ٹھوس اور مضبوط تخلیق ہی نظر آئے گی۔

4- پھر بار بار اپنی نظر دوڑا، تیری نظر تیری طرف تھک ہار کر ناکام لوٹ آئے گی مگر اسے آسمان کی تخلیق میں کوئی عیب اور نقص نظر نہیں آئے گا جبکہ وہ تھکی ماندی دیکھنے سے عاجز آجائے گی۔

5- یقیناً ہم نے زمین کے قریب والے آسمان کو روشن ستاروں کے ساتھ زینت بخشی اور ان ستاروں کو شہاب ثاقب بنایا جن کے ساتھ ان شیطانوں کو رجم کیا جاتا ہے جو چوری چھپے باتیں سننے کی کوشش کرتے ہیں، پھر وہ انھیں جلا کر راکھ کر دیتے ہیں۔ ہم نے ان کے لیے آخرت میں بھڑکتی ہوئی آگ تیار کر رکھی ہے۔

6- اپنے رب کے ساتھ کفر کرنے والوں کے لیے قیامت کے دن بھڑکتی ہوئی آگ کا عذاب ہے۔ نہایت بری ہے لوٹنے کی جگہ جس کی طرف وہ لوٹیں گے۔

9- کافر کہیں گے: کیوں نہیں، ہمارے پاس رسول آیا تھا جس نے ہمیں اللہ کے عذاب سے ڈرایا تھا مگر ہم نے اسے جھٹلا دیا اور اس سے کہا: اللہ تعالیٰ نے کوئی وحی نہیں اتاری۔ اے رسولو! تم حق سے بہت دور کی گمراہی میں پڑے ہو۔

10- کافر کہیں گے: اگر ہمارا سننا ایسا ہوتا جس سے فائدہ حاصل ہوتا یا ہم اس طرح سمجھتے جس سے حق و باطل میں تمیز ہوتی تو ہم دوزخیوں میں شامل نہ ہوتے بلکہ ہم رسولوں پر ایمان لاتے اور جووہ لائے اس کی تصدیق کرتے اور جنتیوں میں شامل ہو جاتے۔

11- چنانچہ وہ اپنے خلاف خود انکار کرنے اور جھٹلانے کا اعتراف کریں گے تو آگ کے حق دار ٹھہریں گے۔ سو دُوری ہے آگ والوں کے لیے۔

جب اللہ تعالیٰ نے کافروں کی صفات اور ان کی سزا کا ذکر فرمایا تو اس کے بعد ایمان والوں اور ان کی جزا کا بھی ذکر کیا، چنانچہ فرمایا:

12- بلاشبہ جو لوگ اپنی تنہائیوں میں اللہ تعالیٰ سے ڈرتے ہیں، ان کے لیے ان کے گناہوں کی معافی ہے اور ان کے لیے عظیم ثواب ہے اور وہ ہے جنت۔

13- اے لوگو! تم اپنی باتوں کو چھپاؤ یا علانیہ کرو، اللہ تعالیٰ انھیں جانتا ہے۔ بلاشبہ وہ پاک ذات اپنے بندوں کے دلوں کی باتیں بھی جانتی ہے، اس میں سے کوئی چیز اس سے پوشیدہ نہیں۔

14- کیا بھلا جس نے تمام مخلوقات کو پیدا کیا، وہ بھید کو بلکہ اس سے بھی زیادہ خفیہ اور پوشیدہ چیز کو نہیں جانتا؟ وہ تو اپنے بندوں کے بارے میں بڑا باریک بین اور ان کے معاملات سے پوری طرح باخبر ہے، ان کا کوئی عمل اس سے چھپا ہوا نہیں۔

15- وہی ہے جس نے تمھارے لیے زمین کو آسان اور نرم کر دیا ہے تاکہ تم اس پر رہائش اختیار کر سکو، لہٰذا تم اس کے اطراف و اکناف میں چلو پھرو اور اس کے اس رزق میں سے کھاؤ جو اس نے اس زمین میں تمھارے لیے تیار کیا اور صرف اسی کی طرف تمھیں حساب کتاب اور جزا و سزا کے لیے اٹھ کر جانا ہے۔

16- کیا تم اللہ سے بے خوف ہو گئے ہو جو آسمان میں ہے کہ وہ تمھارے نیچے سے زمین پھاڑ دے، جیسا کہ اس نے قارون کے نیچے سے اسے پھاڑا، حالانکہ وہ رہنے کے لیے نہایت موزوں اور نرم ہے، پھر وہ پُرسکون ہونے کے بعد اچانک تمھیں لے کر ہلنے لگے؟

17- یا تم آسمان والے اللہ سے بے خوف ہوگئے ہو کہ وہ آسمان سے تم پر اسی طرح پتھر برسائے جس طرح اس نے قومِ لوط پر برسائے تھے؟ عنقریب جب تم میری سزا دیکھو گے تو تمھیں پتا چل جائے گا کہ میرا ڈرانا کیسا تھا لیکن عذاب دیکھ لینے کے بعد تمھیں ڈرانے کا کوئی فائدہ نہ ہوگا۔

18- یقیناً ان امتوں نے بھی جھٹلایا جو ان مشرکوں سے پہلے تھیں اور جب وہ اپنے کفر اور جھٹلانے پر اڑے رہے تو ان پر اللہ کا عذاب آگیا۔ پھر کیسا تھا میرا انھیں سزا دینا؟ یقیناً میرا انھیں سزا دینا نہایت سخت تھا۔

19- کیا ان جھٹلانے والوں نے اپنے اوپر اڑتے پرندے نہیں دیکھے جو دورانِ پرواز فضا میں کبھی اپنے پَر کھول لیتے ہیں اور کبھی بند کر لیتے ہیں۔ انھیں زمین پر گرنے سے صرف اللہ تعالیٰ ہی تھامے ہوئے ہے۔ بلاشبہ وہ ہر چیز کو خوب دیکھنے والا ہے، کوئی چیز اس سے چھپی نہیں۔

20- اے کافرو! اگر اللہ تعالیٰ تمھیں عذاب دینا چاہے تو تمھارا کوئی لشکر تمھیں اس سے نہیں بچا سکتا۔ اصل بات یہ ہے کہ کافر سراسر دھوکے میں گرفتار ہیں۔ شیطان نے انھیں دھوکا دیا تو وہ اس کے دھوکے کا شکار ہوگئے۔

21- اگر اللہ تعالیٰ اپنا رزق بند کر دے اور تم سے روک لے تو کوئی تمھیں رزق نہیں دے سکتا۔ بات بس اتنی ہے کہ کافر دشمنی، تکبر اور حق سے رکے رہنے میں حد سے بڑھے ہوئے ہیں۔

22- کیا بھلا جو شخص اپنے منہ کے بل اوندھا ہو کر چلے، اور اس سے مراد مشرک ہے، وہ زیادہ ہدایت یافتہ ہے یا وہ مومن جو صراط مستقیم پر سیدھا چل رہا ہو؟

23- اے رسول( صلى اللہ عليہ وسلم )! ان جھٹلانے والے مشرکوں سے کہہ دیں: اللہ ہی ہے جس نے تمھیں پیدا کیا، تمھارے کان بنائے جن سے تم سنتے ہو، آنکھیں بنائیں جن سے تم دیکھتے ہو اور دل بنائے جن سے تم سوچ بچار کرتے ہو۔ تم پر اس نے جو انعام کیے ہیں، تم ان نعمتوں پر اس کی کم ہی شکر گزاری کرتے ہو۔

24- اے رسول( صلى اللہ عليہ وسلم )! ان مشرکوں سے کہہ دیں جو جھٹلانے والے ہیں: اللہ تعالیٰ ہی ہے جس نے تمھیں زمین میں پھیلایا ہے نہ کہ تمھارے ان بتوں نے جنھوں نے کچھ پیدا نہیں کیا اور قیامت کے دن حساب کتاب اور جزا و سزا کے لیے تم اسی اکیلے کے حضور اکٹھے کیے جاؤ گے، اپنے بتوں کی طرف نہیں، لہٰذا اسی سے ڈرو اور اس اکیلے ہی کی عبادت کرو۔

25- قبروں سے دوبارہ اٹھائے جانے کے منکر اس اٹھائے جانے کو محال سمجھتے ہوئے کہتے ہیں: اے رسول( صلى اللہ عليہ وسلم )! آپ اور آپ کے ساتھی ہمیں جس وعدے (قیامت کے دن) کی دھمکی دیتے ہیں، وہ کب آئے گا اگر تم اپنے دعوے میں سچے ہو کہ وہ ضرور آئے گا؟

26- اے رسول( صلى اللہ عليہ وسلم )! کہہ دیں: قیامت کا علم صرف اللہ تعالیٰ کے پاس ہے۔ صرف وہی جانتا ہے کہ وہ دن کب آئے گا اور میں تو صرف تمھیں کھلم کھلا ڈرانے والا ہوں۔

27- پھر جس دن وہ وعدہ ان کے پاس آگیا اور وہ عذاب اپنے قریب دیکھیں گے، اور یہ قیامت کے دن ہوگا، تو اللہ کے ساتھ کفرکرنے والوں کے چہرے بدل کر سیاہ ہو جائیں گے اور ان سے کہا جائے گا: یہ ہے وہ (عذاب) جو تم دنیا میں طلب کیا کرتے تھے اور تم نے اس کی جلدی مچا رکھی تھی۔

28- اے رسول( صلى اللہ عليہ وسلم )! ان جھٹلانے والے مشرکوں کی بات رد کرتے ہوئے ان سے کہہ دیں: مجھے بتاؤ اگر اللہ تعالیٰ نے مجھے اور میرے ایمان دار ساتھیوں کو فوت کر دیا یا ہماری موت کو مؤخر کر کے ہم پر رحم کیا، تو کافروں کو دردناک عذاب سے کون بچائے گا؟ انھیں اس سے ہرگز کوئی نہ بچا سکے گا۔

29-اے رسول( صلى اللہ عليہ وسلم )! ان مشرکوں سے کہہ دیں: وہی رحمٰن ہے جو تمھیں صرف اپنی عبادت کی طرف بلاتا ہے، ہم اس پر ایمان لائے اور اپنے تمام معاملات میں ہم نے اسی پر بھروسا کیا، تمھیں بھی عنقریب ہر صورت میں معلوم ہو جائے گا کہ واضح گمراہی میں کون تھا اور سیدھی راہ پرکون تھا۔

30- اے رسول( صلى اللہ عليہ وسلم )! ان مشرکوں سے کہیں: مجھے بتاؤ کہ جو پانی تم پیتے ہو اگر یہ زمین کی گہرائی میں چلا جائے جس تک پہنچنے کی تم طاقت نہ رکھو تو کون ہے جو تمھارے پاس بکثرت جاری پانی لے آئے؟ اللہ تعالیٰ کے سوا کوئی ایسا نہیں۔